Ia au i te Bibilia . . .

No te aha e mea atâta mau te hohoˈa faufau?

AITA te hohoˈa faufau i taotia-noa-hia i te mau vahi hooraa taoˈa faufau e i te mau faaiteiteraa no nia i te mau peu taatiraa. I teie nei, e noaa ohie noa i te mau huru taata atoa. I roto fatata i te mau fenua atoa, te faaitehia nei te reira i mua i te mata o te mau taata atoa i roto i te mau papai, te mau vea, te mau buka, te mau porotarama afata teata, te mau hohoˈa teata e te mau ripene vidéo. Mea atâta mau anei teie peu o tei parare roa hoi?

Eaha mau na te hohoˈa faufau? Te faataahia ra mai “te faaiteraa (na roto i te hohoˈa aore ra na roto i te papai) i te mau peu i te pae no te taatiraa tino, no te faaara i te hinaaro o te taatiraa tino.” Mea maramarama maitai teie faataaraa. I teie nei râ, e tia ia haapapu e eaha te mea e faaara i te hinaaro o te taatiraa tino e te mea e ore e faaara i teie hinaaro; ua faatupu teie uiraa i te mau aimârôraa huru rau. Parau mau, i roto i te tahi faito, tei te taata tataitahi te faataaraa e eaha mau na te hohoˈa faufau. Oia hoi, te hoê mea o te faaara i te hinaaro o te taatiraa tino i roto i te hoê taata, aita roa ˈtu paha ïa e mana i nia i te tahi atu taata. Teie râ, ua faaite mai te hoê maimiraa apî i ravehia i nia e 5 000 taata i Helemani e, ia naeahia te faanavenaveraa o te tino i te tahi faito, e ohipa te mau tumu parau faufau i nia fatata i te mau taata atoa, te mau tane e te mau vahine.

Mea ino anei ia faaara i to ˈna mau hinaaro?

E ere i te mea maitai ia faaara i te hoê hinaaro tiamâ, noa ˈtu eaha te huru, mai te peu e eita e nehenehe e haamâhahia ma te tano. Ei hiˈoraa, ahiri e eita e noaa mai te tahi maa mea au roa na tatou; e mâha anei tatou mai te peu e e hiˈo tamau noa ˈtu tatou i te mau hohoˈa o taua maa nei i roto i te vea aore ra te mau buka? I te tahi aˈe pae, mai te peu e eita tatou e faatiahia—no to tatou paha oraora-maitai-raa—ia amu i teie maa, tera râ, e manaˈonaˈo noa tatou, e riro ïa tatou i te hema i to tatou hiaamu, e mea atâta roa ïa te reira. Hoê â huru, e ere ïa i te mea ohie no te hoê taata puhipuhi avaava, e tamata ra i te haapae i ta ˈna peu, mai te peu e e tamau noa oia i te hiˈo atu ma te faahinaaro i te feia e puhipuhi ra i te avaava.

No nia i te mau hinaaro o te taatiraa tino, ia au i te Bibilia, mea na roto ïa i te haamâharaa i te reira i roto i te faaipoiporaa e noaa mai ai te oaoa. (Korinetia 1, 7:2-5; Hebera 13:4) No reira, mea maamaa mau â no te hoê taata taa noa ia faaara i te mau hinaaro o te ore e nehenehe e haamâhahia! E tupu mai ïa te manaˈo e te erehia ra oia i te tahi mea; e te mea ino roa ˈtu â, e nehenehe te hoê taata taa noa e imi i te ravea no te haamâha i to ˈna mau hinaaro na roto i te peu faanavenaveraa i to ˈna melo taatiraa aore ra te peu taiata, ma te ofati hoi i te mau ture e te mau faaueraa tumu a te Atua.—Tesalonia 1, 4:3-7.

Te auraa anei ïa e e ere te hohoˈa faufau i te mea atâta no te feia i faaipoipohia? Aita; e tano atoa teie mau ture no nia i te haerea i papaihia i roto i te mau Papai no te feia i faaipoipohia. Te titau ra te hohoˈa faufau i te mau hinaaro uˈana miimii e te faaitoito ra ia haamâha i to ˈna iho mau hiaai, area te here ra, e imi na mua oia i te haamâha i te mau hinaaro o to ˈna hoa. E aratai te hohoˈa faufau i te mau taatiraa tino haapao ore o te imi i to ˈna iho mahâraa, e o te riro, i roto atoa i te faaipoiporaa, ei peu hairiiri e te aroha ore.—Korinetia 1, 13:5.

