“Noa ˈtu e aita outou i ite aˈenei ia ˈna, ua here outou ia ˈna”
“Noa ˈtu e aita outou i ite aˈenei ia ˈna, ua here outou ia ˈna. Noa ˈtu e aita outou e hiˈo ra ia ˈna i teie nei, te faatupu nei râ outou i te faaroo i roto ia ˈna e te rahi nei to outou oaoa.”—PETERO 1, 1:8, MN.
1. Noa ˈtu e aita roa hoê taata i nia i te fenua nei i teie mahana, i ite aˈenei ia Iesu, nafea te tahi mau taata faaroo ia tutava i te faaite i to ratou paieti no ˈna?
AITA roa hoê taata e ora nei i nia i te fenua nei i teie mahana, i ite aˈenei ia Iesu Mesia. Teie râ, e mau mirioni taata e parau nei e, ua here ratou ia ˈna. I te mau matahiti atoa, i te 9 no Tenuare, e hutihia te hoê tii rahi o Iesu Mesia e amo ra i te hoê satauro, na roto i te mau aroâ o Manila, i Philipino, e ohipa teie o tei parauhia e e faaiteiteraa rahi roa ˈˈe e te uˈana roa ˈˈe no te faaroo o te huiraatira i taua fenua ra. E huti e e turai haapuai te tiaa taata tei maamaahia; e paiuma roa ˈtu vetahi i nia i te tahi no te tamata i te tapea ˈtu i te tii. E rave rahi feia turu i teie ohipa, o tei haere noa mai no te oroa haereraa. Area vetahi ra, ua haere mai iho â ratou no Iesu. Ei haapapuraa, e satauro paha to ratou i nia i te arapoa aore ra te haere tamau nei paha ratou i te pureraa. Teie râ, e nehenehe anei e parau e e haamoriraa mau teie ohipa haamori idolo?
2, 3. (a) O vai te mau pǐpǐ a Iesu o tei ite e o tei faaroo roa ˈtu ia ˈna? (b) O vai â i te senekele matamua ra o tei here e o tei tiaturi ia Iesu, noa ˈtu e aita ratou i ite mata roa ˈtu ia ˈna?
2 I te senekele matamua ra, e rave rahi tausani taata i te mau mataeinaa Roma no Iudea, Samaria, Perea, e Galilea, o tei ite e tei faaroo roa ˈtu ia Iesu Mesia. Ua faaroo ratou i to ˈna vauvauraa i te mau parau mau tei tamahanahana mau no nia i te Basileia o te Atua. E ua ite mata roa ˈtu ratou i te mau semeio o ta ˈna i rave. Ua riro mai vetahi ei mau pǐpǐ itoito mau na ˈna, e ua tiaturi ratou e, o oia ‘te Mesia, te Tamaiti a te Atua ora ra.’ (Mataio 16:16) Aita râ te mau taata o ta te aposetolo Petero i faatae atu i ta ˈna rata matamua i faauruahia, i vai i rotopu i taua mau taata ra.
3 No ǒ mai te feia o ta Petero i papai atu, i te mau mataeinaa no Ponoto, Galatia, Kapadokia, Asia, e Bitunia—i teie nei tau, tei Turekia teie mau mataeinaa atoa. Ua papai atu o Petero ia ratou e: “Noa ˈtu e aita outou i ite aˈenei ia ˈna, ua here outou ia ˈna. Noa ˈtu e aita outou e hiˈo ra ia ˈna i teie nei, te faatupu nei râ outou i te faaroo i roto ia ˈna e te rahi nei to outou oaoa ma te umere hanahana eita e tia ia parau ra.” (Petero 1, 1:1, 8, MN) Mea nafea to ratou iteraa ia Iesu Mesia e ua tae roa i te here ia ˈna e i te faatupu i te faaroo i roto ia ˈna?
4, 5. Teie mau taata o tei ore i ite aˈenei ia Iesu, mea nafea to ratou haapiiraa no nia ia ˈna, e ua tae roa ratou i te here e i te tiaturi ia ˈna?
