Ia papu na tatou i te haereraa mai o te Mesia

“Ua itea ia mâua te Mesia.” — IOANE 1:41.

1. Eaha te faaiteraa putapû mau i papaihia i roto i te Bibilia, e afea ra te reira i te faahitiraahia?

NA TE hoê taata ati Iuda o Anederea te iˈoa i faahiti i teie mau parau i to ˈna taeae a 1 950 matahiti i teie nei. Te ite ra anei outou i te anaanatae rahi i roto i taua mau parau ra, tei papaihia e te aposetolo Ioane? Ua tapaohia taua matahiti ra o te ore e nehenehe e moehia e te taata tuatapapa aamu kerisetiano ra o Luka: “te ahuru ma pae i te matahiti i te hau o Kaisara Tiberio.” Ua haamata te 15raa o te matahiti o Tiberio i te avae setepa o te matahiti 28 o to tatou nei tau, o te taime ïa i faatoroahia ˈi oia ei emepera no Roma, e ua hope te reira i te avae setepa o te matahiti 29 o to tatou nei tau. — Luka 3:1-3, 21, 22; Ioane 1:32-35, 41.

2. Mea nafea te parau tohu a Daniela i te faaiteraa i te matahiti 29 o to tatou nei tau?

² Ua tohuhia ma te papu mau te matahiti te Mesia e fa mai ai. Ua mairi tia ˈtu e 483 matahiti, mai te taime te arii ra o Aretehasaseta i horoa ˈi i te faaueraa no te patu faahou ia Ierusalema, i te 20raa o te matahiti o ta ˈna faatereraa, oia hoi i te matahiti 455 hou to tatou nei taua (Nehemia 2:1-8). Ua tohu te peropheta ra o Daniela e “mai te tuuraa i taua parau i te rave faahou e te patu ia Ierusalema e [tae atu i] te Mesia te Arii ra, e hitu ïa hebedoma, e na hebedoma hoi e ono ahuru e piti tiahapa.” (Daniela 9:25). No reira, na te hoê tau e 7 + 62 = 69 hebedoma taipe e faataa ê i na huru tupuraa faufaa mau e piti. E faaauhia ïa na ono ahuru ma iva hebedoma mau i na 483 mahana. Ia au i te faataaraa o te parau tohu ra ‘hoê mahana no te matahiti hoê’, e fa mai ïa te Mesia e 483 matahiti i muri iho, oia hoi i te matahiti 29 o to tatou nei tau. — Ezekiela 4:6.

3. a) Eaha te auraa o te parau ra “Mesia”? b) Eaha te mau parau tohu tei tia i te Mesia ia faatupu?

³ Te taahia ˈtura ïa e no te aha râ, i te matahiti 29 o to tatou nei tau, “te fatimauu noa ra te taata atoa” i te Mesia. (Luka 3:1, 15.) I roto i te reo heleni, hoê â auraa to te parau ra “Mesia” e te parau ra “Kirito”; te auraa o na iˈoa e piti, oia hoi “Faatahinuhia”. (Ioane 1:41.) Te uiraa faufaa mau i rotopu i te mau ati Iuda, teie ïa, ‘O vai ta te Atua ra o Iehova e faatavai ei arii no te faatere, eiaha noa i nia ia Iseraela, i nia râ i te taatoaraa o te huitaata?’ Na roto i te arai o te mau parau tohu, ua haapapuhia e o te hoê ïa huaai no Iuda, te hoê hina a Aberahama. Hau atu â, e roaa mai i te Mesia te terono o te arii no Iuda ra o Davida e e tia ia ˈna ia fanauhia i Bete-lehema, te oire o Davida. — Genese 17:5, 6; 49:10; Salamo 132:11; Daniela 7:13, 14; Mika 5:2; Ioane 7:42.

Te hoê faaiteraa papu maitai

4, 5. a) Eaha te ohipa i tupu i te matahiti 29 o to tatou nei tau, matahiti tapaohia? b) Mea nafea i te iteraahia ma te feaa ore i te taata i maitihia ei Mesia?

