Teie te mahana faaoraraa!
“Inaha, teie taua anotau au [taa ê] ra; inaha, teie taua mahana faaoraraa ra.”—KORINETIA 2, 6:2; MN.
1. Eaha te titauhia no te fanaˈo i te hoê tiaraa fariihia e te Atua e te Mesia?
UA FAATAA o Iehova i te hoê mahana e haava ˈi oia i te huitaata nei. (Ohipa 17:31) Mai te peu e e mahana faaoraraa te reira no tatou, e hinaaro ïa tatou i te hoê tiaraa fariihia e a ˈna e ta ˈna Haava i maiti ra o Iesu Mesia. (Ioane 5:22) Te titau ra taua tiaraa ra i te hoê haerea e tuati ra i te Parau a te Atua e i te faaroo o te turai ia tatou ia tauturu ia vetahi ê ia riro ei pǐpǐ mau na Iesu.
2. No te aha te ao taata nei i atea ê ai i te Atua?
2 No te mea ua naeahia ratou i te hara, ua atea ê te ao taata nei i te Atua. (Roma 5:12; Ephesia 4:17, 18) E nehenehe râ te feia ta tatou e poro ra e fanaˈo i te ora mai te peu noa e e faahau ratou e o ˈna. Ua faataa maitai te aposetolo Paulo i te reira i to ˈna papairaa i te mau Kerisetiano no Korinetia. E hiˈopoa anaˈe ïa i te Korinetia 2, 5:10 e tae atu i te 6:10 no te ite i ta Paulo i parau no nia i te haavaraa, te faahauraa e te Atua, e te faaoraraa.
‘Te faaitoito noa nei matou i te taata’
3. Nafea to Paulo ‘faaitoito-noa-raa i te taata,’ e no te aha e tia ia tatou ia na reira atoa i teie mahana?
3 Ua faatuati o Paulo i te haavaraa i te pororaa i to ˈna papairaa e: “E fa paatoa ˈtu hoi tatou i mua i te haavaraa a te Mesia; ia [noaa i] te taata atoa e ati noa ˈˈe i te utua e au i te mau mea i ravehia e ana i roto i te tino nei, te maitai e te ino. E teie nei, no te mea ua ite matou i te [mǎtaˈu] o te Fatu ra, i [faaitoito noa ˈi] matou nei i te taata.” (Korinetia 2, 5:10, 11; MN) Ua ‘faaitoito noa [te aposetolo] i te taata’ na roto i te pororaa i te parau apî maitai. E tatou ïa? I te mea e ua fatata te hopea o teie faanahoraa ino o te mau mea, e tia ia tatou ia tutava i te faaitoito ia vetahi ê ia rave i te mau taahiraa avae e titauhia no te fanaˈo i te haavaraa maitai a Iesu e i te farii maitai o te Tumu o te ora, te Atua ra o Iehova.
4, 5. (a) No te aha eiaha tatou e faaahaaha no ta tatou mau ohipa i rave i roto i te taviniraa a Iehova? (b) No teihea mea i faahanahana ˈi Paulo ia ˈna iho “no te Atua”?
4 Mai te peu râ e ua haamaitai te Atua i ta tatou taviniraa, eiaha tatou e faaahaaha. I Korinetia, ua faahanahana vetahi ia ratou iho aore ra i te tahi atu mau taata, o tei faaamahamaha ïa i te amuiraa. (Korinetia 1, 1:10-13; 3:3, 4) Teie ta Paulo i papai no nia i taua huru tupuraa ra: “Aita . . . matou e haamaitai faahou ia matou iho ia outou na, ia noaa râ to outou oaoaraa ia matou nei, ei parauraa ˈtu na outou i te feia i teoteo i te huru i rapae au aˈe aore i te [“mafatu,” MN] ra. Te huru ê nei matou ra, no te Atua ïa; e te haapao nei matou, no outou ïa.” (Korinetia 2, 5:12, 13) Aita te feia teoteo e anaanatae ra i te tahoê e i te vai-maitai-raa i te pae varua o te amuiraa. Ua hinaaro ratou e faaahaaha i te huru rapaeau eiaha râ i te tautururaa i te mau hoa faaroo ia faatupu i te mafatu maitai i mua i te aro o te Atua. No reira o Paulo i aˈo ai i te amuiraa e i papai ai i muri iho e: “O tei arue râ, ia arue oia [“ia Iehova,” MN].”—Korinetia 2, 10:17.
