No te aha vetahi e fanau-faahou-hia ˈi?

“IA ORE te taata ia fanau faahou ra, e ore oia e ite i te basileia o te Atua ra.” (Ioane 3:3) Ua haaputapû e ua haafeaa atoa teie mau parau i te mau taata e rave rahi mai te tau mai â a faahiti ai Iesu i te reira hau atu i te 1 900 matahiti i teie nei.

Ia taa maitai ia tatou i te mau parau a Iesu no nia i te fanau-faahou-raa, e tia na mua ia tatou ia pahono i teie mau uiraa: Eaha te opuaraa a te Atua no te huitaata nei? Eaha te roohia i te nephe i te pohe? Eaha te opuaraa ta te Basileia o te Atua e faatupu?

Te opuaraa a te Atua no te huitaata nei

Ua poietehia te taata matamua, o Adamu, ei tamaiti taata tia roa a te Atua. (Luka 3:38) Aita te Atua ra o Iehova i hinaaro e ia pohe o Adamu. Te vai ra ia Adamu e ta ˈna ra vahine o Eva, i te tiaturiraa e fanau i te hoê fetii taata hara ore o te ora e a muri noa ˈtu e o te faaî i te paradaiso i nia i te fenua. (Genese 1:28) Aita ta te pohe e tuhaa i roto i te opuaraa matamua a te Atua no te tane e te vahine. Ua ô mai oia i roto i te oraraa o te taata na roto i te orureraa i te ture a te Atua.—Genese 2:15-17; 3:17-19.

Ua faatupu teie orureraa hau i te mau uiraa morare rahi, mai te tia-mau-raa o te mana arii o te Atua e te neheneheraa te taata e tapea i to ratou haapao maitai i ta ˈna mau ture. E titauhia te taime no te faatitiaifaro i teie mau uiraa. Aita râ te opuaraa a te Atua ra o Iehova no te huitaata nei i taui, e e manuïa iho â te mea o ta ˈna i opua e rave. Ua opua papu oia e faaî i te fenua e te hoê fetii taata tia roa o te fanaˈo i te ora mure ore i roto i te Paradaiso. (Salamo 37:29; 104:5; Isaia 45:18; Luka 23:43) E tia ia tatou ia haamanaˈo i teie parau mau faufaa roa ia tuatapapa tatou i te mau parau a Iesu no nia i te fanau-faahou-raa.

Eaha te roohia i te nephe i te poheraa?

Ma te taa ore i ta te varua moˈa o te Atua i hohora ˈtu i te feia papai bibilia, ua tutava noa na te mau philosopho heleni i te ite i te auraa o te oraraa. Eita ta ratou e nehenehe e tiaturi e e ora te taata tau matahiti anaˈe, mea pinepine i te hoê oraraa peapea, a pohe atu ai. Ua tano ratou i nia i teie parau. Teie râ, ua hape ta ratou mau tatararaa no nia i te ohipa e roohia i te taata i muri aˈe i te pohe. Ua faaoti hoi ratou e e tamau noa te taata i te ora i roto i te hoê huru ê atu i muri aˈe i te poheraa, e i roto i te mau taata atoa, te vai ra te hoê nephe pohe ore.

Ua hema te mau ati Iuda e te feia e parau na e e kerisetiano ratou i teie mau huru hiˈoraa. Te na ô ra te buka Te raˈi—E aamu (beretane) e: “Ia farerei anaˈe te mau ati Iuda tei atea ê i to ratou fenua i te feia ite teitei Heleni, e fa mai na te manaˈo no te hoê nephe pohe ore.” Te na ô faahou ra teie buka e: “Ua faatupu te mau haapiiraa heleni no nia i te nephe i te hoê tapao maoro i nia i te mau tiaturiraa ati Iuda e i muri iho i nia i to te mau kerisetiano. . . . Na roto i te faatupuraa i te hoê anoiraa otahi o te haapiiraa philosopho a Platon e te tutuu a te Bibilia, ua iriti o Philo [philosopho ati Iuda no Alexandria o te senekele matamua] i te eˈa no te feia feruri kerisetiano i muri iho mai.”

Eaha ta Philo e tiaturi na? Te na ô faahou ra teie buka e: “No ˈna, e faahoˈi te pohe i te nephe i nia i to ˈna huru matamua, hou te fanauraa. I te mea e no ǒ mai te nephe i te ao varua ra, e riro noa ïa te ora i roto i te tino ei area taime poto, e mea pinepine, ei mea peapea.” Teie râ, te huru o Adamu ‘hou to ˈna fanauraa,’ o te vai-ore-raa ïa. Ia au i te faatiaraa a te Bibilia, aita te Atua i opua i te haere-taue-raa ˈtu i te tahi ao varua i te poheraa, mai te mea ra e ua riro te fenua ei vahi tapaearaa hou e tapae ai i te hoê oraraa teitei aˈe aore ra haehaa aˈe.

