E upootia anei te maitai i nia i te ino?

TAU piti tausani matahiti i teie nei, ua haavahia te hoê taata hapa ore, o Iesu Mesia, ma te haamǎtaˈuhia i te pohe. Ua opua te tahi mau taata iino e haapohe ia ˈna no te mea ua faaite oia i te parau mau. Ua pari-haavare-hia oia i te orureraa hau, e ua tuô te tiaa taata e ia haapohehia oia. Ua faautua ihora te hoê tavana roma, o tei haafaufaa aˈe i to ˈna roo politita hau atu i te ora o te hoê tamuta haehaa, ia Iesu i te pohe mauiui mau. Ia hiˈohia te huru tupuraa, e au ra e na te ino i upootia.

Teie râ, te po na mua ˈˈe i to ˈna haapoheraahia, ua parau atu o Iesu i ta ˈna mau pǐpǐ e: “Ua riro te re o teie nei ao ia ˈu.” (Ioane 16:33) Eaha te auraa o ta ˈna parau? A tahi, aita te ino o te ao nei i haaparuparu ia ˈna aore ra i turai ia ˈna ia tahoo atu. Aita oia i hema i te ao nei. (Faaau e te Roma 12:2.) A pohe ai oia, ua pure oia no te feia i taparahi ia ˈna: “E tau Metua, e faaore mai i ta ratou hara, aore hoi ratou i ite i ta ratou e rave nei.”—Luka 23:34.

Ua faaite o Iesu—e tae roa ˈtu i to ˈna poheraa—e e nehenehe e upootia i nia i te ino. Ua faaitoito oia i ta ˈna mau pǐpǐ ia aro atoa ratou i te ino. Nafea ïa ratou e na reira ˈi? Na roto i te peeraa i te aˈoraa a te mau Papai e “eiaha roa te ino e tahoohia i te ino i te taata atoa nei” e ‘ia tamau noa i te aro i te ino i te maitai,’ mai ta Iesu i rave. (Roma 12:17, 21) Teie râ, e manuïa mau anei teie haerea?

Te aroraa i te ino i Dachau

E vahine Helemani o Else o tei tapeahia i Dachau e ua horoa ˈtu oia i te hoê ô faufaa roa na te hoê tamahine Rusia e 14 matahiti, oia hoi te ô o te faaroo e te tiaturiraa.

E aua tapearaa tuiroo o Dachau i reira e mau tausani taata o tei haapohehia i te mǎhu taero e e mau hanere taata, e tae noa ˈtu teie tamahine Rusia, tei ravehia i nia ia ratou te mau tamataraa hairiiri i te pae rapaauraa. E au ra e o Dachau te faito teitei roa ˈˈe o te ino. Noa ˈtu râ, i roto i teie vahi etaeta ra, ua tupu mai te tahi mau ohi maitai e ua rahi roa.

Ua peapea roa o Else no teie tamahine apî o tei titau-atoa-hia ia mataitai i te mau tiai SS ia haru i to ˈna metua vahine. Ua imi o Else, noa ˈtu e e nehenehe oia e pohe ia roaahia oia, i te mau ravea no te paraparau e teie tamahine no nia i te maitai e te ino e no nia i te tiaturiraa o te tia-faahou-raa a te mau Papai. Ua haapii oia i to ˈna hoa apî ia here maoti i te riri atu. E ua ora mai te tamahine Rusia i te hairiiri o Dachau, auaa o Else.

Ua na reira o Else no te mea ua hinaaro oia e pee i te hiˈoraa aroha o te Mesia. Ei Ite no Iehova, ua haapii oia ia ore e tahoo i te ino na roto i te ino, e ua turai to ˈna faaroo ia ˈna ia tauturu ia vetahi ê ia na reira atoa. Noa ˈtu e ua mauiui oia i Dachau, ua noaa ia ˈna te re i te pae morare i nia i te hoê faatereraa ino. E ere o o ˈna anaˈe.

