Ua horoa Iehova i te “hoo no te taata e rave rahi”

1, 2. E nafea te Bibilia ia faataa i to tatou tupuraa e eaha te ravea hoê roa no te huitaata?

“TE AUTÂ amui nei te mau mea atoa i poietehia e te mauiui ra ratou paatoa.” (Roma 8:22) Mea na roto i taua mau parau ra to te aposetolo Paulo faataaraa i to tatou tupuraa peapea mau. Ua raea tatou paatoa i te hara, o te mauiui e te pohe ïa to tatou hopearaa. Auaa râ e ravea ta te Atua hau ê ra o Iehova. (Numera 23:19) Ei Atua parau-tia, ua horoa mai Iehova i te hoo no te faaora ia tatou.

² Te hoo, o te ô rahi roa ˈˈe ïa ta Iehova i horoa no te huitaata. Maoti te reira e faaorahia ˈi tatou i te hara e te pohe. (Ephesia 1:7) O te niu tera o te tiaturiraa o te ora mure ore, i te raˈi anei aore ra i roto i te paradaiso i nia i te fenua. (Luka 23:43; Ioane 3:16; Petero 1, 1:4) Eaha mau na te hoo? E nafea te reira ia haapii mai ia tatou e Atua parau-tia hau ê o Iehova?

No te aha i hinaarohia ˈi te hoê hoo?

3. (1) No te aha i hinaarohia ˈi te hoo? (2) No te aha eita te Atua e nehenehe e taui noa mai tera i te utua pohe e vai ra i nia i te huaai a Adamu?

³ Ua titauhia te hoo no ta Adamu hara. Na roto i te faaroo-ore-raa i te Atua, ua tutuu mai Adamu i te maˈi, te peapea, te mauiui e te pohe ei tufaa na to ˈna huaai. (Genese 2:17; Roma 8:20) Eita te Atua e nehenehe e taui i te utua pohe mai tera noa. Ahiri oia i na reira, ua ofati ïa oia i ta ˈna iho ture, oia hoi: “Ta te hara . . . e aufau mai i te taata, o te pohe ïa.” (Roma 6:23) E ahiri Iehova i haafaufaa ore i ta ˈna iho mau ture aveia tia, e riro ïa te reira ei otoheraa no te faaroo ia ˈna.

4, 5. (1) Mea nafea to Satani faainoraa i te Atua e no te aha ua titauhia ia haapapu Iehova ua haavare Satani? (2) Eaha te pariraa a Satani no nia i te mau tavini haapao maitai a Iehova?

⁴ Mai ta tatou i ite i roto i te pene 12, ua orure hau Satani, Adamu e Eva ia Iehova e ua faaino maitai o Satani i to Iehova iˈoa. Oia mau, ua parihia e haavare e e faatere ino Iehova o te ore e faatura i te tiamâraa o te taata e te mau melahi. (Genese 3:1-5) Na roto i te faataupupuraa i te opuaraa a te Atua e faaî i te fenua i te feia parau-tia, ua hinaaro atoa Satani ia manaˈohia eita Iehova e nehenehe e tapea i ta ˈna parau. (Genese 1:28; Isaia 55:10, 11) Ahiri aita Iehova i haapapu mea hape ta Satani i parau, eita paha ïa te rahiraa o te mau melahi e te taata e tiaturi faahou i ta ˈna huru faatereraa.

⁵ Ua faaino-atoa-hia te mau tavini haapao maitai a Iehova. Ua pari Satani e tavini ratou ia ˈna no te fanaˈo noa i ta te Atua haamaitairaa, e i mua i te fifi, e taiva ratou paatoa i te Atua. (Ioba 1:9-11) Mea faufaa ia haapapu na mua ua haavare Satani. Tera râ, ua itehia mai ia Iehova te ravea no te faaite i te parau mau, e i te hoê â taime, no te faaora atoa i te huitaata.

Te hoo aifaito

6. Eaha te tahi mau parau i faaohipahia i roto i te Bibilia no te faataa i te ravea a te Atua no te faaora i te huitaata?

