Te hau a te Atua no te feia e haapiihia ra e Iehova
“E te mau tamarii atoa na oe ra, e haapiihia ïa e Iehova, e e hau rahi to te mau tamarii na oe ra.” — ISAIA 54:13.
1, 2. Eaha te mea faufaa roa e nehenehe ai tatou e fanaˈo i te hau?
TE HAU, auê ïa taoˈa hinaarohia e! Te faaite mai nei râ hoi te Tuatapaparaa e e ere te reira te mea e itehia nei i roto i te huitaata. No te aha hoi?
2 Mea tuati maitai te hau i te faatura i te mana. E tei ia vai, i roto i teie nei ao, te mana teitei roa ˈˈe, maoti hoi tei te Poiete ra, oia hoi te Atua ra o Iehova? Mea faufaa roa ˈtura ïa ia farii mai oia ia tatou ia nehenehe tatou e ite mau i te hau (Salamo 29:11; 119:165). Ia erehia tatou i taua haamaitairaa faufaa mau ra a Iehova, eita roa ˈtu ïa tatou e nehenehe e fanaˈo i te hau mau, te hau e te Atua, e to tatou taata-tupu, aore ra e tatou iho. — Isaia 57:21.
No te aha te hau e ore ai e itehia ˈi e to teie nei ao
3. Na te aha i faaino i te mau auraa i rotopu i te Atua e te taata?
3 Mai ta tatou iho i ite, i te omuaraa ra iho â o te aamu taata nei, ua patoi te hoê tamarii varua a te Atua ia Iehova. E tuhaa atoa hoi te patoi no te tamaˈi. Inaha, ua turai aˈera te enemi o te hau, tei parauhia i muri iho te Diabolo ra o Satani, ia Eva, ia fariu ê mai oia i te ture a te Atua noa ˈtu â ïa e te manaˈo ra oia e e nehenehe oia e maitai mai. Ua faahuru ê aˈera te Diabolo i te parau mau ia tiaturi te vahine e te faaere ra to ˈna auraro i te Atua ia ˈna, i te tahi mea maitai. Mai te huru ra ïa e te turai atura oia ia ˈna ia faaohipa i te huru miimii, ia haapao noa oia “ia ˈna na mua”. Ua pee maite atura hoi ta ˈna tane ia ˈna i roto i te ino, e inaha, ua ino roa atoa aˈera ta raua huaai taatoa i taua huru feruriraa ra. — Genese 3:1-6, 23, 24; Roma 5:12.
4, 5. a) Eaha te aanoraa o te mana o Satani i nia i te huru feruriraa o te taata? b) Eaha ïa te faahopearaa i nia i te mau tutavaraa a te taata no te faatupu i te hau?
4 E ere noa na te hoê tuhaa iti o te huitaata nei i faarue i te ture a te Atua. Inaha, te haapapu maira te mau Papai e “o Satani hoi o te haavare i to te ao atoa nei”. (Apokalupo 12:9.) Te orure rahi nei vetahi pae i te ture a Iehova e aita roa ˈtu hoi ratou e faatura ra i te Atua e to ratou taata-tupu; te na reira atoa nei vetahi, noa ˈtu i roto i te mau tuhaa haihai roa. I te mea hoi, ua manuïa Satani i te aratai i te manaˈo o te taata nei te aposetolo Ioane i nehenehe ai e papai e: “Te vai noa nei to te ao atoa i raro aˈe i taua varua ino ra.” (Ioane 1, 5:19). Noa ˈtu e e parau te taata e te tiaturi ra ratou aore ra aita e te vai mau ra te Diabolo, te rave nei râ ratou i to ˈna hinaaro, e te auraro nei hoi ratou ia ˈna; o ˈna atura ïa to ratou aratai. No reira, ua atea roa te huitaata nei i te Atua, e enemi oia no ˈna. Ia hiˈohia te reira, e maere anei tatou ia ite e aita te mau tutavaraa a te taata no te haamau i te hau i manuïa? — Kolosa 1:21.
5 Noa ˈtu te reira, te rahi noa ˈtura te taata no roto mai i te mau nunaa teie e ite nei i teie mahana te hau a te Atua, hau no ô mai i te Atua ra. Nafea ïa te reira e nehenehe ai?
