‘Ua hoohia outou e te hoê taoˈa faufaa’
‘Ua hoohia outou e te hoê taoˈa faufaa. No reira, a haamaitai i te Atua, i te tino o outou na.’ — KORINETIA 1, 6:20.
1, 2. a) Na te aha i haamatara i te eˈa “i ora ˈi tatou i te mau pohe nei”? b) Eaha tei ravehia ia mana te tusia o te Mesia i te pae o te ture, e na te aha i faahohoˈa mai i te reira?
TE NA ô ra te papai salamo e: “O to matou nei Atua, o te Atua ïa e ora ˈi; no te Atua hoi, no Iehova, i ora ˈi tatou i te mau pohe nei.” (Salamo 68:20). Ua haamatara te tusia o Iesu Mesia i teie eˈa. Teie râ, no te haamana i teie tusia, e tia i te Mesia ia tia roa ˈtu i mua i te aro o te Atua iho.
2 Ua faahohoˈahia te reira i te Mahana Taraehara a tomo atu ai te tahuˈa rahi i roto i te Vahi Moˈa roa ra (Levitiko 16:12-15). Ua papai te aposetolo Paulo e: “O te Mesia râ i tae maira ei tahuˈa rahi (...) e ere hoi ma te toto puaaniho, e te toto kafa, ma to ˈna iho râ toto, i te tomoraa hoê i roto i te vahi moˈa roa ra, e ma te ora mure ore te noaaraa no tatou. Aita aˈenei hoi te Mesia i tomo i roto i na vahi moˈa i hamanihia e te rima ra, i te hohoˈa no te vahi moˈa mau ra, tei te raˈi mau râ oia ia faaite oia ia ˈna iho i mua i te aro o te Atua no tatou, i teie nei â.” — Hebera 9:11, 12, 24.
Te mana o te toto
3. a) Eaha te huru hiˈoraa a te feia haamori ia Iehova no nia i te toto, e no te aha? b) Na te aha e faaite ra e e mana to te toto no te faaore i te hara i te pae o te ture?
3 Eaha te tuhaa o te toto o te Mesia i roto i to tatou faaoraraa? Mai te tau o Noa mai â, ua faariro te feia haamori mau i te toto ei mea moˈa (Genese 9:4-6). E tuhaa faufaa roa to te toto i roto i te tereraa o te ora, inaha, te na ô ra te Bibilia e “tei te toto hoi te maa ora [aore ra ora] e ora ˈi te mau mea atoa ra”. (Levitiko 17:11.) No reira, e titau na te Ture a Mose e, ia faatusiahia te hoê animala, e faatahehia to ˈna toto i mua ia Iehova. I te tahi taime, ua tuu-atoa-hia te toto i nia i te mau tara o te fata. Ma te papu maitai, tei roto te mana taraehara o te hoê tusia i to ˈna toto (Levitiko 8:15; 9:9). “E aita rea hoi e mea toe i te tamâhia i te toto i ta te ture ra; e aore e toto i faatahehia ra, aita roa e faaoreraa hara.” — Hebera 9:22.
4. a) Eaha te tapao e titauhia ra i to te Atua taotiaraa i te faaohiparaa i te toto? b) Eaha te mea papu maitai no nia i te huru i ravehia no te haapohe ia Iesu?
4 Eita ïa e maerehia e, i raro aˈe i te Ture, e faautuahia na te raveraa hape atoa o te toto i te pohe (Levitiko 17:10)! Ua ite tatou paatoa e ia varavara anaˈe te hoê taoˈa, aore ra ia taranihia oia, e maraa to ˈna faufaa. Ua haapapu te opaniraa a Iehova i nia i te raveraa i te toto, e e faarirohia te toto, eiaha mai te hoê taoˈa mama roa, mai te hoê râ taoˈa faufaa rahi e te maitatai roa (Ohipa 15:29; Hebera 10:29). Ua tano maitai te reira e te opuaraa faahiahia mau ta te toto o te Mesia e faatupu. Ma te tano mau, ua pohe oia ia au i te hoê huru tupuraa o tei haamanii i to ˈna toto. Mea papu atura ïa e aita noa te Mesia i faatusia i to ˈna tino taata, ua haamanii atoa râ oia i to ˈna nephe, ua faatusia i to ˈna iho ora ei taata tia roa (Isaia 53:12)! Aita te Mesia i erehia i teie ravea e au i te ture ia noaa ia ˈna teie ora no te tiaraa taata hara, no reira, e faufaa rahi roa to to ˈna toto i haamaniihia e e nehenehe oia e afaihia ˈtu i mua i te Atua no te faaore i te hara o te huitaata nei.
