Te oraraa ia au i to tatou pûpûraa “i te mau mahana atoa”
“Ia hinaaro te taata i te pee mai ia ˈu ra, e faarue oia ia ˈna iho, a rave ai i tana [pou haamauiuiraa] i te mau mahana atoa, a pee mai ai ia ˈu.”—LUKA 9:23.
1. Eaha te hoê ravea no te faito i to tatou manuïaraa ei mau kerisetiano?
“E FEIA pûpû-mau-hia anei tatou?” Ua riro te pahonoraa i teie uiraa, ia au ia John F. Kennedy, te 35raa o te Peretiteni o te mau Hau Amui no Marite, ei tapao no te faito i te manuïaraa o te feia tiaraa teitei i te pae no te faatereraa. E nehenehe teie uiraa ia hiˈopoa-hohonu-hia e riro ei tamataraa no to tatou manuïaraa ei mau tavini kerisetiano.
2. Mea nafea te hoê titionare i te tatararaa i te parau ra “pûpûraa”?
2 Eaha râ te pûpûraa? Te faataa ra te Webster’s Ninth New Collegiate Dictionary i te reira mai “te hoê ohipa aore ra peu pûpûraa no te hoê huru atua aore ra no te hoê faaohiparaa moˈa,” “te hoê huru haamoriraa aore ra faaineineraa no te hoê opuaraa taa maitai,” “te faatusiaraa ia ˈna iho.” E au ra e ua faaohipa o John F. Kennedy i te parau i te auraa ra e “faatusiaraa ia ˈna iho.” No te hoê kerisetiano, e auraa rahi atu â to te pûpûraa.
3. Eaha te pûpûraa kerisetiano?
3 Ua faaue Iesu Mesia i ta ˈna mau pǐpǐ e: “O te taata i hinaaro i te pee mai ia ˈu, e faarue oia ia ˈna iho, a rave ai i ta ˈna [pou haamauiuiraa], a pee mai ai ia ˈu.” (Mataio 16:24) E ere te pûpûraa ia ˈna iho no te Atua i te faatupu-noa-raa i te hoê ohipa haamoriraa i te sabati noa aore ra i te taime e haere ai oia e mataitai i te tahi vahi haamoriraa. E titau te reira i te hoê huru oraraa no te mau taime taatoa. Te riroraa mai ei kerisetiano o te faarueraa ïa ia ˈna iho aore ra te haapaeraa ia ˈna iho no te tavini i te Atua ta Iesu Mesia i tavini, o Iehova. Hau atu, e rave te hoê kerisetiano i ta ˈna “[pou haamauiuiraa]” na roto i te amoraa i te mauiui atoa o te nehenehe e fa mai no to ˈna riroraa ei pǐpǐ no te Mesia.
Te hiˈoraa tia roa
4. Eaha ta te bapetizoraa o Iesu i faataipe?
4 I to ˈna parahiraa i nia i te fenua, ua faaite o Iesu eaha ta te pûpûraa ia ˈna iho no Iehova e titau ra. Teie to ˈna mau manaˈo hohonu: “Aita aˈenei i tia ia oe te tusia e te perosephora; ua faaau râ oe i te hoê tino no ˈu.” I muri iho ua na ô oia e: “Teie au, e tau Atua, te haere nei au e faatia i to oe hinaaro, (ua papaihia te parau no ˈu i roto i te otaro o te buka ra.)” (Hebera 10:5-7) Mai te hoê melo o te hoê nunaa i pûpûhia, ua pûpûhia oia no Iehova i te fanauraahia mai â. Teie râ, i te omuaraa o ta ˈna taviniraa i nia i te fenua, ua pûpû oia ia ˈna iho na roto i te bapetizoraa ei taipe no to ˈna tuuraa ˈtu ia ˈna iho no te rave i te hinaaro o Iehova, oia hoi e hinaaro o tei titau ia ˈna te pûpûraa i to ˈna ora ei tusia hoo. Ua horoa ïa oia i te hoê hiˈoraa no te mau kerisetiano ia rave i te mea atoa ta Iehova e hinaaro ra.
