‘E tamau i te haere ma te ati maite i te Mesia’
“E tena na, ua farii outou i te Fatu i te Mesia ra ia Iesu, e [tamau i te haere ma te ati maite ia ˈna].”—KOLOSA 2:6; MN.
1, 2. (a) Nafea to te Bibilia faataaraa i te oraraa o Enoha i roto i te taviniraa ia Iehova ma te haapao maitai? (b) Nafea to Iehova tautururaa ia tatou ia haere e o ˈna, ia au i ta te Kolosa 2:6, 7 e faaite ra?
UA ITE aˈena anei outou i te hoê tamaiti iti e haere ra e to ˈna metua tane? E pee maite te hoa iti i te mau hautiutiraa atoa a to ˈna metua tane, ma te mata î i te umere; e tamau noa te metua tane i te tauturu ia ˈna, ma to ˈna iho mata î i te here e te haapopou. Oia atoa, e faaohipa Iehova i te hoê faahohoˈaraa e au maite i te reira no te faataa i te hoê oraraa i roto i te taviniraa ia ˈna ma te haapao maitai. Ei hiˈoraa, te parau ra te Parau a te Atua e “ua tamau noa [te taata haapao maitai ra o Enoha] i te haere e te Atua [mau].”—Genese 5:24, MN; 6:9, MN.
2 Mai te hoê metua tane manaˈo maitai e tauturu i ta ˈna tamaiti apî ia haere e o ˈna, ua horoa mai Iehova na tatou i te tauturu maitai roa ˈˈe. Ua tono mai oia i ta ˈna Tamaiti fanau tahi i nia i te fenua. I roto i te mau taahiraa avae atoa o to ˈna oraraa i nia i te fenua, ua faahohoˈa Iesu Mesia ma te tia roa i to ˈna Metua i nia i te raˈi. (Ioane 14:9, 10; Hebera 1:3) No reira, no te haere e te Atua, e titauhia ia haere tatou e o Iesu. Ua papai te aposetolo Paulo e: “E tena na, ua farii outou i te Fatu i te Mesia ra ia Iesu, e [tamau i te haere ma te ati maite ia ˈna]; ia aˈahia i roto ia ˈna, e ia patuhia i nia iho ia ˈna, e ia papu outou i te parau faaroo, mai tei haapiihia ˈtu ia outou na, e ia [î hau aˈe i te faaroo] ma te haamaitai.”—Kolosa 2:6, 7; MN.
3. Ia au i te Kolosa 2:6, 7, no te aha tatou e nehenehe ai e parau e, te haereraa ma te ati maite e te Mesia, e titauhia ïa hau atu â i te rave-noa-raa i te bapetizoraa?
3 No te mea e hinaaro ratou e haere ma te ati maite i te Mesia, a tutava ˈi i te pee i ta ˈna mau taahiraa avae tia roa, e rave te feia haapii i te Bibilia mafatu haavare ore i te bapetizoraa. (Luka 3:21; Hebera 10:7-9) Na te ao atoa nei, i te matahiti 1997 noa ra, hau atu i te 375 000 tei rave i teie taahiraa avae ora—te hoê ïa faito au 1 000 tiahapa i te mahana hoê. Mea faahiahia mau teie maraaraa! Teie râ, te faaite ra te mau parau a Paulo i tapaohia i roto i te Kolosa 2:6, 7 e, te haereraa ma te ati maite i te Mesia, e titauhia ïa hau atu â i te rave-noa-raa i te bapetizoraa. E faataa te ihoparau Heleni i hurihia na roto i te parau ra “tamau i te haere,” i te hoê ohipa e tia ia tamau noa, ma te maumau ore. Hau atu â, ua parau faahou o Paulo e, no te haere e te Mesia, e titauhia e maha ohipa: ia aˈahia i roto i te Mesia, ia patuhia i nia iho ia ˈna, ia papu i te parau faaroo, e ia î hau aˈe i te haamaitai. E hiˈopoa anaˈe i te mau tuhaa atoa o te pereota e e hiˈo anaˈe nafea te reira e tauturu mai ai ia tatou ia tamau i te haere ma te ati maite i te Mesia.