⁶ Ua faaite te ravea a Iehova i to ˈna aroha hamani maitai e e Atua parau-tia o ˈna. Aita ta te taata e ravea mai tera te huru. Na roto i te parau “hoo,” e matara mai te manaˈo o te hooraa mai, o te faahauraa, o te taraehara, o te tapoˈiraa hara e te faaoreraa hara. (Salamo 49:8; Daniela 9:24; Galatia 3:13; Kolosa 1:20; Hebera 2:17) Ua haamatara maitai Iesu i teie mau manaˈo atoa na roto i teie mau parau: “Ua haere atoa mai te Tamaiti a te taata nei eiaha ia tavinihia oia, no te tavini râ e no te horoa i to ˈna ora ei hoo no te taata e rave rahi.”​—Mataio 20:28.

7, 8. (1) Eaha te auraa o te taˈo “hoo” i roto i te mau Papai? (2) Eaha te faaite ra e ô atoa mai te parau o te aifaitoraa i roto i te taˈo “hoo”?

⁷ Eaha te hoê hoo? Te taˈo Heleni i faaohipahia i ǒ nei, no roto mai ïa i te tahi parau “matara, faatiamâ” te auraa. E faaohipahia teie parau no te faataa i te moni e aufauhia ia tiamâ mai te feia i haruhia i muri aˈe i te tamaˈi. E aufauhia te hoê hoo no te faahoˈi mai i te tahi mea ta tatou i ere. I roto i te mau Papai Hebera, no roto mai te taˈo “hoo” (kophere) i te hoê parau “tapoˈi” te auraa. Ei hiˈoraa, hoê â parau tei faaohipahia a faaue ai te Atua ia Noa ia parai, aore ra ia tapoˈi, i te tâ i rapaeau e i roto i te araka. (Genese 6:14) E tauturu mai te reira ia taa ua tapoˈi te tusia o Iesu i ta tatou mau hara.​—Salamo 65:3.

⁸ Ia au i te hoê titionare, i roto i te taˈo Hebera kophere, “te vai ra te manaˈo o te aifaitoraa,” aore ra o te hoê tuearaa. (Theological Dictionary of the New Testament) No te hoo mai ia tatou, aore ra no te tapoˈi i ta tatou mau hara, e titauhia ia aufau i te hoê hoo o te aifaito, aore ra o te tapoˈi maitai, i ta tatou i ere no te hara. No reira te ture ta te Atua i horoa ia Iseraela i parau ai: “E ora ei ora ïa, e mata ei mata, e niho ei niho, e rima ei rima, e avae ei avae.”​—Deuteronomi 19:21.

9. No te aha te mau tavini haapao maitai a te Atua i pûpû ai i te tusia animara e eaha to Iehova manaˈo i taua mau tusia ra?

⁹ Mai te tau mai â o Abela, ua pûpû te mau taata haapao maitai i te mau tusia animara i te Atua. Ua ite ratou i to ratou tiaraa taata hara e e mea titauhia te taraehara. Ua tiaturi atoa ratou e faaora mai te Atua i te huitaata i te hara na roto i te hoê “huaai” fafauhia. (Genese 3:15; 4:1-4; Levitiko 17:11; Hebera 11:4) Ua farii maitai Iehova i te feia o tei pûpû i taua mau tusia ra no te haamori ia ˈna. Eita râ te animara e nehenehe e tapoˈi roa i te hara a te taata, tei raro aˈe hoi te animara i te taata. (Salamo 8:4-8) No reira te Bibilia e parau ai: “Eita . . . e tia i te toto o te puaatoro oni e to te puaaniho ia hopoi ê i te mau hara.” (Hebera 10:1-4) E hohoˈa noa taua mau tusia ra no te tusia rahi aˈe e pûpûhia i muri aˈe.

“Ei hoo aifaito”

10. (1) E nafea ia aifaito te hoo e pûpûhia? (2) No te aha aita i titauhia ia pûpû e mirioni taata i to ratou ora?

¹⁰ Ua parau te aposetolo Paulo: “No Adamu hoi te taata atoa e pohe ai.” (Korinetia 1, 15:22) E titauhia ïa ia pohe te hoê taata tia roa mai ia Adamu ia aifaito te hoo e pûpûhia. (Roma 5:14) O te hoê anaˈe taata tia roa o tei ore i raea i te hara e te pohe te nehenehe e pûpû i te “hoo aifaito.” (Timoteo 1, 2:6) Eita ïa e titauhia ia pûpû e mirioni taata i to ratou ora no te hoo mai i te huaai taatoa o Adamu. Ua faataa te aposetolo Paulo, ua ô mai te hara i “te ao nei na roto i te taata hoê ra e te pohe na roto i te hara.” (Roma 5:12) “No te taata hoê ra i ô mai ai te pohe,” ua horoa ïa te Atua i te hoo na roto i “te taata hoê.” (Korinetia 1, 15:21) Mea nafea?