5 Aita anei o Paulo i faahanahana ia ˈna iho? Ua manaˈo paha vetahi e oia no te mea ua parau o Paulo e e aposetolo oia. Ua tia râ ia ˈna ia faahanahana ia ˈna iho “no te Atua.” Ua faahanahana oia ia ˈna iho no ta ˈna mau haapapuraa ei aposetolo, ia ore hoi to Korinetia e faarue ia Iehova. Ua na reira o Paulo no te faahoˈi mai ia ratou i te Atua ra no te mea ua faaruri ê te mau aposetolo hape ia ratou. (Korinetia 2, 11:16-21; 12:11, 12, 19-21; 13:10) Aita râ o Paulo i tamata noa i te faaiteite i ta ˈna mau mea i rave i te mau taata atoa.—Maseli 21:4.
Te faahepo ra anei te here o te Mesia ia outou?
6. Nafea te here o te Mesia ia ohipa i nia ia tatou?
6 Ei aposetolo mau, ua haapii o Paulo ia vetahi ê no nia i te tusia taraehara o Iesu. Ua ohipa te reira i nia i te oraraa o Paulo, no reira oia i papai ai e: “Te faahepo nei hoi te here o te Mesia ia matou, no te mea ua manaˈo matou e ua pohe te hoê noa taata no te taatoaraa; no reira ïa ua pohe te taatoaraa; e ua pohe hoi oia no te taata atoa, ia ore te feia e ora ra ia ora faahou no ratou noa iho, no ˈna râ o tei pohe no ratou e tei tia faahou mai.” (Korinetia 2, 5:14, 15, MN) Ua faaite mau â o Iesu i te here i to ˈna horoaraa i to ˈna ora no tatou! Ia riro mau â ïa te reira ei puai o te turai ia tatou i roto i to tatou oraraa. E tia i te mauruuru no to Iesu horoaraa i to ˈna ora no tatou, ia turai ia tatou ia faaitoito i te faaite i te parau apî maitai o te faaoraraa ta Iehova i horoa na roto i ta ˈna Tamaiti here. (Ioane 3:16; a faaau e te Salamo 96:2.) Te faahepo ra anei “te here o te Mesia” ia outou ia apiti ma te itoito i roto i te pororaa i te Basileia e te faariroraa i te taata ei pǐpǐ?—Mataio 28:19, 20.
7. Eaha te auraa eiaha e ‘haapao i te taata i te haapaoraa o te tino’?
7 Na roto i te faaohiparaa i to ratou oraraa no te faaite i te mauruuru no ta te Mesia i rave no ratou, ‘aita’ te feia faatavaihia ‘e ora faahou ra no ratou noa iho, no ˈna râ.’ Ua parau o Paulo e: “E teie nei e ore atura matou e haapao noa ˈtu i te taata i te haapaoraa o te tino nei; e ua haapao matou i te Mesia i te haapaoraa o te tino ra, teie nei râ e ore matou e haapao faahou ia ˈna i reira.” (Korinetia 2, 5:16) Eiaha te mau Kerisetiano e hiˈo i te taata ma te hoê huru pae tino, na roto paha i te faateiteiraa i te mau ati Iuda i nia ˈˈe i te mau Etene aore ra te taata ona i nia ˈˈe i te taata veve. Aita te feia faatavaihia e ‘haapao ra i te taata i te haapaoraa o te tino,’ no te mea o to ratou taairaa i te pae varua e te mau hoa faaroo te mea faufaa. E ere te feia i ‘haapao i te Mesia i te haapaoraa o te tino ra’ i te mau taata noa i ite mata roa ˈtu ia Iesu a vai ai oia i te fenua nei. Noa ˈtu e ua hiˈo na vetahi o te tiaturi ra i te Mesia ia ˈna na mua ˈˈe mai te hoê taata, eiaha ratou ia na reira faahou. Ua horoa oia i to ˈna tino ei hoo e ua faatiahia mai oia ei varua ora. E vaiiho atoa vetahi atu o te faatiahia no te ora i nia i te raˈi, i to ratou tino iˈo aita hoi ratou i ite aˈenei ia Iesu Mesia i te pae tino.—Korinetia 1, 15:45, 50; Korinetia 2, 5:1-5.