Ua ‘aˈahia anei outou i roto i te Mesia’?
4. Eaha te auraa ia ‘aˈahia i roto i te Mesia’?
4 A tahi, ta Paulo ïa i papai, e titauhia tatou ia ‘aˈahia i roto i te Mesia.’ (A faaau e te Mataio 13:20, 21.) Nafea te hoê taata e nehenehe ai e rohi e ia aˈahia oia i roto i te Mesia? Inaha, eita te mau aˈa o te hoê tumu tiare e itehia e te mata taata, mea faufaa roa râ te reira no te tumu tiare—na te reira e haamau maitai ia ˈna e e horoa i te maa na ˈna. Oia atoa, e ohipa na mua te hiˈoraa o te Mesia e ta ˈna haapiiraa i nia ia tatou ma te ore e itehia, na roto i te putaraa i roto i to tatou feruriraa e to tatou mafatu. I reira tatou e haamâhahia ˈi e e itoitohia ˈi. Ia vaiiho tatou na te reira e aratai i to tatou huru feruriraa, ta tatou mau ohipa, e ta tatou mau faaotiraa, e turaihia tatou ia pûpû i to tatou ora no Iehova.—Petero 1, 2:21.
5. Nafea tatou e nehenehe ai e “hiaai maite” i te maa varua?
5 Mea au roa na Iesu te ite no ǒ mai i te Atua ra. Ua tae roa oia i te faaau i te reira i te maa. (Mataio 4:4) Inaha, i roto i ta ˈna Aˈoraa i nia i te Mouˈa, ua horoa oia e 21 faahitiraa no roto mai i na buka taa ê e vau o te mau Papai Hebera. Ei peeraa i to ˈna hiˈoraa, e tia ia tatou ia riro mai ta te aposetolo Petero i aˈo—“ia hiaai maite” i te maa varua “mai te tamarii fanau apî.” (Petero 1, 2:2) Ia hiaai te hoê tamarii fanau apî i te maa, aita e feaaraa no nia i to ˈna hiaai rahi. Mai te peu e aita tatou e riro ra mai teie no nia i te maa varua, te faaitoito maira te mau parau a Petero ia tatou ia faatupu i taua hiaai ra. Nafea? E nehenehe te faaueraa tumu e itehia i roto i te Salamo 34:8 e tauturu mai: “A tamata na ia ite i te maitai o Iehova.” Ia “tamata” tamau tatou i te Parau a Iehova, te Bibilia, na roto paha i te taioraa i te hoê tuhaa i te mau mahana atoa, e ite tatou e ua haamâhahia tatou i te pae varua e mea au roa. Ia tae i te hoê mahana, e rahi to tatou hiaai i te reira.
6. No te aha e mea faufaa roa ia feruri hohonu i nia i ta tatou e taio ra?
6 Teie râ, mea faufaa ia faatopa maitai i te maa ia paia tatou. No reira, mea titauhia ia feruri hohonu tatou i nia i ta tatou e taio ra. (Salamo 77:11, 12) Ei hiˈoraa, ia taio tatou i te buka ra Te taata rahi roa ˈˈe i ora aˈenei, e rahi roa ˈtu â te faufaa o te mau pene atoa ia faaea tatou e ia ui tatou ia tatou iho e: ‘Teihea huru taata o te Mesia ta ˈu e ite nei i roto i teie aamu, e nafea vau e nehenehe ai e pee i te reira i roto i to ˈu iho oraraa?’ E turai te feruri-hohonu-raa mai teie ia tatou ia faaohipa i ta tatou e haapii. A muri aˈe, tei mua anaˈe tatou i te hoê faaotiraa, e nehenehe tatou e ui ia tatou iho e, ahiri o Iesu tera, e nafea ïa oia. Ia rave tatou i ta tatou faaotiraa ia au i te reira, e haapapu ïa tatou e ua aˈa-mau-hia tatou i roto i te Mesia.
