E faaite anaˈe na i te Basileia o Iehova ma te itoito!
“Farii maira i te taata atoa e haere atu ia ˈna ra. Parau maira i te basileia o te Atua.” — OHIPA 28:30, 31.
1, 2. Na te aha i faaite ia Paulo e te tauturu nei te Atua ia ˈna, e eaha te hiˈoraa ta ˈna i vaiiho mai?
TE TURU noa nei o Iehova i te feia poro o te Basileia. Ua ite-maitai-hia te reira no te aposetolo Paulo. Na roto i te tauturu a te Atua, ua tia aˈera oia i mua i te feia mana, ua faaoromai ihora i te haavîraa uˈana a te feia rahi e ua poro aˈera ma te itoito i te Basileia o Iehova.
2 Noa ˈtu e ua tapeahia oia i roto te fare tapearaa i Roma, ua “farii maira [o Paulo] i te taata atoa e haere atu ia ˈna ra. Parau maira i te basileia o te Atua”. (Ohipa 28:30, 31.) Auê ïa hiˈoraa nehenehe mau no te mau Ite no Iehova no teie mahana e! E nehenehe tatou e haapii rahi no nia i te taviniraa a Paulo ta Luka i faatia i roto i te mau pene hopea o te buka a te mau Ohipa. — 20:1 e tae atu i te 28:31.
Ua faaitoito oia i to ˈna mau taeae i roto i te faaroo
3. Eaha ta Paulo i rave i Teroa, e o vai teie e rave ra mai ia ˈna i to tatou nei tau?
3 I te oreraa te auě i Ephesia, ua faatupu atura o Paulo i te toruraa o to ˈna tere mitionare (20:1-12). A haamata ˈi oia e haere i nia i te pahi no te tere atu i Suria, ua ite aˈera oia e ua faaineine te mau ati Iuda i te hoê opuaraa ino i nia ia ˈna. Ua manaˈo paha ratou i te rave hoê â pahi e o ˈna e e haapohe atu ai ia ˈna. Ua reva ˈtura ïa o Paulo i Makedonia. I Teroa, faaea ihora oia i reira hoê hebedoma no te faaitoito i to ˈna mau taeae i roto i te faaroo, mai ta te mau tiaau haaati e rave nei i ǒ te mau Ite no Iehova i to tatou nei tau. I te mahana na mua ˈˈe i to ˈna revaraa, ua faaroroa atura o Paulo i ta ˈna oreroraa parau e tae roa i te hora hoê ahuru ma piti i te po. Peneiaˈe ua rohirohi o Eutiko, tei parahi i te uputa o te haamaramarama, no te mau ohipa o taua mahana ra. Ma te varea i te taoto, mairi ihora i raro i te toru o te nanai piha e ua pohe ihora oia, ua faahoˈi maira râ o Paulo ia ˈna i te ora. Auê ïa oaoaraa tei tupu e! A feruri na i te oaoa e faatupuhia e te tia-faahou-raa o te mau mirioni taata i roto i te ao apî tei fatata roa i teie nei! — Ioane 5:28, 29.
4. Eaha te faaineineraa ta Paulo i horoa na te mau matahiapo i roto i te taviniraa?
4 I to ˈna tereraa i Ierusalema, ua putuputu aˈera o Paulo i Mileto e te mau matahiapo no Ephesia (20:13-21). Ua faahaamanaˈo aˈera oia ia ratou e ua haapii oia ia ratou “i tera fare, i tera fare” e ua ‘parau onoono maite atu [oia] i te ati Iuda e te Heleni, i te tatarahapa i te Atua, e te faaroo i to tatou Fatu ia Iesu Mesia’. Ua tatarahapa aˈera te feia o tei riro mai, i te pae hopea, ei mau matahiapo, e ua noaa ia ratou te faaroo. Ua haapii-maitai-hia ratou e te aposetolo ia poro ratou i te Basileia ma te itoito, i te feia e ere i te feia faaroo, i roto i te hoê taviniraa i tera e tera fare mai ta te mau Ite no Iehova e rave nei i to tatou mau mahana.
5. a) Mea nafea to Paulo vaiihoraa ia ˈna ia arataihia e te varua moˈa, ma te hoê hiˈoraa maitai? b) No te aha e mea faufaa ia aˈo i te mau matahiapo ia ‘ara i te nǎnǎ atoa’?