4 E au ra e, tei Ierusalema vetahi i to te aposetolo ra o Petero pororaa i mua i te tiaa taata i haere mai i te oroa Penetekose i te matahiti 33 o to tatou nei tau. I muri aˈe i te oroa, e rave rahi pǐpǐ o tei faaea mai i Ierusalema no te fanaˈo â i te haapiiraa no ǒ mai i te mau aposetolo ra. (Ohipa 2:9, 41, 42; a faaau e te Petero 1, 1:1.) I roto i to ˈna mau tere mitionare e rave rau, ua rave te aposetolo Paulo i te hoê taviniraa itoito i rotopu atoa i te feia o tei faaea i te vahi o ta Petero i faatae atu i muri aˈe, i te rata matamua o te Bibilia i mairihia i to ˈna iˈoa.—Ohipa 18:23; 19:10; Galatia 1:1, 2.
5 No te aha teie mau taata, o tei ore hoi i ite aˈenei ia Iesu, i ume-puai-hia ˈi ia ˈna ra? I to tatou nei tau, no te aha te mau mirioni taata na te ao nei, e here hohonu ai ia ˈna?
Te mau mea o ta ratou i faaroo
6. (a) Ahiri e ua faaroo outou ia Petero i te pororaa no nia ia Iesu i te Penetekose 33 ra, eaha ta outou e haapii mai? (b) Mea nafea to te reira ohiparaa i nia i tau 3 000 taata i tia ˈtu i reira?
6 Ahiri e tei Ierusalema outou i to Petero paraparauraa i mua i taua tiaa taata i te oroa o te matahiti 33 ra, eaha ïa ta outou e haapii mai no nia ia Iesu? Eita e ore e, ua haapapu te mau semeio o ta ˈna i rave e, ua tonohia mai oia e te Atua. E, noa ˈtu e ua haapohe te mau taata hara ia Iesu, aita oia i vai maoro i roto i te apoo, tera râ, ua faatiahia mai oia e ua faahanahanahia oia i nia i te raˈi i te rima atau o te Atua. E, o Iesu mau te Mesia o ta te mau peropheta i tohu na. E na roto ia Iesu, ua niniihia te varua moˈa i nia i ta ˈna mau pǐpǐ, ia nehenehe ratou e poro oioi noa i te feia no te mau nunaa rau, no nia i te mau mea faahiahia ta te Atua e rave ra na roto i te arai o ta ˈna Tamaiti. Ua putapû roa te mafatu o te mau taata e rave rahi, o tei faaroo ia Petero i taua taime ra, e tau 3 000 taata o tei bapetizohia ei mau pǐpǐ kerisetiano. (Ohipa 2:14-42) Ahiri e tei reira atoa outou, e rave atoa anei outou i taua faaotiraa ra?
7. (a) Ahiri e tei Anetiohia outou i to te aposetolo Paulo pororaa i reira, eaha ta outou e haapii mai? (b) No te aha vetahi i roto i te tiaa taata i riro ai ei feia faaroo e i tufa ˈi i te parau apî maitai ia vetahi ê?
7 Ahiri e tei rotopu outou i te feia i taua tau ra, i to te aposetolo Paulo haapiiraa i Anetiohia, i te mataeinaa Roma ra no Galatia, eaha ˈtu â ta outou e haapii mai no nia ia Iesu? E faaroo ïa outou ia Paulo ia faataa e, ua tohu aˈena te mau peropheta e e faautuahia o Iesu i te pohe na te feia e faatere ra i Ierusalema. E faaroo atoa outou i te mau faatiaraa a te taata i ite mata e ua faatia-faahou-hia mai o Iesu. E putapû roa paha outou i te faataaraa a Paulo e, na roto i te faatiaraa mai ia Iesu mai te pohe mai, ua haapapu o Iehova e, o Iesu mau te Tamaiti a te Atua. Eita anei ïa to outou mafatu e putapû roa, ia haapii outou e e nehenehe te faaoreraa hara auaa te faaroo i roto ia Iesu, e aratai i te ora mure ore? (Ohipa 13:16-41, 46, 47; Roma 1:4) I te papuraa ia ratou te auraa o te parau o ta ratou i faaroo, ua riro maira vetahi i Anetiohia ei pǐpǐ, e ua tufa ratou ma te itoito i te parau apî maitai na vetahi ê, noa ˈtu e ia na reira ratou, e nehenehe ratou e roohia i te hamani-ino-raa uˈana.—Ohipa 13:42, 43, 48-52; 14:1-7, 21-23.
