Te faatereraa teotaratia i te tau kerisetiano

“To ˈna ra manaˈo hamani maitai . . . e amui ai oia i te mau mea atoa i te Mesia ra, to te raˈi, e to te [fenua] nei.”—EPHESIA 1:9, 10; MN.

1, 2. (a) Mea nafea te tupuraa te amuiraa o ‘te mau mea o te raˈi,’ o tei haamata i te matahiti 33 o to tatou tau? (b) Mea nafea to te mau Kerisetiano faatavaihia faaiteraa i te huru feruriraa o Mose raua o Elia mai te matahiti 1914 mai â?

UA HAAMATA teie amuiraa o ‘te mau mea o te raˈi’ i te matahiti 33 o to tatou tau, i to te ‘Iseraela o te Atua’ faraa mai. (Galatia 6:16; Isaia 43:10; Petero 1, 2:9, 10) I muri aˈe i te senekele matamua o to tatou tau, ua faataupupuhia te amuiraa, no te mea ua tapoˈi roa te “zizania” apotata i ueuehia e Satani i te mau Kerisetiano mau (piihia e Iesu te “sitona”). Teie râ, i te fatataraa mai “te tau hopea ra,” ua fa faahou mai te Iseraela mau o te Atua, e i te matahiti 1919 ra, ua nominohia ratou ei tiaau i nia i te mau taoˈa atoa a Iesu.a—Mataio 13:24-30, 36-43; 24:45-47; Daniela 12:4.

² I roto i te Tamaˈi Rahi Matamua, ua rave te mau Kerisetiano faatavaihia i te mau ohipa puai, mai ta Mose e ta Elia atoa i rave.b (Apokalupo 11:5, 6) Ua poro ratou i te parau apî maitai mai te matahiti 1919 mai â i roto i te hoê ao ino, ma te itoito o Elia. (Mataio 24:9-14) E mai te matahiti 1922 mai â, ua faaite haere ratou i te mau haavaraa a Iehova i nia i te huitaata nei, mai ia Mose atoa o tei faatae i te mau ati a te Atua i nia ia Aiphiti no tahito ra. (Apokalupo 15:1; 16:2-17) I teie mahana, o te toea o teie mau Kerisetiano faatavaihia te pu o te totaiete apî a te mau Ite no Iehova na te ao nei.

Te hoê tino aratai e ohipa ra

3. Eaha te mau ohipa e faaite ra e mea faanahonaho-maitai-hia te amuiraa kerisetiano matamua?

³ Mai te haamataraa mai, ua faanahonahohia te mau pǐpǐ faatavaihia a Iesu. I te mea e ua rahi te numera o te mau pǐpǐ, ua haamauhia te mau amuiraa, e ua nominohia te mau matahiapo. (Tito 1:5) I muri aˈe i te matahiti 33 o to tatou tau, ua ohipa na aposetolo 12 mai te hoê tino aratai mana oia te pu. Ua nehenehe ïa ratou e aratai ma te mǎtaˈu ore i te ohipa pororaa. (Ohipa 4:33, 35, 37; 5:18, 29) Ua faanahonaho ratou i te opereraa i te maa na te feia riirii, e ua tono ratou ia Petero e ia Ioane i Samaria no te haapao i te anaanatae i tapaohia mai i reira. (Ohipa 6:1-6; 8:6-8, 14-17) Ua afai o Baranaba ia Paulo ia ratou ra, no te haapapu e i teie nei, ua riro mai teie taata hamani ino i mutaa iho ei pǐpǐ na Iesu. (Ohipa 9:27; Galatia 1:18, 19) I muri aˈe to Petero pororaa ia Korenelio e i to ˈna utuafare, ua hoˈi atura oia i Ierusalema, e ua faataa ˈtura oia i te mau aposetolo e i te tahi atu mau taeae ati Iudea e mea nafea to te varua moˈa faaiteraa i te hinaaro o te Atua i roto i teie tupuraa.—Ohipa 11:1-18.