⁴ I taua matahiti faataahia ra, oia hoi te matahiti 29 o to tatou nei tau, teie ïa te ohipa i tupu: “I tae mai ai te parau a te Atua ia Ioane a Zakaria i te medebara ra. Haere atura oia na te mau vahi atoa i te pae i Ioridana ra, i te poro haerea i te bapetizo tatarahapa ia faaorehia te hara.” (Luka 3:2, 3). Ua faaineine te taviniraa a Ioane i te mau ati Iuda o tei tatarahapa, ia farii i te haerea mai o te Mesia o tei fatata roa. Hau atu â, ua horoa o Iehova ia Ioane i te hoê tapao. E tia ia ˈna ia tiai i te taata ‘o ta ˈna e ite i te varua i te pouraa mai, e te faaearaa i nia iho ia ˈna ra’. — Ioane 1:33.

⁵ I muri aˈe i to ˈna bapetizoraa ia Iesu no Nazareta, ua ite o Ioane i to ˈna faatavairaahia o te ore e nehenehe e patoihia. Aita o Iesu i faatavaihia i te hinu, mai to ˈna tupuna i nia i te fenua nei o Davida, ua faatavaihia râ oia i te varua moˈa a te Atua ra o Iehova (Samuela 1, 16:13; Ohipa 10:38). I taua iho taime ra, ua parau aˈera te reo a te Atua e: “Tau tamaiti here teie, ua mauruuru roa vau ia ˈna.” (Mataio 3:16, 17). No reira o Ioane i haapapu ai i muri iho e: “Hiˈo atura vau i te [v]arua i te pouraa mai mai te raˈi mai, mai te uupa ra, e ua faaea ihora i nia iho ia ˈna. Ite atura hoi au, e teie ta ˈu parau, o te Tamaiti ïa oia na te Atua.” — Ioane 1:32, 34.

6. Eaha te hiˈoraa maitai ta Anederea e ta Ioane i vaiiho mai na tatou?

⁶ Na roto i teie mau parau, o te faaite ra i to ˈna haapao maitai, ua aratai o Ioane Bapetizo i ta ˈna mau pǐpǐ ia Iesu ra, o ta ˈna i pii atoa “te Arenio a te Atua, o tei hopoi ê atu i te hara o te ao”. (Ioane 1:29.) Ua farii oioi e piti o ta ˈna mau pǐpǐ, ia Iesu. I muri aˈe i te hoê mahana faaearaa i pihai iho ia Iesu, aita roa ˈtu e feaa-faahou-raa i roto i to ratou feruriraa. Ua imi oioi atura te hoê o ratou, o Anederea, i to ˈna taeae, o Simona Petero. Te manaˈohia ra e o Ioane, tamaiti na Zebedaio, te tahi atu pǐpǐ, o tei riro mai ei aposetolo herehia e Iesu. I muri aˈe i to ratou faaiteraa i te Mesia fatata e 70 matahiti, ua turaihia taua Ioane ra ia papai i te mau haamaramaramaraa i faahitihia i nia nei no to tatou maitai. Te haaputapû ra anei to ˈna hiˈoraa e to Anederea i to outou mafatu? Te hinaaro ra anei outou mai ia raua e te tahi atu mau “aposetolo a te Arenio”, e faaite i te mau parau mau putapû no nia i te Mesia? — Apokalupo 1:9; 21:14; Ioane 1:35-41; Ohipa 5:40-42.

