Te parau-tia no te taatoaraa maoti te haava i haamauhia e te Atua
“E here â hoi te Metua i te Tamaiti (...) ua pûpû-hua-hia mai te haava i te Tamaiti.” — IOANE 5:20, 22.
1. Mai te tahi mau taata o te senekele I, eaha te mau uiraa te tia ia outou ia feruri?
MAI TE AHA ta outou huru hiˈoraa i te parau-tia? Eaha hoi ta outou ohipa e rave e itea mai ai ia outou i te parau-tia mau e e ite atu ai outou ia ˈna ia mana i nia i te fenua taatoa nei? E tia mau hoi ia outou ia feruri i nia i taua mau uiraa nei, mai te mau tane e te mau vahine tiaraa teitei no Ateno i na reira.
2, 3. a) Ia au i tei hea manaˈo to Paulo aˈoraa i te mau taata no Ateno e faaroo maira, ia tatarahapa? b) No te aha te tatarahapa i riro ai ei tiaturiraa maere mau na te feia e faaroo ra ia Paulo?
2 Ua faaroo ratou i te hoê oreroraa te tia mau â ia haamanaˈohia ta Paulo i faahiti i mua i te haavaraa tuiroo ra o te Areopago. Ua haaferuri na mua taua aposetolo a te Mesia ra ia ratou e te vai mau ra te hoê Atua otahi, te Poiete, maoti hoi oia tatou paatoa e ora ˈi. Ua aratai taua huru feruriraa nei i teie nei faaotiraa tano mau: maoti taua Atua ra tatou e ora ˈi. I nia i teie faito o ta ˈna oreroraa parau, ua na ô aˈera o Paulo e: “Aita ˈtura te Atua i haapao i taua mau anotau ite ore ra [ei hiˈoraa, o te aratai i te ohipa haamori idolo], teie nei râ, te aˈo mai nei oia i te taata atoa e tatarahapa, eiaha ei vahi toe.” — Ohipa 17:30.
3 Te tatarahapa. Tera te hoê tiaturiraa maere mau no te feia e faaroo atura ia Paulo. Inaha hoi, no te mau Heleni i Tahito ra, te auraa o te parau ra tatarahapa, te inoino-roa-raa ïa no te mea ua rave te hoê taata i te hoê ohipa aore ra i te hoê parau e tatarahapa roa ˈtu ai oia. Tera râ, mai ta te hoê buka e haapapu ra, “eita [te tatarahapa e faahiti] noa ˈˈe i te hoê tauiraa taatoa i te pae no te feruriraa morare o te oraraa, te hoê tauiraa papu i te pae no te aratairaa, te fariu-ê-raa e tano i te haerea i roto i to ˈna taatoaraa”.
4. Eaha te huru feruriraa tano mau e faataa maira i te faahitiraa parau a Paulo no nia i te tatarahapa?
4 Inaha hoi, te taa ra ia tatou paatoa e no te aha e tia ˈi ia tatou ia tatarahapa hohonu mau. E pee anaˈe na i te huru feruriraa o Paulo: I te mea hoi e maoti te Atua e ora paatoa ˈi te mau taata, e utua iho â ïa ta ratou ia ˈna; mea tano atura ïa ia manaˈo e te hinaaro maira te Poiete e ia ite te mau taata e o vai mau na o ˈna. Ahiri e aita to Ateno i ite eaha ta ˈna mau faaueraa tumu e to ˈna hinaaro, e tia ˈtura ïa ia ratou i teie nei, ia ite i te reira, ia tatarahapa e ia faaau i to ratou oraraa i nia i taua hinaaro ra, noa ˈtu eaha te mau huru tutavaraa ta taua ohipa e titau ra. O ta Paulo ïa e faaite maira ia tatou i roto i ta ˈna faahopearaa parau itoito mau e na ô ra e: “No te mea ua haapaohia e ana te mahana e haava mai ai oia i to te ao atoa nei ma te parau-tia, i te taata i haapaohia e ana ra, o ta ˈna i faaite hua mai i te taata atoa nei, oia i faatia faahou mai ia ˈna mai te pohe maira.” — Ohipa 17:31.