5 Ua vaiiho aˈera o Paulo e ia arataihia oia e te varua moˈa o te Atua na roto i te hoê hiˈoraa maitai roa (20:22-30). “Arataihia e [te] varua”, maori râ ma te faahepohia ia pee i te aratairaa a te varua, ua haere ihora te aposetolo i Ierusalema, i reira te tapearaa e te hamani-ino-raa e tiai maira ia ˈna. Ua hinaaro oia i te ora, te ohipa faufaa roa râ i mua i to ˈna mata, ia faaite noa i te haapao maitai i te Atua. E tia ia tatou ia hiˈo i te mau ohipa mai ia ˈna atoa. Ua aˈo ihora o Paulo i te mau matahiapo ia ‘ara i te nǎnǎ atoa i faarirohia ˈi ratou e te varua moˈa ei episekopo i nia ihora’. I muri aˈe i to ˈna ‘revaraa’ (i roto paha i te pohe), ‘e ore te mau urî taehae roa e faaherehere i te nǎnǎ’. E tia mai taua mau taata ra mai roto mai i te mau matahiapo iho, e e farii te mau pǐpǐ aita i maramarama maitai, i ta ratou mau haapiiraa piˈo. — Tesalonia 2, 2:6.
6. a) No te aha o Paulo i nehenehe ai e tuu i te mau matahiapo i te Atua ra ma te papu maitai? b) Mea nafea to Paulo hiˈopoaraa i te tano-maitai-raa o te mau parau i papaihia i roto i te Ohipa 20:35?
6 E tia i te mau matahiapo ia vai ara noa i te pae varua no te paruru ia ratou i te apotata (20:31-38). Ua haapii aˈera te aposetolo ia ratou i te mau Papai hebera e te mau aˈoraa a Iesu, e nehenehe hoi to ˈna mana haamaitai e tauturu ia ratou ia farii i te Basileia i nia i te raˈi, “te tufaa (...) e te feia atoa i haamaitaihia ra”. Ma te rave i te ohipa ia noaa te mau mea i hinaarohia e ana e to ˈna mau hoa, ua faaitoito atoa o Paulo i te mau matahiapo ia riro mai ei mau taata rave ohipa itoito (Ohipa 18:1-3; Tesalonia 1, 2:9). Ia ohipa tatou mai teie te huru e ia tauturu tatou ia vetahi ê ia noaa ia ratou te ora mure ore, e ite ïa tatou i te parau mau o teie mau parau a Iesu: “E mea maitai i te horoa ˈtu i te rave mai.” Te itehia ra te faufaaraa o taua parau ra i roto i te mau Evanelia, o Paulo anaˈe râ o te faahiti ra i te reira, peneiaˈe ua faaroo o ˈna i te parauraahia aore ra na roto i te faauruaraahia e te Atua. E nehenehe tatou e oaoa roa mai te peu e te faaite atoa ra tatou i te hoê â huru feruriraa faatusia e to Paulo. I te mea e ua horoa rahi hoi o ˈna ia ˈna iho, ua faaoto hohonu roa to ˈna revaraa i te mau matahiapo no Ephesia.
Ia tupu to Iehova ra hinaaro!
7. Eaha te hiˈoraa o te auraroraa i te hinaaro o te Atua ta Paulo i horoa?
7 A fatata ˈi te toruraa o to ˈna tere mitionare i te hope (i te area matahiti 56), ua horoa ihora o Paulo i te hoê hiˈoraa maitai roa o te auraroraa i te hinaaro o te Atua (21:1-14). I Kaisarea, ua faaea ihora o ˈna e to ˈna mau hoa i ǒ Philipa, e maha ta ˈna tamahine paretenia, “e peropheta vahine ratou”, aore ra o te faaite i te mau ohipa e tupu, maoti te varua moˈa. I reira, ua ruuruu ihora te peropheta kerisetiano ra o Agabo, i to ˈna rima e to ˈna avae i te tatia o Paulo e ua turaihia aˈera e te varua ia parau e, i Ierusalema, e ruuruu te mau ati Iuda i te fatu o taua tatia ra e e tuu ratou ia ˈna i te rima o te mau Etene ra. “Ua tia hoi ia ˈu ia ruuruuhia vau, eiaha hoi te reira anaˈe ra, ia pohe atoa ˈtu i Ierusalema i te iˈoa o te Fatu ra o Iesu”, ta Paulo ïa i parau. Ua farii maira te mau pǐpǐ na roto i teie mau parau e: “Ia tupu to te Fatu [Iehova] ra hinaaro.”