8. Ahiri e tei te putuputuraa outou a te amuiraa no Ephesia i te taeraa mai te rata a Paulo, eaha ta outou e haapii mai?
8 E ahiri e, tei roto outou i te amuiraa kerisetiano no Ephesia, i te mataeinaa Roma no Asia, i te taeraa mai te rata faauruahia a Paulo na te mau pǐpǐ o taua vahi ra? Eaha ïa ta outou e haapii mai i roto i teie rata, no nia i te tiaraa o Iesu i roto i te opuaraa a te Atua? I roto i taua rata ra, ua faataa o Paulo e, na roto i te Mesia, e tahoê-pauroa-hia te mau mea i nia i te raˈi e to nia i te fenua e te Atua, e ua faataehia te ô a te Atua na roto i te Mesia, i te mau taata o te mau nunaa atoa, e te mau taata o tei pohe i mua i te aro o te Atua no ta ratou mau hapa i rave, e ora faahou mai ratou na roto i to ratou faaroo i te Mesia, e oia atoa, na roto i teie nei ravea, e nehenehe ta te mau taata e riro mai ei mau tamarii herehia a te Atua.—Ephesia 1:1, 5-10; 2:4, 5, 11-13.
9. (a) Eaha te mea e nehenehe e tauturu ia outou ia ite mai te peu e, ua papu mau anei ia outou te auraa o te parau ta Paulo i papai atu i to Ephesia? (b) Mea nafea te mea o ta ratou i haapii no nia ia Iesu, i te ohiparaa i nia i te mau taeae no te mau mataeinaa Roma i faahitihia e Petero?
9 E faahohonu anei te mauruuru no teie mau mea atoa i to outou here i te Tamaiti a te Atua? E ohipa anei teie here i nia i to outou oraraa i te mau mahana atoa, mai ta te aposetolo Paulo i faaitoito i roto i te Ephesia, i te mau pene 4 tae atu i te 6? E turai anei teie mauruuru ia outou, ia hiˈopoa maitai i te mau fa matamua i roto i to outou oraraa? No to outou here i te Atua e to outou mauruuru i ta ˈna Tamaiti, e rave anei outou i te mau tauiraa e titauhia ra, ia riro mau â te raveraa i te hinaaro o te Atua ei ohipa matamua i roto i to outou oraraa? (Ephesia 5:15-17) Ua papai atu te aposetolo Petero i te mau Kerisetiano no Asia, Galatia, e vetahi atu mau mataeinaa Roma, no nia i to ratou huru fariiraa i te mea o ta ratou i haapii, e: “Noa ˈtu e aita outou i ite aˈenei ia [Iesu Mesia], ua here outou ia ˈna. . . . Te faatupu nei râ outou i te faaroo i roto ia ˈna e te rahi nei to outou oaoa ma te umere hanahana eita e tia ia parau ra.”—Petero 1, 1:8.
10. (a) Eaha te mea i faaitoito rahi i te here o te mau Kerisetiano matamua no Iesu? (b) Nafea atoa tatou e faufaahia ˈi?