5. Eaha hoi ta te oreroraa parau a Paulo i faatupu i nia i te feia e faaroo maira ia ˈna, e no te aha?
5 E tia mau â teie irava, hohonu hoi e te papu, ia tuatapapa-maite-hia, no te mea te horoa maira oia i te tiaturiraa e fatata roa te parau-tia mau i te mana i nia i te fenua taatoa nei. A tapao na i teie mau parau: “haapaohia e ana te mahana”; “haava i to te ao atoa nei”; “ma te parau-tia”; “i te taata i haapaohia e ana ra”; ‘ma te pûpû mai i te hoê ravea’; “oia i faatia faahou mai ia ˈna.” Aita teie mau parau hopea, oia hoi “i faatia faahou mai ia ˈna” i ore i haaferuri i te mau taata e faaroo atura ia Paulo. Ua faaooo mai vetahi pae ia ˈna, ta te mau irava 32 e tae atu i te 34 ïa e haapapu maira, aita vetahi i anaanatae mai i taua oreroraa parau ra; area vetahi pae ra, ua tiaturi mai ïa ratou e ua tatarahapa. O tatou nei râ, mai te peu e te poihâ ra tatou i te parau-tia mau, ia hau na ïa tatou i te faaohipa i te paari eiaha hoi tatou ia riro mai te rahiraa o taua mau taata no Ateno ra; mea faufaa roa hoi te reira no tatou. Ia taa maitai ia tatou i te auraa o te irava 31, e tuatapapa na mua anaˈe na i teie nei mau parau: “E haava mai oia i to te ao atoa nei.” O vai hoi taua “oia” ra? Eaha te mau otia ta ˈna e farii, i te pae iho â râ no te parau-tia?
6. Na te aha e horoa maira i te tahi mau haamaramaramaraa no nia i Tei haapao i te hoê mahana no te haava i te fenua?
6 Te faataa maira te Ohipa 17:30 e o vai ta Paulo e faahiti ra: te faahiti ra hoi oia i te parau no te Atua mau, no Tei horoa mai no tatou i te ora, no to tatou Poiete, e faaite maira i te mau taata atoa e e tia ia ratou ia tatarahapa. E rave rahi mau haamaramaramaraa ta te mau ohipa a te Atua e horoa maira no nia ia ˈna, te vauvauhia maira râ ta ˈna mau faanahoraa no nia i te parau-tia ma te maramarama maitai, i roto i te Bibilia; te faataa maira hoi taua buka nei i te mau auraa i rotopu ia ˈna e te mau taata mai ia Mose, e te faahiti maira i te mau ture ta ˈna i horoa ˈtu ia Iseraela tahito ra.
Eaha te huru haavaraa e eaha te huru parau-tia?
7. Eaha te manaˈo ta Mose i horoa no nia i te parau-tia a Iehova?
7 Eita e ore outou i te ite e, e rave rahi matahiti te maororaa to Mose taairaa i te mau auraa fatata roa e o Iehova, e no te fatata hoi te Atua i nehenehe ai e paraparau e ua parau “vaha” oia ia Mose. (Numera 12:8.) Ua ite o Mose i to Iehova huru i nia ia ˈna, i nia i te tahi atu mau taata e i nia i te mau nunaa. I te mau taime hopea o to ˈna oraraa, mai teie te huru to ˈna faataaraa mai i te huru o te Atua: “Oia te Mato, o tei tia roa ta ˈna ohipa ra; o tei au atoa to ˈna ra mau haerea; e Atua parau mau, e te ino ore ra; e parau-tia ta ˈna e te titiaifaro!” — Deuteronomi 32:4.