8. Mai te peu e mea fifi na tatou i te farii i te hoê aˈoraa maitai, eaha ta tatou e nehenehe e haamanaˈo?
8 I Ierusalema, ua faatia aˈera o Paulo i te mau matahiapo i te ohipa ta te Atua i rave i rotopu i te mau Etene, na roto i ta ˈna taviniraa (21:15-26). Mai te peu e, ia tae i te hoê mahana, mea fifi na tatou i te farii i te hoê aˈoraa maitai, e haamanaˈo ïa tatou e mea nafea to Paulo fariiraa i te hoê aˈoraa. No te haapapu e aita o ˈna i haapii i te mau ati Iuda tei parahi ra i ǒ te mau Etene ra, “ia faarue ia Mose”, ua pee aˈera oia i te aˈoraa a te mau matahiapo ia tamâ ia ˈna ia au i te mau peu e ia haapao i te mau haamâuˈaraa e roaa mai no ˈna e no na taata e maha ê atu. Noa ˈtu e ua iritihia te Ture e te pohe o Iesu, aita o Paulo i hapa noa ˈˈe ma te faaohiparaa i te mea o ta te Ture i faaue i te feia o tei faahiti i te mau euhe. — Roma 7:12-14.
Rave-ino-hia, aita râ i mǎtaˈu
9. No te haavîraa uˈana a te feia rahi, eaha te mau tamataraa i roohia i nia ia Paulo mai te mau Ite no Iehova i to tatou nei tau?
9 I roto e rave rahi mau huru tupuraa, ua faaite te mau Ite no Iehova i te haapao maitai i te Atua ra, noa ˈtu te haavîraa uˈana a te feia rahi. (Ei hiˈoraa, hiˈo i te Buka matahiti a te mau Ite no Iehova 1975, api 180-190.) Ua tiarepu aˈera te mau ati Iuda no Asie Mineure i te feia rahi no te patoi ia Paulo (21:27-40). I to ratou iteraa ia Terophimo te taata no Ephesia e o ˈna, ua pari hape aˈera ratou ia Paulo i te haaviiviiraa i te hiero ma te aratairaa ˈtu i te mau Heleni i roto. Ua fatata roa ihora ratou i te taparahi haapohe ia ˈna a haere mai ai te haava roma, o Kalaudio Lusia, e ta ˈna mau taata e faaore i te faahuehueraa. Mai tei tohuhia (no te mau ati Iuda râ), ua faaue atura o Lusia e ia ruuruuhia o Paulo i te auri fifi (Ohipa 21:11). E arataihia te aposetolo i roto i te pare tapiri i te aua o te hiero a ite ai o Lusia e e ere o Paulo i te taata orure hau, e ati Iuda râ oia e e tiaraa to ˈna no te tomo atu i roto i te aua o te hiero. A faatiahia ˈi oia ia paraparau, ua parau atura o Paulo i te nunaa na roto i te reo hebera.
10. Eaha ta te oreroraa parau a Paulo i faatupu i nia i te mau ati Iuda no Ierusalema, e no te aha aita te aposetolo i tairihia?
10 Ua horoa o Paulo i te hoê faaiteraa itoito mau (22:1-30). Ua faaite maira oia ia ˈna mai te hoê ati Iuda o tei haapiihia i pihai iho ia Gamaliela, taata haapii faatura-roa-hia. Ua faataa aˈera te aposetolo e, i to ˈna haereraa i Damaseko no te hamani ino i te feia o tei pee i Te Eˈa, ua haapourihia to ˈna mata e te hoê orama a Iesu Mesia tei faahanahanahia, ua ohipa râ o Anania ia nehenehe â o Paulo e ite. I muri iho, ua faaroo aˈera oia i te Fatu i te parauraa ia ˈna e: “A haere, e tono ê atu hoi au ia oe i te Etene ra.” Ua faatupu aˈera taua mau parau ra i te tamaˈi. Ma te tuô e eita e tano e ia ora o Paulo, ua hahae ihora te feia faahuehue i to ratou ahu ma te riri rahi e ua haapuehu aˈera i te repo i nia. Ua aratai maira ïa o Lusia ia Paulo i roto i te pare no te uiui ia ˈna ma te papai, ia ite oia e no te aha râ te mau ati Iuda i patoi ai ia ˈna. Aita ihora o Paulo i tairihia i te tairi puaa (te hoê taoˈa hamanihia e te taura iri puaa, te vai ra te mau taponaraa aore ra ua tamauhia te mau huˈahuˈa auri aore ra te ivi i nia iho) ma te ani e: “E au anei i te ture ia papai outou i te taata no Roma aore i faahapahia ra?” I to ˈna iteraa e e taata o Paulo no Roma, mǎtaˈu ihora o Lusia e ua aratai maira ia ˈna i mua i te Sunederi ia ite mau oia i te tumu te mau ati Iuda i faahapa ˈi ia ˈna.
