Te rave ra anei outou i te hinaaro o te Atua?

I ROTO i ta ratou taviniraa na te mau fare, ua farerei e piti Ite no Iehova i te hoê perepitero no te Ekalesia epikopo. E hohoˈa taata maitai roa o ˈna, e huruhuru taa to ˈna, i roto i te area e 60 matahiti, e e piriaro to ˈna tei papaihia te iˈoa o ta ˈna ekalesia i nia iho. Na roto i te hoê puhipuhiraa aho, ua parau oia: “Mea faahiahia roa ahiri e mai ia outou ta matou mau melo ekalesia i te itoito no te pororaa i te Parau, tera râ, te ani atu nei au ia orua eiaha e haere faahou mai i to ˈu nei fare.”

Oia, e rave rahi mau taata o te haafaahiahia nei i te ohipa a te mau Ite no Iehova e o te haapopou nei ia ratou no to ratou itoito e to ratou manaˈo tae. Teie râ, aita roa ˈtu ratou e anaanatae ra i te mea ta te mau Ite e rave ra, e eita ratou e manaˈo noa ˈˈe e e rave atoa ratou i teie ohipa. E ere râ hoi teie huru tupuraa huru ê roa ia hiˈohia, i te mea apî. Ua tapao o Iesu i te reira i to ˈna ra tau, e ua haamatara oia i teie parau na roto i te ravea o te hoê parabole o tei haaputapû i te manaˈo.

“Eaha ra to outou manaˈo? I te hoê taata toopiti a ˈna pue tamarii tamaroa; ua haere atura oia i te matahiapo, na ô atura, E tau tamaiti, haere oe e rave i te ohipa i roto i tau ô vine ra aauanei. Ua parau maira oia, na ô maira, E ore au e tae, e muri aˈera tatarahapa ihora, haere atura. Ua haere atura oia, e ua na reira atoa ˈtura i te parauraa ˈtu i te teina. Ua parau maira oia, na ô maira, E, aita râ i tae. O vai ta raua i haapao i te hinaaro o to raua metua ra?”—Mataio 21:28-31.

E mea papu maitai te pahonoraa. Mai te nahoa o tei faaroo ia Iesu, e pahono tatou e, “O te matahiapo ra.” Hau atu râ i teie tatararaa ohie ia itehia, na roto i taua parabole ra, ua huti o Iesu i to tatou ara-maite-raa i nia i te vahi faufaa roa oia hoi te raveraa i te mea ta te metua tane i hinaaro. Noa ˈtu e ua parau te tamaiti matahiapo e aita o ˈna i hinaaro e haere, ua haere râ oia e ua haapopouhia oia no te reira. E mea faufaa atoa te raveraa i te ohipa tia. Ua ohipa te tamaiti matahiapo na roto i te raveraa i te ohipa i roto i te ô vine a te metua tane; aita oia i haere atu e rave i te ohipa i roto i ta ˈna iho ô vine.

Eaha te auraa o teie mau parau atoa no tatou nei? Eaha ta te Atua e titau ra i te feia haamori i teie mahana? Eaha ta tatou e nehenehe e haapii na roto i te oraraa o Iesu o te tauturu ia tatou ia rave i te hinaaro o to ˈna Metua? E mau uiraa faufaa roa teie, e ia itea mai ia tatou te mau pahonoraa tano, e maitaihia ïa tatou e a muri noa ˈtu, inaha “o tei haapao râ i to te Atua ra hinaaro, e tia ïa i te oraraa e a muri noa ˈtu.”—Ioane 1, 2:17; Ephesia 5:17.

Eaha te “hinaaro o te Atua”?

Ua faahitihia te parau “hinaaro” hau atu i te 80 taime i roto i te buka Comprehensive Concordance of the New World Translation of the Holy Scriptures. I roto tau 60 o teie mau vahi (oia hoi e 75 i nia i te hanere o te taime) te faaauhia ra i te hinaaro o te Atua. E itehia te mau parau ra “to te Atua ra hinaaro,” “hinaaro o to ˈu Metua,” e “hinaaro o te Atua” hau atu i te 20 taime. Ia au i te reira, te ite ra tatou e e tia ia tatou ia tuu i te faufaa matamua i nia i te hinaaro o te Atua. E tia i te raveraa i te hinaaro o te Atua ia riro ei tapitapiraa matamua i roto i to tatou oraraa.

Te auraa o te parau ra “hinaaro” oia hoi ‘hiaai, mea e hinaarohia, opuaraa papu, mea e hiaaihia ra, oia iho â râ te maitiraa aore ra te opuaraa papu o te hoê taata e mana aore ra e puai to ˈna.’ No reira, te vai ra to Iehova, te Mana Hope, te hoê hinaaro, te hoê hiaai aore ra te hoê opuaraa papu. Eaha ïa? Te faaite maira te mau Papai e i te hoê pae, ‘te hinaaro ra te Atua i te taata atoa ia ora, e ia noaa te ite i te parau mau.’ (Timoteo 1, 2:4) Ua rave o Iesu Mesia e te mau kerisetiano matamua i te ohipa ma te horoa ia ratou taatoa no te hopoi atu i teie ite papu ia vetahi ê ra.—Mataio 9:35; Ohipa 5:42; Philipi 2:19, 22.