8. No te aha tatou e haapao maitai ai i tei parauhia e Elihu no nia i te parau-tia?
8 E hiˈopoa atoa anaˈe na i te manaˈo o Elihu. Eita taua taata nei, tei matauhia no to ˈna paari e to ˈna aravihi, e ru noa i te rave i te tahi mau opuaraa; eita, ua faaea noa râ oia hoê hebedoma hau, i te faaroo-noa-raa i te mau tuatapaparaa manaˈo aita e hopearaa. Eaha ihora ïa te faaotiraa ta ˈna i rave maoti to ˈna aravihi e te haapiiraa hohonu i noaa mai ia ˈna no nia i te mau haerea o te Atua? Teie ta ˈna i parau: “E tena na, e faaroo mai outou ia ˈu, e te feia i ite ra, eiaha roa te parau ino ra e hurihia ˈtu i te Atua! eiaha roa te Puaihope ia parauhia i te rave parau ino ra! E tahoo atu oia i ta te taata ra ohipa, e faautua ˈtu oia i te taata atoa i te ohipa ta ˈna i rave ra. E ore mau te Atua e rave i te parau ino, e ore hoi te Puaihope e ruri ê i te parau tia ra.” — Ioba 34:10-12.
9, 10. No te aha te mau titauraa a te Atua no nia i te haava i maitihia i roto i te taata nei e riro ai ei mau titauraa oaoa mau (Levitiko 19:15)?
9 E ere anei tera mau ta tatou e tiai ra i te hoê haava, ia hiˈo mai oia i te taata tataitahi ia au i to ˈna haerea, ma te ore e paetahi e ma te ore e ruri ê i te parau-tia? Eita anei to tatou manaˈo e hau, ia tia ˈtu tatou i mua i te hoê haava i roto i te taata nei e te vai ra to ˈna teie mau huru?
10 Te parau ra te Bibilia e o Iehova “te Haava i to te ao atoa nei”. (Genese 18:25.) I te tahi taime, ua faaohipa ê na oia i te mau haava i roto i te taata nei. Ei hiˈoraa, eaha ïa ta ˈna e tiai ra i te mau haava iseraela e tia na no ˈna? Te haapapu maira te Deuteronomi 16:19, 20, i reira tatou e ite ai i te tahi mau faaueraa a te Atua e faataa maira i te tiaraa o taua mau haava ra, i te reira: “Eiaha oe e ruri ê i te ture ra; eiaha oe e haapao i te huru o te taata; eiaha hoi e rave i te tarahu; e po hoi te mata o te feia paari i te tarahu, e piˈo ê hoi te parau a te feia parau-tia ra. O te mea tia roa râ ta oe e haapao, ia ora hoi oe.” Mai te peu e te faaite maira te mau tii e faataipe ra i te parau-tia ia ˈna ia au i te mau huru o te hoê vahine tei tapoˈihia te mata no te faahohoˈa mai i te huru paetahi ore e titauhia ra ia ˈna, te titau ra ïa te Atua hau atu â. Inaha, te titau ra oia i te mau haava no te fenua nei o te tia ˈtu hoi no ˈna e o te rave e ia faaohipahia ta ˈna mau ture e ia ore ratou e haapao i te huru o te taata.
11. Eaha ta tatou e nehenehe e faaoti ia au i te tuatapaparaa i te mau haamaramaramaraa bibilia no nia i te parau-tia?
11 Na taua mau haamaramaramaraa ra no nia i ta te Atua huru hiˈoraa mai i te parau-tia, i aratai ia Paulo ia faahiti mai i te mau parau hopea o ta ˈna oreroraa parau, i papaihia i roto i te Ohipa 17:31 e na ô ra e “ua haapaohia e ana [te Atua] te mahana e haava mai ai oia i to te ao atoa nei ma te parau-tia”. Te parau-tia e te oreraa e haapao i te huru o te taata, tera mau te mau mea ta tatou e nehenehe e tiaturi e e na reira mai te Atua. E nehenehe vetahi mau taata e haapeapea i te mea e, ia au i te irava 31, e faaohipa te Atua i “te hoê taata” no te haava i te mau taata atoa. O vai hoi taua taata ra? E nehenehe anei tatou e tiaturi e e faatura mau oia i te mau faanahoraa teitei o te parau-tia i haapaohia e te Atua?
