E faaite anaˈe i mua i te taata i te faaoraraa

“Te taata atoa e tiaoro i te iˈoa o Iehova ra, e ora ïa.”—ROMA 10:13, MN.

1. I roto i te aamu a te Bibilia, eaha te mau faaararaa i horoahia?

TE FAATAA ra te aamu a te Bibilia e rave rahi mau “mahana o Iehova.” Te Diluvi i te tau o Noa ra, te haamouraa o Sodoma e o Gomora, e nau haamouraa o Ierusalema i te mau matahiti 607 H.T.T. e 70 T.T., e mau mahana rahi riaria ïa o Iehova. E mau mahana haavaraa i nia i te feia i patoi ia Iehova. (Malaki 4:5; Luka 21:22) I taua mau mahana ra, e rave rahi tei pohe no to ratou ino. Area vetahi ra, ua ora mai ïa. Ua horoa Iehova i te mau faaararaa no te faaite i te feia iino i te ati e fatata maira e no te horoa i te feia aau tia i te ravea no te ora mai.

2, 3. (a) Eaha te faaararaa parau tohu tei faahitihia i te Penetekose? (b) Mai te Penetekose o te matahiti 33 T.T. mai â, eaha tei titauhia no te tiaoro i te iˈoa o Iehova?

² Ua riro te haamouraa o Ierusalema i te matahiti 70 T.T., ei hiˈoraa faahiahia no te reira. Na roto i te faaite-atea-raa i taua ohipa ra fatata e 900 matahiti na mua, ua papai te peropheta ra o Ioela e: “E faaite au i te piri i nia i te mau raˈi, e i nia atoa i te fenua; i te toto, e te auahi, e te pou auahi anaˈe. E faarirohia te mahana ei pouri, e te marama ei toto, a tae ai i taua mahana rahi riaria o Iehova ra.” Nafea te taata e nehenehe ai e ora mai i teie huru mahana riaria? Ua papai o Ioela ma te faauruahia e: “E riro hoi e, o tei tau i te iˈoa ra ia Iehova, o te faaorahia ïa: ei te mouˈa ra hoi ei Ziona e ei Ierusalema te ora, ta Iehova i parau maira; i roto hoi i te toea taata ta Iehova e parau ra.”—Ioela 2:30-32.

³ I te Penetekose o te matahiti 33 T.T., ua paraparau atu te aposetolo Petero i te nahoa ati Iuda e peroseluto i Ierusalema, e ua faahiti oia i te parau tohu a Ioela, ma te faaite e e nehenehe te feia e faaroo ra ia ˈna e tiaturi e e tupu te reira i to ratou ra tau: “E na ˈu e tuu i te piri i nia i te raˈi, e te tapao i raro i te fenua; te toto, e te ahi, e te ata auahi hoi. E riro te mahana ei pouri, e te marama ei toto, e tae ai i taua mahana rahi mǎtaˈu [o Iehova] ra. E e riro hoi e, o te tiaoro i te iˈoa o [Iehova] ra, e ora ïa.” (Ohipa 2:16-21; MN) Tei raro aˈe pauroa te feia e faaroo ra ia Petero i te Ture a Mose, e ua ite ïa ratou i te iˈoa o Iehova. No reira o Petero i faataa ˈi e eita e navai noa ia tiaoro i te iˈoa o Iehova. Te vahi taa ê, e tia atoa ia bapetizo i te iˈoa o Iesu, te taata tei haapohehia e tei faatiahia mai i muri iho no te ora ma te pohe ore i nia i te raˈi.—Ohipa 2:37, 38.

