Uiraa a te feia taio

Eaha te hopoia a te mau tiai o te hiero?

I rotopu i te mau ati Levi, aita te taatoaraa i tavini ei tahuˈa, i amo na hoi vetahi i te hopoia tiai i raro aˈe i te tiaauraa a te raatira o te hiero. Teie ta te taata papai buka ati Iuda Philon i faataa: “E tia vetahi [ati Levi] i pihai iho i te mau uputa no te tiai i te mau vahi tomoraa, e te tahi atu, i mua ïa i te vahi moˈa [o te hiero] ia ore te mau taata atoa ia tomo i reira. E haaati haere atoa te tahi mau tiai i te hiero i te po e te ao ma te tauiui atoa i ta ratou hora tiairaa.”

E nehenehe te Sunederi e faaohipa i teie mau tiai. O ratou anaˈe te pǔpǔ taata ati Iuda ta te hau Roma i faatia ia amo i te ˈoˈe.

Ia au i te taata papai buka Joachim Jeremias, “te tuati maitai ra te reira i ta Iesu i parau i te taime a tapeahia ˈi o ˈna, i haapii noa na hoi o ˈna i te taata i te mau mahana atoa i te hiero, aita râ te mau tiai i haru ia ˈna.” (Mat. 26:55) No Joachim, eita e ore no roto atoa mai i tera pǔpǔ taata te feia i tonohia no te haru ia Iesu i te tahi atu taime. (Ioa. 7:32, 45, 46) Na te mau tiai o te hiero e to ratou raatira i haru atoa i te mau pǐpǐ a Iesu no te afai ia ratou i mua i te Sunederi. Ua tono-atoa-hia te mau tiai no te tiahi i te aposetolo Paulo i rapae i te hiero.—Ohi. 4:1-3; 5:17-27; 21:27-30.