Faatavaihia ei Arii e ei Tahuˈa Rahi

7. No te aha aita o Iesu i nehenehe e riro mai ei tahuˈa i roto i te hiero i Ierusalema?

⁷ Na roto i to ˈna fanauraahia, no roto mai oia i te nunaa ati Iuda; tei “raro aˈe [ïa oia] i te ture”. (Galatia 4:4.) No te mea e no roto mai oia i te opu o Iuda, aita oia i nehenehe e riro ei tahuˈa i roto i te hiero tahito a Iehova, no roto hoi te mau tahuˈa e tavini ra, i te huaai a Aarona, no te opu o Levi. “No te opu o Iuda to tatou Fatu, o te opu aore roa i parauhia e Mose i te toroa tahuˈa ra”, o ta te aposetolo Paulo ïa i faahaamanaˈo i to ˈna mau hoa kerisetiano. — Hebera 7:14.

8. Te faahohoˈa ra te hiero a Iehova i nia i te fenua nei i te aha?

⁸ Te papai nei te aposetolo Ioane e: “Oia te maramarama mau, o te haamaramarama mai i te taata atoa i to ˈna haerea mai i te ao nei.” (Ioane 1:6-9). I to Iesu bapetizoraahia, mai te huru ra ïa e ua fa mai te hoê hiero rahi i te pae varua. Oia mau, te vai ra ïa i teie nei te hoê tahuˈa rahi i te pae varua o te nehenehe e faaora mai i te mau taata atoa nei mai te faatîtîraa o te ao a Satani e vai ra i roto i te pouri i te pae varua. — Hebera 8:1-5; 9:24.

9, 10. a) Eaha ta Iesu i hinaaro e parau a faahiti ai oia e: “Aita aˈenei i tia ia oe te tusia e te perosephora”, e: “Ua faaau râ oe i te hoê tino no ˈu”? b) Eaha te mau manaˈo hohonu o Iesu no nia i taua tumu parau ra?

⁹ Ua pure o Iesu i te taime o to ˈna bapetizoraa. Te faataa ra te Bibilia vetahi o ta ˈna mau parau faufaa o tei papaihia i muri iho e te aposetolo Paulo: “Aita aˈenei i tia ia oe te tusia e te perosephora; ua faaau râ oe i te hoê tino no ˈu: i tei taauahihia ra, e te taraehara ra, aita aˈenei oe i mauruuru i te reira. Ua na ô ihora vau, Teie au, e tau Atua, te haere nei au e faatia i to oe hinaaro, (ua papaihia te parau no ˈu i roto i te otaro o te buka ra)”. — Hebera 10:5-7; Luka 3:21.

¹⁰ No reira, ua faaau Iesu no ˈna iho i te parau tohu a te Salamo 40:6-8, o tei faaite e e faaore o Iehova i te mau tusia animala pûpûhia e te mau tahuˈa a Aarona i roto i te hiero i Ierusalema. Aita o Iehova i “mauruuru” i taua mau ô ra, no te mea e ua riro noa te reira ei hohoˈa, e aita te reira i nehenehe e hoo faahou mai ma te taatoaraa i te hara a te taata. No reira, ua faaineine o Iehova i te hoê tino taata tia no Iesu no te pûpû atu ei tusia. Ua tuu atura te Atua i te ora o ta ˈna Tamaiti i te raˈi i roto i te vairaa tamarii o te hoê paretenia ati iuda. No reira, ua fanauhia aˈera o Iesu ma te viivii ore i te hara a Adamu. Ua riro oia ei Tamaiti taata e te tia hoi a te Atua, e ua nehenehe to ˈna ora e hoo faahou mai i te hara a te huitaata nei (Luka 1:30-35). Mai ta te Salamo 40:8 i tohu, ua hinaaro o Iesu e rave i te hinaaro o to ˈna Metua ma to ˈna mafatu taatoa. “No taua hinaaro ra e moˈa ˈi tatou nei, i te pûpûraa hoê i te tino o Iesu Mesia ra.” — Hebera 10:10, 11.