Te hau maitai roa ta te Atua e horoa maira
6. a) Eaha te faufaaraa ta te Bibilia e horoa ra no te hau? b) Na roto ia vai tatou e nehenehe ai e fanaˈo i te hau ta te Atua e horoa mai nei?
6 I roto i te Roma 15:33, te faataahia maira Iehova mai “te Atua hau” ra. I te haamataraa ra iho â, te opuaraa a te Atua, ia roaa ïa te hau i te mau mea ta ˈna i poiete. Hau atu i te 300 taime i roto i ta ˈna Parau faauruahia, te faahitihia ra te parau no te hau. Te faaite mai nei te Bibilia e o Iesu Mesia te “Arii no te hau”. (Isaia 9:6, 7.) Ia ˈna ra to te Atua horoaraa ˈtu te hopoia no te faaore roa i te mau ohipa a te enemi matamua o te hau, oia hoi te Diabolo ra o Satani (Ioane 1, 3:8). E maoti te Arii o te hau, e nehenehe ai tatou tataitahi e ite i te oaoa i roto i te hau ta te Atua e horoa maira.
7. a) Eaha te hau a te Atua? b) No te aha tatou e ore ai e tiai ia ore teie nei amuiraa tahito e ia taeahia i te huru taata tia roa, i reira tatou e nehenehe atu ai e fanaˈo i te reira?
7 E auê ïa hau faahiahia e! E hau atu â hoi te reira i te ore-roa-raa te tamaˈi. Te parau hebera ra shalôm, matauhia i te huri na roto i te parau ra “hau”, te horoa maira ïa i te manaˈo ra oraora maitai, taoˈa rahi, maitai roa. Te hau e itehia ra e te mau kerisetiano mau, aita ˈtu ïa, no te mea e ere te reira tei te vahi i reira ratou e ora ˈi. E ere te auraa eita ratou e roohia i te mau fifi o teie nei ao. Teie râ, e nehenehe te puai i roto ra e noaa mai ia ratou, e tauturu ia ratou ia ape ia ore te hoê fifi ia ino roa ˈtu, ma te ore e faahoˈi atu mai tei horoahia mai (Roma 12:17, 18). Noa ˈtu â ïa e ua maˈihia aore ra aita e moni, e nehenehe te hoê taata e vai maitai noa i te pae tino e e maitai atoa i te pae varua, e fanaˈo atu ai i te hau ta te Atua e horoa maira. Parau mau, e etaeta roa ˈtu â taua hau ra ia ore roa teie nei ao miimii, e e hohonu roa ˈtu â ia taea paatoa te huitaata i nia i te huru taata tia roa. Teie râ, te hau a te Atua ta tatou e nehenehe e fanaˈo mai teie nei atu nei, o te hau ïa o te feruriraa e o te mafatu, te hoê hau no roto roa mai tei taa ê roa i te mau ohipa no rapae mai (Salamo 4:8). No roto roa mai hoi te reira i te haamaitairaa a te Atua. Auê ïa taoˈa faufaa rahi e!
Te haapii maira Iehova i ta ˈna mau tamarii
8. O vai te mau taata matamua tei fanaˈo i taua hau ra e te Atua na roto ia Iesu Mesia?
8 O vai te feia tei ia ratou ra taua hau nei, no te mea na Iehova e haapii ra ia ratou e teie e auraro nei i ta ˈna mau faaueraa? Te faaite maira te Bibilia e o te mau taata o te Iseraela varua te mau taata matamua. I roto i te Galatia 6:16, teie te parauhia ra no nia ia ratou: “E te feia atoa e haere na teie nei eˈa, ei hau to ratou, e te aroha, i nia atoa i te Iseraela atoa o te Atua ra!” O na 144 000 ïa taata tei maitihia e te Atua no te ora ˈtu i nia i te raˈi i pihai iho ia Iesu Mesia. — Apokalupo 14:1.
