O Iehova to tatou Raatira!
“O te Atua ta matou e faaroo e tia ˈi eiaha te taata.” — OHIPA 5:29.
1, 2. Mai te mau aposetolo, e nafea te mau Ite no Iehova ia faaue anaˈe te tahi mau taata ia ratou ia rave i te ohipa tei patoi i te hinaaro o te Atua?
UA FAATIA te Atua ra o Iehova e ia tuuhia na 12 taata i mua i te hoê apooraa rahi i te matahiti 33 o to tatou nei tau. O te Sunederi ati iuda ïa taua apooraa ra e te feia i faahapahia, o te mau aposetolo ïa a Iesu Mesia. ‘Ua parau matou ia outou eiaha outou e haapii ma teie nei iˈoa, ta te tahuˈa rahi ïa i parau, e inaha, ua î roa Ierusalema i ta outou parau.’ Ua parau aˈera o Petero e te tahi mau aposetolo e: “O te Atua ta matou e faaroo e tia ˈi eiaha te taata.” (Ohipa 5:27-29). Mai te huru ra ïa e te parau ra ratou e: “O Iehova to matou Raatira!”
2 Oia mau, o Iehova te Raatira o te mau pǐpǐ mau a Iesu. O ta te Ohipa a te mau Aposetolo e faaite papu ra, buka o te Bibilia tei papaihia i Roma i te area matahiti 61 e “Luka rapaau maˈi herehia nei”. (Kolosa 4:14.) Mai te mau aposetolo, te auraro nei te mau tavini a Iehova no teie mahana i to ratou Raatira i te raˈi ra, ia patoi anaˈe te mau faaheporaa a te mau taata i to ˈna hinaaro. Eaha râ ta tatou e nehenehe â e haapii i roto i te buka a te mau Ohipa? (I roto i ta outou haapiiraa tataitahi, te faaitoito nei matou ia outou ia taio i te mau tuhaa o taua buka ra o tei papai orarahi-noa-hia.)
Te tono nei Iesu i te tahi mau ite
3. I muri aˈe i to ratou ‘bapetizoraahia i te varua moˈa’, eaha te tapitapiraa matamua a te mau pǐpǐ a Iesu?
3 Ua nehenehe aˈera te mau aposetolo e rave i te hoê tiaraa papu no te Atua, no te mea ua faaitoitohia ratou i te pae varua. Ua pohe aˈera te Mesia i nia i te hoê pou haamauiuiraa, ua ite râ ratou e e ua faatiahia oia (1:1-5). Oia mau, ua “faaite [Iesu] ia ˈna iho i te oraraa”1:3 e ua haapii atura te mau parau mau no nia i te Basileia i roto i te roaraa o na 40 mahana to ˈna raveraa i te tahi mau tino iˈo. Ua parau atoa o ˈna i ta ˈna mau pǐpǐ ia tiai i Ierusalema e ia bapetizohia ratou “i te [v]arua [moˈa]”.1:5 O te pororaa ïa ta ratou tapitapiraa matamua, mai te reira atoa no te mau Ite no Iehova i to tatou nei tau.— Luka 24:27, 49; Ioane 20:19 e tae atu i te 21:24.
4. Eaha te ohipa e tupu ia tae anaˈe mai te varua moˈa i nia i te mau pǐpǐ a Iesu?
4 Hou a bapetizohia ˈi i roto i te varua moˈa, ua manaˈo hape te mau aposetolo i te hoê faatereraa no te fenua nei o te faaore i te faatereraa no Roma, a ui ai ratou i teie nei uiraa e: “E te Fatu, ei teie nei anei oe e faahoˈi mai ai i te hau ia Iseraela?” (1:6-8). Oia mau, ua pahono aˈera o Iesu e eita, no te mea ‘aore i haapaohia ia ite ratou i te taime e te anotau’.1:7 ‘I noaa ia ratou te mana i te varua moˈa ia haere mai i nia iho ia ratou’,1:8 e horoa oia no ratou i te puai no te faaite i te Basileia o te raˈi a te Atua, eiaha râ no te hoê basileia no te fenua nei. E poro atu ratou i Ierusalema, i Iudea e i Samaria, “e tae noa ˈtu i te hopea o te fenua ra”.1:8 Maoti te tauturu o te varua, te faatupu nei te mau Ite no Iehova i taua ohipa ra i nia i te hoê faito o te ao atoa nei i te mau mahana hopea.