5. a) Eaha ta te Mesia i hopoi atu i nia i te raˈi, e no te aha? b) Mea nafea te ite-papu-raahia e ua farii te Atua i te tusia a te Mesia?
5 Aita te Mesia i afai i to ˈna toto mau i nia i te raˈi (Korinetia 1, 15:50). Tera râ, ua rave oia i te mea ta te toto e faataipe ra: te faufaa ia au i te ture o to ˈna ora taata tia faatusiahia. I mua i te aro o te Atua, e nehenehe oia e pûpû atu i teie ora ei taoˈa no te hoo mai i te huitaata hara ra. Ua ite-papu-hia te fariiraa o Iehova i teie tusia i te Penetekose o te matahiti 33, i to te varua moˈa niniiraahia i nia i na pǐpǐ e 120 i Ierusalema (Ohipa 2:1-4). E nehenehe atura e parau e ua fatu te Mesia i te huitaata nei na roto i te hooraa mai ia ratou (Galatia 3:13; 4:5; Petero 2, 2:1). I teie nei, e nehenehe te huitaata nei e fanaˈo i te mau maitai o te hoo.
Te feia matamua e fanaˈo i te hoo
6. Eaha te mau faanahoraa ta te Atua i rave ia faaohipahia te mau maitai no roto mai i te hoo a te Mesia?
6 E ere ïa te auraa e e fanaˈo te huitaata i te huru tia roa i te pae tino i te reira iho taime, e tia na mua ia faaore roa i te hara e vai ra i roto i te taata (Roma 7:18-24). Mea nafea e anafea te hara e faaorehia ˈi? Ua faanaho na mua te Atua e 144 000 ‘tahuˈa’ i te raˈi ‘no te Atua ei arii i nia i te fenua’ e o Iesu Mesia (Apokalupo 5:9, 10; 7:4; 14:1-3). Na roto ia ratou, e faatupu-mǎrû-noa-hia ˈi te mau maitai o te hoo i nia i e huitaata nei i nia i te hoê area taime e hoê tausani matahiti. — Korinetia 1, 15:24-26; Apokalupo 21:3, 4.
7. a) Eaha te faufaa apî, o vai tei faaau i te faufaa, e eaha ta ˈna tapao e titau ra? b) No te aha e titauhia ˈi te hoê pohe ia nehenehe te faufaa apî e haamauhia, e eaha te tuhaa i faatupuhia e te toto o te Mesia?
7 Ia noaa mai te reira, ua ‘hoohia’ na arii-tahuˈa e 144 000 “no roto i te taata nei”. (Apokalupo 14:4.) E tupu te reira maoti te hoê “faufaa apî”. Ua riro teie faufaa ei parau faaau i rotopu i te Atua ra o Iehova e te Iseraela a te Atua i te pae varua ia nehenehe to ˈna mau melo e tavini ei arii e ei tahuˈa (Ieremia 31:31-34; Galatia 6:16; Hebera 8:6-13; Petero 1, 2:9). Nafea râ te hoê faufaa i rotopu i te Atua e te taata tia ore e nehenehe ai e tupu? Te faataa ra o Paulo e: “E faufaa ra [i rotopu i te Atua e te taata tia ore], ia pohe mau â te mea e papu ai ra e tia ˈi. E tusia tei pohe e papu ai te faufaa ia fafau; e ore râ e mana i te oraraa o te mea e papu ai ra.” — Hebera 9:16, 17.
8, 9. Eaha te taairaa i rotopu i te hoo e te faufaa apî?
8 No reira, mea titauhia te tusia o te hoo no te faufaa apî, o Iesu hoi te arai. Ua papai o Paulo e: “Hoê hoi Atua, e hoê hoi arai i ropu i te Atua e te taata, o te taata ra o Iesu Mesia; o tei horoa ia ˈna iho ei hoo i te taata atoa, ia faaitehia i te tau au ra.” (Timoteo 1, 2:5, 6). E tano iho â râ teie mau parau no te 144 000, tei ia ratou ra te faaauraahia i te faufaa apî.