10 Te vai ra te tahi atu mea o tei faaitoito rahi i te here o taua mau Kerisetiano matamua ra ta Petero i papai atu, no te Tamaiti a te Atua. Eaha ïa taua mea nei? I te tau a papai ai o Petero i ta ˈna rata matamua, e piti aˈe Evanelia—ta Mataio e ta Luka—o tei parare aˈena. E nehenehe hoi ta te mau Kerisetiano o te senekele matamua, o tei ore i ite aˈenei ia Iesu, e taio i te mau faatiaraa a te mau Evanelia. E nehenehe atoa ta tatou. E ere te mau Evanelia i te mau aai; te vai nei râ i roto te mau tapao atoa e faaite ra e ua riro mau te reira, ei aamu e nehenehe e tiaturihia. I roto i taua mau faatiaraa i faauruahia mai ra, e rave rahi tuhaa o te nehenehe e faahohonu i to tatou here no te Tamaiti a te Atua.
Te huru o ta ˈna i faaite
11, 12. Eaha te mea i roto i te huru o Iesu i nia ia vetahi ê, o te turai ia tatou ia here ia ˈna?
11 I roto i te faatiaraa papaihia o te oraraa o Iesu, e haapii tatou no nia i to ˈna huru i nia i te tahi atu mau taata. Te haaputapû nei te huru o ta ˈna i faaite, i te mafatu o te taata i teie atoa tau, hau atu hoi i te 1 960 matahiti i muri aˈe i to ˈna poheraa. Tatou paatoa e ora nei, te teimaha nei tatou i te mau faahopearaa o te hara. E rave rahi mirioni taata o te faaruru nei i te parau-tia ore, o te aro nei i te maˈi, aore ra o te hepohepo nei no te tahi atu mau tumu. Teie te mau parau ta Iesu e faatae nei i teie mau taata atoa: “E haere mai outou ia ˈu nei, e te feia atoa i haˈa rahi, e tei teiaha i te hopoia, e na ˈu outou e faaora. A rave mai i tau zugo i nia ia outou, e ia haapiihia outou e au, te mǎrû nei hoi au e te haehaa o te aau: e e noaa hoi te ora i to outou [“nephe,” MN]. Te mǎrû nei hoi ta ˈu zugo e te mâmâ nei ta ˈu hopoia.”—Mataio 11:28-30.
12 Ua faaite o Iesu i te hoê aroha hohonu no te feia veve, te feia i poia, e te feia i oto. I te mau taime i titauhia ra, ua tae roa oia i te faaamu semeio i te mau tiaa taata rahi. (Luka 9:12-17) Ua faatiamâ oia ia ratou i te faatîtîraa a te mau peu tutuu. Ua faaitoito atoa oia i to ratou faaroo i roto i te ravea a te Atua no te faaore i te haavîraa politita e i te pae faanavairaa faufaa atoa. Aita o Iesu i faateimaha ˈtu â i te aau o te feia i paruparu noa na. Ma te aupuru e te here, ua ite oia e nafea ia faaitoito i te feia haehaa. Ua tamǎrû oia i te feia o tei riro mai te aeho fatifati ra, e mai te mori ama mohimohi tei fatata i te pohe ra. E tae roa mai i teie nei tau, e faatupu to ˈna iˈoa i te tiaturi, e tae noa ˈtu i roto i te mafatu o te feia o tei ore i ite aˈenei ia ˈna.—Mataio 12:15-21; 15:3-10.
13. No te aha te huru o Iesu i nia i te feia hara e ume ai i te taata?
13 Aita o Iesu i faatia i te hara, noa ˈtu râ, ua faaite oia e te taa ra ia ˈna te huru o te feia o tei rave i te hapa i roto i to ratou oraraa, o tei tatarahapa râ e tei fariu i nia ia ˈna no te ani i te tauturu. (Luka 7:36-50) Ua parahi oia e ua tamaa oia i rotopu i te feia i hiˈo-ino-hia e te huiraatira, ia manaˈo anaˈe oia e e nehenehe te reira e tauturu ia ratou i te pae varua. (Mataio 9:9-13) Na roto i te huru o ta ˈna i faaite, e mau mirioni taata o tei ore i ite aˈenei ia Iesu, o te farerei atoa ra i taua mau huru tupuraa ra, o tei turaihia ia haapii no nia ia ˈna e ua tiaturi ratou ia ˈna.