5. I roto i teihea auraa Iesu e hoˈi mai ai mai to ˈna revaraa?
5 No horoa noa ˈtura o Iesu i ta ˈna mau pǐpǐ i te ohipa no te faatupu i teie ohipa pororaa i roto i te ao atoa nei, a haamata ˈi oia i te hoˈi i nia i te raˈi. A reva ˈi oia i nia i te raˈi, ua mauê atura oia ma te faaatea ia ˈna e, i muri iho, ua tia aˈera o ˈna i mua i to ˈna Raatira i te raˈi e haamata ihora i te ohipa i roto i te ao varua (1:9-11). I muri aˈe i to ˈna vehîraahia e te ata, moe atura i te mata o te mau aposetolo, ua vaiiho atura i to ˈna tino taata. Fa maira e piti na melahi e parau atura e e ‘hoˈi mai oia mai te reira atoa’. E ua tupu mau â mai te reira te huru. O te mau pǐpǐ anaˈe o tei ite ia ˈna i te revaraa, mai te reira atoa, o te mau Ite no Iehova anaˈe o te ite ra i to ˈna hoˈiraa mai itea-ore-hia e te mata taata nei.
Te maiti nei o Iehova
6. Mea nafea te maitiraahia te mono o Iuda Isakariota?
6 Fatata roa te mau aposetolo i te hoˈi mai i Ierusalema (1:12-26). I roto i te hoê piha i nia (peneiaˈe i ǒ Maria, metua vahine no Mareko), ua tamau maite na aposetolo haapao maitai e 11 i roto i te pure e te mau taetaeae o Iesu, te tahi atu o ta ˈna mau pǐpǐ e to ˈna metua vahine, o Maria (Mareko 6:3; Iakobo 1:1). E horoahia râ te “toroa [hiˈopoa]” o Iuda, ia vai (Salamo 109:8)? Fatata e 120 pǐpǐ i reira, a maiti ai te Atua i te hoê mono no taua taata haavare ra o tei hoo ia Iesu, e ua faahoˈi te reira i te 12 te numera o te mau aposetolo. E maitihia i te hoê taata o tei riro na ei pǐpǐ i roto i te roaraa o te taviniraa a Iesu e o tei ite i to ˈna faatiaraahia. Parau mau, e tia atoa ia ˈna ia farii e o Iehova to ˈna Raatira. I muri aˈe i te pureraahia, ua tuuhia ˈtura te kelero ia Matatia e ia Iosepha Barasaba. Ua faariro atura te Atua i te kelero ia Matatia. — Maseli 16:33.
7. a) I roto i teihea auraa to Iuda ‘hooraa mai i te hoê fenua iti i te utua o ta ˈna hara’? b) Mea nafea to Iuda poheraa?
7 Mea papu maitai e aita o Iuda Isakariota i farii ia Iehova ei Raatira. Aita anei oia i hoo i te Tamaiti a te Atua e 30 moni ario? Ua faahoˈi aˈera Iuda i taua tino moni ra i te mau tahuˈa rahi, ua faaite aˈera râ o Petero e ‘i hoo na e taua taata ra te hoê fenua iti i te utua o ta ˈna hara’. Eaha ïa te auraa? Oia hoi e ua horoa o Iuda i te moni e te tumu no te hooraahia mai i tei piiha te “fenua toto”,Mt 27:8 vahi o tei itehia e e fenua manina i te pae apatoa o te peho no Hinoma. No te mea e ua ino roa to ˈna mau taairaa e te Raatira no te raˈi, haere atura o Iuda e “taave (...) ia ˈna iho”. (Mataio 27:3-10.) Peneiaˈe paha e ua fati te taura aore ra te amaa o te tumu raau i reira to ˈna taaveraa ia ˈna, e ‘ua mairi ihora oia i raro te mata, amaha ˈtura ropu ia ˈna, purehu atura tana aau i rapae’ i nia i te tahi mau mato taratara. Ia ore roa ˈtu te tahi o tatou ia riro ei taata haavare!
