Te tiaturi ra anei te mau Ite no Iehova ia Iesu?

MEA FAUFAA ROA IA TIATURI IA IESU

Anthony: Iaorana Tim, te oaoa nei au i te farerei faahou ia oe.

Tim: Te oaoa atoa nei au i te farerei ia oe.

Anthony: Ua afai mai au i Te Pare Tiairaa e A ara mai na! apî na oe. I to ˈu manaˈo, e au roa oe i te mau tumu parau i roto i teie na vea.

Tim: Mauruuru. Te oaoa nei au i to oe tere i teie mahana, e uiraa pai ta ˈu.

Anthony: A ui mai na.

Tim: I te tahi mahana, ua paraparau vau i te hoê hoa ohipa e ua faaite atu vau e mea au roa na ˈu e taio i ta outou mau papai. Ua na ô mai oia e eiaha e taio i te reira no te mea aita te mau Ite no Iehova e tiaturi ra ia Iesu. Tera iho â? Ua pahono vau ia ˈna e e ani vau ia hoˈi faahou mai oe e farerei ia ˈu.

Anthony: Mauruuru no ta oe uiraa. Mea au pai e ua ani iho â oe i te hoê Ite no Iehova, eiaha râ i te tahi atu. Ia hinaaro oe e ite i te tiaturiraa a te tahi taata, te ravea maitai aˈe, e ui ïa oe ia ˈna, e ere anei?

Tim: Tera atoa to ˈu manaˈo.

Anthony: Teie te parau mau. O te mau Ite no Iehova te feia e tiaturi roa ia Iesu. No matou, e mea faufaa roa ia faatupu i te faaroo ia Iesu no te ora.

Tim: Ua papu iho â ia ˈu. Tera râ i to ˈna parauraa mai e aita outou e tiaturi ra ia Iesu, feruri aˈera vau, aita tâua i tauaparau no tera tumu parau na mua ˈˈe.

Anthony: E hinaaro paha oe ia faaite atu vau te tahi mau irava Bibilia e haapapu ra i te faufaaraa ia faatupu i te faaroo ia Iesu? Teie te tahi mau irava ta te mau Ite no Iehova e faaohipa pinepine no te poro i te taata.

Tim: Na reira ïa.

Anthony: Na mua roa, e hiˈo anaˈe i ta Iesu iho i parau i roto i te Ioane 14:6. Te tauaparau ra Iesu e te tahi o ta ˈna aposetolo. Ua papaihia: “Ua parau atura Iesu ia ˈna, O vau te eˈa, e te parau mau, e te ora, aore roa e taata e tae i te Metua ra, maori râ ei ia ˈu.” Ia au i teie irava, maoti o vai e nehenehe ai te taata e haafatata ˈtu i te Metua?

Tim: Maoti Iesu.

Anthony: Tera e te tiaturi papu nei te mau Ite no Iehova e o ˈna anaˈe te ravea. I to oe manaˈo, ia au i ta oe i ite no nia i te mau titauraa a te Atua, e mea tia ia pure na roto ia vai?

Tim: Na roto i te iˈoa o Iesu.

Anthony: No reira ïa i roto i ta ˈu mau pure atoa, e pûpû vau i te reira i te Atua na roto ia Iesu. E mai tera te mau pure a te mau Ite no Iehova atoa.

Tim: Mea au roa ia ite i te reira.

Anthony: E hiˈopoa anaˈe atoa i te Ioane 3:16. Mea faufaa roa tera irava. Ahiri e nehenehe ta oe e haapoto i tei papaihia no nia i te oraraa o Iesu i te fenua nei e ta ˈna taviniraa, teie te irava e tano maitai. E hinaaro anei oe e taio?

Tim: E, te na ô ra: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.”

Anthony: Mauruuru, ua ite aˈenei oe i teie irava?

Tim: E, mea pinepine au i te faaroo i te reira i ta matou fare pure.

Anthony: Mea matau roa te taata i teie irava. Ia hiˈo maitai tâua, ua parau Iesu e no to te Atua here e nehenehe ai te taata e fanaˈo i te ora mure ore. Eaha râ te tia ia rave?

Tim: Ia faatupu i te faaroo.

Anthony: Tera. Ia faatupu iho â râ i te faaroo i ta ˈna Tamaiti fanau tahi o Iesu Mesia. Te matara maitai ra tera manaˈo i te api 2 o te vea ta ˈu i horoa ˈtu. I roto i Te Pare Tiairaa, te parauhia ra no tera vea “te faaitoito atoa ra ia faatupu i te faaroo ia Iesu Mesia, o tei pohe ia nehenehe tatou e fanaˈo i te ora mure ore e o te faatere nei ei Arii o te Basileia o te Atua.”

Tim: Ua haapapu-roa-hia ïa i roto i ta outou mau vea e te tiaturi ra te mau Ite no Iehova ia Iesu.

Anthony: E.

Tim: No te aha ïa te taata e parau e e aita outou e tiaturi ia Iesu?