8. Nafea te mau taata e ‘hoê ai i te Mesia’?
8 Te na ô faahou ra o Paulo i te feia faatavaihia e: “[“Ia hoê,” MN] te taata i te Mesia ra, ua riro ïa ei taata apî; ua ore te mau mea tahito ra; inaha, ua riro te mau mea atoa ei mea apî.” (Korinetia 2, 5:17) Te auraa ‘ia hoê i te Mesia,’ ia ati atu ïa ia ˈna. (Ioane 17:21) Ua tupu taua taairaa ra no te taata i to Iehova hutiraa ia ˈna i ta ˈna Tamaiti ra e i to ˈna faatavairaa i taua taata ra i te varua moˈa. Ei tamaiti faatavaihia i te varua na te Atua, e “taata apî” ïa oia e e apiti atu oia i te Mesia i roto i te Basileia no te raˈi. (Ioane 3:3-8; 6:44; Galatia 4:6, 7) Ua horoahia te hoê haamaitairaa rahi o te taviniraa i taua mau Kerisetiano faatavaihia ra.
“E faahau outou e te Atua”
9. Eaha ta te Atua i rave ia manuïa te faahauraa e o ˈna?
9 Ua haamaitai o Iehova i te “taata apî”! Te parau ra o Paulo e: “Na te Atua . . . taua mau mea atoa ra, o tei [faahau] ia tatou [e o ˈna iho na roto] ia Iesu Mesia nei, e ua tuu mai hoi ia matou i te [taviniraa faahau] nei; teie hoi taua parau ra, [na] roto te Atua i te Mesia i te [faahauraa] i to te ao nei [e o ˈna] iho, e te huri ore atu i ta ratou hara ia ratou; e ua tuu mai hoi i te parau [faahau] ra ia matou nei.” (Korinetia 2, 5:18, 19; MN) Ua atea ê te huitaata nei i te Atua i te mea e ua hara o Adamu. Ua rave râ o Iehova ma te here e ia tupu te faahauraa na roto i te tusia o Iesu.—Roma 5:6-12.
10. Ua horoa o Iehova i te taviniraa faahau ia vai ma ra, e nafea to ratou raveraa i te reira?
10 Ua horoa o Iehova i te taviniraa faahau i te feia faatavaihia, ua nehenehe ïa o Paulo e parau e: “E teie nei, e vea matou na te Mesia mai te mea e, te aˈo nei te Atua i te taata [na roto] ia matou nei; ei [m]ono matou i te Mesia, i te aˈoraa ˈtu i te taata e, E [faahau] outou [e] te Atua.” (Korinetia 2, 5:20; MN) I tahito ra, e tonohia te mau vea aore ra te mau tia i te mau taime aroraa iho â râ no te hiˈo e e nehenehe anei e faaore i te tamaˈi. (Luka 14:31, 32) I te mea e ua atea ê te ao taata nei i te Atua, ua tono oia i ta ˈna mau tia faatavaihia no te faaara i te taata i ta ˈna mau parau faahauraa. Ei mono i te Mesia, te taparu nei te feia faatavaihia e: “E faahau outou e te Atua.” Ua riro teie poroi ei faaitoitoraa aroha ia imi i te hau e te Atua e ia farii i te faaoraraa ta ˈna e rave na roto i te Mesia.
11. Maoti te faaroo i roto i te hoo, o vai ma te fanaˈo i te pae hopea i te hoê tiaraa tia i mua i te Atua?
11 E nehenehe te feia atoa e faatupu ra i te faaroo i roto i te hoo e faahau e te Atua. (Ioane 3:36) Te parau ra o Paulo e: “Ua faariro hoi oia [Iehova] ia ˈna [Iesu], i tei ore i ite i te hara ra, ei taraehara na tatou; ia faarirohia tatou ei feia parau-tia i te aro o te Atua ia ˈna ra.” (Korinetia 2, 5:21) O te taata tia roa ra o Iesu te tusia taraehara i pûpûhia no te huaai atoa a Adamu, tei faaorahia mai te hara mai. Ua riro maira ratou ei “parau-tia i te aro o te Atua” na roto ia Iesu. O na feia aiˈa 144 000 e apiti e te Mesia tei fanaˈo na mua i taua parau-tia ra, aore ra te tiaraa tia i mua i te Atua. I te roaraa o ta ˈna Faatereraa Tausani Matahiti, e fanaˈo atoa te mau tamarii a te Metua mure ore ra o Iesu Mesia i te hoê tiaraa tia ei feia tia roa. E aratai o Iesu ia ratou i te tiaraa taata tia roa ia nehenehe ratou e faaite i to ratou haapao maitai i te Atua e fanaˈo atu ai i te ô o te ora mure ore.—Isaia 9:6; Apokalupo 14:1; 20:4-6, 11-15.