9 I to te Atua faaauraa i te hoê faufaa e te Iseraela i te pae tino ra, ua mana te reira i te taime a faatahehia ˈi te toto animala ei tusia (Hebera 9:18-21). Oia atoa, ia mana te faufaa apî, e tia i te Mesia ia haamanii i te “toto no te faufaa”. (Mataio 26:28; Luka 22:20.) Maoti te Mesia tei riro i te hoê â taime ei Tahuˈa Rahi e ei ‘arai no te faufaa apî,’ ua haafanaˈo te Atua i te faufaa o te toto o Iesu i te feia tei faaôhia mai i roto i te faufaa apî, ma te horoa atoa ˈtu te parau-tia taata nei (Hebera 9:15; Roma 3:24; 8:1, 2). E nehenehe atura ïa te Atua e farii ia ratou i roto i te faufaa apî ia riro ratou ei mau arii-tahuˈa i te raˈi ra! Ei Arai e ei Tahuˈa Rahi, te tauturu nei Iesu ia ratou ia tapea noa ratou i te hoê tiaraa mâ i mua i te Atua. — Hebera 2:16; Ioane 1, 2:1, 2.
Te haaputuputuraa i te mau mea no te fenua nei
10, 11. a) No te aha e parauhia ˈi e e ere noa o te mau kerisetiano faatavaihia o te fanaˈo i te hoo? b) O vai te feia rahi roa, e eaha to ratou tiaraa e te Atua?
10 O te kerisetiano faatavaihia anaˈe anei o te fanaˈo i te faatiamâraa na roto i te hoo, te faaoreraa i ta ratou mau hara? Aita, te faafaite ra te Atua i te mau mea atoa ia ˈna ra na roto i te hau i noaa i te toto i manii i nia i te pou haamauiuiraa, mai ta te Kolosa 1:14, 20 e faaite ra. Oia hoi te mau mea no te raˈi ra (te mau 144 000) e te mau mea no te fenua. Teie mau mea, o te feia ïa e titau ra e ora i nia i te fenua nei, te feia o te fanaˈo i te oraraa tia roa i roto i te Paradaiso i nia i te fenua. Mai te matahiti 1935 iho â râ, ua ravehia te hoê tutavaraa rahi no te haaputuputu i teie mau taata. Te faataa ra te Apokalupo 7:9-17 ia ratou mai te “feia rahi roa” tei te Atua ra e te Arenio ra to ratou ora. E tiâ ia ratou ia ora ˈtu i te “ati rahi” e ia ‘arataihia i te mau pape ora ra,’ inaha, te faaite ra te Apokalupo 20:5 e e ora roa mai teie feia, ma te oraraa taata tia roa, na mua ˈˈe te hopea o te Faatereraa Hoê Tausani Matahiti a te Mesia. Te feia e na roto atu i te tamataraa hopea ei feia tia roa, o ratou ïa te faarirohia ei feia parau-tia no te ora e a muri noa ˈtu i nia i te fenua nei. — Apokalupo 20:7, 8.
11 Teie râ, na mua ˈˈe i te reira, “ua horoi” ê na te feia rahi roa “i to ratou ahu, e ua teatea, i te toto o te Arenio”. (Apokalupo 7:14.) Eita te Mesia e ohipa ei Arai no te faufaa apî no ratou, e fanaˈo râ ratou i teie faufaa na roto i te ohipa a te Basileia o te Atua. E ohipa noâ te Mesia no ratou, teie râ, ei Tahuˈa Rahi, ta Iehova e faaohipa no te haafanaˈo i te hoo ia nehenehe ratou i teie nei e parauhia e feia parau-tia na nia i te tiaraa taua no te Atua. (A faaau e te Iakobo 2:23.) I te roaraa o te Mileniuma, e faatiamâ-rii-mǎrû-noa-hia ratou ‘i te tapea ra o te hara, ia noaa [atu ai i te pae hopea] te tiamâ maitai o te tamarii a te Atua ra.’ — Roma 8:21.
12. Ua ohipa te Atua e te feia haapao maitai na mua ˈtu i te tau kerisetiano i nia i teihea niu?
12 No nia i to ratou tiaraa e o Iehova, e au ra e mea taa ê rii te huru o te feia rahi roa i to te feia haamori na mua ˈtu i te tau kerisetiano. Teie râ, ua ohipa te Atua e o ratou maoti te ravea o te hoo i faanahohia no a muri aˈe (Roma 3:25, 26). Ua fanaˈo ratou i te faaoreraa i ta ratou mau hara ia au i te hoê ravea e tano no te hoê noa area taime (Salamo 32:1, 2). Maoti hoi i te faatiamâ ia ratou i te ‘manaˈo o te hara,’ ‘te faahaamanaˈo ra’ te mau tusia animala ‘i ta ratou mau hara’. — Hebera 10:1-3.
