Ta ˈna semeio matamua

A toru atura mahana i riro mai ai Natanaela ei hoê o na pǐpǐ matamua a Iesu. Haere aˈera Iesu e vetahi o taua mau pǐpǐ matamua ra i te pae apatoerau, i te tuhaa fenua o Galilea, to ratou fenua. Te haere ra ratou i te oire mouˈa o Kana, te oire o Natanaela, i te pae apatoerau o Nazareta, i reira Iesu i te paariraa mai. Ua titau-manihini-hia ratou i te hoê oroa faaipoiporaa i Kana.

Tei te oroa faaipoiporaa atoa te metua vahine o Iesu. Ei hoa no te fetii o na hoa faaipoipo, e au ra e ua anihia Maria ia haapao i tera rahiraa manihini. No reira ïa oia i ite oioi ai e ua pau te tahi mea, a faaara ˈtu ai oia ia Iesu: “Aita ta ratou e uaina faahou.”—Ioane 2:3.

Ua hinaaro Maria ia rave Iesu i te tahi ohipa no te mea aita e uaina faahou. Tera râ, pahono maira Iesu: “Vahine, eaha tâua e haapeapea ˈi no te reira?” (Ioane 2:4) O ˈna te Arii maitihia e te Atua, na to ˈna ïa Metua i te raˈi e parau ia ˈna eaha te rave, eiaha râ na te fetii aore ra na te hoa. Ma te paari, vaiiho atura Maria i taua fifi ra i roto i te rima o ta ˈna tamaiti, ma te parau noa ˈtu i te mau tavini: “Ta ˈna e faaue ia outou, a rave.”—Ioane 2:5.

Te vai ra e ono farii pape ofai, e î roa hau atu i te 40 litera pape i roto i te farii tataitahi. Faaue ihora Iesu i te mau tavini: “A faaî i te mau farii i te pape.” E na ô atura: “A taipu na i teie nei e a hopoi atu i te tiaau o te oroa.”—Ioane 2:7, 8.

Maere ihora te tiaau i te maitai rahi o te uaina, aita râ oia i ite e e semeio tei tupu na. Pii maira oia i te tane faaipoipo e parau atura: “E horoa te mau taata atoa i te uaina maitai roa na mua, e ia taero te mau manihini, te uaina ïa e ere i te mea maitai roa. Ua faaherehere oe i te uaina maitai roa no teie nei.”—Ioane 2:10.

O te semeio matamua ïa ta Iesu i faatupu. I to ta ˈna mau pǐpǐ apî iteraa i te reira, puai atura to ratou faaroo ia ˈna. I muri iho, haere atura Iesu, to ˈna metua vahine e to ˈna mau teina i te oire o Kaperenaumi i te pae apatoerau tooa o te râ o te miti o Galilea.