11. I roto i teihea auraa e Pharisea o Paulo?
11 A haamata ˈi o Paulo i te paruru ia ˈna i mua i te Sunederi ma te parau e ‘ua parahi noa na hoi o ˈna ma te aau maitai i mua i te aro o te Atua’, ua faaue ihora te tahuˈa rahi ra o Anania ia moto atu ia ˈna (23:1-10). Ua parau atura ïa o Paulo e: “Ua fatata te Atua i te moto mai ia oe i tena na patu faateateahia.” “E faaino hoi oe i te tahuˈa rahi?” ta vetahi ïa o te feia i tia noa i pihai iho i ani mai. No te mea aita to ˈna mata e ite maitai ra, peneiaˈe aita o Paulo i taa e o Anania taua taata ra. A ite ai oia e te vai ra te mau Pharisea e te mau Sadukea i roto i te apooraa, ua parau aˈera oia e: ‘E Pharisea vau, e no te tiaturi i te tia-faahou-raa i haavahia mai ai au nei!’ Na taua mau parau ra i faataa ê i te Sunederi, no te mea ua tiaturi te mau Pharisea i te tia-faahou-raa, area te mau Sadukea râ, aita ïa ratou i tiaturi i te reira. No te mea e ua rahi roa ˈtura te tamaˈi, ua haere mai atura o Lusia e tauturu i te aposetolo.
12. Na te aha i faatia ia Paulo ia ora mai i te hoê opuaraa ino no te haapohe ia ˈna i Ierusalema?
12 I muri aˈe, ua ora mai o Paulo i te hoê opuaraa ino no te haapohe ia ˈna (23:11-35). Ua horeo ihora e maha ahuru ati Iuda e, e ore ratou e tamaa e e inu hou ratou e taparahi haapohe ai ia ˈna. Ua faaite atura te tamaiti a te tuahine o Paulo ia ˈna i taua opuaraa ra, e ua faaite atoa oia ia Lusia. Ua arataihia ˈtura ïa o Paulo ma te apeehia e te mau faehau a te nuu, i te tavana rahi ra o Felisi, i Kaisarea, oire pu faatereraa roma o Iudea. I muri aˈe i to ˈna parauraa ia Paulo e e faaroo oia ia ˈna, ua tapea aˈera o Felisi ia ˈna i roto i te fare rahi a Heroda le Grand, te piha faatereraa a te tavana rahi.