O vai te rave ra i te hinaaro o te Atua i teie mahana? I rotopu i na fatata i te piti miria taata o te parau nei e e pǐpǐ ratou no Iesu Mesia, ehia rahiraa o tei riro mai te tamaiti matahiapo ra i roto i te parabole a Iesu, o tei haere i rapae no te rave i te hinaaro o to ˈna metua? E ere i te mea fifi ia pahono. E riro te mau pǐpǐ mau a Iesu Mesia o te pee i to ˈna mau taahiraa avae i te rave i te ohipa o ta ˈna i parau e e tia ia ratou ia rave: “E mata na râ te evanelia i te faaite-haere-hia [na mua] i te mau fenua atoa nei.” (Mareko 13:10) Te poro nei te mau Ite no Iehova, tei hau atu i te maha mirioni e te afa na te ao nei, ma te itoito i te parau apî maitai o te Basileia o te Atua e te haapii atu nei ratou ia vetahi ê, ma te faaite e o te Basileia te tiaturiraa hoê roa o te huitaata nei no te hau e te vai-maitai-raa. Te rave ra anei outou i ta outou tuhaa taatoa i roto i te raveraa i te hinaaro o te Atua? Te poro ra anei outou i te parau apî maitai o te Basileia mai ta Iesu i rave?—Ohipa 10:42; Hebera 10:7.

Te iteraa mai i te oaoa maoti te raveraa i te hinaaro o te Atua

E mea oaoa ia haapii e eaha te hinaaro o te Metua, e mea oaoa roa ˈtu â râ ia haapii atu ia vetahi ê i te hinaaro o te Atua. Ua ite o Iesu i te oaoa na roto i te haapiiraa ˈtu i te taata no nia i to ˈna Metua. Ua riro ïa mai te maa no ˈna. (Ioane 4:34) E fanaˈo atoa tatou i te oaoa mau mai te peu e e rave tatou mai ta Iesu i rave, oia hoi, te pororaa e te haapiiraa ˈtu i te mau mea o ta ˈna i haapii, te mau mea i noaa mai ia ˈna no ǒ mai i to ˈna Metua ra. (Mataio 28:19, 20) Mai ta Iesu i tǎpǔ, “e ao to outou, e te feia i ite i teie nei mau parau, ia haapao outou i taua parau ra.”—Ioane 13:17.

Ei faahohoˈaraa: Ua parau te hoê metua vahine o tei haamata faahou aita i maoro aˈenei i te taviniraa pionie ma te taime taatoa e: “Auê te au e ia ite i te mata o te hoê taata haapii bibilia ia maramarama ia putapû anaˈe to ˈna mafatu i te mau parau mau huru rau a te Bibilia! E mea oaoa roa no ˈu ia ite i te hoê iho â râ vahine haapii ia papai rima roa i te mau irava atoa na mua ˈˈe i te haapiiraa e ia tapao i te taime haapiiraa ia nehenehe oia e pahono i te mau uiraa haamanaˈoraa i muri aˈe.” Ua haapii rii te tahi o ta ˈna feia haapii i te parau mau i to ˈna taurearearaa ra. I te mea e ua faaipoipohia oia i teie nei e te haapeapea ra oia no te tahi mau fifi o ta ˈna e farerei ra, ua hinaaro puai oia e farerei i te mau Ite. Auê oia i te oaoa e i te taime a ite ai te tuahine pionie ia ˈna! Ua oaoa roa teie vahine apî i te haamata-faahou-raa i ta ˈna haapiiraa bibilia.

Te tapearaa i te oaoa o te raveraa i te hinaaro o te Atua

O te Arii ra o Davida no Iseraela tahito te hoê taata o tei imi i te rave i te hinaaro o te Atua i roto i to ˈna oraraa taatoa. Noa ˈtu te mau faateimaharaa e te mau haafifiraa e rave rahi o ta ˈna i farerei, ua faauruahia oia ia parau e: “E mea au na ˈu te rave i to oe hinaaro, e tau Atua; te vai nei hoi ta oe ture tei roto i to ˈu nei aau.” (Salamo 40:8) Tei roto roa te raveraa i te hinaaro o Iehova i te nephe o Davida, i roto roa ia ˈna iho. Tera te tumu o to ˈna oaoa aueue ore i te taviniraa ia Iehova. E ere te raveraa i te hinaaro o te Atua i te hoê ohipa teimaha no Davida. Ua riro râ ei mea au mau, te tahi mea no roto roa mai i to ˈna mafatu. I roto i to ˈna oraraa taatoa, ua aro oia no te rave i te mea maitai aˈe no te tavini i to ˈna Atua, o Iehova, noa ˈtu e ua hara oia i te tahi taime e ua hape oia.