9. Eaha te “huru haerea” tei tauturu i te mau kerisetiano ia fanaˈo i te hau?
9 I te senekele I, ua ite aˈera te mau melo o te Iseraela varua i te hoê parau mau faufaa roa, oia hoi te hoê huru “eˈa” e nehenehe ai e noaa ia ratou te hau. Ua riro ei mea faufaa roa no ratou ia ite ratou i te auraa o taua eˈa ra. Hau atu i te 15 senekele, ua faaohipa o Iehova i te ture a Mose, tei riro hoi ei ata noa no te mau mea maitatai ra no a muri aˈe. I muri aˈe râ i te pohe tusia o Iesu Mesia, aita te mau tavini a Iehova i raro aˈe faahou i taua ture ra (Hebera 10:1; Roma 6:14). Ua haapapu maitai te opuaraa i ravehia e te tino aratai o te mau kerisetiano i Ierusalema no nia i te parau no te peritome, i te reira (Ohipa 15:5, 28, 29). Ua haapapu-faahou-hia te reira i roto i te episetole faauruahia e te Atua, i to Galatia. Inaha, ua tupu te mau mea maitatai tei riro hoi te ture a Mose ei ata. Ua faaô maira Iehova ma te faaoromai i roto i te feruriraa e te mafatu o te mau pǐpǐ faatavaihia a te Mesia, te auraa mau o To ˈna aroha faito ore i haapapuhia mai na roto i te arai o ta ˈna Tamaiti. Na roto i te atuaturaa i te faaroo i roto i taua faanahoraa ra e ma te ora ia au i taua faaroo ra, e nehenehe atura ïa te mau pǐpǐ a te Mesia e fanaˈo i te hoê hau o tei ore aˈenei i tamatahia ˈˈenei e te mau taata hara, na mua ˈtu. — Galatia 3:24, 25; 6:16, 18.
10. a) Te ora ra te Iseraela varua i tei hea tupuraa o te parau tohu a Isaia 54:13? b) Nafea te aˈo a Iehova i te tautururaa ia ratou ia ite i te hau?
10 Ua itea hoi te Iseraela pae varua i te tupuraa o te parau tapu faahiahia mau i faataahia i roto i te Isaia 54:13, i reira te Atua iho e parau atu i ta ˈna faanahonahoraa melahi haapao maitai, ta ˈna e faahohoˈa nei i te hoê vahine faaipoipo i te na ôraa e: “E te mau tamarii atoa na oe ra, e haapiihia ïa e Iehova, e e hau rahi to te mau tamarii na oe ra.” Oia mau, te Tamaiti matamua o taua faanahonahoraa ra, o Iesu Mesia iho â ïa, tei faatoroahia ei Mesia i to ˈna faatavairaahia e te varua moˈa i te matahiti 29 o to tatou nei tau. Teie râ, mea rahi atu â te mau tamarii a te “vahine faaipoipo” a Iehova i nia i te raˈi. Inaha, 144 000 mau tamarii ê atu â ta ˈna, e o ratou te piti o te tuhaa no te huaai ia au mai tei faaitehia i roto i te Genese 3:15. Ua tapu mai o Iehova e e riro mai oia ei Orometua rahi no teie mau tamaiti atoa. Ua haapii oia ia ratou i te mau parau no nia ia ˈna iho e no nia i ta ˈna mau opuaraa. Ua faaite oia ia ratou nafea râ ratou ia tavini ia ˈna. I te tahi mau taime, ua aˈo atu o ˈna ia ratou, i to ratou haapao-ore-raa i ta ˈna Parau. E ere i te mea ohie roa ia farii i te aˈo; teie râ, ua faˈi taua mau tamaiti ra, ma te haehaa, e mea faufaa mau â te reira no ratou, e ua rave ratou i te mau tauiraa tei titauhia mai. No reira, e mau faahopearaa maitai atura ïa ta taua aˈo ra e faatupu: “O te maitai ra ïa o te parau-tia te tupu i taua aˈo ra.” — Hebera 12:7, 11; Salamo 85:8.
“Te feia rahi roa” i haapiihia i roto i te mau haerea o te Atua
11. a) O vai atu â teie e haapiihia nei i teie nei tau e Iehova? b) Nafea taua mau taata nei i te faaiteraa e te ohipa nei ratou ia au i te parau a Isaia 2:2, 3, e eaha ta te reira e faatupu i nia ia vetahi ê?