Anthony: E rave rau tumu. I te tahi taime, ua faaroo noa ratou i ta vera ma e parau ra aore ra i ta to ratou mau tia haapaoraa i haapii atu.

Tim: Ia feruri au, peneiaˈe e na reira vetahi no te mea e te parau ra outou e e Ite outou no Iehova eiaha râ no Iesu.

Anthony: Peneiaˈe, tera te tahi tumu.

Tim: No te aha outou e paraparau noa ˈi no Iehova?

‘UA FAAITE AU I TO OE IˈOA’

Anthony: Te tahi tumu no te mea ua na reira Iesu te tamaiti a Iehova. E hiˈo anaˈe i ta Iesu i parau a pure ai oia i to ˈna Metua. Tei roto ïa i te Ioane 17:26. E taio mai na oe i tera irava.

Tim: Te na ô ra: “E ua faaite atu hoi au ia ratou, e e faaite atu â vau, i to oe iˈoa, ia herehia mai ratou i to hereraa mai ia ˈu nei ra, e o vau hoi e parahi i roto ia ratou.”

Anthony: Mauruuru. Te ite ra oe e ua parau Iesu e ua faaite oia i te iˈoa o te Atua. I to oe manaˈo, no te aha oia i na reira ˈi?

Tim: Aita vau e papu ra no te aha.

Anthony: Te haamanaˈo ra vau i te tahi atu irava o te tauturu mai ia maramarama. E rave mai na i te Roma 10:13 o te na ô ra: “O te tiaoro atoa hoi i te iˈoa o Iehova ra, e hope roa ïa i te ora.” Te haapapuhia ra e e mea faufaa ia faaite i te iˈoa o Iehova no te ora. I to oe manaˈo, aita anei Iesu i ite i te reira?

Tim: Mea papu e oia.

Anthony: Ua ite Iesu e e mea faufaa te reira no te ora. No reira oia i faaite ai i ta ˈna mau pǐpǐ i te iˈoa o te Atua a faaitoito atu ai ia faahiti i te reira. Tera te tahi tumu matou e paraparau noa ˈi no Iehova. E mea faufaa no matou ia faaite i to te Atua iˈoa e ia tauturu ia vetahi ê ia faahiti i tera iˈoa.

Tim: Tera râ, noa ˈtu e aita te taata i ite aore ra i faahiti i to ˈna iˈoa, te manaˈo ra ratou i te Atua.

Anthony: Peneiaˈe. Ma te faaite mai râ i to ˈna iˈoa, ua ite te Atua e e mea ohie aˈe no tatou ia haafatata ˈtu ia ˈna.

Tim: Eaha ïa ta oe e hinaaro ra e parau?

Anthony: A feruri na. E ere paha i te mea faufaa ia ite e o Mose te iˈoa o te taata i vahi i te miti Uteute aore ra ua horoahia ia ˈna na Ture ahuru. E no Noa, te taata i hamani i te araka e ua faaora i to ˈna utuafare e te animara. E no Iesu, te taata i pou mai mai te raˈi mai e ua pohe no ta tatou mau hara.

Tim: E.

Anthony: Ua hinaaro râ te Atua ia ite tatou i to ratou mau iˈoa. E mea au aˈe iho â pai! Ma te faahiti noa i to ratou iˈoa, ua taa ia tatou i ta ratou i rave na.

Tim: Aita vau i feruri aˈenei mai tera. E manaˈo tano roa!

Anthony: Te vai ra te tahi atu tumu e faaite ai te mau Ite no Iehova i to te Atua iˈoa. Te hinaaro nei matou ia faatupu te taata i te faaroo i te Atua ra o Iehova a haafatata ˈtu ai ia ˈna. Mea faufaa atoa râ no matou ia ite te taata e maoti Iesu e faaorahia ˈi tatou. Peneiaˈe, e nehenehe tâua e taio i te tahi atu irava e haapapu ra i tera manaˈo.

Tim: E.

Anthony: A haamanaˈo na. Ua taio tâua e ua parau Iesu i roto i te Ioane 14:6 e o ˈna “te eˈa, e te parau mau, e te ora.” E hiˈo anaˈe i te mau irava i nia noa ˈtu, i roto i te Ioane 14:1. E hinaaro anei oe e taio i te tuhaa hopea o tera irava no te ite i ta Iesu i parau?

Tim: E, te na ô ra: “E faaroo i te Atua, e e faaroo atoa mai hoi ia ˈu.”

Anthony: Mauruuru. I to oe manaˈo, mea faufaa anei te faaroo? Te faaroo ia Iesu aore ra ia Iehova?

Tim: Ua parau Iesu te faaroo ia raua toopiti.

Anthony: Mea papu. Ua taa iho â ïa ia oe eita e navai ia parau e e faaroo to tatou i te Atua e ia Iesu! E mea titauhia ia faaite i te reira i roto i to tatou oraraa.

Tim: Parau mau roa!

Anthony: E nafea ïa ia faaite e ua faatupu mau tatou i te faaroo i te Atua e ia Iesu? E nehenehe anei tâua e tauaparau i te reira i te tahi atu mahana?a

Tim: A e!