11. Eaha te parau tohu ta te poheraa o te Mesia i faatupu, e mea nafea taua poheraa ra i te ‘faaoreraa i te tusia’?

¹¹ Ua faaore te tusia o te ora taata o Iesu, tei pûpûhia i te hoê taime e a muri noa ˈtu, i te pûpûraa i te tahi atu mau ô i roto i te hiero tahito i Ierusalema. Hau atu, ua pohe o Iesu i te mahana o te Pasa o te matahiti 33, oia hoi fatata e toru matahiti e te afa i muri aˈe i to ˈna bapetizoraahia. E tano na matahiti e toru e te afa i te hoê afaraa hebedoma taipe (Numera 14:34). Ua tupu ïa te mau ohipa mai ta Daniela i tohu no nia i te tâpû-ê-raahia te Mesia: “Ei ropu i taua hebedoma e faaore ai oia i te tusia e te ô ia ore.” (Daniela 9:26, 27). Noa ˈtu e ua tupu noâ te ohipa a te tahuˈa tahito e tae roa i te taime te hiero i haamouhia ˈi i te matahiti 70 o to tatou nei tau, ua ore te faufaa o te mau tusia i pûpûhia e te mau tahuˈa i taua mau matahiti ra, no te mea e ua monohia te reira e te tusia a Iesu o tei hau ê. — Mataio 23:37, 38.

12. Tei nia ˈˈe te autahuˈaraa o Iesu i to Aarona, i roto i teihea auraa?

¹² O Aarona te taata matamua i roto i te hoê anairaa tahuˈa rahi no Iseraela. I muri aˈe i to ˈna faatavairaahia e te hinu moˈa, e tia ia ˈna ia tiai e hitu mahana i roto i te sekene hou e noaa ˈi ia ˈna te mana no te tavini ei tahuˈa rahi (Levitiko 8:12, 33). Oia atoa, ua tiai o Iesu i te hoê area tau hou oia i nehenehe atu ai e ohipa no te mau taata. Ua haamata taua tau tiairaa ra i te taime o to ˈna faatavairaahia ei Tahuˈa Rahi, e ua tamau noâ te reira e tae roa i te taime o to ˈna tia-faahou-raa. Taa ê atu ia Aarona, aita e faufaa na te Tamaiti pohe ore a te Atua ia monohia oia, e ua riro oia i te hoê â taime ei Tahuˈa e ei Arii “ia au i te parau ia Melekisedeka”. — Salamo 110:1-4; Genese 14:18-20; Hebera 6:20; 7:1-3, 11-17, 23-25.

13. a) Eaha te hopoia teimaha tei tia i te tahuˈa rahi no Iseraela ia amo? b) Mea nafea to Iesu Mesia amoraa i te hoê hopoia teimaha roa ˈtu â?

¹³ I Iseraela tahito ra, tei te tahuˈa rahi te hopoia rahi no te horoa i te hoê haapiiraa i te pae faaroo tano maitai (Levitiko 10:8-11; Malaki 2:7). Oia atoa, ua faaite o Iesu i te mau titauraa tia a Iehova o tei tia i te mau taata atoa e hinaaro nei e ia roaa ia ratou te Basileia e te ora mure ore, ia faatupu (Mataio 6:9, 10, 33; 7:28, 29; 11:12; 25:34, 46). I roto i te hoê sunago i Nazareta, ua taio o Iesu e ua faatano oia i teie parau tohu i nia ia ˈna iho e: “Tei nia iho ia ˈu te [v]arua o te Fatu, oia i faatahinu mai ia ˈu ei poro haere i te parau maitai i te taata rii.” E, i muri aˈe i to ˈna haereraa maa taime iti i Kaperenaumi, ua parau oia e: “E parau haere â vau i te parau maitai o te basileia o te Atua i te mau oire ê atu â e tia ˈi, i tonohia mai ai hoi au.” (Luka 4:18, 19, 43; Isaia 61:1, 2). Ua faaineine atoa o Iesu e 70 o ta ˈna mau pǐpǐ no te haaparare i taua pororaa o te Basileia ra, e ua tohu oia e e rahi atu â ta ratou ohipa i ta ˈna iho i rave (Luka 10:1-9; Ioane 14:12). Na reira oia i haamau ai i te mau niu no te hoê faanahoraa haapiiraa bibilia i roto i te ao taatoa nei ta ˈna e faatere na roto i te arai o ta ˈna “tavini haapao maitai”, oia hoi ta ˈna mau pǐpǐ faatavaihia. — Mataio 24:45-47; 28:19, 20.