11 I to tatou nei tau, aita Iehova e haapii noa ra i te Iseraela varua anaˈe. I roto i na 50 matahiti i mairi aˈenei, ua fariu tia atoa oia i to ˈna manaˈo i nia i te tahi atu mau taata. No nia ia ratou, teie ta Isaia, tei faauruahia e te Atua, i parau i te Isa pene 2, irava 2 e te 3: “E riro ia tae i te mau mahana hopea ra, e faatiahia te mouˈa ra o te fare o Iehova i nia i te tupuai mouˈa, e faateiteihia ïa i nia ˈˈe i te mau aivi; e tairuru atoa mai te mau etene atoa ra i reira.” Oia mau, te feia i maiti te haamoriraa a te Atua mau ra, te tuu nei ïa ratou ia ˈna i mua roa i roto i to ratou oraraa. No reira, tei nia ˈˈe taua haamoriraa ra i te tahi atu mau haamoriraa ê atu, ta ratou iho i faaohipa na i mutaa ihora e ta teie nei ao e tamau noa nei i te rave. Ua ite te mau taata o te mau nunaa atoa i te reira. Ua ite ratou e, noa ˈtu te mau titauraa a te feia mana o te fenua nei aore ra te mana rahi o te mau ohipa e ravehia nei i roto i teie nei ao e ore e tano na te mau kerisetiano, te tuu nei te feia e haamori ra ia Iehova i te mau auraa e taai ra ia ratou ia ˈna i nia ˈˈe i te mau mea atoa nei. Te feia e hiˈopoa ra i te huru oraraa o taua mau taata e haamori nei ia Iehova, ua ite atoa ratou i te mau huru ta ratou e faahotu nei, e e rave rahi te feia e hinaaro nei e amui mai i roto i te haamoriraa mau. No reira ua hau atu i te toru milioni teie e parau nei i to ratou taata-tupu e: “E haere mai e haere tatou i nia i te mouˈa o Iehova, i te fare o te Atua o Iakoba; e na ˈna e haapii mai i ta ˈna haapaoraa, e haere tatou na te eˈa ta ˈna e faaite maira.” — Hiˈo Zekaria 8:23.
12. Eaha te mau haamaitairaa e noaa ra i te feia e parauhia ra i roto i te Isaia 2:2, 3 e o te Atua hoi to ratou Orometua? A horoa mai na te hoê o te mau huru faahiahia mau o te haapiiraa ta te Atua e horoa mai nei.
12 A feruri na maa taime iti eaha te auraa ia riro te Atua ei Orometua no tatou! Te feia e farii ra i ta ˈna haapiiraa e tei papu mau e no ô mai te reira i te Atua ra, aita ïa to ratou haava manaˈo e arepurepu tamau ra. Aita to ratou manaˈo e feaapiti ra aore ra aita ratou i riro ei tîtî na te hoê huru feruriraa fifi mau ia opua ratou e rave i te parau-tia. Mea maramarama maitai te parau mau no roto mai i te Parau a te Atua. E te faaite maira hoi te irava maha o te Isaia pene piti te hoê tuhaa faufaa roa o te haapiiraa e horoahia ˈtu i taua mau taata ra. Te faaite mai nei te reira nafea tatou e nehenehe ai e fanaˈo i te hau i roto i te hoê ao amahamaha. No reira, ma te ore e amui atoa ˈtu i roto i te mau ohipa ta te tahi pae e maiti nei i te rave, te opua nei te feia e haapiihia e Iehova e tiapai i ta ratou ˈoˈe ei auri arote e ta ratou mahae ei tipi tope vine. Eita ratou e haapii faahou i te tamaˈi.
