Ua faatiahia anei Iesu ei tino iˈo aore ra varua?
Te pahonoraa a te Bibilia
Te parau ra te Bibilia no nia ia Iesu: “Ua haapohehia oia ei taata, ua faatiahia mai râ ei varua.”—Petero 1, 3:18; Ohipa 13:34; Korinetia 1, 15:45; Korinetia 2, 5:16.
Na roto i ta ˈna mau parau ua faaite Iesu aita oia e faatiahia mai e to ˈna tino iˈo e toto. Ua parau hoi oia e horoa o ˈna i to ˈna “tino ia ora to te ao nei,” ei hoo no te huitaata. (Ioane 6:51; Mataio 20:28) Ahani o ˈna i faatiahia mai e to ˈna tino iˈo aita ïa o ˈna e nehenehe e pûpû i to ˈna ora ei tusia taraehara. Tera râ, te parau ra te Bibilia ua pûpû oia i to ˈna tino iˈo e toto “hoê roa pûpûraa.”—Hebera 10:10.
Ua faatiahia mai Iesu ei varua e nafea ïa ta ˈna mau pǐpǐ i ite ai ia ˈna?
E nehenehe te mau varua e rave i te tino taata ia itehia mai ratou. Ei hiˈoraa, i te matamua ua tamaa e ua inu te mau melahi e te taata. (Genese 18:1-8; 19:1-3) Tera râ, e varua hoi ratou o te nehenehe e faarue i te fenua no te hoˈi i te raˈi.—Te mau tavana 13:15-21.
I muri aˈe i to ˈna tia-faahou-raa, no te hoê taime poto, ua rave atoa Iesu i te tino taata mai ta te mau melahi i rave i na mua aˈe. Ei varua e nehenehe ïa o ˈna e fa mai aore ra e moˈe mai ta ˈna e hinaaro. (Luka 24:31; Ioane 20:19, 26) Aita Iesu i rave hoê â tino, no reira aita ta ˈna mau hoa piri i ite oioi ia ˈna. Maoti noa râ ta ˈna i parau e i rave ua taa ˈtura ia ratou e o ˈna tera.—Luka 24:30, 31, 35; Ioane 20:14-16; 21:6, 7.
I to Iesu faraa mai i te aposetolo Toma te vai ra te pepe i nia i to ˈna tino. Ua na reira Iesu ia tiaturi Toma e ua faatiahia mai o ˈna e ia faaea Toma i te feaa.—Ioane 20:24-29.