Aita te tiaturiraa e e nephe pohe ore to te taata e haapiihia ra i roto i te Parau faauruahia e te varua o te Atua, oia hoi te Bibilia. Aita oia e faaohipa ra i te hoê noa ˈˈe taime i te parau ra “nephe pohe ore.” Te na ô ra oia e, i to ˈna poieteraahia, e nephe o Adamu, aita râ i horoahia ˈtu te hoê nephe. Te na ô ra te Genese 2:7 e: “A hamani ai te Atua ra o Iehova i te taata i te repo fenua nei, ua haapuai ihora oia i te aho ora i roto i tana apoo ihu ra, riro aˈera te taata ei taata [nephe] ora.” Aita te huitaata nei i tuuhia i mua i te tiaturiraa o te ora mure ore i nia i te raˈi aore ra te haamauiuiraa mure ore i roto i te poauahi. Te faaite ra te Bibilia e e aramoina te nephe, aore ra taata, ia pohe oia. (Salamo 146:3, 4; Koheleta 9:5, 10; Ezekiela 18:4) No reira, ua turu te mau philosopho i te mau hiˈoraa tuea ore i te mau Papai no nia i te nephe. E tia ia tatou ia ara i te mau manaˈo hape o te haapoiri i to tatou taaraa i te mau parau a Iesu no nia i te fanau-faahou-raa.

Fanau-faahou-hia no te faatere ei arii

Ua parau atu o Iesu ia Nikodemo e te feia ‘e fanau-faahou-hia . . . e ô atu ïa i te basileia o te Atua.’ (Ioane 3:3-5) Eaha taua Basileia nei? Na roto i te parau taipe, i te omuaraa o te aamu taata nei, ua faahiti te Atua ra o Iehova i te tahi tuhaa o ta ˈna opuaraa e faaohipa i te hoê “huaai” taa ê—no te taahi i te afii o te Ophi tahito ra, te Diabolo ra o Satani. (Genese 3:15; Apokalupo 12:9) Mai tei faaite-mǎrû-hia i roto i te mau Papai, ua itehia e o Iesu Mesia teie “huaai,” e e faatere oia e te mau arii apiti i roto i te ravea otahi o te mana arii o te Atua, te Basileia Mesia. (Salamo 2:8, 9; Isaia 9:6, 7; Daniela 2:44; 7:13, 14) Te reira te Basileia o te raˈi, te hoê faatereraa i nia i te raˈi o te faatiamâ i te mana arii o Iehova e o te faaora i te huitaata nei i te faatîtîraa o te hara e te pohe.—Mataio 6:9, 10.

I pihai iho ia Iesu ei mau arii apiti, te vai ra e 144 000 feia o te hoohia mai i rotopu i te huitaata nei. (Apokalupo 5:9, 10; 14:1-4) Ua maiti te Atua vetahi i rotopu i te fetii taata tia ore o Adamu ia riro mai ei “feia moˈa o Tei Teitei,” e e faatere ratou e te Mesia i roto i te Basileia Mesia. (Daniela 7:27; Korinetia 1, 6:2; Apokalupo 3:21; 20:6) Ua tuu teie mau tane e teie mau vahine i te faaroo i roto ia Iesu Mesia, o tei parau e e ‘fanau-faahou-hia’ ratou. (Ioane 3:5-7) Mea nafea e no te aha teie fanauraa e tupu ai?

Ua bapetizohia teie mau taata i roto i te pape ei mau pǐpǐ na te Mesia. Ua faaore te Atua i ta ratou mau hara i nia i te niu o te tusia o te hoo a Iesu, ua faariro oia ia ratou ei feia parau-tia, e ua faatavai oia ia ratou ei mau tamarii varua no ˈna. (Roma 3:23-26; 5:12-21; Kolosa 1:13, 14) Ua parau atu te aposetolo Paulo i teie mau taata e: “O te [v]arua faatamarii râ tei noaa ia outou, i parau ai hoi tatou, E Aba, e tau Metua. O te [v]arua iho hoi, e to tatou atoa nei [feruriraa], o tei faaite ïa e, e tamarii tatou na te Atua. E tamarii ra, e feia tufaa ïa; e feia tufaa i te Atua ra, e feia tufaa tatou e te Mesia; te pohe apipiti nei hoi tatou e oia atoa, ia haamaitai-apipiti-hia tatou e oia atoa hoi.”—Roma 8:15-17.

Ei mau pǐpǐ na te Mesia, ua fanaˈo ratou i te hoê fanauraa apî, aore ra te hoê haamataraa apî, i roto i te oraraa. Ua faatupu te reira i te hoê tiaturiraa e e tufaa atoa ta ratou i roto i te tufaa aiˈa a Iesu i nia i te raˈi. (Luka 12:32; 22:28-30; Petero 1, 1:23) Ua faataa te aposetolo Petero i te fanau-faahou-raa i te na ôraa e: “O [te Atua] tei faafanau faahou ia tatou no te rahi o to ˈna ra aroha, ia noaa te manaˈo ora i te tia-faahou-raa o Iesu Mesia mai te pohe maira, ia noaa te tufaa ino ore ra, e te viivii ore, e te maheahea ore, o tei vaiihohia i nia i te raˈi no outou.” (Petero 1, 1:3, 4) E nehenehe teie oraraa apî i nia i te raˈi e fanaˈohia e teie mau taata no te mea e faatia mai te Atua ia ratou mai ta ˈna i faatia mai ia Iesu.—Korinetia 1, 15:42-49.