Î roa i te varua moˈa
8. Afea to te mau pǐpǐ a Iesu bapetizoraahia i roto i te varua moˈa, e eaha te ohipa i tupu i reira?
8 Eaha ˈtura ïa no te bapetizoraa i roto i te varua moˈa, bapetizoraa i tǎpǔhia? Ua tupu ïa i te Penetekose o te matahiti 33, ahuru mahana i muri aˈe i to Iesu revaraa (2:1-4). Auê ïa ohipa faahiahia mau e! A feruri na i te ohipa i tupu. Tei roto na pǐpǐ e 120 i te piha teitei, ‘a haruru mai ai no nia mai i te raˈi mai te mataˈi rahi uˈana ra, î roa ˈˈe te fare i parahihia e ratou’. E ere i te hoê mataˈi, ua manaˈohia râ e o te reira iho â. Ua fa maira te hoê arero, “mai te ahi ra te huru”, i nia iho i te pǐpǐ tataitahi e te aposetolo tataitahi. “Î aˈera ratou atoa i te [v]arua [moˈa], ua parau ihora i te parau ěê.” A tupu ai taua bapetizoraa ra, ua faatahinuhia ˈˈera ratou atoa i te varua moˈa, ua faatavaihia e ua tapaohia ratou no te hoê tufaa i te pae varua. — Ioane 3:3, 5; Korinetia 2, 1:21, 22; Ioane 1, 2:20.
9. Ua paraparau aˈera te mau pǐpǐ î roa i te varua moˈa, i te aha?
9 Ua maere ihora te mau ati Iuda e te mau taata o tei farii i te haapaoraa ati iuda ‘no te mau fenua atoa i raro aˈe i teie nei raˈi’ i Ierusalema (2:5-13). Ma te maere mau, ua ani aˈera ratou e: ‘Eaha ra hoi teie i ite ai tatou atoa nei i to tatou iho reo mau i te parauraahia mai?’ Peneiaˈe paha o te reo parauhia i te mau vahi mai te Medai (i te pae hitia o te râ no Iudea), i Pherugia (i Asie Mineure) e i Roma (i Europa). Ua maere roa e rave rahi taata i te faarooraa i te mau pǐpǐ i te parauraa na roto te mau reo ěê “i te peu taa ê a te Atua”,2:11 ua horoa râ te feia tâhitohito i te manaˈo e ua î teie mau taata i te uaina monamona.
Te faaiteraa anaanatae mau i horoahia e Petero
10. Teihea parau tohu ta te ohipa i tupu i te Penetekose o te matahiti 33 i faatupu, e te vai ra anei te hoê â huru tupuraa i to tatou nei tau?
10 Ua horoa o Petero i te faaiteraa ma te haapapu e, i te ivaraa o te hora i te poipoi, eita ïa e nehenehe e taero (2:14-21). Te faatupu ra râ taua ohipa nei i te parau tǎpǔ ta te Atua i faaite no te niniiraa i to ˈna varua moˈa i nia i to ˈna nunaa. Ua faaurua te Atua ia Petero no te haapapu i to tatou nei tau ma te apiti i te mau parau ra “ia tae i te mau mahana hopea ra” e ‘e tohu hoi ratou’. (Ioela 2:28-32.) E horoa mai o Iehova i te mau piri i nia i te raˈi e te mau tapao i nia i te fenua nei na mua ˈˈe i to ˈna mahana rahi, e e ora mai te feia anaˈe o te tiaoro i to ˈna iˈoa ma te faaroo. I to tatou nei mau mahana, e ninii-atoa-hia te varua i nia i te mau kerisetiano faatavaihia e e faatia te reira ia ratou ia ‘tohu’ ma te puai e te aravihi.
11. Eaha ta te mau ati Iuda e ta te Atua i rave no nia ia Iesu?
11 I muri iho, ua faaite atura Petero e o vai te Mesia (2:22-28). Ua haapapu aˈera te Atua e o Iesu te Mesia ma te faatia ia ˈna ia faatupu i te mau ohipa mana, i te mau tapao e te mau piri (Hebera 2:3, 4). Ua rihia râ oia e te mau ati Iuda i nia i te hoê pou ‘i te rima o te taata haapao ore ra’, te mau taata no Roma o tei ore i auraro i te ture a te Atua. “Ua tuuhia mai [o Iesu] (...) i te opua mau e te haapao-atea-raa a te Atua”, oia hoi o te reira te hinaaro o te Atua. Teie râ, ua faatia aˈera te Atua ia Iesu e ua haamoe atura i to ˈna tino taata ia ore te reira e ite i te tahuti. — Salamo 16:8-11.
