A faaitoito tamau te tahi e te tahi

“Eiaha ei parau faufau to roto mai i to outou vaha, ei parau maitai râ, e tupu ai te maitai au ra.”—EPHESIA 4:29.

1, 2. (a) No te aha e nehenehe ai e parau e ua riro te paraparauraa ei ô maere mau? (b) Eaha te tia ia ara ia faaohipa anaˈe tatou i to tatou arero?

“UA RIRO te paraparauraa mai te hoê taura maere mau o te taai maite i te mau hoa, te mau fetii e te mau totaiete . . . Maoti te feruriraa e te faaohipa-amui-raa i te mau uaua [o te arero], te faahiti nei tatou i te mau taˈiraa reo o te faatupu i te here, te pohehae, te faatura—oia hoi te mau manaˈo putapû atoa o te taata.”—Te faarooraa, te tamataraa e te hâuˈaraa (beretane).

² E ere noa to tatou arero i te hoê melo no te momi aore ra no te tamata; ua riro oia ei tuhaa no to tatou aravihi ia tufa i to tatou manaˈo e to tatou huru hohonu. “Te arero nei, e melo iti haihai ïa,” o ta Iakobo ïa i papai. “Te haamaitai nei tatou i te Atua ra i to tatou Metua i te reira: e te faaino nei tatou i te taata tei hamanihia i to te Atua ra hohoˈa i te reira.” (Iakobo 3:5, 9) Oia mau, e nehenehe tatou e faaohipa i to tatou arero ma te au, ei hiˈoraa no te arueraa ia Iehova. Teie râ, i te mea e e taata tia ore tatou, mea ohie roa no tatou ia faaohipa i to tatou arero no te faahiti i te mau parau mauiui aore ra te mau mea tano ore. Ua papai o Iakobo e: “Eiaha roa te tia te reira, e au mau taeae e.”—Iakobo 3:10.

3. Eaha na tuhaa e piti te tia ia tatou ia ara no nia i ta tatou paraparauraa?

³ Eita te hoê noa ˈˈe taata e nehenehe e haavî i to ˈna arero ma te tia roa, tera râ, e tia ia tatou ia tutava i te haamaitai ia tatou. Te aˈo maira te aposetolo Paulo e: “Eiaha ei parau faufau to roto mai i to outou vaha, ei parau maitai râ, e tupu ai te maitai au ra, e maitai ai te feia e faaroo ra.” (Ephesia 4:29) Te itehia ra e piti tuhaa i roto i teie faaueraa: te mea te tia ia tatou ia haapae e te mea te tia ia tatou ia rave. E tuatapapa anaˈe na i teie nau tuhaa nei.

Te haapaeraa i te parau faufau

4, 5. (a) Eaha te aroraa te tia i te mau kerisetiano ia rave i mua i te parau faufau? (b) Eaha te faahohoˈaraa e tano no nia i te “parau faufau”?

⁴ A tahi, te faaue maira te Ephesia 4:29 e: “Eiaha ei parau faufau to roto mai i to outou vaha.” E ere i te mea ohie. Hoê tumu, oia hoi ua parare roa te parau faufau i roto i te ao e haaati ra ia tatou. E rave rahi mau taurearea kerisetiano o te faaroo nei i te parau ino i te mau mahana atoa, no te mea te manaˈo ra te mau taurearea haere haapiiraa e e haapuai te reira i ta ratou parau aore ra e haapaari te reira ia ratou. Eita paha ta tatou e nehenehe e ape i te faaroo atu i te mau parau faufau, tera râ, e nehenehe ta tatou e e tia hoi ia tatou ia tutava ia ore tatou ia tapea mai i teie mau parau. Eiaha roa ˈtu ia mau i roto i to tatou feruriraa aore ra to tatou vaha.