4. Eaha te opuaraa i ravehia no te haapohe ia Petero, e mea nafea râ oia i te faaoraraahia mai?

⁴ I muri iho, ua aro-uˈana-hia te tino aratai. Ua tapeahia o Petero i roto i te fare auri, e ua faaorahia mai oia maoti noa te hoê melahi. (Ohipa 12:3-11) I teie nei, a tahi ra te hoê taata, e ere oia i te hoê o na aposetolo 12, i tia mai ai i nia i te hoê tiaraa teitei i Ierusalema. I to Petero tuuraahia mai, ua na ô atu oia i te hoê pǔpǔ tei putuputu i te fare o te metua vahine o Ioane Mareko e: “E faaite atu ia Iakobo [te taeae o Iesu] e te mau taeae i teie nei mau parau.”—Ohipa 12:17.

5. Nafea te tauiraahia te faanahoraa o te tino aratai i muri aˈe i te haapoheraahia o Iakobo?

⁵ Na mua ˈtu, i muri aˈe i to Iuda Isakariota, te aposetolo i hoo ia Iesu, haapoheraa ia ˈna, ua itehia e e tia ia horoa i “to ˈna toroa [“tiaau,” MN]” ei aposetolo i te hoê taata i apee ia Iesu i roto i ta ˈna taviniraa, e i ite mata i to ˈna poheraa e to ˈna tia-faahou-raa. Teie râ, i to Iakobo, te taeae o Ioane, haapoheraahia, aita hoê aˈe taata i mono ia ˈna ei hoê o na aposetolo 12. (Ohipa 1:20-26; 12:1, 2) Noa ˈtu râ, te faaite ra te parau i muri iho no nia i te tino aratai i roto i te mau Papai, e ua rahi taua tino aratai ra. I te tupuraa te hoê aimârôraa e e tia anei i te mau Etene o tei pee ia Iesu, ia auraro i te Ture a Mose, ua tuuhia taua fifi ra i mua i “te mau aposetolo e te mau [“taata paari,” MN] i Ierusalema ra.” (Ohipa 15:2, 6, 20, 22, 23; 16:4) No te aha tei roto atoa “te mau taata paari” i teie nei i te tino aratai? Aita te Bibilia e pahono ra, teie râ, te vai ra te hoê faufaaraa taa maitai. Ua faaite te poheraa o Iakobo e te tapearaahia o Petero i roto i te fare auri e, e nehenehe te mau aposetolo e tapea-atoa-hia aore ra e haapohe-atoa-hia i te hoê mahana. I roto i teie huru tupuraa, na te tahi atu ïa mau matahiapo faaineinehia e te aravihi i roto i te mau huru faanahoraa a te tino aratai, e tamau noa i te haapao i te ohipa tiaau ma te nahonaho maitai.

6. Nafea te tino aratai i te ohipa-noa-raa i Ierusalema, noa ˈtu e aita faahou to ˈna mau melo matamua i taua oire ra?

⁶ I to Paulo haereraa mai i Ierusalema i te area matahiti 56 o to tatou tau, ua haere oia e farerei ia Iakobo e, te na ô ra te Bibilia e, “tei reira hoi te mau [“taata paari,” MN] atoa ra.” (Ohipa 21:18) No te aha aita e faahitihia ra te mau aposetolo i taua putuputuraa ra? I ǒ nei â, aita te Bibilia e pahono ra. Teie râ, ua tapao te taata tuatapapa aamu ra o Eusèbe i muri iho e, i te tahi mau tau na mua ˈˈe i te matahiti 66 o to tatou tau, “ua tiahihia te mau aposetolo e toe ra, o te opua-noa-hia ra e haapohe, i rapaeau ia Iudea. Teie râ, no te faaite i ta ratou poroi, ua revareva ratou na te mau fenua atoa ma te mana o te Mesia.” (Eusebius, Buka III, V, irava 2) Parau mau, e ere te mau parau a Eusèbe no roto mai i te Bibilia, teie râ, te tuea ra te reira e ta te Bibilia e parau ra. Ei hiˈoraa, i te matahiti 62 o to tatou tau, tei Babulonia o Petero—mea atea ia Ierusalema. (Petero 1, 5:13) Teie râ, i te matahiti 56 o to tatou tau, e peneiaˈe tae atu i te matahiti 66 o to tatou tau, ua ohipa mau â te hoê tino aratai i Ierusalema.

