Tuhiko—Te hoê hoa tavini tiaturihia

E RAVE rahi taime to Tuhiko ratereraa na muri ia Paulo e te ohiparaa ei vea na ˈna. Ua riro oia ei taata ohipa o tei nehenehe e horoahia te moni e te mau hopoia tiaau. I te mea e te faaite ra te mau Papai i to ˈna huru e nehenehe oia e tiaturihia—te hoê huru faufaa roa no te mau Kerisetiano atoa—peneiaˈe e hinaaro oe e ite hau atu â no nia ia ˈna.

Ua faataa o Paulo ia Tuhiko mai to ˈna “taeae here ïa, e te [tavini haapao maitai], e e [hoa tavini i roto] i te Fatu nei.” (Kolosa 4:7; MN) No te aha te aposetolo e faahohoˈa ai ia ˈna mai teie te huru?

Te tere tauturu i Ierusalema

Ua itehia te hoê hinaaro i te pae materia i rotopu i te mau Kerisetiano i Iudea i te area matahiti 55 T.T. Ma te tauturuhia e te mau amuiraa no Europa e no Asia Iti, ua faanaho Paulo i te hoê pǔpǔ no te tauturu ia ratou. E tuhaa atoa ta Tuhiko, no te mataeinaa no Asia mai oia, i roto i teie tere tauturu.

I muri aˈe i to ˈna horoaraa i te mau faaueraa e nafea e faanaho i teie ô, ua parau Paulo e e hoˈi atu te taata e nehenehe e tiaturihia i Ierusalema aore ra e haere mai oia na muri ia ˈna, ma te rave mai i te taoˈa aufau. (Korinetia 1, 16:1-4) I roto i te roaraa o to ˈna tere mai Heleni mai e tae atu i Ierusalema, ua apeehia mai oia e e rave rahi taata, e o Tuhiko te hoê o ratou. (Ohipa 20:4) Peneiaˈe e hinaarohia iho â teie nahoa aano no te mea te afai nei ratou i te moni na muri ia ratou no e rave rahi mau amuiraa. Peneiaˈe ua riro te hinaaroraa i te paruru ei tapao maitai roa, i te mea e e haafifi na te nǎnǎ eiâ ia ora ˈtu.—Korinetia 2, 11:26.

Mai to Arisetareho e to Terophimo apeeraa ˈtu ia Paulo i Ierusalema, e au ra e e ua na reira atoa o Tuhiko e te tahi atu feia. (Ohipa 21:29; 24:17; 27:1, 2) No te mea tei roto o Tuhiko i taua porotarama tauturu ra, ua riro ïa oia ei hoê o tei anihia ia riro mai ei “taeae” o tei ohipa e o Tito i Heleni no te faanaho i te taoˈa aufau e o tei “haapao-atoa-hia râ e te mau ekalesia, ia haere oia e o [Paulo] atoa ma taua taoˈa horoa noa.” (Korinetia 2, 8:18, 19; 12:18) Mai te peu e e ua riro te faatupuraahia te faaueraa matamua e Tuhiko ei hopoia hoê roa, hau atu â ïa o te piti o ta ˈna poroi.

Mai Roma e tae atu i Kolosa

E pae aore ra e ono matahiti i muri iho (60-61 T.T.), ua manaˈo Paulo e e matara mai oia i to ˈna tapea-matamua-raahia i Roma. Ua na muri iho Tuhiko ia ˈna, mau hanere kilometera te atea i te fare. Teie nei ua hoˈi atu o Tuhiko i Asia. E tauturu te reira ia Paulo ia tufa i te mau rata i te mau amuiraa kerisetiano o taua vahi ra e ia tono i te tîtî ra o Philemona, Onesimo, ia hoˈi i Kolosa. Ua afai o Tuhiko e o Onesimo i na rata e toru o tei anoihia i teie nei i roto i te pueraa buka tei faauruahia a te Bibilia—hoê i to Ephesia, hoê i to Kolosa, e hoê na Philemona. Peneiaˈe ua faatae-atoa-hia te hoê rata i te amuiraa no Laodikea, hoê oire 11 kilometera i te atea ia Kolosa.—Ephesia 6:21; Kolosa 4:7-9, 16; Philemona 10-12.