14. Eaha te mea e haaputapû ia outou no nia i ta Iesu huru tautururaa i te taata i maˈihia, i hapepa, aore ra i oto?
14 Te haapapu ra te huru o Iesu i nia i te taata tei roohia i te maˈi aore ra i te hapepa, i to ˈna aau mahanahana e to ˈna aroha, e tae noa ˈtu i to ˈna aravihi no te tamǎrûraa ia ratou. No reira, i to te hoê taata lepera haafatataraa mai ia ˈna e to ˈna taparuraa ia tauturu mai oia ia ˈna, aita o Iesu i haafaufau i to ˈna iteraa ˈtu i teie taata. E aita oia i parau atu ia ˈna e, noa ˈtu to ˈna aroha ia ˈna, e mea ino roa to ˈna lepera, e aita ta ˈna e ravea no te tauturu ia ˈna. Ua taparu hoi teie taata e: “E te Fatu, ia tia ia oe ra, e mâ vau ia oe.” Ma te ore e haamarirau, ua faatoro atura Iesu i to ˈna rima e ua tapea ˈtura i teie lepera, na ô atura: “Ua tia ia ˈu, ia mâ oe.” (Mataio 8:2, 3) I te tahi atu taime, ua opua te hoê vahine e rapaau ia ˈna na roto i te tapea-omoe-raa ˈtu i te hiti ahu o Iesu. Ua paraparau atu o Iesu i teie vahine ma te maitai e ma te tamǎrû ia ˈna. (Luka 8:43-48) E i to ˈna farereiraa i te mau taata e haere ra i te hunaraa maˈi, ua aroha roa ˈtura oia i te vahine ivi e oto ra, ua pohe hoi ta ˈna tamaiti fanau tahi. Noa ˈtu e ua patoi o Iesu i te faaohipa i to ˈna mana no ǒ mai i te Atua ra, no te faaamu semeio ia ˈna iho, ua faaohipa râ oia i teie mana no te faatia mai i teie taata pohe e no te horoa faahou atu ia ˈna i ta ˈna metua vahine ra.—Luka 4:2-4; 7:11-16.
15. Eaha to outou huru ia taio outou e ia feruri outou i nia i te mau faatiaraa no nia ia Iesu?
15 Ia taio tatou i teie mau faatiaraa e ia feruri tatou i nia i te huru o ta Iesu i faaite, e hohonu atu â ïa to tatou here no teie taata o tei pûpû i to ˈna ora, ia nehenehe tatou e ora e a muri noa ˈtu. Noa ˈtu e aita tatou i ite aˈenei ia ˈna, e hinaaro tatou e haafatata ˈtu ia ˈna, e e pee i to ˈna mau taahiraa avae.—Petero 1, 2:21.
To ˈna turuiraa ˈtu i nia i te Atua ma te haehaa
16. Ua haamau na mua Iesu i te ara-maite-raa i nia ia vai, e eaha ta ˈna i faaitoito mai ia tatou ia rave?
16 Te mea hau atu â, ua haamau o Iesu i to ˈna ara-maite-raa e to tatou atoa, i nia i to ˈna Metua i te raˈi ra, te Atua ra o Iehova. Ua haapapu oia i te faaueraa rahi roa ˈˈe i roto i te Ture, i te na ôraa e: “[E here] oe i to Atua ia Iehova ma to aau atoa, e ma to [“nephe,” MN] atoa, e ma to manaˈo atoa.” (Mataio 22:36, 37) Ua faaue oia i ta ˈna mau pǐpǐ e: “Ei faaroo to outou i te Atua.” (Mareko 11:22) I to ratou faarururaa i te tamataraa rahi i to ratou faaroo, ua aˈo atura oia ia ratou e: “A pure tamau.”—Mataio 26:41, MN.
17, 18. (a) Mea nafea to Iesu faaiteraa e, ua turui atu oia i nia i to ˈna Metua ma te haehaa? (b) No te aha e mea faufaa roa te ohipa o ta ˈna i rave, no tatou?