‘Te anotau au taa ê’
12. Eaha te taviniraa faufaa e ravehia ra e te mau tia e te mau vea a Iehova?
12 Ia faaorahia tatou, e tia ia tatou ia faaohipa i te mau parau a Paulo: “[E teie nei te taparu atoa ˈtu nei matou ia outou, ma te rave amui i te ohipa e o ˈna, e eiaha outou e farii faufaa ore noa i te aroha faito ore o te Atua ra a erehia ˈi i te tapao o te reira]; te parau ra hoi oia e, Ua faaroo vau ia oe i te anotau au ra, e ua turu atu vau ia oe i te mahana faaoraraa ra: e inaha, teie taua anotau au [taa ê] ra; inaha, teie taua mahana faaoraraa ra.” (Korinetia 2, 6:1, 2; MN) Aita te mau tia faatavaihia a Iehova e ta ˈna mau vea, oia hoi te “mamoe ê atu,” e farii faufaa ore noa ra i te aroha faito ore o te Atua ra a erehia ˈi i te tapao o te reira. (Ioane 10:16) Na roto i to ratou haerea tia e ta ratou taviniraa itoito i teie “anotau au,” te imi nei ratou i te farii maitai o te Atua e te faaara nei ratou i te taata o te fenua nei e teie te ‘mahana faaoraraa.’
13. Eaha te manaˈo faufaa o te Isaia 49:8, e nafea te reira i te tupu-matamua-raa?
13 Te faahiti ra o Paulo i te Isaia 49:8, e parau ra e: “Te na ô maira Iehova: Ua faaroo vau ia oe i te taime [“maitai,” MN] ra; ua tauturu vau ia oe i te mahana e ora ˈi ra; e na ˈu e faaora ia oe, e horoa vau ia oe ei faufaa na te taata nei, ia papu te fenua; e ia haaparahihia te mau vahi i tuua i te ano ra.” Ua tupu na mua teie parau tohu i te faatiamâraahia mai te nunaa Iseraela i te faatîtîraa a Babulonia e to ratou hoˈiraa i muri iho i to ratou fenua i vai ano.—Isaia 49:3, 9.
14. Nafea te Isaia 49:8 i te tupuraa i nia ia Iesu?
14 I roto i te tahi atu tupuraa o te parau tohu a Isaia, ua horoa o Iehova i ta ˈna “tavini” ra o Iesu ei “tiarama no te etene e ei ora na [te Atua] e tae noa ˈtu i te hopea mai o te fenua nei.” (Isaia 49:6, 8; a faaau e te Isaia 42:1-4, 6, 7; Mataio 12:18-21.) Papu maitai, ua tupu “te taime maitai ra,” aore ra “te anotau au ra,” a vai mai ai o Iesu i te fenua nei. Ua pure oia, e ua “faaroo” te Atua ia ˈna. Ua riro ïa te reira ei ‘mahana faaoraraa’ no Iesu no te mea ua tapea maite oia i to ˈna taiva ore tia roa e “riro atura oia ei tumu no te ora mure ore no te feia atoa e faaroo ia ˈna ra.”—Hebera 5:7, 9; Ioane 12:27, 28.
15. Mai afea mai to te mau ati Iseraela pae varua tutavaraa i te haapapu e ua tia ia ratou ia fanaˈo i te aroha faito ore o te Atua, e no teihea tapao?
15 Te faatano ra o Paulo i te Isaia 49:8 i nia i te mau Kerisetiano faatavaihia, a taparu ai oia ia ratou ‘eiaha ratou ia erehia i te tapao o te aroha faito ore o te Atua’ na roto i te oreraa e imi i to ˈna maitai i “te anotau au ra” e i te “mahana faaoraraa” ta ˈna e horoa ra. Te na ô faahou ra o Paulo e: “Inaha, teie taua anotau au [“taa ê,” MN] ra; inaha, teie taua mahana faaoraraa ra.” (Korinetia 2, 6:2) Mai te Penetekose 33 T.T. mai â, ua tutava te mau ati Iseraela pae varua i te haapapu e ua tia ia ratou ia fanaˈo i te aroha faito ore o te Atua ia riro hoi “te anotau au ra” ei “mahana faaoraraa” no ratou.