12. Eaha ta Davida i ite aˈena, e eaha te tia ia rave no te ora mai?
12 Ua tamau â o Petero i te haafaufaa i te mau parau tohu no nia i te Mesia i roto i ta ˈna faaiteraa (2:29-36). Ua parau aˈera oia e ua ite aˈena o Davida i te tia-faahou-raa o te taata rahi roa ˈˈe i rotopu i ta ˈna mau huaai, oia hoi o Iesu te Mesia. Mai to ˈna tiaraa teitei i nia i te raˈi i te pae atau o te Atua, ua ninii aˈera o Iesu i te varua moˈa tei horoahia mai e to ˈna Metua (Salamo 110:1). ‘Ua hiˈo e ua faaroo’ aˈera te feia ta Petero i paraparau atu, i te ohipa a taua varua ra, ma te hiˈo i te mau arero, mai te ahi ra, o tei faaea i nia i te upoo o te mau pǐpǐ e ma te faaroo ia ratou ia paraparau na roto i te mau reo ěê. Ua faaite atoa o Petero i te faufaa ia farii ia Iesu mai te Fatu e te Mesia no te ora mai. — Roma 10:9; Philipi 2:9-11.
Na Iehova e faahaere ra i mua
13. a) Ia bapetizohia ma te tano, eaha te tia i te mau ati Iuda e te mau peroseluto ia farii? b) Ehia rahiraa tei bapetizohia, e eaha te ohipa i tupu i Ierusalema?
13 Ua faatupu te mau parau a Petero i te hoê ohipa maere mau (2:37-42). Ua putapû roa te feia e faaroo ra, o tei farii i te taparahiraahia te Mesia. Ua faaitoito aˈera Petero ia ratou na roto i teie mau parau: “E tatarahapa, e ia bapetizohia outou atoa i roto i te iˈoa o Iesu Mesia ia matara te hara, e horoahia mai ïa te [v]arua [moˈa] ia outou.” Ua farii aˈena te mau ati Iuda e te mau peroseluto, ia Iehova ei Atua no ratou e te hinaaro nei ratou i to ˈna varua. I teie nei râ, e tia ia ratou ia tatarahapa e ia farii ia Iesu mai te Mesia ia bapetizohia ratou i roto i te iˈoa (oia hoi ma te farii i te ohipa e te mau tiaraa) o te Metua, o te Tamaiti e o te varua moˈa (Mataio 28:19, 20). Ma te pororaa ˈtu i taua mau ati Iuda ra e i taua mau peroseluto ra, ua faaohipa aˈera o Petero i te taviri matamua i te pae varua ta Iesu i horoa ˈtu ia ˈna no te tatara i te uputa e aratai ra i te ite e i te ravea no te tomo atu i roto i te Basileia no te raˈi, no te mau ati Iuda faaroo (Mataio 16:19). I taua iho mahana ra, ua bapetizohia atura e 3 000 taata! A feruri na i taua rahiraa ite no Iehova e poro ra i roto i te tuhaa fenua iti no Ierusalema!
14. No te aha e mea nafea to te feia faaroo ‘amuiraa i ta ratou taoˈa’?
14 E rave rahi o te feia no te fenua ěê o te ere ra i te maa no te faaea maoro atu â, te hinaaro nei râ ratou e haapii hau atu â i nia i to ratou faaroo apî e e poro atu ia vetahi ê. Ua tauturu atura te mau pǐpǐ matamua a Iesu i te tahi e te tahi ma te here, mai te mau Ite no Iehova i to tatou nei tau (2:43-47). Ua “amui” atura te feia i faaroo “i ta ratou taoˈa”.2:44 Ua hoo atura vetahi i to ratou mau fenua, e ua tufa ihora i tei noaa mai i te feia i roto i te fifi. Mea na reira to te amuiraa raveraa i te hoê haamataraa faahiahia mau, ‘a amui noa ˈi Iehova i te feia i faaorahia ra i te ekalesia ra aita e mahana i tuua’.