13. Eaha te mau mea maitai aˈe ta tatou e fanaˈo ra ia faaauhia i te mau tavini a te Atua na mua ˈtu i te tau kerisetiano?
13 E ere hoê â huru no te mau kerisetiano mau i teie mahana. Te haamori nei ratou i nia i te niu o te hoê hoo ua oti i te aufauhia! Na roto i to ratou Tahuˈa Rahi, ‘e faafatata noa ˈtu ratou ma te aau rotahi i te terono o te aroha mau ra’. (Hebera 4:14-16.) Te faafaiteraa i te Atua, e ere ïa te hoê mea e tiaihia ra ia tupu, e ohipa râ e fanaˈohia ra i teie nei (Korinetia 2, 5:20)! Ia hape ratou, e nehenehe ta ratou hape e faaore-mau-hia (Ephesia 1:7). Te fanaˈo mau nei ratou i te hoê haava manaˈo mâ (Hebera 9:9; 10:22; Petero 1, 3:21). E haamataraa noa teie mau haamaitairaa no te tiamâraa hanahana mau a te mau tamarii a te Atua ta te mau tavini a Iehova e fanaˈo i te tau a muri atu!
Te hohonuraa o te paari e te here o te Atua
14, 15. Mea nafea te hoo i te haamatararaa i te paari rahi o Iehova, e tae noa ˈtu i to ˈna parau-tia e to ˈna here?
14 Ua riro mau â te hoo ei ǒ faahiahia mau no ǒ mai ia Iehova ra! Mea ohie roa ia taa i te reira, e mea hohonu maitai no te faatupu i te mǎtaˈu i nia i te feia maramarama roa ˈˈe. Ua na nia noa to tatou ite i te mau ohipa a te hoo. Te pii nei râ tatou e te aposetolo Paulo e: “Auê te rahi hau ê atu o te paari e te ite o te Atua e! e te imiraa ore o tana faaauraa, e tana mau haerea i te itea ore ia imi e!” (Roma 11:33). Ua faaitehia mai te paari o Iehova i te mea e ua nehenehe oia i te hoê â taime e faaora i te huitaata nei e e faatiamâ i to ˈna mana arii. Na roto i te arai o te hoo, “ua ite mai nei te parau-tia a te Atua (...) o [te Mesia] ta te Atua i tuu mai e faafaite, ia tiaturi i to ˈna ra toto”. — Roma 3:21-26.
15 Eita te Atua e nehenehe e faahapahia no to ˈna faaoreraa i te hara i ravehia i mutaa ihora e te feia haamori na mua ˈˈe i te tau kerisetiano. Hau atu, eita Iehova e nehenehe e faahapahia no to ˈna fariiraa i te feia parau-tia faatavaihia ei mau tamarii na ˈna aore ra te feia rahi roa ei taua no ˈna ra (Roma 8:33). Ua ere-rahi-hia oia iho, e ua ohipa te Atua ia au i te ture, ma te tia roa, ma te patoi taatoa i te pariraa haavare rahi a Satani e na ô ra e e faatere tia ore o Iehova! Ua haapapu-maitai-hia te here miimii ore o te Atua no ta ˈna mau mea i poiete. — Roma 5:8-11.
16. a) Mea nafea to te hoo faaafaroraa i te parau no te haapao maitai o te mau tavini a te Atua? b) Mea nafea te hoo i te horoaraa mai i te hoê niu no te tiaturi i te ao apî parau-tia i mua nei?
16 Ua faatitiaifaro atoa te ravea i faaohipahia no te aufau i te hoo, i te uiraa no nia i te haapao maitai o te mau tavini a te Atua. Ua navai noa te auraro o Iesu no te haapapu i te reira (Maseli 27:11; Roma 5:18, 19). Hau atu, te vai atoa ra te oraraa o na 144 000 kerisetiano o tei tapea i to ratou haapao maitai e tae noa ˈtu i te pohe noa ˈtu te patoiraa a Satani (Apokalupo 2:10)! Maoti te hoo i nehenehe ai ratou e fanaˈo i te pohe-ore-raa ei taoˈa haamauruururaa — oia hoi te ora eita e nehenehe e haamouhia (Korinetia 1, 15:53; Hebera 7:16)! E pariraa maamaa roa ïa ta Satani oia hoi eita te mau tavini a te Atua e nehenehe e tiaturihia! Ua horoa atoa mai te hoo i te hoê niu papu no te tiaturi i te mau parau tǎpǔ a te Atua. E nehenehe tatou e ite i te hoê hohoˈa o te faaoraraa o tei ‘haapapu-maitai-hia’ na roto i te tusia o te hoo (Hebera 8:6). E parau papu ïa te parau no te ao apî parau-tia! — Hebera 6:16-19.
