E tupu te hoê tia-faahou-raa o te feia parau-tia
“Te tiaturi nei au i te Atua . . . e e tia-faahou-raa to tei pohe, te feia parau-tia e te feia parau-tia ore.”—OHIPA 24:15.
1. Eaha te tupuraa ta te mau taata atoa i faaruru mai te hararaa o Adamu e o Eva?
“O TEI itea ia oe ta to rima e rave ra, a rave ma to puai atoa ra; aore hoi e ohipa, aore e imiraa, aore hoi e ite, aore hoi e paari, i te apoo ta oe e haere na.” (Koheleta 9:10) Na roto i teie mau parau maiti-maitai-hia, te faataa ra te Arii paari ra o Solomona i te hoê tupuraa ta te mau ui atoa o te huitaata nei i faaruru mai te hararaa mai â o to tatou nau metua matamua, o Adamu e o Eva. Aita e faataaraa, e roohia te mau taata atoa i te pohe—te taata moni e te taata veve, te arii e te taata haihai, te taata taiva ore e te taata faaroo ore. Oia mau, ua “mana” te pohe.—Roma 5:17.
2. No te aha ua haaparuparu vetahi feia haapao maitai i te roaraa o teie nei tau hopea?
2 Noa ˈtu te haereraa i mua o te ite aivanaa i te pae rapaauraa, te mana noa ra te pohe i teie atoa mahana. E ere te reira i te mea maere, ua haaparuparu vetahi i te faaruru-noa-raa i teie enemi tahito. No te aha? I te mau matahiti 1920 i mairi na, ua faaite te Taiete Watch Tower i te poroi ra “E ore roa te mau mirioni taata e ora ra i teie nei e pohe.” O vai ma teie mau mirioni taata? O te mau “mamoe” ïa faahitihia i roto i te mau faataaraa a Iesu no nia i te mau mamoe e te mau puaaniho. (Mataio 25:31-46) Ua tohuhia e e fa mai teie feia e au i te mamoe i te tau hopea, e to ratou tiaturiraa oia hoi te ora mure ore i nia i te fenua o te riro ei paradaiso. A mairi noa ˈi te tau, ua noaa i te nunaa a te Atua te hoê maramarama maitai aˈe no nia i te tiaraa o teie mau “mamoe” i roto i te mau opuaraa a Iehova. Ua itehia e e faataa-ê-hia teie feia faaroo i te mau “puaaniho” mafatu etaeta, e i muri aˈe i to ratou haamouraa, e fanaˈo te mau mamoe i te ao o te Basileia i nia i te fenua nei o tei faaineinehia no ratou.
Te haaputuputuraa o te feia e au i te mamoe
3. I nia i teihea ohipa te nunaa a te Atua i te haamauraa i ta ˈna tutavaraa mai te matahiti 1935 mai â?
3 Mai te matahiti 1935 mai â, ua haamau “te tavini haapao maitai” i to ˈna tutavaraa ia itea mai teie feia e au i te mamoe e ua aratai oia ia ratou i roto i te faanahonahoraa a Iehova. (Mataio 24:45; Ioane 10:16) Ua taa ˈtura i teie mau kerisetiano haapiihia e te faatere ra o Iesu i teie nei i roto i te Basileia o Iehova i nia i te raˈi e te fatata maira te taime o te hopea o teie faanahoraa o te mau mea iino e o te haamauraa o te hoê ao apî i reira te parau-tia e mau ai. (Petero 2, 3:13; Apokalupo 12:10) I roto i taua ao apî ra, e faatupuhia te mau parau putapû a Isaia e: “E na ˈna e haamou roa i te pohe e a muri noa ˈtu.”—Isaia 25:8.
4. Noa ˈtu te tiaturiraa ru e ite i te mana arii o Iehova ia upootia mai i Aramagedo, eaha tei tupu i nia e rave rahi o te mau mamoe ê atu?