⁵ Te parau tumu o te faaararaa a Paulo, o te hoê ïa parau Heleni taaihia i te hoê iˈa ino aore ra te tahi maa pê. A feruri na i teie faahohoˈaraa: Tei mua outou i te hoê taata iria e ua hae roa o ˈna. I te pae hopea, e faaite roa mai oia i to ˈna riri, e e ite atu outou i te hoê iˈa ino na roto mai i to ˈna vaha. I muri iho, e ite atu outou ia ˈna ia tutuha mai i te hoê maa pe e te hâuˈa ino, o te pahi atu i nia i te feia i pihai iho mai. O vai teie taata? Auê te peapea e mai te peu e taua taata ra, o tatou iho ïa! Inaha, e tano roa teie faahohoˈaraa mai te peu e ‘e parau faufau to roto mai i to tatou vaha.’

6. Nafea te Ephesia 4:29 e tano atoa ˈi no te paraparauraa faaino e te tano ore?

⁶ E tano atoa te irava o te Ephesia 4:29 no nia i to tatou haapaeraa i te faaino tamau atu ia vetahi ê. Parau mau, mea taa ê to tatou manaˈo e te mau mea o ta tatou e au aore ra e farii, teie râ, ua faaea anei outou i pihai iho i te hoê taata o te faahiti noa i te parau (aore ra e rave rahi mau parau) no te faahapa i tera taata, tera vahi, aore ra te mau mea atoa e paraparauhia? (A faaau e te Roma 12:9; Hebera 1:9.) E faaamahamaha, e faataiâ, e e vavahi atoa teie huru paraparauraa ta ˈna. (Salamo 10:7; 64:2-4; Maseli 16:27; Iakobo 4:11, 12) Aita paha e taa ra ia ˈna e ua riro oia mai te feia faaino ta Malaki i faataa na. (Malaki 3:13-15) E riro oia i te hitimahuta mai te peu e e parau mai te hoê taata ia ˈna e ua faura mai te hoê iˈa ino aore ra te hoê maa pe na roto mai i to ˈna vaha!

7. Eaha te hiˈopoaraa ia tatou iho te tia ia ravehia?

⁷ Mea ohie roa ia hiˈo atu i te tahi taata o te faahiti tamau i te mau parau tano ore e te mau parau faahapa, tera râ, a aniani na ia outou iho, ‘Mai te reira atoa anei to ˈu huru? Mai te reira atoa anei au?’ Mea maitai roa ia feruri tatou i te tahi mau taime i te huru o ta tatou mau parau. E parau tano ore anei e te faahapa atoa? Te paraparau ra anei tatou mai te mau hoa haavare tootoru a Ioba? (Ioba 2:11; 13:4, 5; 16:2; 19:2) No te aha tatou e ore ai e faahiti i te mau parau maitatai? Mai te peu e e faaroo tatou i te hoê tauaparauraa faahapa, no te aha tatou e ore ai e faataui i te aparauraa i nia i te hoê tumu parau maitai?

8. Eaha te haapiiraa e horoahia ra i roto i te Malaki 3:16 no nia i te paraparauraa, e nafea tatou e faaite ai e te faaohipa ra tatou i teie haapiiraa?

⁸ Ua faataa o Malaki i teie huru tupuraa taa ê: “I reira te feia i mǎtaˈu ia Iehova i te parau pinepineraa te tahi i te tahi; e ua faaroo maira Iehova, e ua ite, e papaihia ihora te tahi buka manaˈoraa i mua ia ˈna, no te feia i mǎtaˈu ia Iehova, e tei manaˈo i to ˈna ra iˈoa.” (Malaki 3:16) Ua tapao anei outou e mea nafea to te Atua pahonoraa i te paraparauraa maitai? Eaha te faahopearaa o teie huru paraparauraa i nia ia vetahi ê? E nehenehe tatou tataitahi e huti mai i te hoê haapiiraa no nia i ta tatou paraparauraa i te mau mahana atoa. Mea hau aˈe no tatou e no vetahi ê mai te peu e e matau tatou i te faahiti i te parau o te faahohoˈa i ta tatou ‘tusia o te arueraa i te Atua.’—Hebera 13:15.