Eiaha ia erehia i te tapao
17. a) Mea nafea to vetahi faaiteraa e ua erehia ratou i te tapao o te hoo? b) Na te aha e turai ia tatou ia vai viivii ore noa i te pae morare?
17 No te fanaˈo i te hoo, e tia ia noaa i te ite, ia faaohipa i te faaroo e ia ora ia au i te mau ture a te Bibilia (Ioane 3:16; 17:3). Mea iti râ te feia e hinaaro nei e na reira (Mataio 7:13, 14). I rotopu atoa i te mau kerisetiano mau, te vai ra vetahi o te “farii faufaa ore noa i te aroha mau o te Atua”. (Korinetia 2, 6:1.) Ei hiˈoraa, i roto i te mau matahiti, e mau tausani feia o tei tiavaruhia no te haerea viivii i te pae taatiraa. Auê te haama e ia hiˈohia te mau mea atoa ta Iehova e ta te Mesia i rave no tatou nei! Eita anei te farii maitai o te hoê taata no te hoo e turai ia ˈna ia ape i te riroraa mai te taata “ua aramoina ia ˈna e ua tamâhia oia i mutaa iho i ta ˈna hara”? (Petero 2, 1:9.) Ma te tano mau, ua faahaamanaˈo atura Paulo i te mau kerisetiano e: “Ua tauihia hoi outou i te taui, e teie nei, e haamaitai i te Atua i to outou tino.” (Korinetia 1, 6:20). Ia haamanaˈo tatou i te reira, e puai roa ˈtu â to tatou hinaaro e vai viivii ore noa i te pae morare! — Petero 1, 1:14-19.
18. Mea nafea te hoê kerisetiano o tei rave i te hara ino mau e nehenehe noa ˈi e fanaˈo i te hoo?
18 Eaha ˈtura ahiri e ua topa ê na te hoê taata i roto i te hara ino mau? E tia ia ˈna ia huti mai i te maitai o te faaoreraa hara na roto i te hoo, ma te fanaˈo i te tauturu î i te here o te mau tiaau (Iakobo 5:14, 15). Noa ˈtu e e titauhia te aˈo paari, eiaha te kerisetiano tei tatarahapa ia haaparuparu i mua i teie huru aˈo (Hebera 12:5). Teie te haapapuraa faahiahia mau a te Bibilia: “Ia faˈi râ tatou i ta tatou hara, e parau mau ta te Atua e te tia i te faaoreraa mai i ta tatou hara, e te tamâraa ia tatou i te mau parau-tia ore atoa.” — Ioane 1, 1:9.
19. Mea nafea paha te hoê kerisetiano ia hiˈo i to ˈna haerea tia ore na mua ˈˈe oia i haapii ai i te parau mau?
19 I te tahi taime, e faataiâ rahi roa vetahi mau kerisetiano no to ratou haerea tia ore i mutaa ihora. “Na mua ˈˈe vau a ô mai ai i roto i te parau mau,” o ta te hoê taeae tei paruparu roa i papai, “ua roohia mâua ta ˈu vahine i te maˈi purumu parauhia herpes génital. I te tahi taime, e manaˈo mâua e mea repo mâua, mai te mea ra e aita to mâua ‘e parahiraa’ i roto i te faanahonahoraa mâ a Iehova”. Oia mau, noa ˈtu e ua riro mai ratou ei kerisetiano, e nehenehe vetahi e ooti mai i te mauiui no roto mai i te mau hape tahito (Galatia 6:7). Teie râ, eita e tia i te hoê taata ia manaˈo e mea viivii oia i mua i te aro o Iehova mai te peu e ua tatarahapa oia. E nehenehe “te toto o te Mesia” ‘e tamâ i to tatou haava manaˈo i te ohipa pohe’. — Hebera 9:14.