11. (1) No te aha e parauhia ˈi e faaruru te taata o te horoa i to ˈna ora i “te pohe no te taata atoa”? (2) No te aha eita Adamu raua Eva e nehenehe e fanaˈo i te mau maitai ta te hoo e horoa mai? (A hiˈo i te nota i raro i te api.)

¹¹ Ua maiti Iehova i te hoê taata tia roa o te pûpû i to ˈna ora ma te aau tae. Ia au i te Roma 6:23, “ta te hara hoi e aufau mai i te taata, o te pohe ïa.” Eaha te auraa? E faaruru te taata o te horoa i to ˈna ora ei tusia i “te pohe no te taata atoa” no te aufau i te utua o ta Adamu hara. (Hebera 2:9; Korinetia 2, 5:21; Petero 1, 2:24) I tera noa taime e aifaito ai te hoo e e haapaohia ˈi ta Iehova ture parau-tia. E nehenehe atu ra ïa te utua pohe e vai ra i nia i te huaai o Adamu e faaorehia, no te feia iho â râ o te faaroo i te Atua.a​—Roma 5:16.

12. E nafea te hoo e nehenehe ai e tauturu e rave rahi taata? A horoa i te hoê hiˈoraa.

¹² A feruri na te faaea ra oe i te hoê oire e rave te rahiraa o te taata i te ohipa i roto i te hoê â taiete. Mea aufau-maitai-hia oe, e na reira atoa to oe feia tapiri e e oraraa fanaˈo to outou. I te hoê râ mahana, opani atura te taiete. Eaha te tumu? Ua taviri te taata faatere i te moni e topatari aˈera te taiete. Ua ere oe e to oe feia tapiri i te ohipa e aita e moni faahou no te aufau i te mau haamâuˈaraa. No te taata hoê, ua fifi roa te oraraa o to oe utuafare e na reira atoa to te feia e rave rahi. Auaa, ua opua te hoê taata hamani maitai i te tauturu ia outou paatoa. Ua aroha roa hoi oia i te feia rave ohipa e to ratou mau utuafare. Ua ite oia mea faufaa ia tere faahou te taiete, rave atura oia i te faanahoraa no te hoo mai i te taiete e ua aufau atoa i te tarahu a te taiete. Fanaˈo faahou atura to te oire i te ohipa e maitai faahou mai nei te oraraa o te mau utuafare. Oia atoa, no te taata hoê ra o Iesu, e mirioni taata tei tauturuhia.

Na vai e horoa i te hoo?

13, 14. (1) Mea nafea to Iehova horoaraa i te tusia no te hoo mai i te huitaata? (2) Ua aufauhia te hoo ia vai ra e no te aha i titauhia ˈi taua faanahoraa ra?

¹³ O Iehova anaˈe tei nehenehe e horoa i “te Arenio . . . o te faaore roa i te hara a to te ao nei!” (Ioane 1:29) Aita te Atua i tono noa mai i te tahi melahi no te faaora i te huitaata, ua tono mai râ i ta ˈna Tamaiti, o ˈna anaˈe hoi te nehenehe e haapapu mea hape te mau pariraa a Satani no nia i te mau tavini a Iehova. Ua rave Iehova i te haapaeraa rahi roa ˈˈe ma te tono mai i ta ˈna Tamaiti otahi “here roa” ei tusia. (Maseli 8:30) Ma te aau tae, “ua haapae” te Tamaiti a te Atua “ia ˈna iho.” (Philipi 2:7) Na roto i te hoê semeio, ua tuu Iehova i te ora o ta ˈna Tamaiti otahi i roto i te opu o te hoê vahine apî ati Iuda o Maria te iˈoa. (Luka 1:27, 35) I to ˈna fanauraahia mai ei taata, ua mairihia o ˈna i te iˈoa ra o Iesu. Ia au râ i te Bibilia, e parauhia oia te Adamu hopea, e taata tia roa hoi oia mai ia Adamu. (Korinetia 1, 15:45, 47) No reira ïa Iesu i nehenehe ai e pûpû ia ˈna iho ei tusia no te hoo mai i te huitaata i te hara.