Te faatereraa i teie nei tau

7. Ia faaauhia e te tino aratai o te senekele matamua, eaha te taa-ê-raa faahiahia i roto i te faanahoraa o te Tino Aratai i teie mahana?

⁷ Mai te matahiti 33 o to tatou tau e tae atu i te ati rahi i tupu i Ierusalema, papu maitai, e mau Kerisetiano ati Iuda anaˈe te mau melo o te tino aratai. I roto i to ˈna tere i te matahiti 56 o to tatou tau, ua faarooroo o Paulo e e rave rahi Kerisetiano ati Iuda i Ierusalema e ‘itoito noa nei i te ture [a Mose],’ noa ˈtu ratou i “mau i te [“faaroo,” MN] a to tatou Fatu ra a Iesu Mesia.”c (Iakobo 2:1; Ohipa 21:20-25) E mea fifi paha no teie mau huru ati Iuda ia manaˈo e e Etene tei roto i te tino aratai. I teie nei râ tau, ua ravehia te tahi atu tauiraa i roto i te faanahoraa o teie tino. I teie mahana, o te mau Kerisetiano Etene faatavaihia anaˈe te mau melo, e ua haamaitai rahi mai Iehova i ta ratou ohipa tiaau.—Ephesia 2:11-15.

8, 9. Eaha te mau ohipa i ravehia i roto i te Tino Aratai i teie nei tau?

⁸ Mai te haamauraahia te Watch Tower Bible and Tract Society of Pennsylvania i te matahiti 1884 e tae atu i te matahiti 1972, e mana rahi to te peretiteni o te Taiete i roto i te faanahonahoraa a Iehova, a ohipa amui maite noa ˈi te Tino Aratai e te mau raatira a te Taiete. Te haapapu ra te mau haamaitairaa i fanaˈohia i taua mau matahiti ra, e ua farii o Iehova i taua faanahoraa ra. I rotopu i te matahiti 1972 e te matahiti 1975, ua rahi te Tino Aratai 18 melo i roto. Ua pee roa ˈtu â te mau mea i te faanahoraa i te senekele matamua, i te horoaraahia te mana rahi atu â i taua tino ra i rahi, e mau raatira vetahi a te Watch Tower Bible and Tract Society of Pennsylvania.

⁹ Mai te matahiti 1975 mai, e rave rahi o teie na melo 18 tei hope ta ratou hororaa i nia i te fenua nei. Ua re ratou i nia i te ao nei, e ua ‘parahi e o Iesu atoa i nia iho i to ˈna ra terono i nia i te raˈi.’ (Apokalupo 3:21) No teie tumu e vetahi atu, hoê ahuru melo i teie nei i roto i te Tino Aratai, e tae noa ˈtu i tei faaôhia mai i te matahiti 1994 ra. E mau ruhiruhia te rahiraa. Teie râ, te turu-maitai-roa-hia nei teie mau taeae faatavaihia a rave noa ˈi ratou i ta ratou mau hopoia teimaha. Ihea e itehia ˈi taua turu ra? A hiˈo atu ïa i te mau haereraa i mua i teie nei tau i rotopu i te nunaa a te Atua, e ite ïa outou i te pahonoraa.

Te turu no te Iseraela o te Atua

10. O vai tei apiti atu i te feia faatavaihia i roto i te taviniraa a Iehova i teie anotau hopea, e mea nafea te reira i te tohuraahia?