‘E faaite tatou ia tatou iho ei rave ohipa na te Atua’
16. I roto i teihea mau tupuraa fifi i faaite ai o Paulo ia ˈna iho ei rave ohipa na te Atua?
16 Aita i tia i vetahi mau taata i roto i te amuiraa no Korinetia ia fanaˈo i te aroha faito ore o te Atua. Ua faaino ratou ia Paulo no te faaore i to ˈna tiaraa aposetolo, noa ˈtu e aita roa ˈtu oia i “tuu i te turoriraa i te taata atoa.” Ua faaite mau â oia ia ˈna iho ei rave ohipa na te Atua na roto “i te faaoromai rahi, e te pohe, e te apǐapǐ, e te ahoaho, i te papai, e te tapea, e te auê, e te ohipa, e te ara, e te haapaeraa maa.” (Korinetia 2, 6:3-5) I muri iho, ua haaferuri o Paulo e mai te peu e e rave ohipa te feia e patoi maira ia ˈna, ua “hau” aˈe ïa oia ia ratou no te mea ua faaruru hau aˈe oia i te tapearaa, te papairaa, te ati, e te haapaeraa.—Korinetia 2, 11:23-27.
17. (a) Ma te faatupu i teihea mau huru maitatai e faaite ai tatou ia tatou iho ei rave ohipa na te Atua? (b) Eaha ‘te mau mauhaa o te parau-tia’?
17 E nehenehe tatou e faaite ia tatou iho ei mau rave ohipa na te Atua, mai ia Paulo e to ˈna mau hoa. Nafea? Na roto ïa i “te viivii ore,” aore ra te peu mâ, e na roto i te ohiparaa ia au i te ite papu a te Bibilia. E nehenehe tatou e faaite ia tatou iho na roto i “te haamahûraa roa,” te faaoromai-rahi-raa i te ino aore ra i te faatihaehaeraa, e “te hamani maitai” a rave ai tatou i te mau mea faufaa no vetahi ê. Hau atu â, e nehenehe tatou e faaite ia tatou iho ei rave ohipa na te Atua na roto i te fariiraa i te aratairaa a to ˈna varua, i te faaiteraa i “te [“here,” MN] haavare ore,” te faahitiraa i te parau mau, e te turuiraa i nia ia ˈna no te ani i te puai no te rave i te taviniraa. Te vahi anaanatae, ua haapapu atoa o Paulo i to ˈna tiaraa rave ohipa na roto i “te mauhaa ra o te parau-tia i te rima atau e te rima aui.” I roto i te tamaˈi i mutaa ihora, na te rima atau e tapea i te ˈoˈe, area te rima aui ra, e tapea ïa i te paruru. No te upootia i roto i te tamaˈi pae varua i nia i te feia haapii haavare, aita o Paulo i faaohipa i te mau mauhaa o te tino hara nei—mai te haavarevareraa, te taviriraa, te faahemaraa. (Korinetia 2, 6:6, 7; 11:12-14; Maseli 3:32) Ua rave râ oia i te mau “mauhaa” aore ra te mau ravea parau-tia no te turu i te haamoriraa mau. Ia na reira atoa ïa tatou.
18. Mai te peu e e rave ohipa tatou na te Atua, eaha ïa to tatou haerea?
18 Mai te peu e e rave ohipa tatou na te Atua, e faaite ïa tatou i te hoê haerea mai to Paulo e to to ˈna mau hoa ohipa. E ohipa tatou mai te mau Kerisetiano faaturahia anei aore ra eita. Eita te mau parau faaino no nia ia tatou e tapea i ta tatou ohipa pororaa, eita atoa tatou e faaahaaha ia paraparau-maitai-hia no nia ia tatou. E faaite tatou i te parau mau e i te mauruuru no te mau ohipa paieti. Ia haafifihia tatou e te enemi, e tiaturi tatou ia Iehova. E e farii tatou i te aˈo ma te mauruuru.—Korinetia 2, 6:8, 9
