Te tahi mea maitai aˈe i te mau taoˈa faaunauna

I MURI aˈe i to ˈna faahitiraa i “te unauna rapae au” ta te mau vahine e rave no te faanehenehe ia ratou, teie te aˈoraa a te aposetolo Petero: “O te taata moe râ o te aau ra te faaunauna, i te mea tahuti ore ra, o te aau mǎrû e te mamahu, o te mea taoˈa rahi ïa i mua i te aro o te Atua.”—Petero 1, 3:3, 4.

Te vahi anaanatae, i to te aposetolo papairaa i teie huru faanehenehe rapaeau, ua faaohipa oia i te hoê parau Heleni koʹsmos, no reira mai hoi atoa te parau Farani ra “cosmétique,” teie te auraa “faaunaunaraa.” Te opani ra anei o Petero i te mau vahine ia parai i to ratou mata e ia rave i te tahi atu mau taoˈa faaunauna? Aita roa ˈtu te Parau a te Atua e opani ra i te reira. Aita, na te taata taitahi e faaoti no ˈna iho, e tei te hinaaro atoa o te taata taitahi.

Mai te peu râ e ua rahi roa te parairaa i te mata, aore ra te huru ê ra e rave rahi i te reira, eaha ïa te huru e faaitehia ra? E ere anei te nehenehe ore, te haama ore, te au ore, te faaoru, aore ra te miimii? Oia mau, e nehenehe te reira e faaino i te hohoˈa rapaeau o te hoê vahine o te horoa i te hoê manaˈo hape i te pae morare.—A faaau e te Ezekiela 23:36-42.

Ia au i te reira, ia maiti oia i te faaohipa i te mau taoˈa faaunauna, e tutava te hoê vahine “e parau ra e te faatura ra [oia] i te Atua” e ia faaite to ˈna hohoˈa mata i te feruriraa haapao maitai, te mǎrû, te hamani maitai, e te ieie ore. E faarahi teie mau huru maitatai i to ˈna nehenehe. Inaha, ia maiti oia i te parai i to ˈna mata aore ra eita, e faaite oia i te tura e te nehenehe i roto. E faaite te reira e ua papu ia ˈna, ia au i te mau parau a Petero i nia nei, e te vai ra te tahi mea maitai aˈe i te mau taoˈa faaunauna.—Timoteo 1, 2:9, 10, MN.