Te hoê upootiaraa i nia i te ino

“EAHA ra hoi teie nei urî pohe i faaino mai ai i tau fatu, te arii nei, e tuu aˈe na oe ia ˈu e tii au e tairi mai i te afii iho.” No ǒ mai teie aniraa ia Abisai ra, te hoê raatira nuu ati Iseraela. E pahonoraa iria ta ˈna i to ˈna faarooraa i to ˈna ra fatu, te Arii ra o Davida, i te faainoraahia e te hoê ati Beniamina ra o Simei te iˈoa.—Samuela 2, 16:5-9.

Ua faatupu o Abisai i te hoê feruriraa tei farii-pinepine-hia i teie mahana—te faaueraa tumu e tahoo atu. Oia, ua hinaaro Abisai e haamauiui ia Simei no te mau faainoraa ta ˈna i faatae atu i nia ia Davida.

Eaha râ te huru o Davida? Ua tapea Davida ia Abisai, ma te parau atu e: “E vaiiho noa ˈtu.” Noa ˈtu e mea hapa ore te mau pariraa a Simei, ua patoi ra o Davida ma te haehaa i te tamataraa e tahoo atu. Area ra, ua tuu atu oia i teie ohipa i roto i te rima o Iehova.—Samuela 2, 16:10-13.

I to Davida hoˈi-faahou-raa i nia i te terono i muri aˈe i te horo-ê-raa i mua i te hoê orureraa hau o tei ore i manuïa a ta ˈna tamaiti, o Simei tei rotopu i te feia matamua i farii popou ia ˈna e i tatarahapa. Ua hinaaro â o Abisai e haapohe ia ˈna, aita râ Davida i faatia i te reira.—Samuela 2, 19:15-23.

I roto i teie hiˈoraa, ua haapapu o Davida e ua riro oia ei hohoˈa tano no Iesu Mesia, no ˈna hoi te aposetolo Petero i papai e: “O tei ore i faaino atu, ia faainohia mai oia . . . ua pûpû râ ia ˈna iho ia ˈna no ˈna te [“haavaraa,” MN] tia ra.”—Petero 1, 2:23.

I teie mahana, ua faauehia te mau Kerisetiano ia riro “ei aau mǎrû . . . eiaha e tahoo atu i te ino i te ino.” (Petero 1, 3:8, 9) Ma te pee atu i te hiˈoraa i vaiihohia mai e Davida e Iesu Mesia, e nehenehe atoa tatou e ‘haapohe i te ino i te maitai.’—Roma 12:17-21.