12, 13. Nafea tatou e ite ai e o vai te “taata” ta te Atua e faaohipa no te faatupu i te haavaraa?
12 Te faahaamanaˈo maira te Ohipa 17:18 e te faaite ra o Paulo “[te] parau apî [no nia] ia Iesu e te tia-faahou-raa”. No reira, ia hope ta ˈna oreroraa parau, ua ite maitai te feia e faaroo maira ia ˈna e te faahiti ra oia i te parau no nia ia Iesu Mesia, ia parau oia e e ‘haava mai te Atua i te fenua atoa nei ma te parau-tia, i te taata i haapaohia e ana ra, o ta ˈna i faaite hua mai i te taata atoa nei, oia i faatia faahou mai ia ˈna mai te pohe maira’.
13 Ua papu ia Iesu e ua haapao o te Atua ia ˈna ei haava, ei haava o te pahono i te mau faanahoraa e titauhia ra e te Atua. Teie ta ˈna i parau i roto i te Ioane 5:22: “Aore roa hoi a te Metua taata i haava, ua pûpû-hua-hia mai te haava i te Tamaiti.” I muri aˈe i to ˈna faaiteraa mai i te parau no nia i te tia-faahou-raa o te feia i roto i te apoo ra, te na ô râ Iesu e: “Aore e mea e tia ia ˈu iho ia rave; te faaau nei au i ta ˈu e faaroo nei; e parau-tia hoi ta ˈu; aita hoi au i imi i to ˈu iho hinaaro, o te hinaaro râ o te Metua o tei tono mai ia ˈu nei ra.” — Ioane 5:30; Salamo 72:2-7.
14. Eaha te huru haavaraa ta tatou e tiai ra no ǒ mai ia Iesu ra?
14 E tuati maitai te reira i te Ohipa 17:31, i reira to Paulo haapapuraa mai e e tia i te Tamaiti ia “haava i te ao taatoa nei ma te parau-tia”. Aita roa ˈtu taua parau nei e titau ra i te hoê parau-tia paari mau, te fati ore e te aueue ore. Aita, ia faaau-maite-hia râ te parau-tia i te aroha e te ite eaha to te taata hinaaro. Hau atu, eiaha ia moehia ia tatou, mai te peu e tei te raˈi o Iesu i teie nei, ua ora râ oia i mutaa ihora mai te taata ra te huru. E nehenehe atura ïa oia e taa eaha to tatou mau hinaaro. I roto i te Hebera 4:15, 16, te tuatapapa ra o Paulo i taua tumu parau nei, ia faahiti oia i te parau no te tahuˈa rahi ra o Iesu.
15. E taa ê o Iesu i te mau haava i maitihia i roto i te taata nei, i roto i tei hea tuhaa?
15 Ia taio tatou i te Hebera 4:15, 16, eita anei tatou e oaoa ia ite tatou e o Iesu to tatou haava? Teie hoi tei papaihia: “E ere hoi to tatou i te tahuˈa rahi e ore e tia ia aroha mai ia tatou i to tatou mau paruparu nei; i ati atoa hoi oia i te mau mea atoa mai ia tatou atoa nei, aita roa râ e hara. E teie nei, e faafatata noa ˈtu tatou i te terono o te aroha mau ra, ia arohahia mai tatou nei, e ia noaa te maitai ei turu mai ia tatou i te tau e au ai ra.” I to tatou nei tau, e ere roa ˈtu i te mea ohie ia tia ˈtu i mua i te hoê tiribuna; ma te hoê râ haava mai te Mesia e nehenehe tatou e ‘faafatata noa ˈtu i te terono o te aroha mau ra, ia arohahia mai tatou nei, e ia noaa te maitai ei turu mai ia tatou i te tau e au ai ra’. No nia i taua tau e au ai ra, e nehenehe hoi ta tatou e ui i teie nei uiraa: ‘Afea Iesu e haava mai ai i te huitaata nei ma te parau-tia?’