Te Paruru matamua i te mana arii o Iehova

14. a) No te aha te tahuˈa rahi no Iseraela e tomo ai i roto i te vahi Moˈa Roa hoê taime i roto i te matahiti, i te Mahana o te mau Taraehara? b) Eaha ta te mea noˈanoˈa e faahohoˈa ra?

¹⁴ Te tumu faufaa roa ˈˈe te Tamaiti a te Atua i haere mai ai i nia i te fenua nei, e ere ïa no te faaora i te huitaata, no te pahono râ i te mau tumu parau haavare i faatupuhia e Satani no nia i te mana arii o Iehova. E nehenehe tatou e taa i te reira ia feruri anaˈe tatou i nia i te Mahana o te mau Taraehara ta te mau ati Iseraela i haapao i te mau matahiti atoa. I taua mahana ra, e tia i te tahuˈa rahi tahito ia tomo i roto i te vahi Moˈa Roa e rave rahi taime. I te taime matamua, e tomo ïa oia i roto e te mea noˈanoˈa, e e tuu oia i te reira i roto i te hoê aˈua î i te arahu i tutuihia (Levitiko 16:12-16). Te faahohoˈa maitai ra taua ohipa ra i te mea o ta te Tahuˈa Rahi taipe e rave i nia i te fenua nei hou oia e haere ai i nia i te raˈi no te faaite ia ˈna iho i mua i te aro o Iehova e te faufaa o to ˈna tusia taatab (Hebera 9:24). Mai ta te faaohiparaa i te mea noˈanoˈa e faaite ra, ua tapaohia te oraraa haapao maitai o Iesu na roto i te mau pure ma te aau rotahi, te hoê itoito faahiahia mau no te haamoriraa viivii ore e te hoê here hohonu no Iehova (Salamo 141:2; Mareko 1:35; Ioane 2:13-17; 12:27, 28; 14:30, 31; Hebera 5:7). Ua nehenehe o Iesu e tapea i to ˈna haapao maitai hapa ore i mua i te mau faahemaraa haavarevare atoa, te mau faaoooraa e te hamani-ino-raa uˈana ta Satani e ta te feia e turu ra ia ˈna i faatupu i nia ia ˈna. — Maseli 27:11; Mataio 22:15-18; Mareko 14:60-65; 15:16-32; Luka 4:13, 29; Ioane 8:44, 59.

15. Nafea tatou e nehenehe ai e faaite i to tatou mauruuru ia Iehova no to ˈna horoaraa mai na tatou i te hoê tahuˈa rahi maitai roa (Hebera 10:21-26)?

¹⁵ Na roto i to ˈna faatiaraahia no te oraraa pohe ore i nia i te raˈi, ua haamauruuruhia o Iesu no te mea e ua faatitiaifaro oia i te mana arii o Iehova. E tia ia tatou ia faaite i to tatou mauruuru hohonu ia Iehova no to ˈna horoaraa mai na tatou i te hoê Tahuˈa Rahi maitai roa. “E teie nei, e tahuˈa rahi hau ê o tatou i reva aˈenei i nia i te raˈi, o te Tamaiti a te Atua ra o Iesu, e tapea maite â tatou i ta tatou parau.” (Hebera 4:14). Te hinaaro mau ra anei outou e pee i te hiˈoraa i te pae o te haapao maitai o Iesu, noa ˈtu eaha te ohipa ta te Diabolo e nehenehe e rave? Mai te peu e, e, e nehenehe outou e papu e e tauturuhia outou e e nehenehe outou e upootia mai. Oia mau, e nehenehe outou e fanaˈo i te tauturu maitai roa ˈˈe. “E ere hoi to tatou i te tahuˈa rahi e ore e tia ia aroha mai ia tatou i to tatou mau paruparu nei; i ati atoa hoi oia i te mau mea atoa mai ia tatou atoa nei, aita roa râ e hara. E teie nei, e faafatata noa ˈtu tatou i te terono o te aroha mau ra, ia arohahia mai tatou nei, e ia noaa te maitai ei turu mai ia tatou i te tau e au ai ra.” — Hebera 4:15, 16; 5:7-10; Philipi 4:13; Ioane 1, 2:1, 2.