13. No hea mai te mau melo o te “feia rahi roa”, na te aha râ i faataui ia ratou?
13 I roto i te Apokalupo 7:9, 10, 14, e ite tatou i taua nei â feia ra oia hoi, i muri aˈe i to ratou oraraa ˈtu mai roto atu i te “ati rahi” e fatata roa mai nei, o te fanaˈo ra i te hau i roto i te fenua apî a te Atua. No roto mai te mau melo o taua “feia rahi” ra o te mau taata e ora ˈtu, i te mau pupu taata atoa, mau opu, mau nunaa e mau reo atoa. No roto mai e rave rahi o ratou, i mutaa ihora, i te mau nunaa e tamaˈi noa na te tahi i te tahi. Vetahi, ma te ore hoi e ô roa ˈtu i roto i te tamaˈi, ua ora na râ ratou i te hoê huru oraraa ma te haapao noa ia ratou iho. Te haafifi atoa ra râ hoi te reira i te hau. Teie râ, te feia i haere mai i rapae mai roto mai i te mau nunaa atoa, ua riro ratou i teie nei ei mau taata mea au na ratou te hau e teie e turu nei i te hau. E na te aha i faariro ia ratou mai te reira te huru? Ua haapiihia hoi ratou e Iehova. — Isaia 11:9.
Te hoê hau otahi roa
14. Ua niuhia te hau e fanaˈohia nei e te nunaa o Iehova i nia i te aha, e no te aha?
14 E hau otahi mau â te hau ta Iehova e horoa nei na to ˈna nunaa. E ere te reira no roto mai i te hoê faaauraa paruparu i ravehia e e piti na pupu tei ore roa ˈtu e tiaturi noa ˈˈe te tahi i te tahi. Aita roa ˈtu e manaˈo feaa to roto. Ua niuhia oia i nia i te parau-tia (Isaia 32:17). Nafea râ hoi te hoê hau mai te reira te huru e nehenehe ai e tupu i rotopu i te mau taata tia ore? I te mea hoi e e feia hara tatou, eaha ïa te parau-tia e vai nei ia tatou nei? Oia hoi, maoti te faaroo e nehenehe ai tatou e fanaˈo i te hoê parau-tia o te riro mau â i te tupu maoti te taraehara o te tusia o Iesu.
15. I roto i te roaraa o te taviniraa a Iesu i nia i te fenua nei, eaha te haapiiraa faufaa roa no te hau ta Iehova e horoa ra na te mau taata e riro mai ei mau tamarii na ˈna?
15 Te tauturu mai nei te reira ia papu maitai tatou i te mau parau a Iesu i faahitihia i roto i te Ioane 6:45-47. I roto i taua mau irava ra, te parau atura Iesu i te mau ati Iuda tei ore i farii ia ˈna ei Mesia e tei faaino hoi ia ˈna. Inaha, te manaˈo ra hoi oia i ta ˈna mau pǐpǐ ia parau oia e: “Ua papaihia hoi i roto i te mau peropheta ra [oia hoi i roto i te Isaia 54:13] e, e haapii-anaˈe-hia ratou e te Atua. E teie nei, o tei faaroo e tei haapiihia e te Metua ra, o te tae mai ïa ia ˈu nei. Aita râ e taata i ite i te Metua, maori râ o to ǒ mai i te Atua ra, ua ite oia i te Metua. Amene, amene, e parau atu vau ia outou, O tei faaroo ia ˈu nei e ora mure ore to ˈna.” Ua farii taua mau pǐpǐ ra i te haapiiraa a Iehova ia ratou. Te aratai ra te reira ia ratou i nia ia Iesu. A faarue ai te tahi pae i ta ˈna haapiiraa e a faarue ai ratou ia Iesu, ua faaea mai ratou i pihai iho ia ˈna. Mai ta Petero i parau, “ua faaroo aˈenei hoi matou, e ua ite hoi matou e, o oe te Mesia, te Tamaiti a te Atua ora ra”. (Ioane 6:69.) No to ratou faaroo ia Iesu Mesia, e nehenehe atura ïa ratou e ora ma te hau e te Atua ra o Iehova; e ite atura hoi ratou i te hau o te aratai tia i te ora mure ore ra.
16. a) Mai te Penetekose mai o te matahiti 33, nafea to te mau pǐpǐ a Iesu fanaˈoraa i te faanahoraa i ravehia na roto i te arai o te Mesia? b) I muri aˈe, eaha tei titauhia ia ratou?