7. Eaha to tatou manaˈo i te maa varua etaeta, e tia ˈi?
7 Te aˈo atoa maira o Paulo ia tatou ia amu i te “maa etaeta,” oia hoi te mau parau mau hohonu aˈe o te Parau a te Atua. (Hebera 5:14) E tia ia riro te taioraa i te Bibilia taatoa ei fa matamua na tatou ia au i teie mau parau. Te vai ra atoa te tahi atu â mau tumu parau taa maitai no te haapiiraa, mai te tusia hoo o te Mesia, te mau faufaa huru rau ta Iehova i faaau e to ˈna nunaa, aore ra te tahi o te mau parau tohu o te Bibilia. E rave rahi tumu parau o te tauturu ia tatou ia amu e ia faatopa i te maa varua etaeta mai teie. Eaha te fa o te raveraa i te ite mai teie? E ere ïa te horoaraa mai i te tumu ia faaahaaha tatou, te faahoturaa râ i to tatou here ia Iehova e ia fatata roa ˈtu â tatou ia ˈna. (Korinetia 1, 8:1; Iakobo 4:8) Ia rave tatou i teie ite ma te hiaai mau, ia faaau tatou i te reira ia tatou iho, e ia faaohipa tatou i te reira no te tauturu ia vetahi ê, te pee mau ra ïa tatou i te Mesia. E tauturu te reira ia tatou ia aˈa-maite-hia i roto ia ˈna.
Te ‘patuhia ra anei outou i nia iho i te Mesia’?
8. Eaha te auraa ia ‘patuhia i nia iho i te Mesia’?
8 No te tahi huru haereraa ma te ati maite i te Mesia, ua taui taue noa o Paulo i te hoê faahohoˈaraa na roto i te tahi—i te faahohoˈaraa o te hoê tumu tiare na roto i to te hoê fare. Ia feruri tatou i te hoê fare e patuhia ra, e feruri tatou eiaha noa i te niu, i te fare atoa râ e faatiahia ma te ite-maitai-hia, na roto i te rave-puai-raa i te ohipa. Oia atoa, e tia ia tutava maite tatou i te faahotu i te mau huru maitatai e te mau peu matarohia e au i te Mesia. Eita e ore i te itehia te tutavaraa mai teie, mai ta Paulo i papai ia Timoteo e: “Ia ite te taata atoa i te tupuraa o to oe ite.” (Timoteo 1, 4:15; Mataio 5:16) Eaha te tahi mau ohipa kerisetiano o te patu ia tatou?
9. (a) No te pee maite i te Mesia i roto i ta tatou taviniraa, eaha te tahi mau fa ohie ta tatou e nehenehe e haamau? (b) Nafea tatou e ite ai e te hinaaro ra Iehova ia oaoa tatou i ta tatou taviniraa?