Itoito i mua i te feia faatere
13. Eaha te faaiteraa ta Paulo i horoa ia Felisi ra, e ua nafea ihora taua tavana rahi ra?
13 I muri noa ˈˈe, ua patoi aˈera o Paulo i te mau pariraa hape a to ˈna mau enemi e ua horoa ihora i te faaiteraa ia Felisi ma te itoito (24:1-27). I mua i te mau ati Iuda o tei faahapa ra ia ˈna, ua faaite aˈera o Paulo e aita oia i faahuehue i te feia rahi. Ua haapapu ihora oia e te tiaturi ra oia i te Ture e i te mau Peropheta, e te tiaturi ra oia i te hoê “tia-faahou-raa to tei pohe, te feia parau-tia e te feia parau-tia ore”. Ua haere mai oia i Ierusalema e hopoi i “te taoˈa [aroha]” (te mau ô na te mau pǐpǐ a Iesu, peneiaˈe no te mau hamani-ino-raa ratou i veve ai) e ua tamâ oia ia ˈna ia au i te mau peu. Noa ˈtu e ua faataime o Felisi i te haavaraa, ua poro ihora o Paulo ia ˈna i muri aˈe, ia ˈna e ia Derusila, ta ˈna vahine (tamahine a Heroda Ageripa I), no nia i te Mesia, i te parau-tia, i te hitahita ore e i te haavaraa no a muri atu. I to ˈna faarooraa i taua mau parau ra, rurutaina ihora o Felisi e faahoˈi atura ia Paulo. Tera râ, i muri aˈe, ua tii pinepine atura oia ia ˈna, ma te tiaturi faufaa ore noa e e petahia mai oia i te moni. Ua ite maitai o Felisi e aita o Paulo i hara, ua tapea noa râ oia ia ˈna i te fare tapearaa ma te tiaturi e e auhia mai oia e te mau ati Iuda. E piti matahiti i muri iho, ua mono aˈera o Porio Phesito ia ˈna.
14. I teihea faanahonahoraa a te Ture, ta Paulo i faaohipa a tia mai ai oia i mua ia Phesito, e eaha te tuatiraa o te nehenehe e haamauhia no te reira?
14 I mua ia Phesito atoa, ua paruru aˈera o Paulo ia ˈna ma te itoito (25:1-12). Ahiri e ua tano iho â e ia haapohehia te aposetolo, eita oia e ani e ia ape oia i te reira, aore roa râ e taata e nehenehe e tuu atu ia ˈna i mua i te mau ati Iuda ra no te faaoaoa ia ratou. “Ei ia Kaisara vau”, ta Paulo i parau, ma te faaohipa i te tiaraa a te hoê taata roma e ia haavahia oia i Roma (i taua tau ra, i mua ia Néron). Ua fariihia ihora ta ˈna aniraa. E haere ïa o Paulo e ‘faaite atoa i Roma’, mai tei tohuhia (Ohipa 23:11). Te faaohipa atoa nei te mau Ite no Iehova i te mau faanahonahoraa o te nehenehe e tavini i ‘te faatiaraa e te faaitoitoraa i te evanelia nei’. — Philipi 1:7.
15. a) Eaha te parau tohu tei tupu a tae ai o Paulo i mua i te arii o Ageripa e i muri iho, i mua ia Kaisara? b) Mea nafea to Paulo ‘tueraa i te tara’?
15 Ua faaroo ihora o Heroda Ageripa II, arii no Iudea i te pae apatoerau, e to ˈna tuahine o Bereni (ua rave hoi raua i te mau taairaa faaturi fetii), ia Paulo i roto i te hoê tere no te farerei ia Phesito, i Kaisarea (25:13–26:23). Ma te horoa i te faaiteraa ia Ageripa e ia Kaisara, e faatupu ïa o Paulo i te parau tohu tei faaite e e hopoi oia i te iˈoa o te Fatu i mua i te aro o te mau arii (Ohipa 9:15). Ma te faatia ia Ageripa i te ohipa i tupu i nia i te eˈa no Damaseko, ua faahiti aˈera o Paulo i teie mau parau ta Iesu i parau ia ˈna e: “Eita e tia ia oe ia tue i te tara.” Mai te hoê puaatoro etaeta o te pepe na roto i te faaoromairaa i te mau patia tara, ua pepe atoa o Paulo ma te aro i te mau pǐpǐ a Iesu, o tei tauturuhia e te Atua.
16. Eaha te huru o Phesito e o Ageripa, a horoa ˈi o Paulo i te faaiteraa ia raua?
16 Eaha te huru o Phesito e o Ageripa (26:24-32)? Ma te ore roa e nehenehe e taa i te tia-faahou-raa e ma te maere roa i te manaˈo papu o Paulo, ua parau atura o Phesito ia ˈna e: “Ua maamaahia oe i te imi rahi i te parau.” Hoê â atoa huru, i to tatou nei tau, te parau nei te tahi pae e e feia maamaa te mau Ite no Iehova, noa ˈtu e i te tupuraa mau, mai ia Paulo, te ‘parau nei ratou i te parau mau e te aoaoa ore’. “Ua fatata vau i te riro ei Cherisetiano ia oe”, ta Ageripa ïa i parau, o tei faaoti i te apooraa, ua ite râ oia e ua nehenehe o Paulo e tuuahia ahiri e aita oia i pii i te haavaraa a Kaisara.