E ere o Tuhiko i te hoê taata afai rata noa. Ua riro oia ei vea tiaturihia, inaha ua papai Paulo e: “Na Tuhiko e faaite atu ia outou i te mau parau atoa no ˈu nei, e taeae here ïa, e te [tavini haapao maitai], e e [hoa tavini i roto] i te Fatu nei: i tono atu ai hoi au ia ˈna ia outou na, e ia ite oia i te parau ia outou, e ia haamahanahana hoi i to outou aau.”—Kolosa 4:7, 8; MN.

Te faahiti ra te aivanaa ra o E. Randolph Richards e, “e pinepine te taata afai rata i te riro ei taai i rotopu i te taata papai buka e te feia e fanaˈo ra hau atu i tei papaihia ra. . . . [Te hoê tumu] e hinaarohia ˈi i te hoê taata afai rata e nehenehe e tiaturihia [oia hoi] e pinepine oia i te afai i te tahi atu haamaramaramaraa. Peneiaˈe e faahiti poto noa te hoê rata i te hoê tupuraa, e pinepine ia au i te manaˈo o te taata papai buka, teie râ e faahiti hau atu â te taata afai rata i te mau tuhaa iti atoa ra.” Maoti e nehenehe te hoê rata e horoa i te mau haapiiraa e te mau tumu parau ru, e faatae-atoa-hia te tahi atu mau haamaramaramaraa e te vea tiaturihia ma te parau roa ˈtu.

E mea iti roa ta te mau rata i te feia no Ephesia, Kolosa, e ia Philemona e parau ra no nia i te huru o Paulo. No reira o Tuhiko i faahoˈi mai ai i ta ˈna iho haamaramaramaraa, ma te faataa i te huru tupuraa o Paulo i Roma, ma te faaite i te mau huru tupuraa o te mau amuiraa a nehenehe atu ai e faaitoito. Ua horoa-noa-hia teie mau huru poroi e hopoia i te feia atoa e nehenehe e ohipa no te tia ˈtu ei taata afai rata haapao maitai. O Tuhiko o te hoê o taua huru taata ra.

Tiaau i roto i te mau tuhaa fenua atea

I muri aˈe i to ˈna matararaa mai mai te fare tapearaa no Roma, ua feruri Paulo e tono anei ra oia ia Tuhiko aore ra ia Aretema ia Tito ra i te motu no Kereta. (Tito 1:5; 3:12) I te pitiraa o te tapearaa o Paulo i Roma (peneiaˈe i roto i te area matahiti 65 T.T.), ua tono faahou te aposetolo ia Tuhiko i Ephesia, peneiaˈe no te mono ia Timoteo, o tei nehenehe i tere i taua tau ra na pihai iho ia Paulo.—Timoteo 2, 4:9, 12.

Aita hoi i haapapu-maitai-hia e ua haere o Tuhiko i Kereta e i Ephesia i te roaraa o taua taime ra. Teie râ, te haapapu ra te mau faahitiraa mai teie te huru e ua vai noa oia hoê o te mau hoa piri roa o Paulo e tae roa ˈtu i te hopearaa o te mau matahiti taviniraa a te mau aposetolo. Mai te peu e e ua manaˈo o Paulo i te tono ia ˈna ei tia e peneiaˈe e ere i te mea ohie i te monoraa ia Timoteo e o Tito, e mea papu e e ua riro mai o Tuhiko e tiaau kerisetiano paari. (A faaau e te Timoteo 1, 1:3; Tito 1:10-13.) Ua riro to ˈna anaanatae mau no te ratere e to ˈna faaohiparaahia no te mau tuhaa fenua atea e mea faufaa no Paulo e no te mau amuiraa kerisetiano atoa.

I teie mahana, te tavini nei te mau Kerisetiano tei ineine roa i te faatusia ia ratou iho i te Atua, i roto i te mau amuiraa a te mau Ite no Iehova no to ratou vahi aore ra e haavata ratou ia ratou no te faahaere i mua i te mau faufaa o te Basileia i te tahi atu vahi. E mau tausani o tei farii ma te oaoa i te mau hopoia ei mitionare, tiaau ratere, tavini i roto i te mau paturaa na te ao nei, te taviniraa i te pu rahi a te Taiete Watch Tower, aore ra i roto i te hoê o teie mau amaa. Mai ia Tuhiko, eita ratou e itehia e te rahiraa, e mau taata rave ohipa itoito râ ratou, mau “tavini haapao maitai” o te here-mau-hia e te Atua e o tei herehia e te tahi atu mau Kerisetiano mai te mau “hoa tavini i roto i te Fatu” e nehenehe e tiaturihia.