I te tahi taime, e nehenehe to tatou oaoa e topatopa. E nehenehe tatou e rohirohi aore ra e paruparu. Peneiaˈe te haapeapea noa nei ta tatou mau hape i rave i mutaa ihora ia tatou, te patiatia ra to tatou haava manaˈo ia tatou no nia i te hoê ohipa hape ta tatou i rave mea maoro i teie nei. Mea pinepine, e nehenehe tatou e haapaiuma i teie mau manaˈo na roto i te faahohonu atu â i te haapiiraa i te Parau a te Atua. E nehenehe tatou e faariro ei tapao na tatou ia nanaˈo roa i te ture a te Atua i roto i to tatou “aau,” mai ta Davida i rave. Mai te peu e e tamata tatou i te rave i te hinaaro o te Atua ma te horoa ia tatou taatoa, oia hoi, na roto i to tatou ravea maitai roa ˈˈe, e haamauruuru mai oia ia tatou ia au i teie faito no te mea e Atua haapao maitai oia.—Ephesia 6:6; Hebera 6:10-12; Petero 1, 4:19.

Ma te anaanatae, i roto i te Hebera 10:5-7, ua faahiti te aposetolo Paulo i te mau parau a Davida i roto i te Salamo 40:6-8 e ua faatano oia i nia ia Iesu Mesia. I te na reiraraa, ua haamatara o Paulo i te auraa fatata roa e vai ra i rotopu ia Iesu e to ˈna Metua. Te faataa ra te parau Hebera no te “hinaaro” i te mau manaˈo ra ‘e mea au mau, e hiaai, e maitai, aore ra e mea e oaoa ˈi.’ No reira, e nehenehe te Salamo 40:8 e taiohia no nia i te Mesia e: “I te raveraa i te mea e oaoa ˈi oe ra, e ta ˈu Atua e, e mea au mau na ˈu.”a Ua hinaaro o Iesu e rave i te mea e oaoa ˈi to ˈna Metua. Aita noa o Iesu i rave i te mea i anihia mai ia ˈna. Ua rave râ oia i te mea o tei fatata roa i te mafatu o to ˈna Metua, e ua oaoa oia i te na reiraraa.

Ua haamauhia te oraraa taatoa o Iesu i nia i te haapiiraa ˈtu ia vetahi ê e eaha te hinaaro o te Atua e eaha te tia ia ratou ia rave no te fanaˈo i te haamaitairaa a te Atua. E taata poro e e orometua haapii oia ma te taime taatoa e ua noaa mai ia ˈna te oaoa rahi i te raveraa i taua ohipa ra. No reira, e mea tano iho â ïa ia manaˈo e rahi noa ˈtu tatou i te rave i te ohipa a Iehova, e rahi atoa ïa te oaoa e noaa mai ia tatou. E nehenehe atoa anei outou e tavini ma te taime taatoa i roto i te ohipa pororaa ia rahi atoa to outou oaoa?

Te tahi atu tauturu no te tapea i te oaoa i te raveraa i te hinaaro o te Atua, o te tiatonu-maite-raa ïa i nia i te tau i mua nei. O ta Iesu ïa i rave. “O tei faaoromai i te [pou haamauiuiraa], aore i haapao i te haama, i te [oaoa] i tuuhia mai i mua i tana aro.” No ˈna, te oaoa, o te tapearaa ïa i to ˈna haapao maitai i te Atua e tae noa ˈtu i te hopea e na reira, te noaaraa mai i te haamauruururaa o te tiaraa arii i te pae atau o to ˈna Metua.—Hebera 12:2.

A feruri na i te oaoa e fanaˈohia i mua nei e te feia o te tamau noa i te rave i te hinaaro o te Atua. E ite ratou i te haamouraa o te feia o te onoono nei i te rave i to ratou iho hinaaro miimii noa ˈtu e e haamauiui te reira i te feia e tutava nei i te rave i te hinaaro o te Atua. (Tesalonia 2, 1:7, 8) A manaˈo na i te oaoa o te feia herehia o te tia faahou mai i to ratou neheneheraa e haapii e e rave i te hinaaro o te Atua. Aore ra a hiˈo na i te opuaraa a te Atua e faariro faahou i te fenua ei Paradaiso. E i te pae hopea, a feruri i te tiamâraa e noaa mai na roto i te haamou-roa-raahia o Satani, te enemi o te hinaaro o Iehova.

Oia, e nehenehe te hinaaro o te Atua i teie mahana e hopoi mai i te oaoa rahi i teie nei e te oaoaraa mure ore i te tau i mua nei. Noa ˈtu eaha te pahonoraa o te taata i roto i te ohipa pororaa, e pee na tatou e tia ˈi i te hiˈoraa o Iesu i te oaoaraa ia rave i te hinaaro o to ˈna Metua.

[Nota i raro i te api]