4 I te mea e te fatata maira te hopea o te ao a Satani, e hinaaro mau te mau kerisetiano e au i te mamoe e ora tae roa ˈtu i te taime e upootia ˈi te mana arii o Iehova i te ati rahi e tae maira i nia ia Babulonia Rahi e te toea o te ao a Satani. (Apokalupo 19:1-3, 19-21) No e rave rahi râ, eita ratou e ite i te reira. Ua pohe noa ˈtura e rave rahi i tiaturi e tei rotopu ratou i te mau “mirioni” taata o te ore roa e pohe. Ua hamani-ino-hia vetahi no te parau mau i roto i te mau fare auri e te mau aua tapearaa taata aore ra na te feia faaroo maamaa. Ua pohe te tahi pae i roto i te mau ati aore ra i roto i te mau tupuraa parauhia te mau tumu natura—te maˈi e te ruhiruhia. (Salamo 90:9, 10; Koheleta 9:11) Papu maitai, e pohe e rave rahi atu â hou te hopea e tae mai ai. Nafea teie nei feia e ite ai i te faatupuraa o te parau tǎpǔ o te hoê ao apî i reira te parau-tia e mau ai?
Te tiaturiraa o te tia-faahou-raa
5, 6. Eaha te oraraa no a muri aˈe no te feia e tiaturiraa no te fenua to ratou o tei pohe na mua ˈˈe ia Aramagedo?
5 Ua horoa te aposetolo Paulo i te pahonoraa i to ˈna paraparauraa i mua i te tavana roma ra o Felisi. Mai tei faataahia i roto i te Ohipa 24:15, ua parau o Paulo ma te mǎtaˈu ore e: “Te tiaturi nei au i te Atua . . . e e tia-faahou-raa to tei pohe, te feia parau-tia e te feia parau-tia ore.” Te horoa maira te tiaturiraa o te tia-faahou-raa i te itoito i mua i te mau ati ino mau. No teie tiaturiraa, eita to tatou mau hoa here o te maˈihia ra e o te manaˈo ra e e pohe ratou e haaparuparu roa. Noa ˈtu eaha te tupu mai, ua ite ratou e e ooti ratou i te haamauruururaa o te haapao maitai. No te tiaturiraa o te tia-faahou-raa, ua ite to tatou mau taeae e mau tuahine itoito o te faaruru ra i te pohe i mua i te feia hamani ino e eita roa ˈtu teie nei feia e upootia mai. (Mataio 10:28) Ia pohe te hoê taata i roto i te amuiraa, e oto tatou e ua moe teie taata. I te hoê â taime, mai te peu e o te hoê teie tane aore ra vahine o te mau mamoe ê atu, te oaoa nei tatou e ua faaite to tatou hoa faaroo i te haapao maitai tae roa ˈtu i te hopea e te taoto ra oia i teie nei, ma te papu ia ˈna e i te hoê oraraa no a muri aˈe i roto i te ao apî a te Atua.—Tesalonia 1, 4:13.
6 Oia mau, e tuhaa faufaa roa te tiaturiraa o te tia-faahou-raa no to tatou faaroo. No te aha e mea puai mau to tatou tiaturiraa i te tia-faahou-raa, e na vai e tufa ra i teie tiaturiraa?
7. Eaha te tia-faahou-raa, e eaha vetahi mau irava o te faaite ra i teie tiaturiraa papu?
7 Te parau heleni ra no te parau “tia-faahou-raa” o a·naʹsta·sis ïa, te auraa ra “tiaraa i nia.” Te faahoro ra te reira na mua roa i te hoê tiaraa mai te pohe mai. Ma te anaanatae, aita te parau ra “tia-faahou-raa” e itehia ra i roto i te mau Papai Hebera, te faataa-maitai-hia ra te tiaturiraa o te tia-faahou-raa i reira. Ei hiˈoraa, te ite ra tatou i te reira i roto i te mau parau piihia e Ioba a mauiui ai oia: “Ahiri oe e faatapuni ia ˈu i hade e; . . . ahiri oe e faataa i te taime, a manaˈo mai ai ia ˈu nei!” (Ioba 14:13) Hoê â atoa, i roto i te Hosea 13:14, te taiohia ra e: “E faaora vau ia ˈna i te apoo ra; e hoo faahou atu vau ia ratou mai te pohe mai; E te pohe e, Eihea to oe tara? E te apoo e, Eihea to oe pohe?” I roto i te Korinetia 1, 15:55, ua faaohipa te aposetolo Paulo i teie mau parau e ua faaite oia e e upootiahia i nia i te pohe na roto i te tia-faahou-raa. (Papu maitai, i roto i taua irava ra ua faahiti o Paulo i te tia-faahou-raa i nia i te raˈi.)