Te hoê faaoraraa e ta ˈna mau faahopearaa
15. Eaha te ohipa i tupu a tomo ai o Petero e o Ioane i roto i te hiero, e eaha te huru o te nunaa?
15 Ua tauturu aˈera Iehova i te mau pǐpǐ a Iesu na roto i te mau “tapao”. (3:1-10.) No reira, i te taime o Petero e o Ioane i tomo ai i roto i te hiero i te hora o te pure faahitihia i te taime o te tusia no te avatea, i te hora 3, haere atura raua na pihai iho i te hoê taata pirioi mai te opu mai â o to ˈna metua vahine, i te pae opani piihia O Nehenehe e o tei aniani noa ra i te tahi mau “taoˈa”. “Aita a ˈu ario e te auro, ta Petero ïa i parau, e ta ˈu râ e vai nei, o ta ˈu ïa e horoa ˈtu na oe: A tia oe i nia, a haere i te iˈoa o Iesu Mesia i Nazareta ra.” I taua iho taime, ua ora ˈtura taua taata ra. A tomo ai oia i roto i te hiero, “ouˈauˈa haere noa ˈtura ma te haamaitai i te Atua”, ua ‘maere ihora’ te nunaa. Peneiaˈe ua haamanaˈo vetahi i teie mau parau e: “Ei reira te pirioi e ouˈauˈa noa ˈi mai te aili.” — Isaia 35:6.
16. Na te aha i faatia i te mau aposetolo ia faaora i te taata pirioi?
16 Ma te hitimahuta, ua putuputu aˈera te nunaa i te poretiko no Solomona, te hoê poretiko tei tapoihia, i te pae hitia o te râ o te hiero. Ua horoa aˈera o Petero i te hoê faaiteraa (3:11-18). Ua faataa ˈtura oia e ua horoa te Atua i te mau aposetolo i te mana no te faaora i taua taata pirioi ra na roto i te arai o Ta ˈna tavini faahanahanahia, oia hoi o Iesu (Isaia 52:13 e tae atu i te 53:12). Ua faarue te mau ati Iuda i taua “Taata Moˈa e te Parau-Tia ra”, ua faatiahia râ oia e Iehova. Oia mau, aita te nunaa e ta ˈna mau taata faatere i ite e te haapohe nei ratou i te Mesia, mea na reira râ to te Atua faatupuraa i te mau parau tohu e faaite ra e ‘e mauiui to ˈna Mesia’. — Daniela 9:26.
17. a) Eaha te tia i te mau ati Iuda ia rave? b) Eaha te ohipa e tupu ra mai te taime te ‘Mesia i tonohia ˈi’ i to tatou nei tau?
17 Ua faaite aˈera o Petero e eaha te tia i te mau ati Iuda ia rave no te ohipa ta ratou i faatupu i nia i te Mesia (3:19-26). E tia ia ratou ‘ia tatarahapa’, aore ra ia faaite e ua hape ratou no ta ratou mau hara, e ‘ia fariu mai’, aore ra ia taui, ma te pee i te hoê haerea taa ê. Mai te peu e e atuatu ratou i te faaroo ia Iesu, te Mesia, ma te farii i te hoo, e faahaumǎrûhia ratou e Iehova, no te mea e faaorehia ta ratou mau hara (Roma 5:6-11). Ua faahaamanaˈo Petero i te mau ati Iuda e o ratou te mau tamarii o te faufaa ta te Atua i faaau i to ratou mau tupuna ra ma te parau ia Aberahama e: “Ei to huaai e hope ai te mau fetii atoa o te ao nei i te ora.”3:25 Ua tono aˈera te Atua na mua roa i to ˈna Tavini mesia no te faaora i te mau ati Iuda tei tatarahapa. Mai te ‘tonoraahia mai te Mesia’3:26 i roto i te puai o te Basileia o te raˈi i te matahiti 1914 ra, te ite nei tatou i te hoê haamau-faahou-raahia faahiahia mau o te mau parau mau e o te faanahonahoraa teotaratia i rotopu i te mau Ite no Iehova. — Genese 12:3; 18:18; 22:18.