5. Mea nafea to Iesu faaiteraa i te hoê hiˈoraa maitai no nia i te mau mea materia?
5 I muri aˈe i to ˈna bapetizoraa ua pee Iesu i te hoê huru oraraa o tei aratai ia ˈna i te pae hopea i te hoê pohe tusia. Aita oia i anaanatae i te imiraa i te moni aore ra i te aratairaa i te hoê oraraa fanaˈo e te ohie. Maoti râ, ua riro ta ˈna taviniraa ei tuhaa rahi roa ˈˈe o to ˈna oraraa. Ua faaitoito oia i ta ˈna mau pǐpǐ ia ‘tamau noa i te imi na mua roa te basileia e to ˈna parau-tia,’ e ua faaohipa o ˈna iho i teie mau parau. (Mataio 6:33) Inaha, i te hoê taime ua parau atoa oia e: “E ana to te alope, e tauraa to te manu o te reva, area te Tamaiti a te taata nei aita o ˈna tuaroi.” (Mataio 8:20) Ua nehenehe ta ˈna e faatano i ta ˈna mau haapiiraa no te rave ia aufau mai ta ˈna mau pǐpǐ ia ˈna. I te mea e e tamuta oia ua nehenehe oia e rave i te tahi taime no te hamani i te hoê tauihaa haviti mau no te hoo atu e ia roaa mai ïa maa moni iti ario. Aita râ oia i faaohipa i to ˈna mau aravihi no te imi i te ruperuperaa i te pae materia. Ei mau tavini pûpûhia no te Atua, te pee ra anei tatou ia Iesu ma te tapea i te hoê hiˈoraa tia no nia i te mau mea materia?—Mataio 6:24-34.
6. Nafea tatou ia pee ia Iesu na roto i te riroraa ei mau tavini faatusia pûpûhia no te Atua?
6 Na roto i te tuuraa i ta ˈna taviniraa i te Atua i nia i te parahiraa matamua, aita Iesu i imi i to ˈna iho maitai. Ua riro to ˈna oraraa i te roaraa o ta ˈna taviniraa i na matahiti e toru e te afa i mua i te taata ei oraraa faatusia. I te hoê taime i muri aˈe i te hoê mahana î mau, ma te taime ore hoi no te tamaa, ua ineine Iesu i te haapii atu i te mau taata o tei ‘purara ê e o tei faarue-taue-hia mai te mamoe tiai ore ra.’ (Mataio 9:36; Mareko 6:31-34) Noa ˈtu e ‘ua rohirohi i te tereraa,’ ua haafatata ˈtu oia no te tauaparau e te hoê vahine no Samaria o tei haere mai i te apoo pape a Iakoba i Sikara. (Ioane 4:6, 7, 13-15) Ua haapao noa oia i te maitai o vetahi ê na mua ˈˈe i to ˈna iho. (Ioane 11:5-15) E nehenehe tatou e pee ia Iesu na roto i te horoa-tusia-raa ma te maitai mau i ta tatou iho mau faufaa no te tavini i te Atua e ia vetahi ê. (Ioane 6:38) Na roto i te feruriraa i te ravea e faaoaoa mau ai tatou i te Atua maoti i te rave-noa-raa i te mea iti roa ˈˈe e titauhia ra, e ora ïa tatou ia au i to tatou pûpûraa ia tatou iho.