9 Ua faaue Iesu ia tatou ia poro e ia haapii i te parau apî maitai. (Mataio 24:14; 28:19, 20) Ua haamau oia i te hiˈoraa maitai roa ˈˈe, i te poro-haere-raa ma te itoito e ma te aravihi. Parau mau, eita roa ˈtu tatou e nehenehe e rave mai ta ˈna i rave. Teie râ, ua haamau te aposetolo Petero i teie fa na tatou: “E faateitei râ outou i te Fatu ra i te Mesia i roto i to outou aau: e ia vai ineine [“tamau,” MN] â outou ia parau atu i te taata atoa ia ui mai ia outou i te tiaturi i roto ia outou na, ma te mǎrû e te auraro maite atu.” (Petero 1, 3:15) Mai te peu e aita outou e manaˈo ra e e “vai ineine tamau â outou ia parau atu,” eiaha e hepohepo. A haamau i te mau fa au noa o te tauturu ia outou ia raea mǎrû noa taua faito ra ia outou. E nehenehe te faaineine-oioi-raa ia outou iho e tauturu ia outou ia faarau i ta outou faaiteraa aore ra ia faaohipa hoê aore ra e piti irava. E nehenehe paha outou e haamau i te mau fa mai te vaiiho-hau-atu-â-raa i te mau aratai Bibilia, te rave-hau-atu-â-raa i te mau hoˈi-faahou-raa e farerei, aore ra te haamataraa i te hoê haapiiraa Bibilia. Eiaha te tapao ia tuuhia i nia iho noa i te faito rahi—mai te rahiraa hora, te rahiraa papai i vaiihohia, aore ra te rahiraa haapiiraa Bibilia—i nia iho râ i te maitairaa. Te haamauraa i te mau fa au noa e te tutavaraa ia raeahia te reira, e nehenehe ïa e tauturu ia tatou ia oaoa i te horoaraa ia tatou iho i roto i te taviniraa. O ta Iehova ïa e hinaaro—ia tavini tatou ia ˈna “ma te oaoa.”—Salamo 100:2; a faaau e te Korinetia 2, 9:7.
10. Eaha ˈtu â te tahi mau ohipa kerisetiano e titauhia ia rave tatou, e nafea te reira e tauturu ai ia tatou?
10 Te vai atoa ra te mau ohipa ta tatou e rave i roto i te amuiraa o te patu ia tatou i nia iho i te Mesia. Te mea faufaa roa ˈˈe, te faaiteraa ïa i te here te tahi i te tahi, no te mea o te tapao teie e itehia ˈi te mau Kerisetiano mau. (Ioane 13:34, 35) I te taime a haapii noa ˈi tatou, e tupu te here o te rahiraa o tatou no te taata e faatere i ta tatou haapiiraa, mai te reira iho â hoi. Teie râ, eita anei ta tatou e nehenehe e pee i te aˈoraa a Paulo “ia mahora” na roto i te haamatauraa ia vetahi ê i roto i te amuiraa? (Korinetia 2, 6:13) E hinaaro atoa te mau matahiapo i to tatou here e to tatou tapao mauruuru. Na roto i te rave-amui-raa i te ohipa e o ratou, te titauraa e te fariiraa i ta ratou aˈoraa no roto mai i te mau Papai, e tauturu tatou ia ohie aˈe ta ratou ohipa teimaha. (Hebera 13:17) I taua noâ taime ra, e tauturu te reira ia patuhia tatou i nia iho i te Mesia.
11. Eaha te manaˈo au e tia ia tatou ia rave no nia i te bapetizoraa?
11 E taime anaanatae mau te bapetizoraa! Teie râ, eita e tia ia tiaturi tatou e e riro te mau taime atoa o to tatou oraraa a muri aˈe ei mea faahiahia mai teie. E titauhia i te rahiraa o to tatou paturaa i nia iho i te Mesia ia “haere na taua tapao nei â ma te haapao maite â hoi i te mea hoê [â].” (Philipi 3:16) E ere râ hoi te hoê oraraa haumani e te anaanatae ore. Teie noa te auraa, te haereraa ïa i mua ma te reni afaro—na roto i te tahi atu mau parau, te haamauraa ïa i te mau peu maitatai matarohia i te pae varua e te pee-tamau-raa i te reira i te roaraa o te mau mahana e te roaraa o te mau matahiti. A haamanaˈo na e o “te mau papu e tae noa ˈtu i te hopea ra, oia te ora.”—Mataio 24:13.
Te ‘papu ra anei outou i te parau faaroo’?