“Te hoê mahana” no te haava — Afea ïa?
16, 17. Nafea tatou e ite ai e, mai te raˈi mai, te rave ra o Iesu i te hoê ohipa haavaraa?
16 Ia haamanaˈo na tatou i te parau i faaohipahia e Paulo: “ua haapao [te Atua] i te hoê mahana” no te haava i te ao nei na roto i te arai o te Haava ta ˈna i haapao. Na mua ˈˈe râ taua “mahana” haavaraa ra, te rave ra o Iesu mai teie atu nei i te hoê ohipa haavaraa faufaa mau. No te aha hoi tatou e nehenehe ai e parau mai te reira te huru? Inaha hoi, tau taime na mua ˈˈe oia e tapeahia ˈi, ma te pari-hape-hia e ma te faautuahia i te utua pohe ma te tia ore, ua horoa mai Iesu i te hoê parau tohu no nia i to tatou nei tau. E ite tatou i te reira i roto i te Mataio pene 24, i reira to Iesu faataaraa mai i te parau no te mau ohipa e tupu i roto i te ao taatoa nei, o te tapao i te tau e parauhia ra e te “hopea o te amuiraa o te mau mea nei”. Te haapapu maira te mau tamaˈi, te oˈe, te mau aueueraa fenua e te tahi atu mau ati e tairi nei i te fenua nei mai te tau o te Tamaˈi rahi Matamua mai â e te tupu te parau tohu a Iesu e e fatata roa hoi “te hopea”. (Mataio 24:3-14.) E rave rahi matahiti i teie nei to te mau Ite o Iehova horoa-noa-raa i taua mau haamaramaramaraa bibilia ra e te tamau noa nei â hoi ratou i te horoa. Mai te peu e e hinaaro outou i te tahi atu â mau haamaramaramaraa e haapapu mai e te ora mau nei tatou i te mau mahana hopea o te amuiraa o te mau mea tia ore nei, a haere noa ˈtu e farerei i te hoê Ite o Iehova.
17 I teie nei, e fariu tia anaˈe na i nia i te piti o te tuhaa o te buka a Mataio pene 25. Tei roto noâ tatou i te parau tohu a Iesu no nia i te mau mahana hopea. Te mea ta tatou e nehenehe e taio i roto i te Mataio 25:31, 32, te tupu ra ïa i to tatou nei tau, oia hoi: “Ia tae maira te Tamaiti a te taata ma ta ˈna hanahana, e te mau melahi moˈa atoa ra, ei reira oia e parahi ai i nia iho i to ˈna terono hanahana; e e haaputuhia to te mau fenua atoa i mua i to ˈna aro: e na ˈna e faataa ia ratou mai te tiai mamoe e faataa i te mamoe i te puaaniho ra.” E hiˈo anaˈe na eaha ta Iesu e parau ra ei faaotiraa parau no nia i taua ohipa faataa-ê-raa ra, i taua ohipa haavaraa ra. Teie ta tatou e taio i te irava 46: “O te [te mau taata i tuuhia i roto i te anairaa o te mau “puaaniho”] haere ê ïa e rave i te pohe mure ore, area te feia parau-tia ra [te mau mamoe], o te rave ïa i te ora mure ore.”
18. Eaha te faahopearaa o te haavaraa e tupu nei?
18 No reira, te ora nei ïa tatou i te hoê tau hopea, i te hoê tau haavaraa. E fariihia te mau taata e ‘imi ra i te Atua e itea ˈtu ai ia ratou’, i roto i te mau “mamoe”; e nehenehe hoi ratou e ora ˈtu mai roto atu i te amuiraa o te mau mea nei e e tomo atu ai i roto i te ao apî ta te Atua i tǎpǔ maira. I reira hoi te mau parau e itehia i roto i te Petero 2, 3:13 e tupu ai, e na ô ra e: “Te tatari nei râ tatou i te raˈi apî e te fenua apî ta ˈna i parau maira, i te vai-mau-raa o te parau-tia ra.” I taua “mahana” ra hoi te mau parau a Paulo i papaihia i roto i te Ohipa 17:31 e tupu paatoa ˈi, e te fenua nei e haavahia ˈi ma te parau-tia.