Te feia faaroo “i tiahia”
8, 9. (a) Nafea te mau taata tia ore e nehenehe ai e fanaˈo i te tia-faahou-raa o te feia parau-tia? (b) Eaha te niu o to tatou tiaturiraa i te hoê oraraa eita e faahopehia e te pohe?
8 I roto i ta ˈna faataaraa ia Felisi, faahitihia i te paratarapha 5, ua parau o Paulo e e tupu te hoê tia-faahou-raa o te feia parau-tia e o te feia parau-tia ore. O vai te feia parau-tia o te faatiahia mai? Inaha, aita e taata parau-tia mai to ˈna â fanauraahia mai. E feia hara anaˈe tatou pauroa mai te fanauraahia mai, e te rave nei tatou i te mau hara i te roaraa o to tatou oraraa—o te faautua pohe ia tatou i nia e piti huru. (Roma 5:12; 6:23) Teie râ, i roto i te Bibilia te ite ra tatou i te parau ra “i tiahia.” (Roma 3:28) Te faataa ra te reira i te mau taata, noa ˈtu e e mea tia ore ratou, e ua faaorehia ta ratou hara e Iehova.
9 Te faaohipa-rahi-aˈe-hia ra te parau i nia i te mau kerisetiano faatavaihia, e tiaturiraa no te raˈi to ratou. I roto i te Roma 5:1, te parau ra te aposetolo Paulo e: “E teie nei, ua tiahia tatou i te faaroo, e hau to tatou i te Atua ra, i to tatou Fatu ia Iesu Mesia ra.” Ua faarirohia te mau kerisetiano atoa i faatavaihia ei feia parau-tia no to ratou faaroo. Te faaroo i roto i te aha? Mai ta Paulo e haamaramarama maitai ra i roto i te buka a Roma, o te faaroo ïa i roto ia Iesu Mesia. (Roma 10:4, 9, 10) Ua pohe o Iesu ei taata tia roa e i muri iho ua faatiahia mai oia mai te pohe mai e ua paiuma oia i nia i te raˈi no te pûpû i te faufaa o to ˈna ora taata no tatou. (Hebera 7:26, 27; 9:11, 12) I to Iehova fariiraa i teie tusia, ua faaatea ê mai o Iesu te nunaa taata i te tîtîraa o te hara e o te pohe. Te faufaa-rahi-hia ra te feia o te faaohipa ra i te faaroo i roto i taua faanahoraa ra. (Korinetia 1, 15:45) I nia i teie niu e tiaturiraa to te mau tane e to te mau vahine haapao maitai e fanaˈo i te hoê oraraa te ore roa e faahopehia e te enemi rahi, te pohe.—Ioane 3:16.
10, 11. (a) Eaha te tia-faahou-raa e tiai maira i te mau kerisetiano haapao maitai i faatavaihia? (b) Eaha te huru tia-faahou-raa tei tiaturihia na i te feia haamori hou te tau kerisetiano?
10 Maoti te tusia hoo o Iesu, te vai ra i te feia haapao maitai i faatavaihia, faarirohia ei feia parau-tia, te tiaturiraa papu e e faatiahia mai ratou ei mau varua pohe ore, mai ia Iesu. (Apokalupo 2:10) Te faahitihia ra to ratou tia-faahou-raa i roto i te Apokalupo 20:6, o te na ô ra e: “E ao to ˈna, e te moˈa, to te noaa ia ˈna te tia-faahou-raa matamua ra; e ore roa te piti o te pohe e tiaia noa mai i te reira: e riro râ ratou ei tahuˈa na te Atua e na te Mesia, e e hau to ratou ia ˈna ra e ia hoê tausani i te matahiti.” O te tia-faahou-raa no te raˈi teie. A tapao na râ e te pii ra te Bibilia i te reira e “te tia-faahou-raa matamua,” te auraa ra e te vai ra te tahi atu â mau taata o te faatiahia mai.