7. Nafea tatou ia pee ia Iesu na roto i te faatura-noa-raa ia Iehova?
7 Aita roa ˈtu Iesu i tamata i te huti i te ara-maite-raa i nia iho ia ˈna na roto i to ˈna tautururaa i te mau taata. Ua pûpû oia ia ˈna no te Atua no te rave i To ˈna hinaaro. No reira ua imi noa oia e ia fanaˈo Iehova, to ˈna Metua, i te hanahana atoa no te mau mea atoa e ravehia. I to te hoê taata faatere piiraa ia ˈna e “orometua maitai,” na roto i te faaohiparaa i te taˈo ra “maitai” ei tiaraa iˈoa, ua faatitiaifaro Iesu ia ˈna ma te parauraa ˈtu e: “O te Atua anaˈe ra te maitai.” (Luka 18:18, 19; Ioane 5:19, 30) Ua ineine anei tatou, mai ia Iesu, i te huti i te faahanahanaraa eiaha i nia ia tatou i nia râ ia Iehova?
8. (a) Ei taata i pûpûhia, mea nafea to Iesu faataa-ê-raa ia ˈna iho i te ao? (b) Nafea tatou ia pee ia ˈna?
8 I te roaraa o to ˈna oraraa pûpûhia i nia i te fenua, ua faaite Iesu e ua rohi taatoa oia i roto i te taviniraa i te Atua. Ua vai mâ noa oia inaha hoi ua nehenehe oia e pûpû ia ˈna iho ei “arenio ino ore e te [maˈi] ore” no te riro ei tusia hoo. (Petero 1, 1:19; Hebera 7:26) Ua hiˈopoa oia i te mau faaueraa atoa o te Ture a Mose, e tia ˈtura taua ture ra. (Mataio 5:17; Korinetia 2, 1:20) Ua ora oia ia au i ta ˈna iho haapiiraa i te pae morare. (Mataio 5:27, 28) Aita e taata e nehenehe e faahapa tia ˈtu ia ˈna no te tahi mau tumu ino. Oia mau, ‘ua faufau na oia i te parau ino.’ (Hebera 1:9) Ei mau tavini no te Atua, e pee tatou i te hiˈoraa o Iesu na roto i te tapea-mâ-noa-raa i to tatou oraraa e to tatou atoa mau hinaaro i mua i te aro o Iehova.
Mau hiˈoraa ei faaararaa
9. Eaha te hiˈoraa ei faaararaa ta Paulo i faahiti, e no te aha e tia ia tatou ia hiˈopoa i teie hiˈoraa?
9 I te taa-ê-raa o te hiˈoraa o Iesu, te vai ra te hiˈoraa ei faaararaa o te mau ati Iseraela. I muri aˈe atoa i to ratou faaiteraa e e rave ratou i te mea atoa ta Iehova e faaue atu ia ratou ia rave, aita râ ratou i manuïa i te raveraa i to ˈna hinaaro. (Daniela 9:11) Ua faaitoito te aposetolo Paulo i te mau kerisetiano ia huti i te haapiiraa i roto i te ohipa i tupu i nia i te mau ati Iseraela. E tuatapapa anaˈe tatou i te tahi mau tupuraa ta Paulo i faahiti i roto i ta ˈna rata matamua i te feia no Korinetia e e hiˈo anaˈe eaha te mau marei te tia ia apehia e te mau tavini pûpûhia no te Atua o to tatou nei tau.—Korinetia 1, 10:1-6, 11.
10. (a) Mea nafea te mau ati Iseraela i te ‘nounouraa i te mau mea iino’? (b) No te aha ua faautua-rahi-aˈe-hia te mau ati Iseraela i te pitiraa o te taime a amuamu ai ratou no nia i te maa, e eaha te haapiiraa ta tatou e nehenehe e huti mai i roto i teie hiˈoraa ei faaararaa?