A ohipa no te faaitoito ia vetahi ê

9. No te aha te mau putuputuraa kerisetiano e riro ai ei mau taime tano roa no te faaitoito ia vetahi ê?

⁹ Ua riro te mau putuputuraa a te amuiraa ei mau taime maitatai no te faahiti ‘i te parau maitai ra, e tupu ai te faaitoitoraa, e maitai ai te feia e faaroo ra.’ (Ephesia 4:29) E nehenehe tatou e na reira ia vauvau tatou i te hoê oreroraa parau no nia i te Bibilia, ia rave tatou i te hoê faahiˈoraa, aore ra ia pahono tatou i roto i te mau tuhaa ma te mau uiraa e te mau pahonoraa. E tano ïa te Maseli 20:15 no tatou: “Te vaha ite râ o te taoˈa maitai roa.” O vai hoi tei ite e ehia mafatu o ta tatou e haaputapû aore ra e faaitoito?

10. I muri aˈe i te feruriraa e ua tauaparau pinepine tatou ia vai, eaha te faatitiaifaroraa te tia ia ravehia? (Korinetia 2, 6:12, 13)

¹⁰ E tano atoa te taime na mua ˈˈe e i muri iho i te mau putuputuraa no te faaitoito te tahi e te tahi na roto i te mau tauaparauraa e au ia faaroohia mai e te taata. Mea ohie roa hoi ia faaohipa i teie mau taime no te tauaparau e to tatou mau fetii e te pǔpǔ iti o to tatou mau hoa piri roa, mea au na tatou ia paraparau atu. (Ioane 13:23; 19:26) Teie râ, ia au i te Ephesia 4:29, no te aha tatou e ore ai e haere atu e paraparau i te tahi atu mau taata? (A faaau e te Luka 14:12-14.) E nehenehe tatou e opua e paraparau hau atu i te tahi Iaorana poto noa i vetahi mau taata apî, i te feia ruhiruhia, aore ra i te mau tamarii, peneiaˈe ma te parahi roa ˈtu e te feia apî ia nehenehe tatou e paraparau atu i nia i te hoê â faito. Na roto i to tatou anaanatae haavare ore e te mau taime paraparauraa faaitoito, e faatupu atoa ˈi vetahi pae i te mau manaˈo o Davida i roto i te Salamo 122:1.

11. (a) Eaha te peu matauhia e te rahiraa i te pae no te parahiraa? (b) No te aha vetahi e tauiui ai i to ratou vahi parahiraa?

¹¹ Te tahi atu tauturu no te faatupu i te mau paraparauraa maitatai, o te tauiraa ïa i to tatou vahi parahiraa i te mau putuputuraa. Peneiaˈe e tia i te hoê metua vahine e aiû iti ta ˈna ia parahi na pihai iho i te vahi haumitiraa, aore ra te hoê taata hapepa ra, e parahi atu ïa o ˈna i nia i te mau parahiraa na te hiti, tera râ, eaha no te toea o tatou nei? No te mea paha e e peu matauhia te reira na tatou, e parahi noa tatou i nia i te hoê â parahiraa aore ra i te hoê â vahi; mai te hoê manu e hoˈi atu i ta ˈna vahi apaeraa. (Isaia 1:3; Mataio 8:20) Tera râ, i te mea e e nehenehe ta tatou e parahi i te mau vahi atoa, no te aha ïa tatou e ore ai e taui i ta tatou vahi parahiraa—i te pae atau anei, i te pae aui, i mua roa, e na reira noa—e mea na reira tatou e haamatau hau atu ai i te mau huru taata atoa? Parau mau, aita e ture e faahepo ra ia tatou ia na reira, tera râ, te ite nei te mau matahiapo e te feia ua noaa ia ratou te paari, o te tauiui nei i to ratou vahi parahiraa, e mea ohie aˈe ia tufa i te mea e au i te mau taata e rave rahi maoti hoi i te faaea noa e te hoê pǔpǔ hoa piri roa.