4. Eaha te poroi ta te mau Kerisetiano i haaparare?

⁴ Mai te Penetekose mai â, ua haaparare te mau Kerisetiano i te parau no nia ia Iesu tei faatiahia mai. (Korinetia 1, 1:23) Ua faaite ratou e e nehenehe te mau taata e fariihia ei mau tamaiti pae varua a te Atua ra o Iehova, e e riro ei melo no te ‘Iseraela [apî] o te Atua,’ te hoê nunaa pae varua o te ‘faaite hua i te mau maitai o Iehova.’ (Galatia 6:16; Petero 1, 2:9) Te feia e ore e taiva e tae noa ˈtu i te pohe, e noaa ïa ia ratou te ora pohe ore i nia i te raˈi ei feia aiˈa apiti e o Iesu i roto i to ˈna Basileia i nia i te raˈi. (Mataio 24:13; Roma 8:15, 16; Korinetia 1, 15:50-54) Hau atu, ua tia i teie mau Kerisetiano ia faaite i te mahana rahi riaria o Iehova e tae maira. Ua tia ia ratou ia faaara i te nunaa ati Iuda e e tupu te hoê ati aita i tupu aˈenei i Ierusalema e i nia i te feia i parau e e nunaa ratou no te Atua e tae mai i taua taime ra. Teie râ, te vai ra te feia e ora mai. O vai ma ïa? Te feia ïa e tiaoro i te iˈoa o Iehova.

‘I te anotau hopea’

5. Eaha te mau ohipa o te parau tohu tei tupu i teie nei tau?

⁵ I roto e rave rahi mau tuhaa, ua faahohoˈa te mau huru tupuraa i taua tau ra, i ta tatou e ite ra i teie nei tau. Mai te matahiti 1914 mai â, ua ora noa na te huitaata nei i roto i te hoê tau taa ê, o ta te Bibilia i faataa mai “te tau hopea,” “te hopea o [“te faanahoraa o te mau mea,” MN],” e ‘te anotau hopea.’ (Daniela 12:1, 4; Mataio 24:3-8; Timoteo 2, 3:1-5, 13) I to tatou nei senekele, te faatupu rahi nei te mau tamaˈi iino, te haavîraa uˈana mâha ore, e te inoraa te totaiete taata e te natura, i te parau tohu a te Bibilia. E tuhaa anaˈe teie mau mea atoa o te tapao i tohuhia mai e Iesu, o te faaite ra e e fatata te huitaata nei i te ite i te mahana riaria hopea o Iehova. E hope te reira i roto i te tamaˈi ra o Aramagedo, te faito hopea ïa o te ‘ati rahi aitâ ïa ati mai te matamehai mai o teie nei ao, e tae roa aˈenei i teie nei mahana, e e ore roa hoi a muri atu.’—Mataio 24:21; Apokalupo 16:16.

6. (a) Mea nafea to Iehova ohiparaa no te faaora i te feia haehaa? (b) Ihea tatou e ite ai i te mau aˈoraa a Paulo e nafea ia ora mai?

⁶ I te mea e te fatata roa maira te mahana haamouraa, te ohipa nei o Iehova no te faaora i te feia haehaa. I teie “tau hopea,” ua haaputuputu oia i te toea o te Iseraela pae varua o te Atua, e ua haapao atura i ta ˈna mau tavini i nia i te fenua mai te mau matahiti 1930 mai, no te haaputuputu i te “feia rahi roa, e ore roa e pau ia taio, no te mau fenua atoa, e te mau opu atoa, e te mau nunaa atoa, e te mau reo atoa.” Ei pǔpǔ, “e haere mai [teie mau taata] mai roto mai i te ati rahi” ma te ora. (Apokalupo 7:9, 14) Tera râ, nafea te taata tataitahi ia haapapu i to ˈna faaoraraa? Te pahono maira te aposetolo Paulo i taua uiraa ra. I roto i te Roma pene 10, te horoa maira oia i te mau aˈoraa maitatai roa no te ora mai—e mau aˈoraa i tano no to ˈna ra tau e e tano atoa no to tatou nei tau.

Te hoê pure no te faaoraraa

7. (a) Eaha te tiaturiraa i faataahia i roto i te Roma 10:1, 2? (b) No te aha Iehova e faaue ai ia faaite rahi atu â i “te parau apî maitai”?

⁷ I to Paulo papairaa i te buka Roma, ua faarue ê na Iehova i te nunaa Iseraela. Tera râ, ua parau te aposetolo e: “Teie hoi te hinaaro mau i tau aau, e ta ˈu nei pure i te Atua ia Iseraela, ia ora ratou.” Ua hinaaro oia e ia noaa i te mau ati Iuda te ite papu no nia i te hinaaro o te Atua, o te faaora hoi ia ratou. (Roma 10:1, 2) Hau atu, te hinaaro ra Iehova e ia ora te feia e faatupu ra i te faaroo no roto i te ao taatoa o te huitaata nei, mai tei faaitehia i roto i te Ioane 3:16: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” Ua haamatara te tusia o te hoo o Iesu i te eˈa no taua faaoraraa rahi ra. Mai i te tau o Noa ra e i te tahi atu mau mahana haavaraa i muri iho, e “parau apî maitai” ta Iehova te tia ia faaitehia, o te faataa ra i te ravea no te ora mai.—Mareko 13:10, 19, 20, MN.