¹⁰ I te matahiti 1884 ra, fatata te feia atoa i apiti atu i te Iseraela o te Atua, e mau Kerisetiano faatavaihia ratou. A mairi noa ˈi râ te tau, ua haamata te tahi atu pǔpǔ i te fa mai, e i te matahiti 1935, ua itehia e o teie pǔpǔ te “feia rahi roa” o te Apokalupo pene 7. Ma te tiaturi e faaea i nia i te fenua nei, te faahohoˈa ra ratou i ‘te mau mea o te fenua nei,’ o ta Iehova e opua ra e amui atoa i te Mesia. (Ephesia 1:10) Te faahohoˈa nei ratou i te mau “mamoe ê atu” o te parabole a Iesu no nia i te mau aua mamoe. (Ioane 10:16) Mai te matahiti 1935 mai â, ua haaputuhia mai te mau mamoe ê atu i roto i te faanahonahoraa a Iehova. Ua ‘pee [ratou] mai te ata e pee ra, e mai te tiaa uuairao e maue i to ratou mau apoo ra.’ (Isaia 60:8) No te mea e te maraa ra te feia rahi roa e te iti ra te pǔpǔ taata faatavaihia, a faahope ai te rahiraa i ta ratou hororaa i nia i te fenua nei i roto i te pohe, ua rave mai te mau mamoe ê atu aravihi i te hoê tiaraa rahi i roto i te mau ohipa kerisetiano. Mea nafea ïa?

11. Eaha te mau hopoia taa ê, tei taotiahia hoi na mua ˈˈe i te mau Kerisetiano faatavaihia, i horoahia na te mau mamoe ê atu?

¹¹ Ua riro noa na te faaite-haere-raa i te mau maitai o Iehova, ei hopoia taa ê na te “nunaa moˈa” o te Atua. Ua faahiti o Paulo i te reira mai te hoê tusia e pûpûhia i te hiero, e i te feia e riro mai ei “autahuˈaraa arii,” ua faaue o Iesu ia poro e ia haapii i te taata. (Exodo 19:5, 6; Petero 1, 2:4, 9; Mataio 24:14; 28:19, 20; Hebera 13:15, 16) Teie râ, ua faaitoito taa ê Te Pare Tiairaa o te 1 no Atete 1932 i te feia i faahohoˈahia e Ionadaba, ia apiti i roto i teie ohipa. Oia mau, ua na reira aˈena e rave rahi o teie mau mamoe ê atu. I teie mahana, fatata e na te mau mamoe ê atu e rave ra i te ohipa pororaa atoa, ei tuhaa rahi o ta ratou ‘haamoriraa [i te Atua] i te rui e te ao i roto i to ˈna ra hiero.’ (Apokalupo 7:15) Oia atoa, i roto i te tuhaa matamua o te aamu o te nunaa o Iehova i teie nei tau, e mau Kerisetiano faatavaihia te mau matahiapo o te amuiraa, te mau “fetia” i roto i te rima atau o Iesu Mesia. (Apokalupo 1:16, 20) Teie râ, ua faaite Te Pare Tiairaa o te 1 no Me 1937 e, e nehenehe te mau mamoe ê atu aravihi e riro ei mau aratai o te pǔpǔ (mau tiaau peretiteni). Noa ˈtu e te vai ra te feia faatavaihia, e nehenehe e faaohipa i te mau mamoe ê atu mai te peu e eita e maraa i te feia faatavaihia ia amo i teie hopoia. I teie mahana, fatata te mau matahiapo atoa o te amuiraa, e mau mamoe ê atu ïa ratou.

12. Eaha te mau hiˈoraa a te mau Papai e vai ra no te mau mamoe ê atu aravihi o te fanaˈo nei i te mau hopoia teimaha i te pae no te faanahonahoraa?