19. Nafea e nehenehe ai e ‘faariro i te taata e rave rahi ei feia taoˈa’ i te pae varua?
19 A faaoti ai oia i ta ˈna aparauraa no nia i te taviniraa faahau, ua parau o Paulo e ‘mai te mea e te oto nei [o ˈna iho e to ˈna mau hoa], aita râ e faaea i te oaoa; mai te mea e e veve, te faariro nei râ i te taata e rave rahi ei taata taoˈa; mai te mea e aita roa e faufaa, tei ia ratou râ te mau mea atoa nei.’ (Korinetia 2, 6:10) Noa ˈtu e ua oto taua mau rave ohipa ra no to ratou mau mauiui, ua ite râ ratou i te oaoa. Mea veve ratou i te pae materia, ua ‘faariro râ ratou i te taata e rave rahi ei feia taoˈa’ i te pae varua. Inaha, ‘tei ia ratou ra te mau mea atoa’ no te mea ua horoa mai to ratou faaroo i te mau taoˈa pae varua na ratou—tae noa ˈtu i te tiaturiraa e riro ei mau tamaiti na te Atua i te raˈi. E ua fanaˈo ratou i te hoê oraraa taoˈa e te oaoa ei mau rave ohipa Kerisetiano. (Ohipa 20:35) E nehenehe atoa tatou, mai ia ratou, e ‘faariro i te taata e rave rahi ei feia taoˈa’ na roto i te apitiraa i roto i te taviniraa faahau i teie nei—i teie mahana faaoraraa!
A tiaturi i te faaoraraa a Iehova
20. (a) Eaha te hinaaro rotahi o Paulo, e no te aha te taime i taotiahia ˈi? (b) Na te aha e tapao ra i te mahana faaoraraa ta tatou e ora nei i teie nei?
20 I to Paulo papairaa i te piti o ta ˈna rata i to Korinetia i te area matahiti 55 T.T., tau 15 noa matahiti e toe ra no te faanahoraa o te mau mea ati Iuda. Ua hinaaro te aposetolo ma te mafatu rotahi ia faahau te mau ati Iuda e te mau Etene e te Atua na roto i te Mesia. E mahana faaoraraa te reira, e ua taotiahia te taime. Tei roto atoa tatou i te hopea o te hoê faanahoraa o te mau mea mai te matahiti 1914 mai â. Te tapao ra te ohipa pororaa i te Basileia e ravehia ra na te ao nei i teie nei, i te reira mai te mahana faaoraraa.
21. (a) Eaha te irava i maitihia no te matahiti 1999? (b) Eaha te tia ia tatou ia rave i teie mahana faaoraraa?
21 E tia i te taata no te mau nunaa atoa ia faaroo i te faanahoraa o te faaoraraa a te Atua na roto ia Iesu Mesia. Aita e taime no te faataere. Ua papai hoi o Paulo e: “Inaha, teie taua mahana faaoraraa ra.” O taua mau parau ra ïa tei faahitihia i roto i te Korinetia 2, 6:2, te irava a te mau Ite no Iehova no te matahiti 1999. Mea tano maitai teie irava, no te mea e ite tatou i te hoê ohipa riaria roa ˈtu â i te haamouraa o Ierusalema e ta ˈna hiero! Ua fatata te hopea o teie faanahoraa taatoa o te mau mea, e te feia atoa i te fenua nei. Teie te taime—eiaha ananahi—no te ohipa. Mai te peu e te tiaturi ra tatou e tei ia Iehova ra te ora, te here ra tatou ia ˈna, e te haafaufaa ra tatou i te ora mure ore, eita ïa tatou e erehia i te tapao o te aroha faito ore o te Atua. Ma te hoê hinaaro haavare ore e faahanahana ia Iehova, e haapapu ïa tatou na roto i te parau e te ohipa e te hiaai mau ra tatou e na reira ia parau tatou e: “Inaha, teie taua mahana faaoraraa ra.”
Nafea outou ia pahono?
◻ No te aha mea faufaa roa ia faahau e te Atua?
◻ O vai ma te mau tia e te mau vea e apiti ra i roto i te taviniraa faahau?
◻ Nafea tatou e nehenehe ai e faaite ia tatou iho ei rave ohipa na te Atua?
◻ Eaha te auraa no outou te irava a te mau Ite no Iehova no te matahiti 1999?
[Hohoˈa i te api 17]
Te poro ra anei outou ma te itoito, mai ia Paulo, e te tauturu ra anei outou ia vetahi ê ia faahau e te Atua?
Mau Hau Amui no Marite
Farani
Côte d’Ivoire
[Hohoˈa i te api 18]
I teie mahana faaoraraa, tei rotopu anei outou i te mau nahoa taata i faahau e te Atua ra o Iehova?