8. Na roto i te peeraa i te hiˈoraa o Paulo, te faaite nei te mau Kerisetiano mau i te hamani maitai i nia ia vai i teie nei tau, e nafea?

⁸ Na roto i te faaiteraa i to ˈna iho hamani maitai i nia i te mau ati Iuda e te mau Etene, ua poro o Paulo i te mau taime atoa. Ua ‘aˈo oia i te ati Iuda e te Heleni.’ Ua parau atu oia i te mau matahiapo no Ephesia e: “Aore roa aˈenei e mea e maitai ai outou na i vaiihohia e au; aita aˈenei i tuutuu i te aˈo atu ia outou, e te haapii ia outou, e te haapii ia outou i te vahi taata, e i tera fare, i tera fare, i te parau-onoono-maite-raa ˈtu i te ati Iuda e te Heleni, i te tatarahapa i te Atua, e te faaroo i to tatou Fatu ia Iesu Mesia.” (Ohipa 18:4; 20:20, 21) Oia atoa i teie nei tau, te rohi nei te mau Ite no Iehova i roto i te pororaa, eiaha noa i te feia e parau nei e mau Kerisetiano ratou, i te mau taata atoa râ, e tae noa ˈtu i “te hopea o te fenua ra.”—Ohipa 1:8; 18:5.

E faˈi anaˈe i “te parau o te faaroo”

9. (a) Teihea huru faaroo ta te Roma 10:8, 9 e faaitoito ra? (b) Afea e mea nafea tatou ia faˈi i to tatou faaroo?

⁹ E titauhia te hoê faaroo faaoromai ia noaa te ora. Ma te faahiti i te Deuteronomi 30:14, ua parau o Paulo e: “Tei pihai iho te parau ia oe, tei roto i to vaha, e tei roto i to aau, oia hoi te parau o te faaroo ta matou e faaite nei.” (Roma 10:8) Ia poro anaˈe tatou i taua “parau o te faaroo” ra, e aˈa roa ˈtu â te reira i roto i to tatou mafatu. O te mea ïa i tupu i nia ia Paulo, e e nehenehe te tahi atu â o ta ˈna mau parau e haapuai i ta tatou faaotiraa e pee i to ˈna hiˈoraa, e tufa i taua faaroo ra na vetahi ê: “Ia faˈi hoi to vaha i te Fatu ra ia Iesu, e ia faaroo to aau e ua faatia te Atua ia ˈna i te poheraa ra, e ora ïa oe.” (Roma 10:9) Eiaha e faˈi noa i mua ia vetahi ê i te taime bapetizoraa, e faˈi tamau atoa râ, e faaite i mua i te taata ma te itoito i te mau tuhaa rarahi o te parau mau. Te tuu ra teie parau mau i te tapao i nia i te iˈoa faufaa roa o te Fatu Mana hope ra o Iehova; i nia i to tatou Arii Mesia e te Taraehara, te Fatu ra o Iesu Mesia; e i nia i te mau parau tǎpǔ faahiahia o te Basileia.

10. Ia au i te Roma 10:10, 11, nafea tatou ia faaohipa i teie “parau o te faaroo”?

¹⁰ Aita e faaoraraa no te feia e ore e farii e e faaohipa i teie “parau o te faaroo,” mai ta te aposetolo i parau faahou e: “O te aau hoi to te taata nei i faaroo, e ia roaa ˈtu te parau-tia; o te vaha hoi tei faˈi i te parau, e ia roaa ˈtu te ora. Te parau maira hoi te parau i papaihia ra e, O tei faaroo atoa ia ˈna ra, e ore anaˈe ïa e haama.” (Roma 10:10, 11) E tia ia noaa ia tatou te ite papu o teie “parau o te faaroo” e ia tamau i te atuatu i te reira i roto i to tatou mafatu ia turaihia tatou ia faaite i te reira ia vetahi ê. Ua faahaamanaˈo mai o Iesu ia tatou e: “E teie nei, o te haama ia ˈu e ta ˈu nei parau i teie nei ui hara e te faaturi, oia atoa ta te Tamaiti a te taata e haama ia tae mai oia ma te hanahana o to ˈna ra Metua, e ma te mau melahi moˈa atoa ra.”—Mareko 8:38.