¹² E mea hape anei ia horoa i teie mau huru hopoia teimaha na te mau mamoe ê atu? Eita, te pee nei te reira i te hoê hiˈoraa o te aamu. E mau tiaraa teitei to vetahi mau peroseluto ěê (te feia ěê) i roto ia Iseraela no tahito ra. (Samuela 2, 23:37, 39; Ieremia 38:7-9) I muri aˈe i te hopoi-ê-raahia e to Babulonia, ua horoahia na te mau Netinimi aravihi (te mau tavini o te hiero e ere i te mau ati Iseraela) te mau haamaitairaa taa ê e tavini i te hiero, o te mau ati Levi anaˈe hoi te rave na i te reira. (Ezera 8:15-20; Nehemia 7:60) Hau atu, ua farii o Mose, o tei itehia i roto i te orama o te faahuru-ê-raa i pihai iho ia Iesu, i te mau aˈoraa maitatai roa a Ietero te ati Midiana. I muri iho, ua ani oia i te tamaiti a Ietero, o Hobaba, e aratai ia ratou na roto i te medebara.—Exodo 18:5, 17-24; Numera 10:29.

13. Na roto i te tufaraa ma te haehaa i te hopoia na te mau mamoe ê atu aravihi, ua pee te feia faatavaihia i to vai huru feruriraa maitai roa?

¹³ I te hopea o na matahiti e 40 i roto i te medebara, ua pure o Mose, ma te ite hoi e eita oia e tomo i roto i te Fenua Tǎpǔhia, ia horoa mai o Iehova i te hoê mono. (Numera 27:15-17) Ua faaue atura o Iehova ia Mose e nomino ia Iosua i mua i te nunaa taatoa, e ua na reira o Mose, noa ˈtu e e mea puai noâ oia i te pae tino, e aita oia i faaea oioi i te tavini ia Iseraela. (Deuteronomi 3:28; 34:5-7, 9) Na roto i te hoê â huru feruriraa haehaa, ua horoa aˈena te feia faatavaihia i te mau hopoia taa ê rahi atu â na te mau taata aravihi o te mau mamoe ê atu.

14. Teihea mau parau tohu e faaite ra i te tiaraa e rahi noa ˈtura o te mau mamoe ê atu i roto i te faanahonahoraa?

¹⁴ E parau tohu atoa te tiaraa e rahi noa ˈtura o te mau mamoe ê atu i roto i te faanahonahoraa. Ua tohu o Zekaria e e riro te Philiseti e ere i te ati Iseraela “mai te tavana i Iuda.” (Zekaria 9:6, 7) E mau raatira opu fetii te mau tavana, no reira, te parau ra o Zekaria e e farii te enemi tahito o Iseraela ra i te haamoriraa mau, e e riro ratou mai te raatira opu fetii i te Fenua Tǎpǔhia. Hau atu, teie ta Iehova i parau atu i te Iseraela o te Atua: “E na te taata ěê e tia mai e faaamu i ta outou mau nǎnǎ; e te mau tamarii o te taata ê ra te riro ei faaapu, e ei tope vine na outou. E parauhia râ outou, O te mau tahuˈa na Iehova; e mairihia outou, O te mau tavini o to tatou Atua.” (Isaia 61:5, 6) O te mau mamoe ê atu teie mau “taata ěê.” Ua horoahia na ratou te mau hopoia no te rave e rave rahi atu â ohipa, a faahope ai te toea faatavaihia ruhiruhia i ta ratou hororaa i nia i te fenua nei, e e haere atu ai i nia i te raˈi e tavini roa ei “mau tahuˈa na Iehova,” ma te haaati i te terono hanahana o Iehova ei “mau tavini o to tatou Atua.”—Korinetia 1, 15:50-57; Apokalupo 4:4, 9-11; 5:9, 10.