¹⁴ E aufauhia taua hoo ra ia vai ra? Te haapapu ra te Salamo 49:7 e e hopoihia te hoo i “te Atua” ra. I te mea na Iehova i horoa mai i te hoo, no te aha ïa te reira e aufauhia ˈi ia ˈna? Eita teie faanahoraa e nehenehe e faaauhia i te moni hoo e aufauhia no te tahi taoˈa, ua riro râ ei ravea no te faaî i te titauraa parau-tia a te Atua. Ma te horoa mai i te hoo, ua haapapu Iehova eita o ˈna e ofati i ta ˈna iho ture tia noa ˈtu e titauhia te haapaeraa rahi.​—Genese 22:7, 8, 11-13; Hebera 11:17; Iakobo 1:17.

15. No te aha i titauhia ˈi ia mauiui e ia pohe Iesu?

¹⁵ I te omuaraa o te matahiti 33, ua farii maite Iesu Mesia ia mauiui rahi oia no te aufau i te hoo. Ua vaiiho oia e ia tapeahia oia na nia i te mau pariraa haavare, ia haavahia oia ei taata hara e ia patitihia i nia i te hoê pou haamauiuiraa. Ua titau-mau-hia anei ia mauiui rahi Iesu mai teie? E, no te haapapu mea hape ta Satani i parau no nia i te mau tavini a te Atua. I to ˈna tamariiraa, aita Iesu i nehenehe e na reira, no reira te Atua i paruru ai ia ˈna i te rima o Heroda. (Mataio 2:13-18) I to Iesu râ paariraa mai, na ˈna iho i maiti i te mau papu i mua i te mau tamataraa a Satani, riro atura te reira ei haapapuraa mea hape mau ta Satani mau pariraa.b Ma te “taiva ore, te hapa ore, te viivii ore,” ua faaite Iesu “e ere oia mai te feia hara.” Noa ˈtu te hamani-ino-raa rahi, ua haapapu Iesu e tapea te mau tavini a Iehova i to ratou taiva ore i roto i te tamataraa. (Hebera 7:26) E tauturu mai te reira ia taa no te aha Iesu i tuô ai hou a pohe ai: “Ua hope ia ˈu i te rave i ta oe i ani mai!”​—Ioane 19:30.

Ua hope ia Iesu i te rave i ta te Atua i ani mai!

16, 17. (1) Mea nafea Iesu i te faaotiraa i ta ˈna ohipa? (2) No te aha i titauhia ˈi ia tia ˈtu Iesu i “mua i te Atua no tatou”?

¹⁶ Mea titauhia râ ia faaoti Iesu i ta ˈna ohipa. I te toru o te mahana i muri aˈe i te poheraa o Iesu, ua faatia mai Iehova ia ˈna mai te pohe mai. (Ohipa 3:15; 10:40) Na roto i teie semeio rahi, aita noa Iehova i haamaitai i ta ˈna Tamaiti no ta ˈna taviniraa haapao maitai, ua horoa atoa ˈtu râ oia i te ravea no te faaoti i ta ˈna ohipa ei Tahuˈa Rahi na te Atua. (Roma 1:4; Korinetia 1, 15:3-8) Te faataa ra te aposetolo Paulo: “I to te Mesia haereraa mai ei tahuˈa rahi . . . ua tomo oia i roto i te vahi moˈa, eiaha ma te toto o te puaaniho e to te puaatoro oni apî, ma to ˈna iho râ toto, hoê roa tomoraa, e ua noaa mai ia tatou te faaoraraa mure ore. . . . Aita hoi te Mesia i tomo i roto i te hoê vahi moˈa hamanihia e te rima taata, e hohoˈa hoi teie o te vahi moˈa mau, i roto râ i te raˈi, a tia ˈtu ai oia i teie nei i mua i te Atua no tatou.”​—Hebera 9:11, 12, 24.