11. E tia ia poro i te parau apî maitai i roto i teihea faito, e no te aha?

¹¹ Mai tei tohuhia e te peropheta ra o Daniela, i teie tau hopea, te itehia ra “te feia i haapiihia i te parau maitai ra” ia anaana “mai te anaana o te raˈi ra,” a parare ai te faaiteraa o te Basileia i te hopea o te fenua. Te “faafariu [ra ratou] i te taata e rave rahi i te parau-tia,” ua rahi mau â te ite mau, no te mea te haamaramarama rahi atu â maira Iehova i te mau parau tohu no nia i teie tau hopea. (Daniela 12:3, 4) E poroi faufaa roa teie no te faaoraraa o te feia atoa e here ra i te parau mau e te parau-tia.

12. Nafea te Roma 10:12 e tuati ai i te faaueraa a te melahi ra tei faataahia i roto i te Apokalupo 14:6?

¹² Te parau faahou ra te aposetolo Paulo e: “Aita roa hoi e huru ê i te ati Iuda e te Heleni, e hamani maitai rahi hoi to te Fatu o te mau mea atoa nei, i te taata atoa i tiaoro atu ia ˈna ra.” (Roma 10:12) E tia ia poro i “te [“parau apî maitai,” MN]” i teie nei tau i nia i te hoê faito rahi atu â i nia i te fenua nei—i te mau taata atoa, e tae noa ˈtu i te hopea o te fenua. Te maue noa ra te melahi o te Apokalupo 14:6 na ropu i te raˈi, ma te horoa mai i “te parau apî maitai e tia i te vairaa ra ei pororaa ˈtu i te feia e parahi i te ao nei ra, i te mau fenua atoa, e te mau opu atoa, e te mau reo atoa, e te mau nunaa atoa.” Nafea te feia e farii i te reira e faufaahia ˈi?

E tiaoro anaˈe i te iˈoa o Iehova

13. (a) Eaha ta tatou irava no te matahiti 1998? (b) No te aha e mea tano roa ˈˈe teie irava matahiti i teie nei tau?

¹³ Na roto i te faahitiraa i te Ioela 2:32, te na ô ra o Paulo e: “Te taata atoa e tiaoro i te iˈoa o Iehova ra, e ora ïa.” (Roma 10:13, MN) Mea tano maitai teie mau parau tei maitihia ei irava no te matahiti 1998 a te mau Ite no Iehova! E mea faufaa roa ˈtu â, mai tei ore i itehia aˈenei, ia haere i mua ma te tiaturi ia Iehova, ma te faaite i to ˈna iˈoa e te mau opuaraa rarahi e faataa ra i te reira! Mai i te senekele matamua, oia atoa i te tau hopea o teie faanahoraa ino o te mau mea, te faaroohia ra te piiraa puai ra e: “Ia ora outou i teie nei ui mârô.” (Ohipa 2:40) E titau-manihini-raa teie mai te oto pu ra, no te feia atoa na te ao nei e mǎtaˈu ra i te Atua, ia tiaoro ia Iehova no te faaora mai ia ratou, e i te feia atoa e faaroo i ta ratou faˈiraa i te parau apî maitai i mua i te taata.—Timoteo 1, 4:16.

