Te itoito rahi o Iesu no te haamoriraa mau

I te otiraa te faaipoiporaa i Kana, haere ihora Iesu i Kaperenaumi. Ua na muri atoa ˈtu to Iesu metua vahine e to ˈna mau teina o Iakobo, Iosepha, Simona e Iuda ia ˈna.

No te aha Iesu i haere ai i Kaperenaumi? Mea tano maitai aˈe te vahi e vai ai teie oire ia Nazareta aore ra Kana, e e oire rahi aˈe o Kaperenaumi. Mea rahi atoa te pǐpǐ apî a Iesu i faaea na i Kaperenaumi aore ra i pihai iho mai. Ua nehenehe ïa Iesu e faaineine ia ratou i to ratou oire.

A parahi ai oia i Kaperenaumi, faatupu atoa ihora Iesu i te tahi mau ohipa faahiahia. Faaroo aˈera ïa e rave rahi taata o taua oire ra e na pihai iho mai i ta ˈna i rave i reira. Tera râ, haere aˈera Iesu e to ˈna mau hoa, e tane ati Iuda taiva ore, i Ierusalema no te Pasa 30.

I te hiero i Ierusalema, ite aˈera te mau pǐpǐ a Iesu i te tahi mea maere roa no nia ia Iesu, a tahi ra ratou a ite ai.

I raro aˈe i te ture a te Atua ia Mose, i titauhia na ia pûpû te ati Iseraela i te tusia animara i te hiero, e i hinaaro mau na te mau ratere i te maa i te roaraa o to ratou faaearaa i Ierusalema. No reira, ia au i te ture a Mose, i nehenehe na ratou mea atea to ratou haereraa i Ierusalema e hoo mai i “te puaatoro ra, e te mamoe” e te tahi atu mau mea hinaaro-mau-hia. (Deuteronomi 14:24-26) No reira ïa te feia hoohoo i Ierusalema i hoo atu ai i te animara aore ra te manu i roto i te hoê aua rahi o te hiero. I eiâ na vetahi o ratou i te taata ma te faaaufau i te moni rahi roa.

No to ˈna riri rahi, hue ihora Iesu i te moni a te feia taui moni, huri ihora i ta ratou mau airaa maa, e tiahi atura i te feia hoohoo i rapae. Na ô atura Iesu: “A hopoi ê i teie mau mea! A faaea i te faariro i te fare o to ˈu Metua ei fare hoohooraa!”—Ioane 2:16.

I to te mau pǐpǐ a Iesu iteraa i te reira, haamanaˈo aˈera ratou i tei tohuhia no nia i te Tamaiti a te Atua: “E î roa vau i te itoito rahi no to fare.” Ui maira râ te mau ati Iuda: “I te mea e te rave nei oe i teie mau mea, eaha ïa te tapao ta oe e faaite mai?” Pahono atura Iesu: “A vavahi i teie hiero, e faatia vau i te reira e toru mahana.”—Ioane 2:17-19; Salamo 69:9.

Manaˈo aˈera te mau ati Iuda e o te hiero o Ierusalema ta Iesu e parau ra. Ui maira ratou: “E 46 matahiti te paturaahia teie hiero, e toru mahana ïa oe e faatia ˈi i te reira?” (Ioane 2:20) Teie râ, o to ˈna tino ta ˈna e faaau ra i te hoê hiero. E toru matahiti i muri aˈe, haamanaˈo aˈera ta ˈna mau pǐpǐ i taua mau parau ra i to ˈna faatiaraahia mai te pohe mai.