Eaha ïa no te fenua nei?

E ere ïa te auraa e e fanau-faahou-hia te taatoaraa o te huitaata faaroo no te haere atu mai te fenua nei i nia i te raˈi. Ua tu noa teie manaˈo hape e tei vauvauhia e te mau philosopho mai ia Philo, o tei manaˈo e “e riro noa ïa te ora i roto i te tino ei area taime poto, e mea pinepine, ei mea peapea.” Teie râ, aita hoê aˈe mea hape e te poieteraa matamua a te Atua ra o Iehova i nia i te fenua.—Genese 1:31; Deuteronomi 32:4.

Aita i opuahia e ia riro te oraraa o te taata ei mea poto e te mauiui. E faaore o Iesu Mesia e te feia tei fanau-faahou-hia no te tavini ei mau arii e ei mau tahuˈa e o ˈna i nia i te raˈi i te mau faahopearaa iino atoa o te orureraa hau a Satani. (Ephesia 1:8-10) Na roto i to ratou arai ei ‘huaai a Aberahama’ i tǎpǔhia mai, “e maitai te mau fenua atoa o te ao nei.” (Galatia 3:29; Genese 22:18) E fanaˈo ïa te huitaata faaroo i te ora i roto i te paradaiso i nia i te fenua nei, taa ê roa ïa i te oraraa poto e te mauiui rahi o teie mahana.—Salamo 37:11, 29; Apokalupo 21:1-4.

O vai te fanaˈo i te reira?

I rotopu i te feia o te fanaˈo i te ravea a te Atua no te haamaitai i te huitaata nei, te vai ra te feia pohe tei faatiahia mai o te faatupu i te faaroo i roto i te tusia o te hoo a Iesu. (Ioane 5:28, 29; Ohipa 24:15) Aita te rahiraa o ratou i haapii noa ˈˈe i te parau no nia i te Atua e te Mesia e no reira, aita ïa ratou i faatupu i te faaroo i roto ia Iesu. I roto i te feia e faatiahia mai, te vai atoa ra te feia haapao maitai mai ia Ioane Bapetizo, o tei pohe na mua ˈˈe i te poheraa o Iesu e iriti atu ai i te eˈa no te oraraa i nia i te raˈi. (Mataio 11:11) Taa ê atu ia ratou, ‘ua horoi te feia rahi roa no te mau nunaa atoa i to ratou ahu e ia teatea i roto i te toto o te Arenio ra,’ o Iesu Mesia. Ua farii papu ratou i te pororaa no te Basileia e arataihia nei e te mau “taeae” fanau-faahou-hia o Iesu e e ora ˈtu ratou i te tamaˈi a te Atua i Aramagedo no te faaea i nia i te hoê fenua tamâhia. (Apokalupo 7:9-14; 16:14-16; Mataio 24:14; 25:31-46) I roto i te faanahoraa a te Atua, e faaorahia te mau mirioni taata, noa ˈtu e aita ratou i fanau-faahou-hia no te faatere e te Mesia i nia i te raˈi.—Ioane 1, 2:1, 2.

E taio-atoa-hia anei outou i rotopu i te feia o te fanaˈo i te ora i roto i te paradaiso i nia i te fenua? E nehenehe mai te peu e e faatupu outou i te faaroo i roto i te tusia a Iesu Mesia e e apiti mai outou ma te itoito i roto i te amuiraa kerisetiano mau. Aita oia i haaviiviihia e te mau tatararaa philosopho, tera râ, ua riro noâ oia ei “pou e te tumu o te parau mau ra.” (Timoteo 1, 3:15; a faaau e te Ioane 4:24; 8:31, 32.) E nehenehe ïa outou e tiaturi i te hoê oraraa faahiahia no a muri aˈe ia faatere anaˈe te mau tamaiti fanau-faahou-hia a te Atua i nia i te raˈi e ia faahoˈihia te mau tamarii atoa a te Atua i nia te fenua, i nia i te tiaraa tia roa i roto i te hoê fenua unauna tei riro ei paradaiso. No reira, a haru i teie ravea ia noaa mai te ora i roto i teie ao apî o te mau haamaitairaa mure ore.—Roma 8:19-21; Petero 2, 3:13.

[Hohoˈa i te api 6]

Aita i horoahia na Adamu te maitiraa i rotopu i te oraraa i nia te raˈi aore ra te haamauiuiraa mure ore i roto i te poauahi