Faaitoitohia ia au i te hinaaro o te Atua

12. Eaha te peu au ore tei itehia i roto i te aamu?

¹² E tia i te hinaaro e faaitoito ia vetahi ê ia turai i te hoê kerisetiano ia pee i te hiˈoraa o te Atua i roto i teie tuhaa maoti hoi i te pee i te haerea o te taata e haamau e rave rahi mau ture.a Ua tamata hoi te mau taata tia ore i te faahepo atu ia vetahi ê, e ua topa atoa vetahi o te mau tavini a te Atua i roto i teie peu. (Genese 3:16; Koheleta 8:9) I te tau o Iesu, ‘ua taamu’ te mau raatira ati Iuda ‘i te hopoia teimaha e te maraa ore i nia ia vetahi ê ra, aita râ ratou iho i hinaaro e amo i te reira.’ (Mataio 23:4) Ua faariro ratou i te mau peu ohie roa ei mau tutuu faahepohia. No to ratou imiraa e haamau i te mau ture taata nei, ua moehia ia ratou te mau mea ta te Atua i faariro ei mea faufaa aˈe. Aita roa ˈtu ratou i faaitoito i te taata i to ratou haamauraa i te mau ture aore i tuea e te mau Papai; aita hoi ratou i pee i te hinaaro o te Atua.—Mataio 23:23, 24; Mareko 7:1-13.

13. No te aha eita e tano ia faahepo e rave rahi mau ture no to tatou mau hoa kerisetiano?

¹³ Te hinaaro nei te mau kerisetiano e auraro i te mau ture a te Atua. E nehenehe atoa râ tatou e topa i roto i te marei e haamau e rave rahi mau ture teimaha. Eaha hoi te tumu? A tahi, e ere hoê â huru to tatou pauroa no nia i te mea ta tatou e au aore ra e hinaaro, e no reira, e riro vetahi i te farii i te hoê mea o te au-ore-hia e te tahi pae e ta ratou e faaoti e e tia ia haapaehia. Mea taa ê atoa te mau kerisetiano no nia i to ratou tupuraa i te pae varua. Ua riro anei râ te haamauraa e rave rahi mau ture ei ravea e au i te Atua no te tauturu ia vetahi ê ia noaa i te paari i te pae varua? (Philipi 3:15; Timoteo 1, 1:19; Hebera 5:14) E mai te peu noa ˈtu e te pee ra te hoê taata i te hoê haerea atâta aore ra fifi roa ia hiˈo-anaˈe-hia, ua riro anei te hoê ture opaniraa ei ravea maitai aˈe? Ta te Atua e hinaaro ra, oia hoi e na te feia na ratou te reira hopoia, e tamata i te tauturu i te hoê taata e atea ê ra na roto i te haaferuriraa ia ˈna ma te mǎrû.—Galatia 6:1.

14. Eaha te mau tapao o te mau ture ta te Atua i horoa na Iseraela?

¹⁴ Oia mau, ia ˈna i faaohipa ia Iseraela ei nunaa no ˈna, ua haamau te Atua i te mau hanere ture no nia i te haamoriraa i te hiero, te mau tusia, e tae noa ˈtu te faanahoraa no te vai-mâ-raa. Ua tano te reira no te hoê nunaa taa maitai, e e rave rahi mau ture o tei riro ei tohu e o tei tauturu ia aratai i te mau ati Iuda i te Mesia ra. Ua papai o Paulo e: “Riro atura te ture ei orometua e aratai ia tatou i te Mesia ra, ia faatiahia tatou i te faaroo. Teie nei râ, ua itea mai te faaroo nei, aita ˈtura tatou i vaiihohia i raro aˈe i te aratai.” (Galatia 3:19, 23-25) I muri aˈe te faaoreraahia te ture i nia i te pou haamauiuiraa, aita te Atua i horoa na te mau kerisetiano i te hoê tabula ture roa no te mau tuhaa atoa o te oraraa, mai te mea ra e te reira te ravea no te faaitoito ia ratou i roto i te faaroo.