20. Mea nafea te tiaturiraa i te hoo ia faaore i te manaˈo faahapa faufaa ore i roto i te hoê kerisetiano?
20 Oia, e nehenehe te faaroo i roto i te hoo e tauturu ia tatou ia faaore i te hopoia teimaha o te faahaparaa ia tatou iho. Teie ta te hoê tuahine apî i parau: “Ua aro noa vau i te peu viivii o te faanavenaveraa i to ˈu melo taatiraa e 11 matahiti i teie nei. Fatata roa vau i te faarue i te amuiraa i te hoê taime, ma te manaˈo e eita Iehova e hinaaro i te hoê taata faufau mau ia haaviivii i ta ˈna amuiraa.” E tia ia tatou ia haamanaˈo e e Atua ‘maitai o Iehova e ua tia ia ˈna te faaore mai i te hara’ mai te peu e e faaitoito tatou i te aro i te peu tia ore, ia ore tatou ia hema! — Salamo 86:5.
21. Mea nafea te hoo ia ohipa i nia i to tatou huru hiˈoraa i te feia e faaino maira ia tatou?
21 E ohipa atoa te hoo i nia i to tatou haerea i nia ia vetahi ê. Ei hiˈoraa, eaha to outou huru ia faaino mai te hoê hoa kerisetiano ia outou? E faarahi anei outou i te faaore i te hara ia au i te Mesia ra (Luka 17:3, 4)? E taata “aau mǎrû aroha noa” anei outou “ma te faore hoi i te hara te tahi e te tahi, mai ta te Atua i faaore mai i ta outou i te Mesia ra”? (Ephesia 4:32.) Aore ra e tapea noa anei outou i te riri e e inoino noa anei tatou? Ia na reira tatou, te erehia ra e tatou i te tapao o te hoo. — Mataio 6:15.
22, 23. a) Mea nafea te hoo ia ohipa i nia i ta tatou mau opuaraa e to tatou huru oraraa? b) Eaha te manaˈo papu te tia i te mau kerisetiano atoa ia rave ia au i te hoo?
22 I te pae hopea, e tia i te faufaa ta tatou e horoa ra no te hoo ia ohipa hohonu i nia i ta tatou mau opuaraa e to tatou huru oraraa. Te na ô ra o Paulo e: ‘Ua hoohia outou e te hoê taoˈa faufaa; eiaha e riro ei tavini no te taata.’ (Korinetia 1, 7:23). O te mau hinaaro materia anei — te fare, te ohipa, te maa, te ahu — te niu o to outou oraraa? Aore ra te imi ra outou na mua i te Basileia, ma te tiaturi i te parau tǎpǔ a te Atua e na ˈna e haapao i teie tuhaa (Mataio 6:25-33)? Te tavini ra anei outou i ta outou paoti ohipa, e inaha, aita e taime toe faahou no te mau ohipa teotaratia? A haamanaˈo na, ‘ua horoa te Mesia ia ˈna iho no tatou’ “ia tamâ oia ia tatou ei taata mau no ˈna iho, e te itoito i te mau ohipa maitatai ra”. — Tito 2:14; Korinetia 2, 5:15.
23 ‘E haamaitai tatou i te Atua na roto ia Iesu Mesia’ no teie ǒ maitatai roa — oia hoi te hoo (Roma 7:25)! Eiaha tatou ia erehia i te tapao o te hoo, ia riro râ oia ei puai mau i roto i to tatou oraraa. Ia haamaitai tatou i te Atua, ma to tatou manaˈo, ta tatou parau e ta tatou ohipa, a haamanaˈo noa ˈi ma te mauruuru rahi e ua hoohia mai tatou e te hoê taoˈa rahi.
Mau uiraa no te hiˈopoa
◻ No te aha te toto e faarirohia ˈi ei mea moˈa, e mea nafea te toto o te Mesia i te afairaahia i mua ia Iehova i nia i te raˈi?
◻ Eaha te tuhaa ta te toto o te Mesia i faatupu no te haamana i te faufaa apî?
◻ Mea nafea te feia faatavaihia e te feia rahi roa ia fanaˈo i te hoo?
◻ Nafea tatou ia faaite e aita tatou i erehia i te tapao o te hoo?
[Hohoˈa i te api 26]
Tei roto te mana o te hoê tusia no te faaore i te hara i to ˈna toto.
[Hohoˈa i te api 27]
E hinaaro te taata e farii popou ra i to te Atua faaoreraa i te hape, e faaore atoa i te hape a vetahi ê.