“O te taata horoa noa ta te Atua e hinaaro”

Ia horoahia ˈtu te tahi taoˈa, na te aha e faaoaoa ia oe? No te rahiraa, e oaoa tatou ia ite e na te here i turai i te tahi taata ia horoa mai i te taoˈa eiaha râ no te mea ua faahepohia ˈtu. Mea faufaa ïa te tumu tatou e horoa ˈi. Te haafaufaa nei iho â te taata i te manaˈo turai, hau roa ˈtu â ïa te Atua. E hiˈopoa anaˈe i te mau parau faaurua ta te aposetolo Paulo i faahiti i roto i te Korinetia 2, 9:7.

No te aha Paulo i papai ai i tera mau parau? Ua hinaaro oia e faaitoito i te mau Kerisetiano i Korinetia ia tauturu i to ratou mau taeae riirii i Iudea. Ua faahepo anei o ˈna i to Korinetia ia horoa? Aita roa ˈtu, ua papai râ: “E horoa te taata atoa i ta ˈna i opua i roto i to ˈna aau; eiaha ma te nounou, e mai te mea e no te titau: o te taata horoa noa hoi ta te Atua e hinaaro.” E hiˈopoa maite anaˈe i tera aˈoraa.

“Ta ˈna i opua i roto i to ˈna aau.” Ua faaite Paulo e e horoa te Kerisetiano mau no te mea ua faaoti oia “i roto i to ˈna aau” ia na reira. Eita ïa o ˈna e manaˈo noa i te mau hinaaro o to ˈna mau taeae. Ia au i te tahi aivanaa, te auraa o te taˈo tumu “opua,” o te “tahi [ïa] mea faaineinehia.” E feruri te hoê Kerisetiano i te mau mea e hinaarohia e to ˈna mau taeae a uiui atu ai e nafea ia horoa ˈtu i te reira.—Ioane 1, 3:17.

“Eiaha ma te nounou, e mai te mea e no te titau.” Ua faahiti Paulo e piti peu e mea tia ia haapae te Kerisetiano mau, te oreraa e horoa ma te aau tae e te horoaraa na roto i te faahepo. “Eiaha e oto (aore ra mauiui)” te auraa o te parau “nounou” na roto i te reo Heleni. Te faataa ra te tahi papai, i te manaˈo-noa-raa e horoa i te moni, ua mauiui ê na te aau o te taata nounou. No tei faahepohia ia horoa, e na reira oia no te mea noa ua titauhia ˈtu. O vai mau na te hinaaro i te taoˈa a te taata nounou e a tei faahepohia?

“O te taata horoa noa ta te Atua e hinaaro.” Ia faaoti te hoê Kerisetiano e horoa, ia na reira oia ma te oaoa, ta Paulo ïa e parau ra. E oaoa iho â te taata tei horoa ma te aau tae. (Ohipa 20:35) Ia hiˈo atu vetahi ê, e ite-maitai-hia to ˈna oaoa. Mea tano ia faaohipa i te taˈo “horoa noa” no te faataa i te aau maitai o te taata e te ohipa ta ˈna e rave a pûpû ai i te hoê ô. E haaputapû te taata horoa noa i to tatou aau a faaoaoa ˈtu ai i te Atua. Te na ô ra te tahi atu huriraa Bibilia: “Te here nei hoi te Atua i te taata e horoa ma te oaoa.”—Te Faufaa api.

Ei Kerisetiano, eaha te haapii mai i ta Paulo mau parau faaurua? E faaohipa anaˈe i te taime, puai aore ra ta tatou mau faufaa no vetahi ê, te feia iho â râ e faaruru ra i te fifi. No te aha? No te mea ua faaoti e ua hinaaro tatou e na reira. E ere noa tatou te oaoa, o te Atua râ o te ‘hinaaro i te taata horoa noa.’