16 Mai te Penetekose atu o te matahiti 33 to taua mau pǐpǐ haapao maitai ra a Iesu haamataraa i te fanaˈo i te tusia o te Mesia. Ua tano maitai tei papaihia e Paulo i roto i te Roma 5:1 no ratou: “Ua tiahia tatou i te faaroo, e hau to tatou i te Atua ra, i to tatou Fatu ia Iesu Mesia ra.” Mai to ratou fanauraahia mai, e huaai anaˈe ratou paatoa na Adamu. Ua faaatea roa hoi ta ratou mau hara ia ratou i te Atua. Eita roa ˈtu hoê noa ˈˈe o te mau mea maitatai ta ratou iho e rave e nehenehe e faaore i te hara tupuna. Teie râ, i roto i to ˈna aroha faito ore ua farii Iehova i te tusia o te ora taata tia mau ra o Iesu ei maitai no te mau huaai a Adamu. No te feia e faaohipa ra i te faaroo i roto i taua faanahoraa nei, e nehenehe atura ïa ratou e faarirohia ei taata parau-tia e e fariihia ei tamarii na te Atua, ma te tiaturi i te ora ˈtu i nia i te raˈi (Ephesia 1:5-7). Inaha hoi, mea rahi anei tei anihia ˈtu ia ratou? E. E tia ia ratou ia haere na roto i te mau eˈa o Iehova. Eita ratou e rave faahou i te hara. Noa ˈtu e eaha, ua taa ia ratou e, noa ˈtu eaha te huru o ta ratou parau-tia, no roto mai te reira i te aroha faito ore o te Atua i haapapuhia mai na roto i te Mesia. Mai ta te mau Papai e faaite ra, te ‘oaoa nei [te mau kerisetiano faatavaihia i te varua o te Atua] i te hau a te Atua na roto ia Iesu Mesia’.
17, 18. a) Te fanaˈo ra anei te mau “mamoe ê atu” i te hau e te Atua? b) Eaha ˈtu â vetahi mau uiraa te tia ia tuatapapahia?
17 E te mau taata ta Iesu i parau ta ˈna “mau mamoe ê atu”? (Ioane 10:16.) Te fanaˈo ra anei ratou i te hau a te Atua? E, te fanaˈo nei, eiaha râ mai te mau tamarii a te Atua. I roto i te Kolosa 1:19, 20, tei roto ratou i te feia e noaa ia ratou te hau a te Atua, ia parauhia e ua manaˈo te Atua e e mea maitai, na roto i te arai o te Mesia, “ia faafaite hoi oia i te mea atoa ra ia ˈna iho i roto ia ˈna ra, i te hau i noaa i te toto o to ˈna ra [to Iesu] satauro; to te raˈi e to te fenua nei [oia hoi te mau taata e horoahia ˈtu te ora mure ore i nia i te fenua tei faarirohia ei paradaiso], ia faaite â ia ˈna”. E faarirohia te feia e tiaturi ra e ora i nia i te fenua nei ei feia parau-tia e te fanaˈo nei ratou i te hau a te Atua mai teie atu nei, eiaha ei tamarii, ei ‘tauˈa râ no te Atua’ mai ia Aberahama. Auê ïa haamaitairaa e, e ere anei? — Iakobo 2:23.
18 Outou iho, te fanaˈo ra anei outou i taua hau ra? E te fanaˈo ra anei outou mai te nehenehe e fanaˈohia e te mau taata e ora nei i teie anotau faufaa roa o te Tuatapaparaa? Te tuatapapa ra te tumu parau i mua nei no nia vetahi mau huru o taua tumu parau e nehenehe e tauturu ia tatou i roto i taua tuhaa ra.
Faahaamanaˈo-faahou-raa
◻ No te aha aita te hau e noaa nei i te ao nei?
◻ Eaha te hau ta te Atua e horoa nei i teie nei mahana?
◻ O vai te nehenehe e fanaˈo i teie hau?
◻ No te aha te parau-tia e riro ai ei ohipa faufaa mau no taua hau ra?
[Hohoˈa i te api 25]
“O tei faaroo e tei haapiihia e te Metua ra, o te tae mai ïa ia ˈu nei.”