No te aha matou e faanehenehe ai ia matou no te mau putuputuraa?

Ua ite paha oe i nia i te mau hohoˈa o teie buka rairai e mea nehenehe maitai te mau Ite no Iehova i ta ratou mau putuputuraa. No te aha matou e haapao maitai ai i to matou huru faanehenehe?

No to matou faatura i te Atua. Te parau ra iho â te Bibilia e eita te Atua e hiˈo i te huru rapaeau o te taata. (Samuela 1, 16:7) Ia putuputu râ matou no te haamori ia ˈna, e hinaaro matou e faaite i te faatura ia ˈna e i to matou mau taeae e tuahine. Ia tia ˈtu matou i mua i te hoê haava, e haapao maitai matou i to matou huru faanehenehe. E faaite atoa ïa to matou huru faanehenehe i te mau putuputuraa i to matou faatura i “te Haava i to te ao atoa,” te Atua ra o Iehova, e te haafaufaa ra matou i ta matou vahi haamoriraa ia ˈna.—Genese 18:25.

No te mau aratairaa ta matou e pee ra. Te faaitoito ra te Bibilia i te mau Kerisetiano ia ahu “ma te tura e ma te manaˈo paari.” (Timoteo 1, 2:9, 10) Eita ïa matou e oomo i te ahu huru ê e hiˈo mai te taata aore ra e faaara i te hinaaro tia ore. E tauturu atoa “te manaˈo paari” ia matou ia maiti i te ahu nehenehe eiaha râ mea haapaoraa ore. E tauturu mai teie mau aratairaa i roto i te maitiraa rau a te taata tataitahi. E nehenehe to matou huru rapaeau au maitai e “faanehenehe roa ˈtu â . . . i te haapiiraa a to tatou Faaora,” a “faahanahana ˈtu ai i te Atua.” (Tito 2:10; Petero 1, 2:12) Ma te faanehenehe maitai no te mau putuputuraa e haapii ai matou ia vetahi ê ia haafaufaa i te haamoriraa a Iehova.

Noa ˈtu e aita to oe e ahu e tano no te putuputuraa, e farii-popou-hia oe ia haere mai oe i te Piha a te Basileia. Eita e titauhia ia oomo i te ahu moni rahi aore ra unauna, ei ahu mâ râ, tura e te au noa.

• No te aha mea faufaa ˈi te huru faanehenehe ia haamori matou i te Atua?

• Eaha te mau aratairaa e tauturu mai ia maiti i te huru faanehenehe?