11 I roto i te Hebera pene 11, ua faahiti o Paulo i te hoê anairaa roa o te mau tavini a te Atua hou te tau kerisetiano o tei faatupu i te hoê faaroo puai i roto i te Atua ra o Iehova. Ua tiaturi atoa ratou i te hoê tia-faahou-raa. I te irava 35 o taua pene ra, te faahiti ra o Paulo i te mau tia-faahou-raa semeio o tei tupu i te roaraa o te aamu o Iseraela, ma te parau e: “E i noaa faahou hoi ta te mau vahine tamarii i pohe ra, i faaora-faahou-hia ïa; e te tahi pae i haamauiuihia ïa, aore i rave i te ora, ia noaa ia ratou te ora faahou, te mea maitai roa ra.” Ua nehenehe teie mau ite haapao maitai no tahito ra e tiaturi i te hoê tia-faahou-raa maitai aˈe i tei ravehia, ei hiˈoraa, e Elia e Elisaia. (Te mau arii 1, 17:17-22; Te mau arii 2, 4:32-37; 13:20, 21) To ratou tiaturiraa o te tia-faahou-raa ïa i roto i te hoê ao i reira eita te mau tavini o te Atua e haamauiuihia no to ratou faaroo, te hoê ao i reira eita te mau vahine e erehia i to ratou feia here i roto i te pohe. Oia mau, ua tiaturi ratou i te tia-faahou-raa mai te pohe mai i roto i te hoê â ao apî ta tatou e tiai ra. (Isaia 65:17-25) Aita Iehova i faaite atu ia ratou mai ta ˈna i faaite ia tatou no nia i teie ao apî. Noa ˈtu râ, ua ite ratou e e tae mai oia, e ua hinaaro ratou e ora i roto.
Te tia-faahou-raa i nia i te fenua
12. Ua faarirohia anei te feia haapao maitai hou te tau kerisetiano ei feia parau-tia? A faataa.
12 E tia anei ia tatou ia manaˈo e e tuhaa to te faatiaraa o teie mau tane e mau vahine haapao maitai hou te tau kerisetiano i roto i taua ao apî ra no te tia-faahou-raa o te feia parau-tia? Papu maitai e e, no te mea te faariro ra te Bibilia ia ratou ei feia parau-tia. Ei hiˈoraa, te faahiti ra te pǐpǐ ra o Iakobo i te hoê tane e te hoê vahine no tahito ra o tei faarirohia ei feia parau-tia. O Aberahama ïa te tane, te tupuna o te nunaa taata Hebera. No nia ia ˈna te taiohia ra e: “Ua faaroo Aberahama i te Atua, e i haapaohia ˈtura ei parau-tia na ˈna: e i parauhia mai hoi oia e, e Taua no te Atua.” O Rahaba ïa te vahine, te hoê vahine e ere oia i te ati Iseraela o tei faatupu i te faaroo i roto ia Iehova. Ua ‘faarirohia oia ei vahine parau-tia’ e ua riro mai oia ei melo o te nunaa Hebera. (Iakobo 2:23-25) No reira, ua faarirohia te mau tane e te mau vahine no tahito ra o tei faaohipa i te hoê faaroo puai i roto ia Iehova e ta ˈna mau parau tǎpǔ e o tei faaea taiva ore noa e tae noa ˈtu i te pohe, ei feia parau-tia e Iehova i nia i te niu o to ratou faaroo, e ma te feaa ore e fanaˈo ratou i te ‘tia-faahou-raa o te feia parau-tia.’
13, 14. (a) Nafea tatou e ite ai e e nehenehe te mau kerisetiano e tiaturiraa no te fenua to ratou e faarirohia ei feia parau-tia? (b) Eaha te auraa o te reira no ratou?