‘Te ui e haere mai’

15. I teie tau hopea, teihea pǔpǔ kerisetiano tei “ruhiruhia,” e teihea pǔpǔ e faahohoˈa ra i ‘te ui e haere mai’?

¹⁵ Ua ineine noa te toea faatavaihia i te haapii i te mau mamoe ê atu no te amo i te mau hopoia rahi atu â. Te na ô ra te Salamo 71:18 e: “Ia ruhiruhia vau e ia hinahinahia tau upoo, e te Atua e, eiaha oe e faarue mai ia ˈu, ia faaite râ vau i to mana i teie nei ui; e to puai, i te taata atoa ia haere mai.” Ma te faataa i teie irava, ua haamatara Te Pare Tiairaa o te 15 no Titema 1948 e papu maitai ua ruhiruhiahia te amuiraa o te mau Kerisetiano faatavaihia. Te parau-faahou-hia ra e “te hiˈo ra” te feia faatavaihia ma te oaoa “i mua ia au i te maramarama o te parau tohu a te Bibilia, e te ite ra i te hoê ui apî.” No vai ïa teie parau? Te na ô ra Te Pare Tiairaa e: “Te parau ra o Iesu no ratou mai ta ˈna mau ‘mamoe ê atu.’” ‘Te ui e haere mai,’ o te feia ïa e ora i raro aˈe i te faatereraa apî i nia i te fenua nei, e faaterehia e te Basileia o te raˈi.

16. Te tiai ru nei te feia o ‘te ui e haere mai’ i teihea mau haamaitairaa?

¹⁶ Aita te Bibilia e faataa maitai ra e afea te mau Kerisetiano atoa i faatavaihia e faarue mai ai i to ratou mau taeae o teie ‘ui e haere mai’ e e reva ˈi no te faahanahanahia e o Iesu Mesia. Te tiaturi nei râ teie feia faatavaihia e te fatata maira te reira taime. Ua tupu te mau ohipa i tohuhia i roto i te parau tohu rahi a Iesu no nia i “te tau hopea ra” mai te matahiti 1914 mai â, e te faaite ra te reira e fatata teie nei ao i te haamouhia. (Daniela 12:4; Mataio 24:3-14; Mareko 13:4-20; Luka 21:7-24) E fatata o Iehova i te haamau i te hoê ao apî, i reira ‘te ui e haere mai’ e ‘parahi ai i te basileia [te fenua nei] i haapaohia no ratou mai te hamaniraa mai o te fenua nei.’ (Mataio 25:34) Te oaoa nei ratou e feruri i te haamau-faahou-raa o te Paradaiso e te tia-faahou-raa o te mau mirioni feia pohe i roto ia Hade. (Apokalupo 20:13) Tei reira atoa anei te feia faatavaihia no te farii i te feia e faatiahia mai? I te matahiti 1925 ra, ua faahiti Te Pare Tiairaa o te 1 no Me e: “Eiaha tatou e parau ma te etaeta e eaha ta te Atua e rave aore ra e ore e rave. . . . [Teie râ,] e nehenehe tatou e manaˈo e, e faahanahanahia te mau melo o te Ekalesia [te mau Kerisetiano faatavaihia] na mua ˈˈe te tia-faahou-raa o te feia faufaa no tahito ra [te mau ite haapao maitai hou te tau kerisetiano].” No nia atoa i te parau e e ora noâ mai anei vetahi feia faatavaihia no te farii i te feia e faatiahia mai, te na ô ra Te Pare Tiairaa o te 1 no Setepa 1989 e: “E ere hoi i te mea titauhia.”d