17 Ua horoa o Iesu iho i te hiˈoraa. E tuhaa faufaa roa hoi to te pure i roto i to ˈna oraraa. (Mataio 14:23; Luka 9:28; 18:1) I te taime a maiti ai oia i ta ˈna mau aposetolo, aita noa o Iesu i tiaturi i to ˈna iho manaˈo, noa ˈtu e na mua ˈˈe, na ˈna i raatira i nia i te mau melahi atoa o te raˈi. Ma te haehaa, ua pure oia i to ˈna Metua i taua po atoa ra. (Luka 6:12, 13) I to ˈna tapearaahia e to ˈna faaoromairaa i te pohe mauiui mau, ua fariu â o Iesu i nia i to ˈna Metua, ma te pure hohonu. Aita oia i manaˈo e ua matau maitai oia ia Satani e, mea ohie atura ïa no ˈna ia patoi atu i ta ˈna mau opuaraa. Ua papu ia Iesu i te faufaaraa ia ore oia ia hiˈa. Ia hiˈa noa ˈtu hoi oia, e faainoraa rahi ïa te reira i to ˈna Metua! E ereraa rahi atoa no te huitaata nei inaha, ua taaihia to ˈna oraraa no a muri aˈe, i te tusia e pûpûhia e Iesu!
18 Ua pure o Iesu ma te tuutuu ore—i to ˈna vairaa e ta ˈna mau aposetolo i roto i te piha teitei i Ierusalema e, ma te uˈana roa ˈtu â, i te ô i Getesemane ra. (Mataio 26:36-44; Ioane 17:1-26; Hebera 5:7) A mauiui ai oia i nia i te pou haamauiuiraa, aita oia i taora parau atu i te feia o tei faaino mai ia ˈna. Area ra, ua pure oia no te feia o tei ohipa ma te ite ore: “E tau Metua, e faaore mai i ta ratou hara, aore hoi ratou i ite i ta ratou e rave nei.” (Luka 23:34) Ua haamau noa oia i to ˈna feruriraa i nia i to ˈna Metua, “ua pûpû râ ia ˈna iho ia ˈna no ˈna te [“haavaraa,” MN] tia ra.” Ta ˈna mau parau hopea i nia i te pou haamauiuiraa, e pure ïa o ta ˈna i faatae atu i to ˈna Metua ra. (Petero 1, 2:23; Luka 23:46) Auê tatou i te mauruuru, i te mea e, ma te turui taatoa i nia ia Iehova, ua faaoti o Iesu ma te haapao maitai i te hopoia ta to ˈna Metua i horoa mai na ˈna! Noa ˈtu e aita tatou i ite aˈenei ia Iesu Mesia, te here hohonu nei tatou ia ˈna no te ohipa o ta ˈna i rave!
Te faaiteraa i to tatou here no ˈna
19. Ia faaite tatou i to tatou here no Iesu, eaha te mau peu o te ore roa ˈtu e tano, o ta tatou e haapae?
19 Nafea tatou ia haapapu e e here mau to tatou, e ere noa râ i ta te vaha noa? I te mea e ua opani to ˈna Metua, ta Iesu hoi i here, ia hamanihia te mau hohoˈa e ia faarirohia ei taoˈa haamoriraa, eita ïa tatou e hinaaro e faahanahana ia Iesu na roto i te tamauraa i teie huru hohoˈa i nia i te hoê fǐfǐ arapoa aore ra na roto i te afaifairaa i te tahi tii na roto i te mau aroâ. (Exodo 20:4, 5; Ioane 4:24) Eita atoa tatou e faahanahana ia Iesu, ia haere tatou i te pureraa, peneiaˈe e rave rahi taime i te hebedoma, e mai te peu e eita tatou e ora ia au i ta ˈna mau haapiiraa i te toea o te hebedoma. Ua parau o Iesu e: “Tei ia ˈna ta ˈu ra [“mau faaueraa,” MN] e ua haapao oia i taua [“mau faaueraa,” MN] ra, oia tei [here] mai ia ˈu; e tei [here] mai ia ˈu ra, e herehia mai oia e tau Metua ra.”—Ioane 14:21, 23; 15:10.