15. Eaha te aratairaa ta te Atua i horoa na te feia haamori kerisetiano?

¹⁵ Parau mau, e ture ta tatou. Te faaue maira te Atua ia haapae i te peu haamori idolo, te poreneia e te faaturi, e i te faaohipa-hape-raa i te toto. Te opani etaeta nei oia i te taparahiraa taata, te haavare, te peu tahutahu, e te tahi atu mau hara. (Ohipa 15:28, 29; Korinetia 1, 6:9, 10; Apokalupo 21:8) E te horoa maira oia i roto i ta ˈna Parau i te mau aˈoraa maramarama no nia e rave rahi mau tuhaa. Teie râ, i nia i te hoê faito hau atu â i to te mau ati Iseraela ra, e hopoia ta tatou no te haapii e no te faaohipa i te mau faaueraa tumu a te Bibilia. E nehenehe te mau matahiapo e faaitoito ia vetahi ê na roto i te tautururaa ia ratou ia ite e ia hiˈopoa i teie mau faaueraa tumu maoti hoi i te imi aore ra i te haamau i te mau ture.

Te mau matahiapo o te faaitoito

16, 17. Eaha te hiˈoraa maitai ta te mau aposetolo i horoa no nia i te haamauraa i te mau ture i nia i te tahi atu feia haamori?

¹⁶ Ua papai o Paulo e: “Ta tatou râ vahi i noaa maira, e na reira tatou i te haere na taua tapao nei â ma te haapao maitai â hoi i te mea hoê â.” (Philipi 3:16) Ia au i teie manaˈo e au i te Atua, ua ohipa te aposetolo i nia ia vetahi ê na roto i te hoê ravea o te faaitoito ia ratou. Ei hiˈoraa, ua faahitihia te uiraa ra e, e tia anei ia amu i te maa o tei pûpûhia na te hoê idolo i te hiero. Ua haamau anei teie matahiapo, peneiaˈe no te haapapu aore ra no te faaohie i te mau ohipa, i te hoê ture no te taatoaraa i roto i te mau amuiraa matamua? Aita. Ua farii oia e, i te mea e e ere hoê â faito tei naeahia i te mau kerisetiano i te pae no te ite e te paariraa, e riro ratou i te rave i te mau maitiraa taa ê. I to ˈna aˈe pae, ua opua oia e horoa i te hoê hiˈoraa maitai.—Roma 14:1-4; Korinetia 1, 8:4-13.

¹⁷ Te faaite ra te mau Papai Heleni Kerisetiano e ua horoa te mau aposetolo i te mau aˈoraa papu no nia i te tahi mau tumu parau tataitahi, mai te ahu e te huru faanehenehe, teie râ, aita ratou i haamau i te mau ture no te mau huru tupuraa taatoa. I teie mahana, ua riro te reira ei hiˈoraa maitai no te mau tiaau kerisetiano, o te tutava nei i te faaitoito i te nǎnǎ. Te faaaano ra te reira i te hoê huru raveraa tumu ta te Atua i pee e tae noa ˈtu e o Iseraela tahito ra.

18. Eaha te mau ture ta Iehova i horoa ia Iseraela no nia i to ratou ahu?

¹⁸ Aita te Atua i horoa na te mau ati Iseraela i te mau ture fifi roa no nia i te mau ahu. E au ra e e omono na te tane e te vahine fatata i te hoê â pereue, aore ra ahu rapaeau, mea rahi atu to te vahine faaunaunaraa aore ra mau peni. E omono atoa na te tane e te vahine i te hoê sa·dhinʹ, oia hoi te hoê ahu na roto. (Te mau tavana 14:12; Maseli 31:24; Isaia 3:23) Eaha te mau ture no nia i te ahu ta te Atua i horoa? Eiaha te vahine e ahu i te ahu tane aore ra te tane e ahu i te ahu vahine, peneiaˈe ma te faaite i te mau peu mahu. (Deuteronomi 22:5) No te faaite e mea taa ê roa ratou i te mau nunaa e haaati ra ia ratou, ua titauhia te mau ati Iseraela ia tuu i te hoê faaunaunaraa i te hiti o to ratou ahu, e te hoê taura ninamu i nia ˈtu i te faaunaunaraa, e peneiaˈe te tahi taoˈa i te mau poro o te ahu rapaeau. (Numera 15:38-41) Te reira anaˈe te faaueraa a te Ture no nia i te mau ahu.