12. Eaha te auraa “ia papu . . . i te parau faaroo”?
12 I roto i te toru o te tuhaa o ta ˈna pereota e faataa ra i to tatou haereraa ma te ati maite i te Mesia, te aˈo maira Paulo ia tatou “ia papu . . . i te parau faaroo.” I roto i te hoê huriraa, te taiohia nei, “haamauhia i te pae faaroo,” no te mea te auraa o te parau Heleni i faaohipahia e Paulo teie ïa, “haamau, haapapu, e faariro ei mea aueue ore i te pae o te ture.” A haere noa ˈi tatou i mua i roto i te ite, e noaa ia tatou te mau tumu hau no te iteraa e e niu maitatai to to tatou faaroo i te Atua ra ia Iehova e, oia mau, mea papu maitai i te pae o te ture. Te faahopearaa, o te hoê ïa haereraa i mua o to tatou vai-papu-raa. E fifi noa ˈtu â te ao a Satani i te faaaueue ia tatou. Te faahaamanaˈo maira teie ia tatou i te aˈoraa a Paulo ia “haere â . . . i mua i te paari mau ra.” (Hebera 6:1) E haere apipiti te tiaraa paari e te vai-papu-raa.
13, 14. (a) Eaha te haamǎtaˈuraa i to ratou vai-papu-raa ta te mau Kerisetiano no te senekele matamua no Kolosa i farerei? (b) Eaha tei haapeapea i te aposetolo Paulo?
13 Ua farerei te mau Kerisetiano no te senekele matamua no Kolosa i te mau haamǎtaˈuraa i to ratou vai-papu-raa. Ua faaara Paulo e: “E ara o te riro noa ˈtu outou i te [“philosophia,” MN] e te haavare faufaa ore a te hoê taata ˈtu, i te parau tutuu a te taata nei, mai te â rii a teie nei ao ra, aore i au i ta te Mesia ra.” (Kolosa 2:8) Aita o Paulo i hinaaro e ia hopoi-ê-hia, ia aratai-ê-hia to Kolosa, tei riro mai hoi ei feia faaterehia e “te basileia o [te] Tamaiti [o te] here [o te Atua] ra,” i to ratou tiaraa i te pae varua i haamaitaihia. (Kolosa 1:13; MN) Aratai-hape-hia na roto i teihea auraa? Te faahiti ra Paulo i te “philosophia,” hoê noa taime e itehia ˈi teie parau i roto i te Bibilia. Te parau ra anei oia no te mau philosopho Heleni, mai ia Platon e ia Socrate? Noa ˈtu â e e haamǎtaˈuraa te reira no te mau Kerisetiano mau, i taua mau mahana ra, e auraa aano atu â to te parau ra “philosophia.” E au pinepine te reira i te mau pǔpǔ e te mau haapiiraa manaˈo e rave rahi—tae noa ˈtu te tahi i te pae faaroo. Ei hiˈoraa, ua mairi te tahi mau ati Iuda mai ia Josèphe e ia Philon i ta ratou iho haapaoraa ei philosophia—peneiaˈe ia rahi atu â te anaanataeraa ˈtu i te reira.
14 Peneiaˈe no te pae faaroo te tahi mau philosophia ta Paulo e haapeapea ra. I muri rii aˈe i roto i taua noâ pene ra o ta ˈna rata i to Kolosa, ua parau oia i tei haapii e “Eiaha e amu, eiaha hoi e tamata, e eiaha hoi e rave noa ˈtu,” te faahiti ra ïa oia i te mau faahohoˈaraa o te Ture a Mose tei faahopehia na roto i te pohe o te Mesia. (Roma 10:4) Taa ê noa ˈtu i te mau philosophia a te etene, te ohipa ra te tahi atu mau mea o te haamǎtaˈu i te maitairaa i te pae varua o te amuiraa. (Kolosa 2:20-22) Ua faaara Paulo no nia i te philosophia, e tuhaa hoi te reira no “te â rii a teie nei ao.” No ǒ anaˈe mai te mau haapiiraa hape mai teie i te taata ra.
15. Nafea tatou e nehenehe ai e ape eiaha tatou ia faaaueuehia e te huru feruriraa e ere no roto mai i te Bibilia ta tatou e farerei pinepine?