I roto i te mau ati i te miti
17. A faataa mai i te mau ati ta Paulo i farerei i roto i te miti i to ˈna tereraa i Roma.
17 I roto i to ˈna tere tei aratai ia ˈna i Roma, ua ite aˈera o Paulo i “te ati i te miti”. (Korinetia 2, 11:24-27.) Ua faauehia ihora te hoê raatira hanere o Iulio te iˈoa, ia aratai i te feia mau auri mai Kaisarea e tae atu i Roma na nia i te pahi (27:1-26). I to ratou tapaeraa i Sidona, ua faatiahia ˈtura o Paulo ia haere e farerei i te feia faaroo, o tei afai mai i te tamahanahana i te pae varua na ˈna (hiˈo Ioane 3, irava 14). I Mura, i Asie Mineure, ua tuu atura o Iulio i te feia mau auri i nia i te hoê pahi tei î i te sitona, tei fano atu i te fenua Italia. Noa ˈtu e ua faaû ratou i te hoê mataˈi ino, ua tae ihora ratou i te vahi O te tiataroraa maitai te iˈoa, tei pihai iho te oire ra o Lasea, i Kereta. Mai reira, fano atura ratou i Phoinikia, ua puihauhau maira râ te hoê mataˈi haapiti. Ma te mǎtaˈu i te opaia i nia i te one (te mau hauone paruparu), i te pae tahatai o Afirika apatoerau, ua ‘tuu ihora i te mau tauhaa o te pahi’, peneiaˈe te mau ie e te mau tira. Ua hopoi ratou i te taura na raro aˈe i te taere o te pahi ia ore e parari. E ao aˈera, ma te faatahurihuri-noa-hia e te vero, huri atura ratou i te taoˈa i raro i te tai. I te toru o te mahana, ua huri ihora ratou i raro i te tai i te taoˈa mau o te pahi (te mau ie aore ra te taatoaraa o te mau poti nainai o te pahi). A manaˈohia ˈi e aita e ravea no te ora ˈtu, ua fa atura te hoê melahi ia Paulo e parau atura ia ˈna eiaha e mǎtaˈu no te mea e tuuhia oia i mua ia Kaisara. Auê hoi manaˈo tamahanahana a parau ai te aposetolo e e hurihia te feia atoa i nia i te pahi, i nia i te hoê fenua!
18. I te pae hopea, eaha ˈtura te hopearaa o Paulo e o to ˈna mau hoa ratere?
18 Oia mau, ua ora mai te feia ratere (27:27-44). I te ahuru ma maharaa o te mahana, i te hora ahuru ma piti i te po, ite aˈera te mau ihitai e te piri ra te pahi i te hoê fenua. No te mea e ua haapapu te mau pateraa i te reira, ua taora aˈera ratou i te mau tutau ia ore ia paiuma i nia i te toa. Ia au i te faaueraa a Paulo, ua amu ihora na 276 taata i te tahi maa. I muri iho, ua haamama aˈera ratou i te pahi ma te faarue i te sitona i raro i te tai. I te aahiata, ua tâpû ihora te feia horo pahi i te mau tutau, tatara ihora i te taura tapea hoê e huti aˈera i te ie rahi ia î i te mataˈi. Ua faanee atura ratou i te pahi i te vahi ripoa au e ua haamata aˈera te reimuri i te parari. Ua tae pauroa râ ratou i te pae miti.
19. Eaha te ohipa i tupu i nia ia Paulo i te motu o Melita, e eaha ta ˈna i rave no to ˈna mau taata-tupu i taua vahi ra?