14. E pii tatou i teihea Mato ia ora tatou?

¹⁴ Eaha te tupu ia tae anaˈe mai te mahana rahi o Iehova i nia i teie fenua? Eita te rahiraa e hiˈo tia ˈtu ia Iehova no te faaoraraa. E “parau [te rahiraa o te taata] i te mau mouˈa, e te mau mato, A mairi mai i nia iho ia matou, e huna ia matou ia moe ê atu i te mata o tei parahi i nia iho i te terono ra, e te riri o te Arenio ra.” (Apokalupo 6:15, 16) Tei roto to ratou tiaturiraa i te mau faanahonahoraa e te mau taatiraa mai te mau mouˈa ra a teie nei faanahoraa o te mau mea. Teie râ, e mea maitai aˈe ahiri ratou i tiaturi i te Mato rahi roa ˈˈe, te Atua ra o Iehova! (Deuteronomi 32:3, 4) Teie ta te Arii ra o Davida i parau no nia ia ˈna: “O Iehova tau pǎpǎ, e tau pare, e tau ora.” O Iehova to tatou “mato e ora ˈi tatou nei.” (Salamo 18:2; 95:1) “E pare etaeta” to ˈna iˈoa, te “pare” etaeta otahi e navai no te paruru ia tatou i roto i te ati e tae maira. (Maseli 18:10) No reira, e mea faufaa roa e ia haapiihia e rave rahi o na taata fatata e ono miria e ora ra i teie nei tau, i te tiaoro i te iˈoa o Iehova ma te haapao maitai e te aau haavare ore.

15. Eaha ta te Roma 10:14 e faaite ra no nia i te faaroo?

¹⁵ Ma te tano, te ani faahou ra te aposetolo Paulo e: “Eaha ra te taata nei e tia ˈi ia tiaoro atu ia ˈna, i tei ore i faaroohia e ratou ra?” (Roma 10:14) E nahoa taata te nehenehe e tauturuhia ia farii i “te parau o te faaroo,” ia nehenehe ratou e tiaoro i te iˈoa o Iehova no te ora mai. E mea faufaa roa te faaroo. Te na ô ra o Paulo i roto i te tahi atu rata e: ‘Aore e faaroo ra e ore roa te Atua e mauruuru: o te haamori i te Atua ra, e faaroo oia e, e Atua [oia], e tia ˈi, e o oia te faautua [maitai] i te feia i imi papu ia ˈna ra.’ (Hebera 11:6; MN) Teie râ, nafea te mau mirioni atu â mau taata e tiaturi ai i te Atua? I roto i ta ˈna rata i to Roma, te ani ra o Paulo e: “Eaha hoi ratou e tia ˈi ia faaroo ia ˈna, i tei ore ratou i ite ia ˈna?” (Roma 10:14) Ua horoa anei Iehova i te ravea no ratou ia ite? Papu maitai! A faaroo na i ta Paulo i parau faahou: “Eaha hoi ratou e ite ai i te [“poro,” MN] ore?”

16. I roto i te faanahoraa a te Atua, no te aha e mea titauhia te feia poro?

¹⁶ Ia au i te haaferuriraa a Paulo, e mea titauhia te feia poro. Ua faaite o Iesu e e parau mau iho â, “e tae noa ˈtu i te hopea o [“te faanahoraa o te mau mea,” MN].” (Mataio 24:14; 28:18-20) Te pororaa, e tuhaa faufaa ïa o te faanahoraa a te Atua no te tauturu i te mau taata ia tiaoro i te iˈoa o Iehova ia ora mai ratou. I roto atoa i te Amuiraa faaroo kerisetiano, aita te rahiraa e faahanahana ra i te iˈoa faufaa roa o te Atua. Ua anoi e rave rahi ia Iehova ma te otohe ore e e piti atu â taata i roto i te haapiiraa maramarama ore o te Toru Tahi. Tei rotopu atoa e rave rahi i te pǔpǔ taata i faahitihia i roto i te Salamo 14:1 e te 53:1 e na ô ra: “Te parau ra te maamaa i roto i to ˈna ra aau, Aore e [“Iehova,” MN]!” E tia ia ratou ia ite e o Iehova te Atua ora, e e tia ia ratou ia maramarama i te auraa taatoa o to ˈna iˈoa, mai te peu e e hinaaro ratou e ora mai i te ati rahi e fatata maira.

Te ‘avae nehenehe’ o te feia poro

17. (a) No te aha e mea tano no Paulo ia faahiti i te hoê parau tohu o te haamau-faahou-raa? (b) Eaha ta te ‘avae nehenehe’ e titau ra?