15 E nehenehe te patururaa i te mau manaˈo e te huru feruriraa a te taata aita i niu-maite-hia i nia i te Parau a te Atua, e haamǎtaˈu i te vai-papu-raa o te Kerisetiano. E tia ia tatou ia ara maitai i teie mau haamǎtaˈuraa i teie mahana. Ua aˈo te aposetolo Ioane e: “E au mau here e, eiaha e faaroo [“atu i te mau parau faaurua atoa, e tamata râ i te mau parau faaurua atoa ia ite e no ǒ mai anei i te Atua ra,” MN].” (Ioane 1, 4:1) No reira, ia tamata te hoê hoa haere haapiiraa i te haapapu ia outou e e peu tahito te oraraa ia au i te mau faito a te Bibilia, aore ra ia hinaaro te hoê taata tapiri e arato ia outou ia pee i te hoê haerea nounou taoˈa, aore ra ia ume mǎrû noa te hoê hoa rave ohipa ia outou ia ofati i to outou haava manaˈo i faaetaetahia e te Bibilia, aore ra ia tae noa ˈtu te hoê hoa faaroo i te faahiti i te mau parau faaino e te manaˈo ino no nia ia vetahi ê i roto i te amuiraa ia au i to ˈna iho manaˈo, eiaha e farii noa ˈtu i ta ratou e parau ra. A faaore atu i tei ore e au i te Parau a te Atua. Ia na reira tatou, e atuatu tatou i to tatou vai-papu-raa a haere noa ˈi tatou ma te ati maite e te Mesia.
“Ia î hau aˈe i te faaroo ma te haamaitai”
16. Eaha te maha o te tuhaa o te haereraa ma te ati maite e te Mesia, e eaha te uiraa ta tatou e nehenehe e ui?
16 Te maha o te huru o to tatou haereraa ma te ati maite e te Mesia ta Paulo i faahiti, oia ïa “ia [“î hau aˈe i te faaroo,” MN] ma te haamaitai.” (Kolosa 2:7) E faahaamanaˈo te parau ra “î hau aˈe” i te hoê anavai o te manii i rapae i to ˈna tahora. Te parau maira ïa teie e no tatou ei Kerisetiano, e tia ia tamau noa i te haamaitai aore ra ia riro te reira ei peu matarohia. E tia ia tatou taitahi ia ui maite e, ‘E taata haamaitai anei au?’
17. (a) No te aha e nehenehe ai e parau e e rave rahi te mau mea e tia ia tatou ia riro ei taata haamaitai, tae noa ˈtu i te mau taime fifi? (b) Eaha te tahi mau ô no ǒ mai ia Iehova ra e tia ia outou ia haamaitai taa ê?
17 Oia mau, e rave rahi te tumu e î ai tatou paatoa i te haamaitai ia Iehova i te mau mahana atoa. Tae noa ˈtu i roto i te mau taime ino roa ˈˈe, e nehenehe e itehia te tahi mau ohipa haihai roa o te horoa mai i te tahi maa haamâharaa. Ia faaite mai te hoê hoa e te taa ra ia ˈna to tatou huru. Ia horoa mai te hoê taata here i te hoê aparaa rima tamahanahana. Ia haamâha te hoê po taotoraa i te rohirohi. Ia haamâha te hoê maa au mau i te poia rahi. Te taˈi o te hoê manu, te ata a te hoê tamarii, te hoê raˈi anaana e te ninamu, te hoê mataˈi haumǎrû—e nehenehe tatou e ite i teie mau mea atoa e hau atu â i roto noa i te hoê mahana. Mea ohie noa ia faariro i teie mau ô ei mea tia. Eita anei e au i teie mau mea atoa te hoê mauruuru? No ǒ mai anaˈe teie mau mea ia Iehova ra, te Pu o “te mau mea maitatai i ho-mai-hia mai, e te mau mea tia roa.” (Iakobo 1:17) E ua horoa mai oia na tatou i te mau ô o te hau aˈe i teie mau mea—te ora iho, ei hiˈoraa. (Salamo 36:9) Hau tau â, ua horoa mai oia na tatou i te hoê ravea no te ora e a muri noa ˈtu. No te horoa mai i teie ô, ua rave Iehova i te tusia rahi roa ˈˈe na roto i te tonoraa mai i ta ˈna Tamaiti fanau tahi, “ta ˈna i here taa ê.”—Maseli 8:30, MN; Ioane 3:16.