Te hinaaroraa i te hoê faatitiaifaroraa

16. Eaha te mau tiaturiraa a te mau pǐpǐ matamua o te Mesia no nia i te faatereraa a to ˈna Basileia?

¹⁶ Ua ite oioi o Anederea e o Ioane i te Mesia mau; teie nei râ, mai te tahi atu mau pǐpǐ apî, e tia ia raua ia haapii hau atu â (Ioane 16:12, 13). Mai te mau ati Iuda faaroo e rave rahi no to raua tau, te tiaturi nei ratou e e haamata te Basileia mesia i te faatere i taua tau ra e e faaora oia i te nunaa o Iseraela e to ˈna oire pu, o Ierusalema, i te faatereraa a te mau Etene (Luka 2:38; 3:15; 19:11; 23:51; 24:21). Eaha râ te mau haamaitairaa o te vai noa mai, ta te reira e hopoi mai no te huitaata hara?

17, 18. No te aha Iesu i horoa ai i te parabole o “te hoê taata mana”?

¹⁷ No te faaora mai i te feia e ora i raro aˈe i to ˈna Basileia i te hara e te pohe, e tia ïa e ia pohe te Mesia na mua, mai te hoê arenio tei faatusiahia (Ioane 1:29; Isaia 53:7, 12). A faaite ai o Iesu e e haapohehia oia, e e faatia-faahou-hia oia i muri iho, ua parau aˈera o Petero ia ˈna e: “Eiaha roa ïa, e te Fatu, eiaha roa oe ia na reirahia mai.” (Mataio 16:21, 22). Ua ite râ o Iesu e “aita [ta ˈna mau pǐpǐ] i ite i te auraa i taua parau ra”. — Mareko 9:31, 32; hiˈo Mataio 17:22, 23.

¹⁸ I to ˈna tere hopea i Ierusalema, ua riro te parau a Iesu i te mea papu atu â (Mataio 20:18, 19). Ua faaite atoa oia i te faufaa rahi ta to ˈna poheraa e hopoi mai, ma te parau e: ‘Ua haere mai te Tamaiti a te taata nei no te horoa i to ˈna nephe ei hoo no te taata e rave rahi.’ (Mataio 20:28). Na te mau tiaturiraa hape e tapea ra i ta ˈna mau pǐpǐ ia taa i te auraa o taua mau parau ra. Ua faataa mai o Luka e “te fatata maira Ierusalema ia ˈna, e te manaˈo ra ratou e, e itea mai te basileia o te Atua i reira ra”. No te faaafaro i to ratou huru feruriraa, ua horoa aˈera o Iesu i te hoê parabole i reira to ˈna faaauraa ia ˈna i “te hoê taata mana” o tei tia ia haere na mua “i te fenua roa ia noaa ia ˈna te toroa arii ra”. (Luka 19:11, 12.) O te raˈi ïa taua “fenua” ra, i reira to Iesu haereraa i muri aˈe i to ˈna poheraa e to ˈna tia-faahou-raa.

19. a) Eaha te mau tiaturiraa hape ta te mau pǐpǐ a Iesu i atuatu na i muri aˈe i to ˈna tia-faahou-raa? b) Eaha te tauiraa i tupu i te Penetekose o te matahiti 33, ia au i te mau auraa i rotopu i te Atua e te mau taata (Hebera 8:7-9, 13)?