¹⁷ E uiraa faufaa atu â ta te aposetolo Paulo: “Eaha hoi te taata nei e tia ˈi ia [“poro,” MN] ia ore ratou ia tonohia? oia hoi tei papaihia ra e, O te nehenehe o te avae o te feia i hopoi mai i te parau oaoa o te hau e, o tei hopoi mai i te evanelia o te maitai ra e!” (Roma 10:15) Te faahiti ra o Paulo i ǒ nei i te Isaia 52:7, te hoê tuhaa hoi o te parau tohu o te haamau-faahou-raa tei tupu mai te matahiti 1919 mai â. I teie mahana faahou, te tono ra Iehova i “tei hopoi mai i te parau maitai ra, o tei faaite hua mai i te parau hau ra! o tei hopoi mai i te parau oaoa e te maitai ra, o tei faaite hua mai i te ora ra!” Ma te auraro, te tamau noa ra te “mau [“tiai,” MN]” faatavaihia e to ratou mau hoa i te umere. (Isaia 52:7, 8) Ua rohirohi paha te avae o te feia e faaite ra i te ora i teie mahana, ua reporepo atoa paha, a haere ai ratou na tera e tera fare, teie râ, e mata oaoa to ratou! Ua ite ratou e na Iehova e tono ra ia ratou no te faaite i te parau apî maitai o te hau, e no te tamahanahana i te feia e mihi ra, ma te tauturu ia ratou ia tiaoro i te iˈoa o Iehova no te faaoraraa.

18. Eaha ta te Roma 10:16-18 e parau ra no nia i te faahopearaa o te faaite-haere-raa i te parau apî maitai?

¹⁸ Mai te peu e e ‘faaroo [te taata] i te parau’ aore ra e maiti ratou i te ore e faaroo atu, e tano ïa te mau parau a Paulo e: “Aitâ ratou i ite? Ua ite ïa; ua reva to ratou reo i te mau fenua atoa, e ua tae ta ratou parau i te hopea mai o te fenua ra.” (Roma 10:16-18) “Te parau hua nei te mau raˈi i te hanahana o te Atua,” e itehia ra i roto i ta ˈna mau ohipa poieteraa, e e tia atoa i to ˈna mau Ite i nia i te fenua nei ia faaite “i te matahiti [“hamani maitai o,” MN] Iehova; e te mahana tahooraa na to tatou Atua; e ia haamahanahana i te feia i mihi ra.”—Salamo 19:1-4; Isaia 61:2.

19. Eaha te faahopearaa no te feia e “tiaoro i te iˈoa o Iehova” i teie mahana?

¹⁹ Te fatata roa maira te mahana rahi riaria o Iehova. “Auê! i teie nei mahana e! te fatata maira te mahana o Iehova, ei pohe ïa no ǒ mai i te Puaihope e tae mai ai.” (Ioela 1:15; 2:31) Te pure nei tatou e ia farii e rave rahi atu â mau taata ma te ru i te parau apî maitai, ma te haaputuputu i roto i te faanahonahoraa a Iehova. (Isaia 60:8; Habakuka 2:3) E haamanaˈo tatou e ua haamou te tahi atu â mau mahana o Iehova i te feia iino—i te tau o Noa ra, i te tau o Lota ra, e i te tau o Iseraela e o Iuda apotata. Tei pihai iho tatou i te ati rahi roa ˈˈe, ia tamâ anaˈe te puahiˈohiˈo a Iehova i te ino i nia i teie fenua, ma te haamarari i te eˈa no te hoê paradaiso o te hau mure ore. Tei rotopu atoa anei outou i te feia e “tiaoro i te iˈoa o Iehova” ma te haapao maitai? Mai te peu e e, a oaoa ïa! Te tǎpǔ maira te Atua ia outou e e ora outou.—Roma 10:13, MN.

Nafea outou ia pahono?

◻ Eaha te mau parau apî i faaitehia i muri aˈe i te Penetekose o te matahiti 33 T.T.?

◻ Nafea te mau Kerisetiano ia haapao i “te parau o te faaroo”?

◻ Eaha te auraa e “tiaoro i te iˈoa o Iehova”?

◻ E ‘avae nehenehe’ to te mau vea o te Basileia i roto i teihea auraa?

[Hohoˈa i te api 18]

Te faaite nei te nunaa o te Atua i to ˈna mau maitai i Porto Rico, i Senegala, i Peru, i Papua Niu Guinea—oia, ati aˈe te fenua nei