Ua papai o Paul Johnson, i roto i ta ˈna buka Aamu o te kerisetianoraa (beretane), e “aita te mau [Ite no Iehova] i farii i te turu atu i te hau Nazi o ta ratou i faahapa ei faatereraa ino. . . . E iva ahuru ma hitu i nia i te hanere o tei faaoromai i te hamani-ino-raa noa ˈtu eaha te huru.” E aroraa faufaa ore anei teie? I roto i te buka Mau faufaa e haavîraa uˈana i Auschwitz (beretane), ua parau te vahine Polonia tuatapapa i te totaiete taata ra o Anna Pawelczynska no nia i te mau Ite no Iehova e: “Ua riro teie pǔpǔ iti feia tapeahia ei puai tiaturiraa papu e ua upootia ratou i nia i te faatereraa Nazi.”

No te rahiraa o tatou nei, te aro nei tatou i te ino i roto ia tatou iho maoti hoi i te ino no rapaeau. E aroraa teie i roto ia tatou iho.

Te upootiaraa i nia i te ino i roto ia tatou nei

Ua faataa te aposetolo Paulo i teie aroraa na roto i teie mau parau: “E ere te maitai o ta ˈu e hinaaro ra e rave o ta ˈu e rave mau nei; o te ino râ o ta ˈu e ore e hinaaro ra e rave o ta ˈu e rave noa nei.” (Roma 7:19, Te faufaa apî [beretane], a William Barclay) Mai ta Paulo i ite, eita tatou e rave ohie noa i te maitai.

E taurearea Paniora o Eugenioa o tei aro, e piti matahiti te maoro, i to ˈna mau hiaairaa iino. “E tia ia ˈu ia haavî ia ˈu iho,” o ta ˈna ïa e faataa ra. “Mai to ˈu apîraa mai â, te vai ra teie hinaaro faufau. Ei taurearea, ua apiti atu vau na nia i to ˈu iho hinaaro i roto i te mau taiataraa mǎhu, e ma te ore e huna i ta ˈu parau, mea au roa na ˈu teie huru oraraa.” Na te aha ˈtura i turai ia ˈna ia hinaaro e taui?

“Ua hinaaro vau e faaoaoa i te Atua, e ua haapii au i roto i te Bibilia e aita o ˈna e farii ra i to ˈu huru oraraa,” o ta Eugenio ïa i parau. “No reira, ua faaoti atura vau e riro mai ei taata apî, e auraro i te mau aratairaa a te Atua. I te mau mahana atoa, e tia ia ˈu ia aro i te mau manaˈo tano ore e te faufau o te puta tamau noa nei â i roto i to ˈu feruriraa. Ua hinaaro papu râ vau e upootia i teie aroraa, e ua pure au ma te tuutuu ore e ia tauturu mai te Atua. E piti matahiti i muri aˈe, ua hemo te vahi fifi roa ˈˈe, noa ˈtu e te haavî noa nei â vau ia ˈu iho. Teie râ, mea hoona teie aroraa. I teie nei, te fanaˈo nei au i te faatura ia ˈu iho, te hoê faaipoiporaa oaoa, e hau atu â, te mau taairaa maitatai e te Atua. Ua ite au na roto i te ohipa o ta ˈu i ora e e nehenehe e haapae i te mau manaˈo iino hou e faatupu ai i te ino—mai te peu e e tutava mau â oe.”

E upootia te maitai i nia i te ino i te mau taime atoa te hoê manaˈo ino e patoihia ˈi, i te mau taime atoa e patoi ai tatou i te faahoˈi i te ino. Teie râ, eita teie mau upootiaraa, noa ˈtu e mea faufaa roa, e faaore i na tumu matamua e piti o te ino. Noa ˈtu te puairaa o ta tatou tutavaraa, eita tatou e nehenehe e tumâ roa i to tatou mau paruparu, e te tamau noa nei o Satani i te faaohipa i to ˈna mana ino i nia i te taata. No reira, e taui anei teie huru tupuraa i te hoê mahana?