20. Eaha vetahi mau mea e faaite e, te here mau ra tatou ia Iesu?
20 Eaha te mau faaueraa o ta ˈna i horoa mai na tatou? A tahi, ia haamori i te Atua mau, ia Iehova, e ia ˈna anaˈe ra. (Mataio 4:10; Ioane 17:3) No to ˈna tiaraa i roto i te opuaraa a te Atua, ua haapii atoa o Iesu e e tia ia tatou ia faatupu i te faaroo i roto ia ˈna ei Tamaiti na te Atua e, e tia ia tatou ia faaite i te reira na roto i te faarueraa i te mau ohipa iino, e te haereraa ma te maramarama. (Ioane 3:16-21) Ua aˈo mai oia ia tatou ia imi na mua i te Basileia o te Atua e ta ˈna ra parau-tia, ia tapitapi i te reira na mua ˈˈe i te mau hinaaro i te pae materia. (Mataio 6:31-33) Ua faaue mai oia e ia here tatou i te tahi e te tahi, mai ta ˈna i here ia tatou nei. (Ioane 13:34; Petero 1, 1:22) E ua parau atoa mai oia e ia riro tatou ei mau ite no te opuaraa a te Atua, mai ia ˈna atoa ra. (Mataio 24:14; 28:19, 20; Apokalupo 3:14) Noa ˈtu e aita ratou i ite aˈenei ia Iesu, tau pae mirioni Ite no Iehova i teie mahana, o tei turaihia ia pee i taua mau faaueraa ra, no to ratou here mau no ˈna. E ere no te mea e aita ratou i ite mata roa ˈtu ia Iesu, ua paruparu ïa to ratou hinaaro e auraro. Te haamanaˈo ra ratou i te parau a to ratou Fatu i te aposetolo Toma ra: “No te mea te hiˈo mai nei oe ia ˈu, e Toma, i faaroo ai oe: e ao to te feia aore i ite ia ˈu a faaroo mai ai.”—Ioane 20:29.
21. Nafea tatou ia faufaahia i te haereraa i te oroa Haamanaˈoraa o te poheraa o te Mesia, e tupu i teie matahiti i te Sabati 23 no Mati?
21 Te tiaturi nei matou e e tahoê atu outou i te feia na te ao nei o te haaputuputu i roto i te mau Piha no te Basileia a te mau Ite no Iehova, i te Sabati 23 no Mati 1997 i muri aˈe i te toparaa mahana, no te haamanaˈo i te tapao rahi roa ˈˈe o te here o te Atua i te huitaata nei, e no te faatupu i te oroa haamanaˈoraa o te poheraa o ta ˈna Tamaiti taiva ore ra o Iesu Mesia. E riro hoi te mau parau e faahitihia e te mau ohipa e ravehia i taua taime ra, i te faahohonu i te here no Iehova e no ta ˈna Tamaiti, e i te faarahi atoa i te hinaaro e haapao i te mau faaueraa a te Atua.—Ioane 1, 5:3.
Nafea outou ia pahono mai?
◻ Mea nafea te feia o ta Petero i faatae atu i ta ˈna buka matamua, i te iteraa e te hereraa ia Iesu?
◻ Eaha vetahi mau mea ta te mau Kerisetiano matamua i faaroo, o te haaputapû ra ia outou?
◻ Eaha te mea i roto i te huru o ta Iesu i faaite, o te faahohonu ra i to outou here no ˈna?
◻ No te aha e mea faufaa roa no tatou, to Iesu turuiraa ˈtu i nia i te Atua ma te haehaa?
◻ Nafea tatou ia faaite i to tatou here no Iesu Mesia?
[Hohoˈa i te api 16, 17]
E umehia tatou ia Iesu ra no te huru o ta ˈna i faaite