18. Nafea tatou e nehenehe ai e faaite e te haamaitai ra tatou ia Iehova?
18 E parau mau roa ïa te mau parau a te papai salamo: “E mea tia te haamaitai ia Iehova.” (Salamo 92:1) Oia atoa, ua faahaamanaˈo o Paulo i te mau Kerisetiano no Tesalonia e: “E haamaitai i te Atua i te mau mea atoa ra.” (Tesalonia 1, 5:18; Ephesia 5:20; Kolosa 3:15) E tia ia tatou taitahi ia opua e riro ei taata haamaitai rahi aˈe. Eiaha ta tatou mau pure ia riro noa ei mau titauraa i te Atua no nia i to tatou mau hinaaro. E tia iho â ia na reira rii. Teie râ, a feruri na e te vai ra to outou hoa o te tâuˈa mai ia outou ia hinaaro noa oia i te hoê ohipa ia outou ra! No reira, eaha ïa e ore ai e pure ia Iehova no te haamaitai noa ia ˈna e no te arue ia ˈna? Auê ïa teie mau pure i te faaoaoa ia ˈna ia hiˈo mau oia i raro i teie nei ao aau mehara ore! Te tahi faufaa haihai rii aˈe o teie mau huru pure, te mea ïa e e nehenehe te reira e tauturu ia tatou ia mata noa i nia i te mau paeau maitatai o te oraraa, ma te faahaamanaˈo ia tatou e ua haamaitai-mau-hia tatou.
19. Nafea te mau parau a Paulo i roto i te Kolosa 2:6, 7 e faaitoito mai ai ia tamau tatou paatoa i te haamaitai i to tatou haereraa e te Mesia?
19 E ere anei i te mea faahiahia te rahiraa o te aratairaa paari e nehenehe e hutihia mai mai roto mai i te hoê noa irava o te Parau a te Atua? E tia ia tatou taitahi ia hinaaro mau e haapao i te aˈoraa a Paulo e tamau noa i te haere e te Mesia. Ia opua maite ïa tatou e ia ‘aˈahia i roto i te Mesia,’ “ia patuhia i nia iho ia ˈna,” “ia papu . . . i te parau faaroo,” e ‘ia î hau aˈe i te haamaitai.’ Mea faufaa roa teie aˈoraa no te feia iho â râ i bapetizo-apî-hia. E au atoa râ te reira ia tatou pauroa. A feruri na nafea te aˈa matamua ia tupu hohonu noa ˈtu â e nafea te hoê fare e patuhia ra ia teitei noa ˈtu â. No reira, aita e hopearaa to to tatou haereraa e te Mesia. E rau te tuhaa o to tatou oraraa e titauhia ia tupu tatou i te rahi. E tauturu e e haamaitai Iehova ia tatou, no te mea e hinaaro oia ia tamau tatou i te haere e o ˈna e ta ˈna Tamaiti here ma te hopea ore.
Nafea outou ia pahono?
◻ Eaha te titauhia i roto i te haereraa ma te ati maite e te Mesia?
◻ Eaha te auraa ia ‘aˈahia i roto i te Mesia’?
◻ Nafea tatou e nehenehe ai e ‘patuhia i nia iho i te Mesia’?
◻ No te aha e mea faufaa roa “ia papu . . . i te parau faaroo”?
◻ Eaha te mau tumu e vai ra ‘ia î hau aˈe i te haamaitai’?
[Hohoˈa i te api 10]
Eita te mau aˈa o te tumu raau e itehia, e horoa râ te reira i te maa na ˈna e e haamau maitai ia ˈna