10 A tahi, ua faaara o Paulo ia tatou ia ore e “nounou i te mau mea iino.” (Korinetia 1, 10:6) Te faahaamanaˈo ra te reira ia outou i te taime a amuamu ai te mau ati Iseraela no to ratou fiu i te amu-noa-raa i te mâna. Ua tono maira Iehova i te tiaa manu pererau na ratou. Ua tupu hoê â rii huru ohipa hoê matahiti na mua ˈtu i roto i te medebara no Sinai, na mua noa ˈˈe a faˈi ai te ati Iseraela e ua pûpûhia ratou no Iehova. (Exodo 16:1-3, 12, 13) E ere râ i te hoê â roa huru tupuraa. I to Iehova faataeraa ˈtu i te tiaa manu pererau i te taime matamua, aita oia i faahapa i te mau ati Iseraela no to ratou amuamuraa. Teie râ, i taua taime ra, e mea taa ê te huru tupuraa. “E te maa â te maa i to ratou vaha, aita i mǎrǔ, ua tupu aˈera te riri o Iehova i taua mau taata ra, e ua tairi ihora Iehova i taua mau taata ra i te pohe rahi roa.” (Numera 11:4-6, 31-34) Eaha tei taui? Ei nunaa pûpûhia, ua faahapahia ratou i teie nei no ta ratou mau ohipa. Ua aratai to ratou ereraa i te mauruuru no te mau faanahoraa a Iehova ia amuamu ratou ia Iehova, noa ˈtu e ua tǎpǔ ratou e e rave ratou i te mau mea atoa ta Iehova i parau! Hoê â atoa huru te amuamuraa no nia i te airaa maa a Iehova i teie nei mahana. Aita vetahi e mauruuru ra i te mau faanahoraa i te pae varua a Iehova na roto i te arai o “te tavini haapao maitai e te paari.” (Mataio 24:45-47) A haamanaˈo râ e te titau ra to tatou pûpûraa ia tatou ia tapea noa i roto i to tatou feruriraa ma te mauruuru eaha ta Iehova i rave no tatou e ia farii i te maa varua ta Iehova e horoa ra.
11. (a) Mea nafea te mau ati Iseraela i te faainoraa i ta ratou haamoriraa ia Iehova i te haamoriraa idolo? (b) Nafea te hoê huru haamoriraa idolo ia hauti i nia ia tatou?
11 I muri iho, ua faaara o Paulo e: “Eiaha atoa outou ei haamori idolo, mai te hoê pae o ratou ra.” (Korinetia 1, 10:7) I ǒ nei ua faahiti te aposetolo ma te papu maitai i te haamoriraa o te kafa o tei tupu i muri noa ˈˈe to te mau Iseraela faaotiraa i te hoê faaauraa e o Iehova i nia i te Mouˈa Sinai. E parau paha outou e, ‘Ei tavini pûpûhia no Iehova, eita roa ˈtu vau e haamori i te idolo.’ A tapao na râ e i te huru hiˈoraa o te mau ati Iseraela, aita ratou i faaea i te haamori ia Iehova; teie râ, ua faaohipa ratou i te haamoriraa o te kafa—te hoê mea faufau mau i mua i te Atua. Eaha teie huru haamoriraa? Ua pûpû te nunaa i te mau tusia i mua i te kafa, e i muri iho ‘ua parahi ratou i raro no te amu e no te inu. E ua tia aˈera i nia e upa.’ (Exodo 32:4-6) I teie nei mahana, te faahua parau ra paha vetahi e te haamori ra ratou ia Iehova. Ua niuhia râ to ratou oraraa, eiaha i nia i te haamoriraa ia Iehova, i nia râ i te navenaveraa i te mau mea o teie nei ao, e te tamata ra ratou i te faaau i ta ratou taviniraa ia Iehova e teie mau ohipa. Parau mau, e ere oia ma te tipapa-roa-raa ˈtu i mua i te hoê kafa auro, eita râ e taa ê roa ˈtu i te pae o te faaueraa tumu. Aita roa ˈtu te hoê taata o tei hamani i te hoê atua ma to ˈna iho hinaaro e ora ra ia au i to ˈna pûpûraa ia ˈna no Iehova.—Philipi 3:19.
12. Ia au i tei tupu i nia i te mau ati Iseraela e o Baala-peora, eaha te haapiiraa ta tatou e nehenehe e huti mai no nia i te faarueraa ia tatou iho?