19, 20. O vai te ite atu i te Mahana Haavaraa e haere mai nei?
19 E ere te Mahana Haavaraa no te mau “mamoe” anaˈe, tei farii-ê-na-hia no te ora ˈtu i roto i te ao apî. Oia mau, i muri aˈe i to ˈna parauraa e ua horoa mai to ˈna Metua i te haavaraa i roto i to ˈna rima, ua faahiti aˈera Iesu i te parau no te hoê tia-faahou-raa e tupu a muri aˈe. I roto atoa i te Ohipa 10:42, te parau ra te aposetolo Petero e o Iesu Mesia “tei haapaohia e te Atua ei haava i tei ora e tei pohe ra hoi”.
20 No reira, i taua ‘mahana i haapaohia’ ra e te Atua no te “haava i to te ao atoa nei ma te parau-tia” na roto i te arai o Iesu Mesia, mahana e faahitihia ra te parau i roto i te Ohipa 17:31, te feia pohepohe e tia faahou mai ai. Auê ïa te oaoa i te iteraa i te puai o te Atua ia ohipa mai no te faaore roa i te pohe, o te pinepine hoi i te riro ei ohipa tia ore ino roa! Ua haapohehia vetahi mau taata, mai ia Iesu iho, na te mau faatereraa aore ra i te taime to ratou oire e haruhia ˈi e te mau nuu. Ua pohe vetahi mau taata i roto i te mau mataˈi rorofai, i roto i te mau aueueraa fenua, i te mau ati auahi aore ra te tahi atu mau ati mai te reira te huru. — Koheleta 9:11.
Te faatitiaifaroraa i te mau ohipa tia ore o mutaa ihora
21. Nafea te mau ohipa tia ore no mutaa ihora ia faatitiaifarohia i roto i te ao apî?
21 Auê hoi tatou i te oaoa ia farerei faahou tatou i tei moe ra e! Ia tae i taua taime ra, a tahi ra ïa e rave rahi mau taata e nehenehe ai e ‘imi i te Atua e itea mau atu ai’ ratou ia ˈna, e inaha e nehenehe atoa ˈtu ai e tiaturi e e noaa ia ratou i te “ora mure ore”, oia hoi te haamauruururaa e horoahia mai na te mau “mamoe”. Ua roohia hoi te tahi mau taata e faatia-faahou-hia, e tae noa ˈtu te feia e ora ˈtu mai roto atu i te amuiraa o te mau mea tia ore, i te mau ati i faarirohia ei mau ohipa tia ore: mai te mau hapa e itehia i te fanauraahia iho â te taata, te matapo, te tariˈa turi, te fifi i te pae no te parau. E nehenehe anei taua mau ati ra e vai mai i roto i te ‘fenua apî i reira te parau-tia e vai mau ai’? Ua faaohipa o Iehova ia Isaia no te faaite mai i te mau parau tohu e rave rahi e tupu mau hoi ma te faahiahia i te Mahana Haavaraa. A tapao na eaha ta tatou e nehenehe e tiaturi: “Ei reira e faaaraarahia ˈi te mata o te matapo ra, e amaha hoi te tariˈa o te feia tariˈa turi ra: ei reira te pirioi e ouˈauˈa noa ˈi mai te aili, e himene mai hoi te vaha o te taata vava ra.” — Isaia 35:5, 6.
22. Eaha te tamahanahanaraa oaoa mau ta te pene 65 a Isaia e horoa maira no nia i te parau-tia?
22 Eaha hoi te nehenehe e parau no nia i te tahi atu mau ohipa tia ore e faatupu nei i te mauiui rahi? I roto i te Isaia pene 65, e ite tatou i te tahi mau parau au mau e te faaitoito atoa. Ia faaau tatou i te irava 17 e te Petero 2, 3:13, e ite ïa tatou e te faahiti atoa ra taua pene nei i te parau no ‘te mau raˈi apî e te hoê fenua apî’, te hoê amuiraa apî no te mau mea tia. Teie râ, na te aha e tapea i te hoê pae o te mau taata paieti ore ia faaino i te hau e te parau-tia? I mua rii atu, te faaatea ê ra teie nei â pene i taua manaˈo ra.