13 Teie râ, eaha ïa no te feia e au i te mamoe i teie nei mahana, te feia e tiaturiraa no te fenua to ratou o te pûpû nei ia ratou no Iehova e o tei pohe taiva ore i teie tau hopea? E fanaˈo anei ratou i te tia-faahou-raa o te feia parau-tia? Oia mau. Ua ite-orama-hia te hoê nahoa rahi o teie nei feia haapao maitai e te aposetolo Ioane. A tapao na mea nafea to ˈna faataaraa ia ratou: “Hiˈo atura vau, e inaha e feia rahi roa, e ore roa e pau ia taio, no te mau fenua atoa, e te mau opu atoa, e te mau nunaa atoa, e te mau reo atoa, i te tia-noa-raa i mua i te terono, e i mua i te Arenio, ma te ahu teatea i te ahuraa e ma te amaa tamara i to ratou rima; e ma te pii hua hoi to ratou reo, i te na ôraa e, Tei to tatou Atua te ora. tei parahi i nia iho i te terono ra, e tei te Arenio.”—Apokalupo 7:9, 10.
14 A tapao e te tiaturi papu ra teie nei feia haehaa i to ratou faaoraraa, e te faatae nei ratou i te reira ia Iehova e ia Iesu, “te Arenio.” Hau atu, te tia ra ratou i mua ia Iehova e te Arenio, ma te ahu teatea. No te aha ma te teatea? Te parau ra te hoê mea ora i nia i te raˈi ia Ioane e: “Ua horoi i to ratou ahu, e ua teatea, i te toto o te Arenio ra.” (Apokalupo 7:14) I roto i te Bibilia, te faataipe ra te peni teatea i te viivii ore, te parau-tia. (Salamo 51:7; Daniela 12:10; Apokalupo 19:8) Te auraa o te tupuraa e te itehia ra te nahoa rahi ma te ahu teatea oia hoi te faariro ra Iehova ia ratou ei feia parau-tia. Nafea ïa e nehenehe ai? No te mea ua horoi ratou, mai te itehia ra, i to ratou ahu i roto i te toto o te Arenio. Te faaohipa ra ratou i te faaroo i roto i te toto i maniihia o Iesu Mesia e no reira ua faarirohia ratou ei feia parau-tia mai te mau hoa o te Atua ma te tiaturiraa e ora mai mai te ati rahi. No reira, e nehenehe te mau kerisetiano haapao maitai atoa i pûpû ia ratou i teie nei o te ‘nahoa rahi’ o te pohe na mua ˈˈe i te ati rahi e papu e e faufaahia ratou i te tia-faahou-raa o te feia parau-tia i nia i te fenua.
15. I te mea e e faatiahia mai te feia parau-tia e te feia parau-tia ore, eaha te haamaitairaa o te tia-faahou-raa o te feia parau-tia?
15 Ua faataahia teie tia-faahou-raa i roto i te Apokalupo pene 20, irava 13, ma teie mau parau: “E ua tuu maira te miti i te feia i pohe i roto ia ˈna ra, e ua tuu maira te apoo e hade i te feia i pohe i roto ia raua ra, e haavahia ihora ratou atoa i ta ratou mau ohipa.” No reira, i te roaraa o te Mahana Haavaraa rahi a Iehova e tausani matahiti, e faatiahia mai te feia atoa i roto i te mehara o te Atua—te feia parau-tia e te feia parau-tia ore. (Ohipa 17:31) E mea maitai roa ˈtu â râ no te feia parau-tia! Ua farerei ê na ratou i te oraraa o te faaroo. Ua fanaˈo aˈena ratou i te hoê taairaa piri roa e Iehova e te tiaturiraa i roto i te faatupuraa o ta ˈna mau opuaraa. E ara mai te mau ite parau-tia hou te tau kerisetiano mai te pohe mai ma te ru i te haapii mea nafea te mau parau tǎpǔ a Iehova no nia i te Huaai i te faatupuraahia. (Petero 1, 1:10-12) E ora mai te feia o te mau mamoe ê atu ta Iehova e faariro ra ei feia parau-tia i to tatou nei mahana i te peapea rahi ma te ineine i te haamau i te Paradaiso i nia i te fenua nei o ta ratou i paraparau na ia faaite ratou i te parau apî maitai i roto i teie faanahoraa o te mau mea. Auê ïa tau oaoa e!