12 Te vai ra te tahi atu huru faaanaanataeraa i roto i te hiˈoraa ei faaararaa no muri mai ta Paulo i faahiti. “E eiaha atoa tatou e faaturi mai te hoê pae o ratou i faaturi ra, e pohe ihora e piti ahuru e toru tiahapa i te tausani i te mahana hoê ra.” (Korinetia 1, 10:8) Ua arataihia te mau ati Iseraela, o tei hema i te peu navenave tia ore i te pae morare a te mau tamahine no Moabi, i te haamoriraa ia Baala-peora i Sitima. (Numera 25:1-3, 9) Te faarueraa ia tatou iho no te rave i te hinaaro o Iehova o te farii-atoa-raa ïa i ta ˈna mau ture no nia i te viivii ore i te pae morare. (Mataio 5:27-30) I teie tau toparaa o te mau ture morare, te faahaamanaˈohia ra tatou i te faufaaraa ia vai mâ noa tatou i te mau huru haerea tia ore atoa i te pae morare, ma te auraro i te mana faatere o Iehova ia faaoti eaha te mea maitai e eaha te mea ino.—Korinetia 1, 6:9-11.
13. Nafea te hiˈoraa o Phinehasa ia tauturu ia tatou ia taa eaha ta te pûpûraa no Iehova e titau ra?
13 A topa ˈi e rave rahi i roto i te marei o te poreneia i Sitima, ua ora te tahi pae ia au i ta ratou pûpûraa ia ratou ei nunaa no Iehova. I rotopu ia ratou, ua faaite o Phinehasa ma te faahiahia mau i te itoito. I to ˈna iteraa i te hoê raatira ati Iseraela i te hopoiraa i te hoê vahine ati Midiana i roto i to ˈna fare ie, rave oioi aˈera o Phinehasa i te hoê mahae i roto i ta ˈna rima e patia ˈtura oia ia raua. Ua parau o Iehova ia Mose e: “Ua faafariu ê iho nei Phinehasa . . . i tau riri i te tamarii a Iseraela, i te itoito no ˈna, ta ˈna i rave iho nei i rotopu ia ratou no ˈu nei, i ore i pau ai te tamarii a Iseraela ia ˈu i taua riri no ˈu nei.” (Numera 25:11) Te oreraa e imi i te faaaifaito ia Iehova—o te auraa mau ïa o te pûpûraa. Eita tatou e nehenehe e vaiiho i te tahi mea ia parahi i roto i to tatou mafatu maoti noa hoi te pûpûraa tatou ia tatou no Iehova. Te turai atoa ra to tatou itoito no Iehova ia vai mâ noa te amuiraa na roto i te faaiteraa i te mau matahiapo i te peu faufau i te pae morare, ma te ore e huna i te reira.
14. (a) Mea nafea te mau ati Iseraela i te tamataraa ia Iehova? (b) Nafea te hoê pûpûraa taatoa no Iehova ia tauturu ia tatou ia ore e ‘rohirohi’?
14 Ua faahiti o Paulo i te tahi atu hiˈoraa ei faaararaa: “Eiaha atoa tatou e aa ˈtu [ia Iehova], mai te hoê pae o ratou i aa ra, e pohe ihora i te ophi.” (Korinetia 1, 10:9) I ǒ nei ua paraparau Paulo no nia i te taime a amuamu ai te mau ati Iseraela i te Atua i nia ia Mose i to ratou ‘aau haamataraa i te rohirohi i taua eˈa ra.’ (Numera 21:4) Aita anei outou i rave aˈenei i teie hape? I to outou pûpûraa ia outou iho no Iehova, ua manaˈo anei outou e ua piri roa o Aramagedo? E mea maoro roa anei te faaoromai o Iehova i ta outou i manaˈo na? A haamanaˈo, aita tatou i pûpû ia tatou iho no Iehova no te hoê noa taime aore ra ia tae roa ˈtu i Aramagedo. To tatou pûpûraa ia tatou no teie nei â ïa e a muri noa ˈtu. No reira, “eiaha tatou e rohirohi i te parau maitai, ei te tau mau ra hoi tatou e ooti ai ia ore tatou ia toaruaru.”—Galatia 6:9.