Aita ratou e hinaaro ra e mamû
18. Eaha te “ofai” ta te “feia patu fare” ati iuda i faarue, na vai anaˈe e horoa i te ora?
18 Ma te riri i te iteraa ˈtu ia Petero e ia Ioane ia faaite i te tia-faahou-raa o Iesu, ua tuu aˈera te mau tahuˈa rahi, te tavana o te hiero e te mau Sadukea ia raua i roto i te fare tapearaa (4:1-12). Aita te mau Sadukea e tiaturi ra i te tia-faahou-raa, tera râ, e rave rahi atu â ati Iuda tei tiaturi, e ua maraa roa te numera o te mau tane anaˈe, i te 5 000. A uiuihia ˈi ratou e te mau melo o te apooraa rahi i Ierusalema, ua parau aˈera o Petero e ua ora mai te taata pirioi na roto i “te iˈoa o Iesu Mesia o Nazareta”, ta ratou i rî i nia i te hoê pou, o tei faatiahia râ e te Atua. Ua riro mai nei taua “ofai” ra i faaruehia e te “feia patu fare” ei “ofai tiavâ”. (Salamo 118:22.) “Aore roa hoi e ora ia vetahi ê”, ta Petero ïa e parau faahou ra.
19. A faauehia ˈi ratou ia faaea i te poro, eaha ˈtura ta te mau aposetolo i pahono?
19 Ua tamatahia i te haamamû i te mau aposetolo (4:13-22). No te mea e te tia noa ra te taata tei faaorahia, aita ˈtura e nehenehe e patoi i taua “tapao rahi mau”,4:16 ua aˈohia ˈtura râ ia Petero e ia Ioane e “eiaha roa e haapii, eiaha roa e parau ma te iˈoa o Iesu”.4:18 Eaha ˈtura ta ratou pahonoraa? ‘E ore hoi matou e tia ia ore ia parau i ta matou i hiˈo aˈenei, e ta matou i faaroo aˈenei.’ E auraro ratou ia Iehova, to ratou Raatira!
Ua faaroohia ta ratou mau pure
20. Eaha ta te mau pǐpǐ i ani na roto i te pure, e eaha ˈtura te faahopearaa?
20 Mai te mau Ite no Iehova e pure ra i roto i ta ratou mau putuputuraa, ua pure aˈera te mau pǐpǐ a faatia ˈi te mau aposetolo tei faaorahia, i te mea ta ratou i farerei (4:23-31). Ua tapao aˈera ratou e ua tahoê aˈera o Heroda Antipas e o Ponotio Pilato, e oia atoa te tahi mau taata no Roma e ere i te ati iuda e te nunaa Iseraela, no te patoi i te Mesia (Salamo 2:1, 2; Luka 23:1-12). Ei pahonoraa i taua pure ra, ua faaî aˈera o Iehova i te mau pǐpǐ i te varua moˈa, e ua tae roa ia ratou i te faahiti i “te parau a te Atua ma te mǎtaˈu ore”. Aita ratou i ani i to ratou Raatira ia faaore i te hamani-ino-raa, ia horoa râ na ratou i te itoito no te poro ma te mǎtaˈu ore noa ˈtu e te vai ra te reira.
21. O vai o Baranaba, e eaha te mau huru maitai e vai ra ia ˈna ra?
21 Ua tamau noâ te mau taata faaroo i te amui i ta ratou mau taoˈa, e aita hoê aˈe o ratou i fifi noa ˈˈe (4:32-37). I rotopu i te feia i horoa i te hoê ô, te vai ra te ati Levi o Iose no Kupero. Ua topa aˈera te mau aposetolo i to ˈna iˈoa o Baranaba, oia hoi te auraa te “tamaiti o te aˈo”, peneiaˈe paha no te mea e mea horoa ohie noa o ˈna e e taata farii maitai. Aita anei tatou e hinaaro ra e riro mai taua taata ra? — Ohipa 11:22-24.
Ua itehia te tahi feia haavare
22, 23. Eaha te hara ta Anania e ta Saphira i rave, e eaha te haapiiraa ta tatou e nehenehe e huti mai no te ohipa i tupu i nia ia raua?