¹⁹ Teie râ, na mua noa ˈˈe i to Iesu haereraa i nia i te raˈi, ua ani aˈera ta ˈna mau pǐpǐ ia ˈna e: “E te Fatu, ei teie nei anei oe e faahoˈi mai ai i te hau ia Iseraela?” (Ohipa 1:6). Ua haafaufaa ore anei Iesu ia ratou no te mea e ua ani ratou i te reira? Aita, ua faataa râ oia e aitâ te taime i tae e e tia ia ratou ia ohipa rahi atu â i roto i te tuhaa faufaa no nia i te faaiteraa i te Mesia mau (Ohipa 1:7, 8). Fatata roa te mau taairaa i te pae o te faufaa i rotopu i te Atua e te Iseraela i te pae tino i te hope. No reira, eita te Basileia mesia no a muri aˈe e haamauhia i nia i taua nunaa taiva ra i nia i te fenua nei. Ua parau o Iesu i te feia ati iuda o tei patoi ia ˈna e: “E hopoi-ê-hia te basileia o te Atua nei ia outou, e e tuuhia ˈtu i te nunaa e faahotu mai i te huero ra.” (Mataio 21:43). Hoê ahuru mahana i muri aˈe i to Iesu haereraa i nia i te raˈi, ua fa mai taua nunaa ra. Ua niniihia te varua moˈa i nia i na 120 pǐpǐ a Iesu, e ua faatavaihia ïa ratou ei “feia moˈa” na te Atua e no te riro mai ei ‘feia tufaa e te Mesia’ i roto i te Basileia mesia no a muri aˈe. — Daniela 7:13, 14, 18; Roma 1:7; 8:1, 16, 17; Ohipa 2:1-4; Galatia 6:15, 16.

20. Noa ˈtu e e mau tiaturiraa hape to ratou, eaha ta te mau kerisetiano haapao maitai no te senekele XX i rave na?

²⁰ Oia atoa i muri aˈe i to ratou faatavairaahia, ua atuatu te mau kerisetiano no te senekele I i te mau tiaturiraa hape (Tesalonia 2, 2:1, 2). Teie râ, maoti i te atuatu i te inoino e i te faarue atu, ua farii ratou ma te haehaa i te faatitiaifaroraa. Faaitoitohia e te varua moˈa o te Atua, ua farii ratou ma te oaoa i te ohipa pororaa e te ‘faariroraa i te mau taata no te mau fenua atoa ei pǐpǐ’. — Mataio 28:19, 20; Ohipa 1:8; Kolosa 1:23.

21. Eaha te mau uiraa e tuatapapahia i roto i te tumu parau i mua nei?

²¹ Eaha ïa ta tatou e nehenehe e parau no te senekele XX? Ua tamoemoe anei te mau tavini a Iehova i te haamauraa o te Basileia mesia o Iehova? E, mai te mau kerisetiano no te senekele I, ua tia anei ia faatitiaifarohia to ratou mau tiaturiraa i roto i te tahi mau tuhaa?

[Nota i raro i te api]

Eaha ta outou e pahono atu?

◻ Eaha te auraa o te parau ra “Mesia”?

◻ Eaha te ohipa faufaa tei tupu i te matahiti 29?

◻ Mea nafea te Mesia i te ‘faaoreraa i te tusia i te afaraa o te hebedoma’?

◻ Mai to ˈna faatavairaahia, eaha te hopoia ta Iesu i amo?

◻ Eaha te opuaraa faufaa o te haereraa mai matamua o te Mesia, e eaha ta tatou e faaoti no tatou?

[Hohoˈa i te api 24]

Te faaite ra te tomoraa matamua o te tahuˈa rahi i roto i te vahi Moˈa Roa i te hoê mea faufaa roa ˈˈe i te faaoraraa o te huitaata.