Maoti i te haapuai i te here i rotopu i na hoa faaipoipo, e faaino te hohoˈa faufau i te reira na roto i te haafaufauraa e te faahuru-ê-raa ia ˈna. No roto mai hoi te mau taatiraa tino e faaitehia ra i roto i te mau hohoˈa faufau i te mau manaˈo faanavenave hairiiri mau, no te mea te horoa maira te reira i te tahi manaˈo hape e te ino no nia i te taairaa piri roa i rotopu i na hoa faaipoipo. Hau atu, i roto i te oraraa mau, eita te mau taairaa i rotopu i na hoa faaipoipo e taotia-noa-hia i nia i te taatiraa o te tino; ua niuhia hoi i nia i te here, te arearearaa, te paraparauraa e te tapao aroha. E nehenehe atoa te hohoˈa faufau e faatupu i te peapea i rotopu i na hoa faaipoipo.

Te faahaehaa roa nei te hohoˈa faufau i te mau taata i nia i te faito o te mau animala, o te ohipa ia au i te ture feruri-ore-hia e aratai ra ia ratou. Eita oia e faaitoito i te hitahita ore, te hoê hotu o te varua o te Atua. (Galatia 5:22, 23) E nehenehe oia e aratai tia ˈtu i te mau peu faufau mau i te pae taatiraa. Teie noa hoi vetahi mau tumu no reira te mau kerisetiano e haapae roa ˈi i te mau hohoˈa faufau.

Te horoa ra te Bibilia i teie aˈoraa paari mau: “Ia oaoa oe i te vahine o te apîraa ra. . . . Eaha hoi oe, e tau tamaiti, i au atu ai i te faaturi, i tauahi atu ai [i roto i te auraa mau aore ra na roto i te tahi atu ravea, oia hoi te mau hohoˈa faufau] i nia i te vahine ê.”—Maseli 5:15-20.

Nafea e ore ai e topa i raro aˈe i te mana o te hohoˈa faufau, aore ra e haapae ai i te reira?

Nafea ia ora mai i to ˈna mana

No te patoi atu i te mana o te mau hohoˈa faufau, te horoa ra te Bibilia i teie nei aˈoraa: “E tena na, uumi [a haapohe] iho i to outou mau melo i te mau mea o teie nei ao, mai te faaturi, te parau faufau ra, te paia [hiaai i te pae no te taatiraa tino].” (Kolosa 3:5) I roto i teie irava, te haapapu maitai ra te parau ra ‘a haapohe’ i te manaˈo e haapae roa—eiaha noa râ e tapea—i te melo o te tino o te nehenehe e faaohipahia no te haamâha i teie mau peu tia ore.

Teie râ, e tia ia rave i te reira ia au i te hoê auraa taipe eiaha râ i roto i te auraa mau. Eita te mau kerisetiano e tâpû i to ratou iho melo. Mai te peu e e “haapohe” roa tatou i te mau manaˈo faufau i te pae taatiraa, eita ïa tatou e topa i roto i te marei o te hohoˈa faufau, e eita atoa tatou e faaohipa i te mau melo o to tatou tino, ei hiˈoraa te mata, ma te tia ore. (hiˈo Mataio 5:29, 30.) No reira te Bibilia e aˈo ai ia mono i te mau hinaaro faufau na roto i “te mau mea tia ra, te mau mea viivii ore ra,” e “e haamanaˈo i taua mau mea ra.”—Philipi 4:8.

Eaha te nehenehe faahou e tauturu ia tatou? Te haamanaˈo-noa-raa—peneiaˈe paha na roto i te tamau-aau-raa—i te mau irava bibilia mai teie te huru:

“E faafariu ê i tau mata ia ore ia hiˈo i te mea faufaa ore.”—Salamo 119:37.

“O te mau mea atoa o teie nei ao, o te hinaaro tia ore o te tino nei, e te hinaaro tia ore o te mata nei, . . . e ere ïa i to ǒ mai i te Metua ra, no teie nei ao anaˈe ïa.”—Ioane 1, 2:16.

“Ua haavarehia râ te taata ia faahahau-ê-hia, e ia riro noa ˈtu i to ˈna iho hinaaro tia ore. E ua tô anaˈe taua hinaaro tia ore ra, fanau maira ta ˈna, o te hara; e ia rave-faahope-hia te hara ra, fanau maira ta ˈna, o te pohe.”—Iakobo 1:14, 15.

E nehenehe mau â e faariro i te mau mea atoa o te faatupu i te hoê ohipa i muri aˈe i te tahi e hope roa ˈi na roto i te pohe, ei mea atâta e e tano te reira no te hohoˈa faufau! Ia haamanaˈo na tatou i teie irava: “O te ueue i ta to ˈna ihora tino, o te pohe ta ˈna e noaa i te tino ra; e o te ueue i ta te [v]arua ra, o te ora mure ore ta ˈna e noaa i te [v]arua ra.” Eiaha tatou e vaiiho i te hohoˈa faufau ia faaere ia tatou i te ora mure ore!—Galatia 6:8.

[Parau iti faaôhia i te api 23]

Maoti hoi i te haapuai i te here i rotopu i te feia faaipoipo, e faaino roa te hohoˈa faufau i te reira na roto i te haafaufauraa e te faahuru-ê-raa ia ˈna