Te haamouraa i te Diabolo

Ua riro te taiva-ore-raa o Iesu e tae roa ˈtu i te pohe, ei pau rahi no Satani. Aita roa te Diabolo i manuïa i te ofati i te taiva ore o Iesu, e ua tapao teie manuïa-ore-raa i te omuaraa o te hopea o Satani. Mai ta te Bibilia e faataa ra, ua tamata Iesu i te pohe e ‘na roto i to ˈna pohe e haamou oia i te Diabolo.’ (Hebera 2:14) I muri aˈe i to ˈna tia-faahou-raa, ua parau atura o Iesu i ta ˈna mau pǐpǐ e: “O te mana atoa i te raˈi e te ao atoa nei ua pûpûhia mai tei ia ˈu anaˈe.” (Mataio 28:18) E e faaohipahia teie mana no te faaore i te mau ohipa a Satani.

Te faataa ra te buka Apokalupo i te mahana i reira o Iesu e tiavaru ai ia Satani i rapae i te raˈi. E tiahihia teie varua ino na te hiti o te fenua nei. Ei faahopearaa, te faaara ra te Bibilia e e rahi te ino: “E ati râ hoi to te fenua e to te tai, tei raro atu na hoi te diabolo ia outou na; e riri rahi hoi to ˈna, no te mea ua ite oia e maa taime poto to ˈna e toe nei.”—Apokalupo 12:7-9, 12.

Te faaite ra te parau tohu bibilia e ua tupu ê na teie ohipa—i te area o te tau o te Tamaˈi Rahi Matamua.b Te faataa ra te reira i te maraaraa rahi o te ino o ta tatou i ite i to tatou nei tau. Teie râ, fatata roa o Satani i te tapea-roa-hia e eita ïa oia e nehenehe faahou e faahema i te taata.—Hiˈo Apokalupo 20:1-3.

Eaha ïa te auraa no te huitaata nei?

“E ore ratou e rave i te ino”

Ei Arii no te Basileia o te Atua, fatata roa o Iesu i te faaohipa i to ˈna ‘mana i nia i te fenua’ no te faanaho i te hoê porotarama haapiiraa pae varua. “Te haapii nei to te ao nei i te parau-tia i reira.” (Isaia 26:9) E itehia te mau haamaitairaa no te mau taata atoa. Te haapapu maira te Bibilia e: “E ore ratou e hauti [“e ore ratou e rave i te ino,” ia au i te tatararaa a Green Interlinear Hebrew/Greek English Bible] e ore e rave ino . . . e î hoi te fenua i te ite ia Iehova, mai te vairaa miti e î i te miti ra.”—Isaia 11:9.

I teie nei atoa, e rave rahi mau hinaaro iino to tatou o te nehenehe e araihia. Ia ore anaˈe te mana o te mau demoni, mea ohie roa ˈtu ïa ‘ia haapae i te ino e ia rave i te maitai.’—Petero 1, 3:11.

E tumu papu to tatou no te tiaturi e e upootia te maitai i nia i te ino no te mea e mea maitai te Atua, e maoti ta ˈna tauturu e nehenehe te feia e hinaaro ra e rave i te maitai e upootia i nia i te ino, mai ta Iesu i faaite na roto i to ˈna iho hiˈoraa. (Salamo 119:68) Te feia e hinaaro ra i teie nei e aro i te ino, e nehenehe ratou e tiaturi e ora i nia i te hoê fenua tamâhia e tei faaterehia mai e te Basileia o te Atua, te hoê faatereraa o te haamou i te ino e a muri noa ˈtu. Te faataa ra te papai salamo i te faahopearaa: “O te aroha e te parau mau ua farerei ïa raua; o te parau-tia e te hau ua hohôˈi raua. E tupu mai te parau mau no roto i te fenua, e hiˈo mai hoi te parau-tia mai te raˈi mai.”—Salamo 85:10, 11.

[Nota i raro i te api]