17. Eaha te mau haamaitairaa taa ê ta te feia faatavaihia, ei pǔpǔ, e fanaˈo e te Arii i faateronohia o Iesu Mesia?

¹⁷ Parau mau, aita tatou i ite e eaha te ohipa e tupu i nia i te Kerisetiano tataitahi i faatavaihia. Teie râ, i to Mose raua o Elia faraa mai i pihai iho ia Iesu i roto i te orama o te faahuru-ê-raa, te faaite ra ïa te reira e i pihai iho atoa te mau Kerisetiano faatavaihia i faatiahia mai ia Iesu, ia haere mai oia ma te hanahana no te ‘faautua maitai i te taata atoa ia au i ta ˈna ra ohipa,’ a faaoti e a faatupu ai oia i ta ˈna haavaraa. Hau atu, te haamanaˈo ra tatou i te parau tǎpǔ a Iesu e, e apiti atu te mau Kerisetiano faatavaihia tei “re” e o ˈna no te ‘tavana i nia i te mau nunaa ma te sepeta auri ra’ i Aramagedo. Ia haere mai o Iesu ma te hanahana, e parahi ratou e o ˈna no “te haavaraa i te mau opu o Iseraela tino ahuru ma piti ra.” Na ratou e o Iesu e ‘haaparuparu ia Satani i raro aˈe i to ratou avae.’—Mataio 16:27–17:9; 19:28; Apokalupo 2:26, 27; 16:14, 16; Roma 16:20; Genese 3:15; Salamo 2:9; Tesalonia 2, 1:9, 10.

18. (a) Eaha te huru tupuraa no nia i ‘te amuiraa o te mau mea o te raˈi atoa i te Mesia ra’? (b) Eaha ta tatou e nehenehe e parau no nia i ‘te amuiraa o te mau mea o te fenua nei atoa i te Mesia’?

¹⁸ Ia au maite i ta ˈna faatereraa o te mau mea, te ‘amui’ mǎrû noa nei o Iehova ‘i te mau mea atoa i te Mesia ra.’ No nia i te amuiraa o ‘te mau mea o te raˈi,’ ua fatata ta ˈna opuaraa i te hope. Te fatata maira te tahoêraa o na 144 000 atoa e o Iesu i nia i te raˈi no “te faaipoiporaa a te Arenio.” No reira, ua horoahia mai na e rave rahi noa ˈtu â mau taeae paari e te aravihi o te mau mamoe ê atu, o te faahohoˈa ra i ‘te mau mea o te fenua nei,’ i te mau hopoia teimaha ˈtu â, no te turu i to ratou mau taeae faatavaihia. Auê ïa tau oaoa ta tatou e ora nei! Auê te oaoa ia ite i te opuaraa a Iehova e haere ra i to ˈna tupuraa! (Ephesia 1:9, 10; 3:10-12; Apokalupo 14:1; 19:7, 9) E auê te mau mamoe ê atu i te oaoa i te turu i to ratou mau taeae faatavaihia, ei pǔpǔ toopiti o te tavini amui mai te “hoê aˈe nǎnǎ” i raro aˈe i te “hoê hoi tiai” o te auraro i te Arii ra o Iesu Mesia, e i te hanahana o te Arii Mana hope rahi, te Atua ra o Iehova!—Ioane 10:16; Philipi 2:9-11.

[Nota i raro i te api]

Nafea outou ia faataa?

◻ Mea nafea te faanahonahoraa a te Atua i te haereraa i mua i te senekele matamua?

◻ Mea nafea te Tino Aratai i te tupuraa i roto i te aamu o te mau Ite no Iehova i teie nei tau?

◻ Eaha te mau hiˈoraa a te mau Papai e faatia ra e horoa i te mana na te mau mamoe ê atu i roto i te faanahonahoraa a Iehova?

◻ Mea nafea te amuiraahia ‘te mau mea o te raˈi’ e ‘te mau mea o te fenua nei’ atoa i te Mesia?

[Hohoˈa i te api 16]

Ua tamau noa te tino aratai i te ohipa i Ierusalema, noa ˈtu e aita faahou to ˈna mau melo matamua i reira

[Hohoˈa i te api 18]

Ua riro te mau Kerisetiano paari i faatavaihia ei haamaitairaa no te nunaa o Iehova

C. T. Russell 1884-1916

J. F. Rutherford 1916-42

N. H. Knorr 1942-77

F. W. Franz 1977-92

M. G. Henschel 1992-