‘E mea puai te parau a te Atua’
1 “E mea ora . . . te parau a te Atua, e te puai rahi,” ta te aposetolo Paulo ïa i papai. (Heb. 4:12) Eaha ta ˈna e hinaaro ra e parau? E nehenehe te parau, aore ra te poroi, a te Atua e itehia i roto i te Bibilia e ohipa puai i nia i te hoê taata. E mana to te paari e vai ra i roto i te Bibilia no te taui i te oraraa o te hoê taata. E faatae te tamahanahana e te tiaturiraa ta ˈna e taˈitaˈi i te mau taata i te Atua ra o Iehova, Tei horoa i te ora. E mana to ta ˈna poroi no te turai i te hoê taata haavare ore ia haere na te eˈa o te aratai atu i te ora mure ore ra. Teie râ, no te ite i taua mau faahopearaa ra, e tia ia faaohipa i te Bibilia ia poro tatou ia vetahi ê.
2 A taio i te hoê irava bibilia i te mau taime au atoa: Aita te feia poro e rave rahi e matau faahou ra i te faaohipa i te Bibilia i te mau uputa. O outou atoa anei? I te mea e e au ra e aita to te mau taata e rave rahi e taime no te aparau maoro, ua matau paha outou i te pûpû noa i te hoê papai aore ra i te haapoto noa i te hoê irava bibilia. Te faaitoito nei ïa matou i te feia poro atoa ia tutava maitai i te taio hoê aˈe irava bibilia ia faaite ratou i te parau apî maitai. E ite ïa te feia ta ratou e paraparau ra e no roto mau ta tatou poroi i te Parau a te Atua.
3 Mea iti te feia e taio tamau ra i te Bibilia, teie râ, i te rahiraa o te taime, mea faatura na ratou te reira. E pinepine e horoa atoa te feia mea rahi ta ratou ohipa hoê aore ra e piti minuti no te faaroo i te hoê irava o te taio-roa-hia i roto i te Parau a te Atua. Mai te peu e e taiohia te hoê irava bibilia e tano ma te mahanahana e ia faataa-poto-hia te reira, e nehenehe te parau a Iehova e ohipa maitai i nia i te taata e faaroo mai ra. Nafea râ ia faatuati i te mau omuaraa parau e te taioraa i te hoê irava?
4 A tamata i te raveraa i muri nei i te taime opereraa vea: Ia apiti oia i roto i te opereraa vea, e faaohipa te hoê tiaau ratere ma te aravihi i te mau Papai. I muri aˈe i to ˈna pûpûraa i te mau vea ma te haamahitihiti i te hoê tumu parau, e tatara oioi mai oia i ta ˈna Bibilia iti e vai ra i roto i to ˈna pute ahu e e taio oia i te hoê irava e tuati i te tumu parau. E nehenehe noa e ui i te uiraa ra: “Eaha to oe manaˈo i teie parau tǎpǔ tamahanahana?” e i muri iho, e taio i te irava i maitihia.
5 A haamau ei fa na outou e taio hoê aore ra e piti irava bibilia i te mau taata atoa o te faaroo ia outou. E mana to te puai rahi no roto mai i te Bibilia no te faatae â e rave rahi mau taata i te Atua ra.—Ioa. 6:44.