19, 20. (a) Eaha te aratairaa ta te Bibilia e horoa ra i te mau kerisetiano no nia i te ahu e te faaneheneheraa? (b) Eaha te manaˈo o te mau matahiapo no nia i te haamauraa i te mau ture no nia i te faaneheneheraa?

¹⁹ Noa ˈtu e aita te mau kerisetiano i raro aˈe i te Ture, te vai ra anei te mau ture i roto i te Bibilia e faataa papu ra e eaha te ahu ta ratou e oomo aore ra nafea tatou ia faanehenehe? Eita. Ua horoa mai te Atua i te mau faaueraa aifaito maitai ta tatou e nehenehe e faaohipa. Ua papai o Paulo e: “Te mau vahine ra hoi, ia faanehenehe ia ratou iho i te ahu e au ra, ma te faaieie ore, e te haapao maitai; eiaha ma te rouru firi, e te auro, e te poe, e te ahu taoˈa rahi ra.” (Timoteo 1, 2:9) Ua aˈo o Petero e maoti hoi i te haafaahiahia roa i te faaunaunaraa rapaeau, e tia i te mau vahine kerisetiano ia haafaufaa i te huru “taata moe râ o te aau ra . . . i te mea tahuti ore ra, o te aau mǎrû e te mamahu.” (Petero 1, 3:3, 4) I te mea e ua papaihia teie aˈoraa, te faaite ra ïa te reira e ua titauhia paha vetahi mau kerisetiano no te senekele matamua ia faahaehaa rii e ia faaiti mai i to ratou huru ahuraa e to ratou huru faanehenehe. Tera râ, maoti i te faahepo—aore ra i te opani—i te tahi mau faaneheneheraa, ua horoa noa ˈtu te mau aposetolo i te tahi aˈoraa ei faaitoitoraa.

²⁰ I roto i te rahiraa o te mau tupuraa, te faaturahia nei te mau Ite no Iehova no to ratou huru faanehenehe haehaa. Noa ˈtu râ, e taui te mau faaneheneheraa ia au i te mau fenua e ia au atoa i te mau vahi aore ra te mau amuiraa. Parau mau, e riro paha te hoê matahiapo e manaˈo etaeta to ˈna aore ra mea au aˈe na ˈna vetahi mau ahu e te tahi huru faanehenehe, i te faaoti no ˈna iho e no to ˈna utuafare fetii. Tera râ, no te nǎnǎ, e tia ia ˈna ia haamanaˈo i teie parau a Paulo: “E ere râ mai te mea e o matou te fatu o to outou faaroo, ei tauturu râ matou i to outou oaoa; e mau faaroo hoi to outou.” (Korinetia 2, 1:24) Ma te patoi i to ratou hinaaro e haamau i te mau ture i roto i te amuiraa, te ohipa nei te mau matahiapo no te faaitoito i te faaroo o vetahi ê.

21. Nafea te mau matahiapo e horoa ˈi i te tauturu e tano mai te peu e e omono te hoê taata i te ahu tano ore?

²¹ Mai i te senekele matamua ra, i te tahi mau taime, e riro te hoê taata apî i roto i te parau mau aore ra te hoê taata paruparu i te pae varua i te pee i te hoê haerea atâta aore ra te tano ore i te pae no te mau ahu aore ra te faaohiparaa i te mau taoˈa faaunauna i te mata aore ra te mau piru. Eaha ïa te tia ia rave? I reirâ, te horoa maira te Galatia 6:1 i te aratairaa no te mau matahiapo kerisetiano o te hinaaro mau ra e tauturu i teie taata. Hou te hoê matahiapo e faaoti ai e horoa i te hoê aˈoraa, e faaite oia i te paari na roto i te haereraa e farerei i te tahi atu matahiapo, eiaha râ i te hoê matahiapo o ta ˈna i ite e hoê â to raua manaˈo aore ra te mea o ta raua e au. Mai te peu e te itehia ra e rave rahi i roto i te amuiraa o te pee ra i teie nei ao i te pae no te ahu aore ra te faaneheneheraa, e tia i te tino matahiapo ia tauaparau no te ite nafea ia horoa i te tauturu maitai roa ˈˈe, na roto paha i te hoê oreroraa parau maitai e te faaitoito i te hoê putuputuraa aore ra na roto i te tautururaa ˈtu i te taata tataitahi. (Maseli 24:6; 27:17) E imi ratou i te ravea no te turu i te manaˈo e faataahia ra i roto i te Korinetia 2, 6:3: “Aore roa i tuu i te turoriraa i te taata atoa, ia ore ia faainohia [ta tatou taviniraa].”