22 Area o Anania e ta ˈna vahine, o Saphira, aita ïa raua i tamau i te farii ia Iehova mai to raua Raatira (5:1-11). Ua hoo aˈera raua i te hoê fenua e ua tapea noa ˈˈera i te hoê tuhaa o te moni ma te haavare e ua horoahia te taatoaraa i te mau aposetolo. Na roto i te ite ta te varua o te Atua i horoa na ˈna, ua taa aˈera o Petero i to raua haavarevare, o tei haapohe ia raua. Auê ïa faaararaa no te feia e turaihia ra e Satani ia riro ei taata haavare! — Maseli 3:32; 6:16-19.
23 I muri aˈe i taua ohipa ra, aita te mau taata i turaihia e te mau manaˈo iino, i hinaaro e apiti atu e te mau pǐpǐ. Ua riro â vetahi mau taata ei feia faaroo (5:12-16). Hau atu, ua tiaturi aˈera te mau taata maˈi e te feia i peapea i te mau varua faufau, i te puai o te Atua, “e faaora-anaˈe-hia ihora ratou atoa”.5:16
E faaroo matou i te Atua e tia ˈi eiaha te taata
24, 25. No te aha te mau upoo faatere ati iuda i hamani ino ai i te mau aposetolo, e eaha râ te faaueraa tumu ta taua mau taata haapao maitai ra i haamau no te mau tavini atoa a Iehova?
24 Ua tamata aˈera te tahuˈa rahi e te mau Sadukea i te tapea i taua haereraa i mua faahiahia roa ra ma te tuu i te mau aposetolo atoa i roto i te fare tapearaa (5:17-25). Ua faaorahia aˈera râ ratou e te melahi a te Atua i te po, e i te poipoi, te haapii ra ratou i roto i te hiero. Aita te hamani-ino-raa e nehenehe e tapea i te mau tavini a Iehova.
25 Teie nei râ, ua tamata-faahou-hia te mau aposetolo a hopoi-faahou-hia ˈi ratou i mua i te Sunederi (5:26-42). Noa ˈtu e ua aˈohia aˈera ratou ia ore e haapii, ua parau aˈera ratou e: “O te Atua ta matou e faaroo e tia ˈi eiaha te taata.” Ua haamau aˈera ratou i te hoê faaueraa tumu no te mau pǐpǐ a Iesu, faaueraa ta te mau Ite no Iehova e faatura noa ra i teie mahana. I muri aˈe i te faarooraa i te hoê faaararaa horoahia e Gamaliela, te hoê taata haapii Ture, ua haapapai atura te mau tavana i te mau aposetolo, ua aˈo aˈera ia ratou ia faaea i te poro, e tuu ihora ia ratou i rapae.
26. Ua tano te taviniraa a te mau aposetolo i ta te mau Ite no Iehova i to tatou nei tau, i roto i teihea auraa?
26 Oaoa roa ˈˈera te mau aposetolo i te mea e no te iˈoa o Iesu i manaˈohia ˈi ratou e au ia ratou taua hamani ino ra. “E aore e mahana tuua ia ratou i te aˈo, e te haapii atu i te taata, (...) [i te parau apî maitai], i roto i te hiero, e i tera fare, i tera fare.” Oia mau, ua faatupu ratou i ta ratou taviniraa i tera e tera fare. I to tatou nei tau, o ta te mau ite no te Atua atoa e rave ra, o tei roaa atoa ia ratou i to ˈna varua no te mea te auraro nei ratou ia ˈna e te parau nei e: “O Iehova to matou Raatira!”
Eaha ta outou e pahono mai?
◻ Eaha te ohipa ta te mau pǐpǐ a Iesu i rave noa na?
◻ Eaha te ohipa i tupu i te mahana o te Penetekose o te matahiti 33?
◻ Afea e mea nafea to Petero faaohiparaa i te taviri matamua i te pae varua ta Iesu i horoa ia ˈna?
◻ Eaha te haapiiraa ta tatou e nehenehe e huti mai no nia i te ohipa i tupu i nia ia Anania e o Saphira?
◻ A aˈohia ˈtu ai ratou ia faaea i te poro, eaha te faaueraa tumu ta te mau aposetolo i haamau no te mau Ite no Iehova atoa?