19 Ma te rari roa e te rohirohi, ua ite aˈera te feia o tei parari te pahi e tei te motu o Melita ratou, i reira ‘ua hamani-maitai-hia ˈtura’ ratou. (28:1-16.) A tuu ai o Paulo i te vahie i nia i te auahi, ua faaara ihora te ahu i te hoê ohidena (ophi) tei piri mai i nia i to ˈna rima. (I to tatou mau mahana, eita e itehia i te mau ophi taero i nia i te motu o Melita, tera râ e “mea taero” taua ophi ra.) Ua manaˈo ihora te feia no Melita e e taata taparahi taata o Paulo e aita oia i faaorahia i “te tahoo”, i to ratou râ iteraa e aita oia i hiˈa i raro a pohe roa ˈtu ai aore ra aita i oru i te maˈi ahuahu, ua manaˈo atura ratou e e atua o ˈna. I muri aˈe, ua faaora ihora o Paulo e rave rahi taata, tei roto atoa te metua tane o Popilio, te raatira rahi o te motu. E toru avae i muri iho, ua fano atura o Paulo, o Luka e o Arisetareho na nia i te hoê pahi e te vai ra i te muaraa o te pahi te iˈoa ra “Diosekuroi” aore ra “Mau Tamaiti a Zia” (Castor e Pollux, mau atua maehaa o te manaˈohia ra e e maitai ratou no te mau ihitai). I muri aˈe i to ratou pouraa i Puteoli, ua tere faahou atura o Iulio e to ˈna pǔpǔ. Ua haamaitai ihora o Paulo i te Atua e itoito atura i to ˈna farereiraa i te mau kerisetiano no Roma mai, te oire pu, i Apio Phoro e te Tabereno Toru ra, i nia i te eˈa no Apio. I to ˈna taeraa i Roma, ua faatiahia aˈera oia ia parahi noa oia anaˈe ra i roto i te fare, i raro aˈe râ i te tiairaa a te hoê faehau.
Ua tamau maite oia i te faaite i te Basileia o Iehova
20. Eaha te ohipa ta Paulo i tamau maite i te rave i to ˈna vahi, i Roma?
20 I to ˈna fare, i Roma, ua faaite aˈera o Paulo ma te itoito i te Basileia o Iehova (28:17-31). Ua parau atura oia i te feia rarahi ati Iuda e: “No ta Iseraela e tiaturi nei hoi i tapeahia ˈi au i teie nei auri fifi.” Te auraa ia atuatu i taua tiaturiraa ra, te fariiraa ïa i te Mesia, no reira e tia atoa ia tatou ia ineine i te mauiui (Philipi 1:29). Parau mau, aita te rahiraa o taua mau ati Iuda ra i tiaturi, e huru mafatu maitai râ to vetahi pae i rotopu ia ratou e to te mau Etene e rave rahi (Isaia 6:9, 10). I te roaraa e piti matahiti (i te area matahiti 59-61), ua farii aˈera o Paulo i te feia atoa i haere atu ia ˈna ra, “parau maira i te basileia o te Atua, e haapii maira i te mau parau o te Fatu ra o Iesu Mesia ma te mǎtaˈu ore, e aore roa e taata i faaore atu”.
21. Tae roa i te hopea o to ˈna oraraa, eaha te hiˈoraa ta Paulo i horoa mai?
21 E au ra e ua parau o Néron e aita ta Paulo e hara e ua tatara aˈera ia ˈna i rapae. Ua rave faahou aˈera te aposetolo i ta ˈna ohipa ma te apeehia e Timoteo raua o Tito. Tera râ, ua tapea-faahou-hia oia i te fare tapearaa i Roma (i te area matahiti 65) e e au ra e ua taparahihia oia, i nia i te faaueraa a Néron (Timoteo 2, 4:6-8). Tae roa i te hopea, ua horoa aˈera o Paulo i te hoê hiˈoraa maitai roa o te hoê taata poro itoito o te Basileia. Turaihia e te hoê feruriraa mai teie te huru i te mau mahana hopea, ia nehenehe te feia atoa o tei pûpû ia ratou na Iehova, e faaite ma te itoito i to ˈna Basileia!
Eaha ta outou e pahono atu?
◻ Eaha te faaineineraa o te taviniraa ta Paulo i horoa ˈtu na te mau matahiapo no Ephesia?
◻ Eaha te hiˈoraa o te auraroraa i te hinaaro o te Atua ta Paulo i vaiiho mai?
◻ Eaha te mau tamataraa tei tuea ta Paulo e ta te mau Ite no Iehova i ite no te haavîraa uˈana a te feia rahi?
◻ Eaha te faanahonahoraa a te Ture ta Paulo i faaohipa a tia mai ai oia i mua i te tavana rahi o Phesito, e eaha te tuatiraa o te nehenehe e haamauhia no te reira i teie mahana?
◻ Eaha te ohipa ta Paulo i tamau maite i te rave i to ˈna fare, i Roma, e eaha ïa te hiˈoraa ta ˈna i vaiiho mai?