22. (a) No te aha eiaha tatou ia haapeapea rahi roa mai te peu e e taa ê rii te mau manaˈo? (b) Eaha te hiˈoraa maitai ta Paulo i horoa mai?

²² Te hinaaro ra te mau matahiapo kerisetiano ‘e faaamu ra i te nǎnǎ a te Atua i roto ia ratou na,’ e rave mai ta Petero i faaite mai, oia hoi, eiaha ‘e faahepo i nia iho i te tufaa a te Atua ra.’ (Petero 1, 5:2, 3) I roto i ta ratou ohipa aroha ra, e nehenehe vetahi mau uiraa e tupu mai no nia i te mau ohipa i reira e ere hoê â huru manaˈo. Peneiaˈe mea matauhia i roto i te hoê amuiraa ia tia mai no te taio i te mau paratarapha i te haapiiraa o te Te Pare Tiairaa. E nehenehe te faanahoraa i te mau pǔpǔ no te pororaa e te tahi atu mau ohipa no nia i te taviniraa, e arataihia ia au i te peu matauhia i roto i tera e tera vahi. Tera râ, e fifi rahi anei mai te peu e mea taa ê rii te huru raveraa a te tahi taata? Te hinaaro nei te mau tiaau here ia ravehia te mau ohipa ‘ma te nahonaho e ma te au,’ e parau teie ta Paulo i faaohipa no nia i te mau ô semeio. Te faaite nei râ te tahi atu mau irava e te tapitapiraa matamua a Paulo, o te ‘tupu-maitai-raa ïa o te amuiraa.’ (Korinetia 1, 14:12, 40) Aita oia i opua e haamau e rave rahi mau ture, mai te mea e te tapao faufaa roa ˈˈe, o te faatuearaa ïa i te mau mea atoa aore ra te titauraa e ia ravehia ma te aravihi. Ua papai oia e: “To matou mana i horoahia mai e te Fatu ia maitai outou, e ere râ ia pohe outou.”—Korinetia 2, 10:8.

23. Eaha vetahi mau ravea e pee ai tatou i te hiˈoraa o Paulo no te faaitoito ia vetahi ê?

²³ Ma te feaa ore, ua ohipa o Paulo no te tupu-maitai-raa o vetahi ê na roto i te paraparauraa tano e te faaitoito. Maoti i te amuimui atu e te tahi noa hoa, ua imi oia i te ravea no te farerei haere e rave rahi mau taeae e mau tuahine, te feia puai i te pae varua e tae noa ˈtu te feia e titau ra i te faaitoitoraa. E ua haafaufaa oia i te here—maoti hoi i te mau ture—inaha ‘e faarahi te here i te maitai.’—Korinetia 1, 8:1.

[Nota i raro i te api]

Ei haamanaˈoraa

◻ No te aha e tia ˈi ia tatou ia taui mai te peu e mea pinepine tatou i te faahapa aore ra i te faaino?

◻ Eaha ta tatou e nehenehe e rave no te faaitoito hau atu â ia vetahi ê i roto i te amuiraa?

◻ Eaha te hiˈoraa i horoahia mai e te Atua no nia i te haamauraa i te ture i nia ia vetahi ê?

◻ Na te aha e tauturu i te mau matahiapo ia ape i te haamauraa i te mau ture taata nei i nia i te nǎnǎ?