15. (a) I nia ia vai to te mau ati Iseraela ohumuraa? (b) Nafea to tatou pûpûraa no Iehova ia turai ia tatou ia faatura i te mana faatere teotaratia?
15 I te pae hopea, ua aˈo o Paulo no nia i te riroraa ei feia “ohumu” i te mau tavini faatavaihia o Iehova. (Korinetia 1, 10:10) Ua ohumu puai mau te mau Iseraela ia Mose raua o Aarona i to na 10 o na 12 feia hiˈo tonoraahia no te imi i te fenua no Kanaana hoˈiraa mai e te mau parau faataiâraa. Ua paraparau atoa ratou no nia i te monoraa ia Mose mai to ratou raatira e te hoˈiraa ˈtu i Aiphiti. (Numera 14:1-4) I teie nei mahana, te farii ra anei tatou i te aratairaa e horoahia ra ia tatou na roto i te ohiparaa o te varua moˈa o Iehova? Na roto i te iteraa i te airaa maa faahiahia i te pae varua pûpûhia mai e te pǔpǔ o te tavini haapao maitai e te paari, e te papu maitai ra e o vai ta Iesu e faaohipa ra no te hopoi i te “maa i te hora mau ra.” (Mataio 24:45) Te titau ra te pûpûraa ma te nephe taatoa no Iehova ia faatura tatou i ta ˈna mau tavini faatavaihia. Ia ore roa tatou e riro mai te tahi feia ohumu o teie nei tau o tei huri i to ratou ara-maite-raa i nia i te hoê aratai apî, ei auraa taipe, no te faahoˈiraa ia ratou i roto i teie nei ao.
O te taatoa anei e maraa ia ˈu?
16. Eaha te mau uiraa te tia i te mau tavini pûpûhia no te Atua ia aniani ia ratou iho?
16 Eita te mau ati Iseraela e topa i roto i teie mau hape rahi ahiri e ua haamanaˈo ratou e aita e otia i to ratou pûpûraa ia ratou no Iehova. Taa ê atu i teie mau ati Iseraela faaroo ore, ua ora Iesu Mesia ia au i ta ˈna pûpûraa tae roa ˈtu i te hopea. Ei mau pǐpǐ o te Mesia, e pee tatou i to ˈna pûpûraa ia ˈna ma te nephe taatoa, ma te ora eiaha no “te hinaaro o te taata, ma te haapao râ i te hinaaro o te Atua.” (Petero 1, 4:2; a faaau e te Korinetia 2, 5:15.) Te hinaaro o Iehova i teie nei mahana oia hoi ‘ia ora te taata atoa, e ia noaa te ite i te parau mau.’ (Timoteo 1, 2:4) No te tapae i reira, e tia ia tatou ia poro i “te evanelia o te basileia” na mua ˈˈe a tae mai ai te hopea. (Mataio 24:14) Eaha te faito o te tutavaraa te tia ia tatou ia tuu i roto i teie taviniraa? E tia ia tatou ia aniani ia tatou iho e, ‘O te taatoa anei e maraa ia ˈu?’ (Timoteo 2, 2:15) E mea taa ê te mau huru tupuraa. Te oaoa nei Iehova e ia tavinihia oia “i ta te taata i noaa eiaha i tei ore i noaa ia ˈna ra.” (Korinetia 2, 8:12; Luka 21:1-4) Eita te hoê taata e nehenehe e haava i te hohonuraa e te haavare ore o te pûpûraa o te tahi atu taata. E tia i te taata tataitahi ia faito i te aano o ta ˈna iho haamoriraa ia Iehova. (Galatia 6:4) E tia i to tatou here ia Iehova ia turai ia tatou ia aniani e, ‘Nafea vau ia faaoaoa ia Iehova?’