23. Eaha te faahopearaa o te Mahana Haavaraa no vetahi pae?
23 I roto i te roaraa o taua Mahana Haavaraa ra, e tamau â Iesu i te rave i ta ˈna ohipa no te faataa e o vai te au ia horoahia ˈtu te ora mure ore. Eita hoi e tia ia horoa ˈtu no vetahi pae. I muri aˈe i to ratou imi-maite-raa i te Atua, peneiaˈe paha “hoê hanere matahiti”, e faaite ïa ratou e eita ratou e hinaaro e faaohipa i te parau-tia. Eita ˈtura hoi ta ratou e nehenehe e tamau â i te ora i roto i te ao apî, e e au maite hoi te reira i te parau-tia; o ta te Isaia 65:20 ïa e haapapu ra: “E te taata rave hara tei tae i te matahiti hoê hanere ra; e parauhia ïa, o te tuhihia.” Mea iti roa te feia e ore e au ia horoahia ˈtu te ora mure ore. Aita anei outou e manaˈo ra e, e oaoa roa o tatou iho e e rave rahi atu â mau taata, i te haapii e te faaohipa i te parau-tia? — Isaia 26:9.
24. Eaha ihora ïa no te ohipa tia ore i te pae faanavairaa faufaa?
24 E tia anei ia tatou ia manaˈo e na roto i teie mau parau eita roa ˈtu te parau-tia ore e itehia, noa ˈtu i te pae faanavairaa faufaa? E papu maitai. O ta Isaia 65:21-23 ïa e haapapu ra: “E patu ratou i te fare, e na ratou iho e parahi; e na ratou e tanu i te ô vine, a amu ai i te maa i reira. E ore ratou e patu, e na vetahi ê e parahi; e ore ratou e tanu, e na vetahi ê e amu; mai te mau mahana o te raau nei te mau mahana o to ˈu ra mau taata, e vai taiata te aho o to ˈu ra feia i maitihia i to te mau mea ta ratou i hamani. E ore hoi ratou e ohipa faufaa ore noa; e ore ratou e faafanau i te tamarii pohe noa: e tamarii hoi ratou na tei haamaitaihia mai e Iehova: ratou, e ta ratou atoa ra mau tamarii.” Auê hoi tauiraa ia faaau tatou i ta tatou e farerei nei i teie mahana! E auê hoi haamaitairaa e!
25. Eaha ta outou e tiai ra i te parau-tia ta te Haava i haapaohia e te Atua e faatupu, e ua ineine outou i te aha?
25 No reira, e nehenehe te feia atoa e poihâ nei i te parau-tia, i te hoê parau-tia e tia i te vairaa, e rohi e e faaitoito: e riro mau â te reira ei parau mau, e te fatata roa hoi i te tupu. Ia fanaˈo na ïa ratou i te taime iti e toe nei â i teie nei tau haavaraa no te imi i te Atua e te mau Ite o Iehova e a itea mau atu ai ia ˈna. E riro hoi ratou i te huti mai i te mau haamaitairaa mure ore.
Ei haapoto-noa-raa
◻ Eaha ta tatou i ite no nia i te mau faanahoraa i te pae no te parau-tia a te Atua?
◻ Eaha ta Iesu ohipa e rave i roto i te Mahana Haavaraa e haere mai nei?
◻ Na te aha e faaite ra e te ora nei tatou i te hoê tau hopea no nia i te haavaraa a te Atua?
◻ Nafea te mau ohipa tia ore o mutaa ihora ia faatitiaifarohia i roto i te ao apî?
[Faaiteraa i te fatu o te hohoˈa i te api 29]
Pictorial Archive (Aamu no te pae Hitia o te râ ma)