¹⁷ Aita te Mesia i nehenehe e hopoi i to ˈna toto i nia i te raˈi. (Korinetia 1, 15:50) Ua tia ˈtu râ oia i mua i te Atua no te faaite i te faufaa o te ora tia roa ta ˈna i pûpû ei tusia ia farii Iehova i te reira no te hoo mai i te huitaata i te hara. Ua farii anei Iehova i taua tusia ra? E, e ua ite-maitai-hia te reira i te Penetekose o te matahiti 33, i te niniiraahia te varua moˈa i nia i na pǐpǐ 120 i Ierusalema. (Ohipa 2:1-4) E tupuraa faahiahia mau, mea rahi atu â râ te mau haamaitairaa ta te mau tavini a te Atua e fanaˈo na roto i te hoo.

Ta tatou e fanaˈo na roto i te hoo

18, 19. (1) O vai ma te faahauhia e te Atua na roto i te toto o te Mesia? (2) Na roto i te hoo, eaha ta te “nahoa rahi” e fanaˈo i teie nei â e a muri aˈe?

¹⁸ I roto i ta ˈna rata i to Kolosa, te faataa ra Paulo ua tia i te Atua ia vai te mau mea atoa i roto i te Mesia, e na roto ia ˈna, ia faahau ïa i te mau mea atoa i te Atua, ma te faatupu i te hau na roto i te toto o Iesu i niniihia i nia i te pou haamauiuiraa. Te faataa atoa ra Paulo e faahauhia “to te raˈi” e “to te fenua.” (Kolosa 1:19, 20; Ephesia 1:10) “To te raˈi,” o na 144 000 ïa Kerisetiano o te tiaturi e tavini ei tahuˈa i te raˈi e o te faatere mai i te fenua ei arii e te Mesia ra o Iesu. (Apokalupo 5:9, 10; 7:4; 14:1-3) E ohipa ratou e o Iesu no te tauturu i te feia auraro i nia te fenua ia fanaˈo i te mau maitai o te hoo i tera e tera mahana 1 000 matahiti te maoro.​—Korinetia 1, 15:24-26; Apokalupo 20:6; 21:3, 4.

¹⁹ “To te fenua,” o te feia ïa e tiaturi e ora e a muri noa ˈtu i roto i te paradaiso i nia i te fenua. Te faataa ra te Apokalupo 7:9-17 ia ratou mai “te hoê nahoa rahi” o te ora ˈtu i “te ati rahi” e fatata mai ra. Eita râ e titauhia ia tiai roa ratou i tera taime no te fanaˈo i te mau maitai o te hoo. “Ua horoi e ua faauouo” ê na ratou i to ratou ahu roa i te toto o te Arenio. I te mea te faatupu nei ratou i te faaroo i te hoo, e fanaˈo ratou i teie nei â i te mau maitai no ǒ mai ia Iehova. Ua hiˈohia ratou ei taata parau-tia e ei hoa no te Atua! (Iakobo 2:23) Na roto i te tusia o Iesu, e nehenehe ratou e “faafatata . . . i te terono o te hamani maitai rahi” e e paraparau ma te taiâ ore i te Atua. (Hebera 4:14-16) Ia hape ratou, e faaore-mau-hia ta ratou hara. (Ephesia 1:7) Noa ˈtu to ratou huru tia ore, te fanaˈo ra ratou i te hoê manaˈo haava maitai. (Hebera 9:9; 10:22; Petero 1, 3:21) Te oaoa nei ratou i teie nei â i te faatupu i te hau e te Atua. (Korinetia 2, 5:19, 20) I te roaraa o na 1 000 matahiti e faatere ai te Mesia, e faaora-mǎrû-noa-hia to te fenua i “te faatîtîraa o te hara e te pohe ia roaa ia ratou te tiamâraa hanahana o te mau tamarii a te Atua.”​—Roma 8:21.

20. Eaha to tatou huru a feruri ai i te hoo?

²⁰ “Ia haamauruuruhia te Atua na roto ia Iesu Mesia” no te hoo! (Roma 7:25) E nehenehe e manaˈohia mea ohie no te Atua ia rave i tera faanahoraa, tera râ, te faaite mai ra te reira i to ˈna paari e maitai rahi. (Roma 11:33) E ia feruri tatou ma te mauruuru i te hoo, e putapû to tatou aau e e faafatata ˈtu â tatou i te Atua parau-tia. Mai te papai salamo, e arue anaˈe ia Iehova o “te hinaaro ra . . . i te parau-tia e te haavaraa paetahi ore.”​—Salamo 33:5.