17. Eaha te taairaa e vai ra i rotopu i te haamoriraa e te mauruuru? A faataa mai na.
17 Ia rahi atu â to tatou pûpûraa ia tatou no Iehova e rahi noa ˈtu â tatou i te mauruuru ia ˈna. Ua pûpû te hoê tamaroa e 14 matahiti to ˈna i te fenua Tapone ia ˈna iho no Iehova e ua faataipe oia i teie pûpûraa na roto i te bapetizoraa i roto i te pape. I muri aˈe, ua hinaaro oia e faanuu â i roto i te haapiiraa teitei e ia riro ei aivanaa. Aita oia i manaˈo aˈe i te taviniraa ma te taime taatoa, ei tavini râ i pûpûhia, aita oia i hinaaro e faarue ia Iehova e ta ˈna faanahonahoraa ite-mata-hia. No te faatupu i ta ˈna fa no te toroa, ua haere oia i te hoê fare haapiiraa tuatoru. I reira ua ite oia i te feia faatuitehia o te fare haapiiraa tuatoru o tei titauhia ia pûpû i to ratou oraraa taatoa no to ratou mau hoa aore ra ta ratou mau haapiiraa. Ua aniani oia i roto ia ˈna e, ‘Eaha pai ïa ta ˈu ohipa i ǒ nei? E nehenehe mau anei au e apee i to ratou huru oraraa e e pûpû ia ˈu iho no te ohipa i rapae? Aita anei au i pûpû aˈena ia ˈu no Iehova?’ Ma te hoê mauruuru faaapîhia, ua riro mai oia ei pionie tamau. Ua hohonu atu â to ˈna taaraa i to ˈna pûpûraa ia ˈna e ua turai te reira ia ˈna ia haapapu i roto i to ˈna mafatu ia haere i te vahi atoa e titauhia ra te tauturu. Ua haere oia i te Haapiiraa faaineineraa no te taviniraa e ua faataehia ˈtu te hoê parau taviniraa no te tavini ei mitionare haaati.
18. (a) Eaha te faito e titauhia i roto i to tatou pûpûraa ia tatou no Iehova? (b) Eaha te haamauruururaa te nehenehe e noaa mai ia tatou no to tatou pûpûraa ia tatou no Iehova?
18 Te pûpûraa o to tatou ïa oraraa taatoa. E tia ia tatou ia faarue ia tatou iho e “i te mau mahana atoa” ia pee i te hiˈoraa maitai o Iesu. (Luka 9:23) Na roto i te faarueraa ia tatou iho, eita tatou e ani ia Iehova i te hoê mahana faaearaa ohipa. Te tuea ra to tatou oraraa i te mau faaueraa tumu ta Iehova i haamau no ta ˈna mau tavini. I roto atoa i te mau vahi ta tatou iho e nehenehe e maiti, e mea maitai no tatou ia hiˈo mai te peu e te rave ra tatou i te mau ravea atoa no te aratai i te hoê oraraa pûpûhia no Iehova. A tavini ai tatou ia ˈna i te mau mahana atoa, ma te rave i te mau mea atoa e maraa ia tatou ia rave no te faaoaoa ia ˈna, e manuïa tatou ei mau kerisetiano e e haamaitaihia tatou ma te farii maitai no ǒ mai ia Iehova ra, Tei tia ia haamorihia e tatou ma te nephe taatoa.
E nehenehe anei outou e faataa mai?
◻ Eaha te auraa o te pûpûraa o Iesu Mesia?
◻ No te aha e tia ia tatou ia ape i te amuamu ia Iehova?
◻ Nafea tatou ia ape i te faaô mai i te haamoriraa idolo ma te aravihi i roto i to tatou oraraa?
◻ Na te haamanaˈoraa i te aha e tauturu ia tatou ia ore e ‘rohirohi’ i te raveraa i te hinaaro o te Atua?
[Hohoˈa i te api 17]
Eita te mau kerisetiano “e rohirohi i te parau maitai”