16. Eaha ta tatou e nehenehe e parau no nia i te Mahana Haavaraa o te tia-faahou-raa o te feia i pohe i to tatou nei tau?
16 I te roaraa o taua Mahana Haavaraa ra e tausani matahiti, afea mau te feia taiva ore i pohe i teie mau matahiti hopea o te faanahoraa o te mau mea iino a Satani e faatiahia mai ai? Aita te Bibilia e faaite ra. Teie râ, e ere anei i te mea tia ia manaˈo e e faatiahia mai te feia faarirohia ei feia parau-tia o tei pohe i to tatou nei tau e no reira e nehenehe ratou e apiti atu i te nahoa rahi o te feia e ora mai ia Aramagedo i roto i te ohipa farii-popou-raa i te mau ui faatia-matamua-hia mai te pohe mai? E, oia mau!
Te hoê tiaturiraa o te horoa i te tamahanahanaraa
17, 18. (a) Eaha te tamahanahanaraa ta te tiaturiraa o te tia-faahou-raa e pûpû maira? (b) Eaha te turai ra ia tatou ia faaite no nia ia Iehova?
17 Te horoa ra te tiaturiraa o te tia-faahou-raa i te puai e te tamahanahanaraa i te mau kerisetiano atoa i teie nei mahana. Mai te peu e e vai taiva ore noa tatou, eita te hoê tupuraa manaˈo-ore-hia e te hoê noa ˈˈe enemi e nehenehe e eiâ i ta tatou haamauruururaa! Ei hiˈoraa, i roto i te Buka matahiti a te mau Ite no Iehova 1992, i te api 177, te faaitehia ra te mau hohoˈa o te mau kerisetiano itoito i Etiopia o tei pohe maoti i te faataiva i to ratou faaroo. Te na ô ra te nota e: “Te mau hohoˈa mata ta tatou e tiai nei i te tia-faahou-raa.” Auê haamaitairaa taa ê ia haamatau i teie nei feia e vetahi atu â eita e pau ia taio o tei faaite i te hoê â haapao maitai i mua i te pohe!
18 Eaha ïa no te feia ta tatou iho e here nei e to tatou mau hoa o te ore, no to ratou matahiti aore ra hapepa, e ora mai i te ati rahi? Ia au i te tiaturiraa o te tia-faahou-raa, te vai ra ia ratou i te hoê oraraa no a muri aˈe faahiahia mau mai te peu e e vai taiva ore noa ratou. E mai te peu e e faaohipa atoa tatou ma te itoito i te faaroo i roto i te tusia hoo o Iesu, e oraraa no a muri aˈe nehenehe mau to tatou. No te aha? No te mea, mai ia Paulo, te tiaturi nei tatou i te “tia-faahou-raa to tei pohe, te feia parau-tia e te feia parau-tia ore.” Ma to tatou mafatu atoa, e haamauruuru tatou ia Iehova no teie tiaturiraa. Ma te papu maitai, e turai te reira ia tatou ia faahiti i te mau parau a te papai salamo e: “E faaite i to [te Atua] hanahana i roto i te mau etene; e ta ˈna ra mau ohipa taa ê i roto i te taata atoa ra. E rahi hoi Iehova, e ia rahi hoi te haamaitai ia ˈna.”—Salamo 96:3, 4.
E nehenehe anei outou e faataa mai?
◻ Eaha te mau irava o te tauturu mai ia haapapu i to tatou tiaturiraa i te tia-faahou-raa i nia i te fenua?
◻ I nia i teihea niu e faarirohia ˈi te mau kerisetiano i teie nei ei feia parau-tia?
◻ Nafea te tiaturiraa o te tia-faahou-raa e horoa mai ai ia tatou te itoito e te manaˈo papu?
[Hohoˈa i te api 9]
Mai ia Paulo, te tiaturi ra te mau kerisetiano faatavaihia i te tia-faahou-raa i nia i te raˈi