Ia vai maite mai â te here taeae!

“Ia vai maite mai â te aroha taeae.”—HEBERA 13:1.

1. Eaha ta outou e rave ia ama noa te auahi i te hoê po toetoe, e eaha te hopoia mai teie atoa te huru te tia ia tatou paatoa ia rave?

E MEA toetoe roa i rapaeau, e te toetoe noa ˈtura. Te paapaaina noa ra te auahi i roto i te tahuraa auahi e te haaveavea ra i to outou fare. No te ora, e tia ïa ia ama noa te auahi. E parahi noa anei outou ma te mataitai i te mau ama auahi ia pohe mǎrû noa e te uteute o te arahu ia marehurehu roa? Eita ïa. E taora noa ˈtu râ outou i te vahie ia ore te auahi ia pohe. I roto i te hoê auraa taipe, e tia ia tatou tataitahi ia na reira atoa no te tahi “auahi” faufaa roa ˈtu â—o te tia hoi ia ama noa i roto i to tatou mafatu—o te here ïa.

2. (a) No te aha e nehenehe ai e parau e ua iti roa te here i teie nei anotau hopea? (b) Eaha te faufaaraa o te here no te mau Kerisetiano mau?

² Mai ta Iesu i tohu na i mutaa ihora, te ora nei tatou i te hoê tau te toetoe nei te here i rotopu i te feia e parau nei e e Kerisetiano ratou na te ao nei. (Mataio 24:12) Te faahiti ra ïa o Iesu i te huru here faufaa roa ˈˈe, oia hoi te here no te Atua ra o Iehova e no ta ˈna Parau, te Bibilia. Te iti atoa ˈtura te tahi atu mau huru here. Ua tohu te Bibilia e, “i taua anotau hopea nei,” e rave rahi o te riro ei “aroha ore.” (Timoteo 2, 3:1-5) E parau mau roa! E tia hoi i te utuafare ia riro ei vahi e uˈana ˈi te aroha, tera râ, te ite-pinepine-hia nei i reira te haavîraa uˈana e te hamani-ino-raa—e mea riaria roa i te tahi mau taime. Teie râ, i roto i te toetoe o teie nei ao, te faauehia ra te mau Kerisetiano, eiaha noa ia here i te tahi e te tahi, ia faatupu atoa râ i te here haapae ia ˈna iho, ma te tuu ia vetahi ê na mua ˈˈe ia tatou iho. E tia ia tatou ia faaite hua i teie nei here, ia itehia mai e te taatoaraa, e ia riro te reira ei tapao haapapuraa i te amuiraa kerisetiano mau.—Ioane 13:34, 35.

3. Eaha mau na te aroha taeae, e eaha te auraa ia vai maite â oia?

³ Ua faauruahia te aposetolo Paulo ia faaue e: “Ia vai maite mai â te aroha taeae.” (Hebera 13:1) Ia au i te hoê buka faahororaa, te taˈo Heleni i hurihia i ǒ nei na roto i te parau ra “aroha taeae” (phi·la·del·phiʹa), “e tano ïa no te here aupuru, te faaiteraa i te maitai, te aau putapû, te pûpûraa i te tauturu.” E eaha te auraa i to Paulo parauraa e e tia ia vai maite â taua here ra? Te na ô râ taua buka ra e: “Eiaha roa ˈtu ia toetoe.” No reira, eita e navai ia putapû noa to tatou aau no to tatou mau taeae; e tia râ ia tatou ia faaite roa ˈtu. Hau atu, e tia ia vai noa taua here ra, ia ore roa ia toetoe. E ere i te mea ohie, e ere anei? Oia, teie râ, e nehenehe te varua o Iehova e tauturu ia tatou ia faatupu i te aroha taeae e ia atuatu noa i te reira. E hiˈo anaˈe na e toru ravea ia ama noa te auahi o teie here i roto i to tatou mafatu.

A aroha ˈtu ia vetahi ê

4. Eaha mau na te auraa o te aroha-atoa-raa ˈtu ia vetahi ê?

⁴ Mai te peu e e hinaaro outou e ia rahi atu â to outou here i to outou mau taeae e mau tuahine kerisetiano, e tia na mua ia outou ia aroha ˈtu ia ratou, ia taa i to ratou huru i roto i te mau tamataraa e te mau haafifiraa o ta ratou e farerei nei i roto i te oraraa. Ua faaue te aposetolo Petero i te reira ia ˈna i papai e: “Ei aau tahi to outou atoa, i te aroha-atoa-raa, ei aroha taeae ra, ei aau mǎrû, ei aau taua.” (Petero 1, 3:8) Te taˈo Heleni i faaohipahia i ǒ nei no te “aroha-atoa-raa,” oia ïa te auraa “e mauiui na muri iho.” No nia i teie taˈo, te na ô ra te hoê taata tuatapapa i te reo Heleni a te Bibilia e: “Te faataa ra oia i te huru feruriraa e tupu mai ia tufa tatou i te mau huru hohonu o vetahi ê mai te mea ra e te ite atoa ra tatou iho i teie mau huru.” No reira, e titauhia ia taa i to vetahi ê ra huru. Ua parau na te hoê tavini haapao maitai ruhiruhia a Iehova e: “E taa ia ˈu i to oe huru, mai te peu e e ite au i to oe mauiui i roto i to ˈu nei mafatu.”

5. Nafea tatou ia ite e te vai atoa ra te aroha ia vetahi ê i roto ia Iehova?

⁵ Te vai atoa ra anei teie aroha ia vetahi ê i roto ia Iehova? Papu maitai. Ei hiˈoraa, te taio nei tatou no nia i te mau mauiui ta to ˈna nunaa ra o Iseraela i faaruru e: “I roto i to ratou mau ahoaho atoa ra, ua ahoaho atoa oia.” (Isaia 63:9, MN) Aita râ o Iehova i ite i to ratou mau fifi, tirara ˈtu ai; ua putapû roa râ oia no to ˈna nunaa. Te itehia ra te hohonu o to ˈna putapû i roto i te mau parau a Iehova iho i nia i to ˈna nunaa, i roto i te Zekaria 2:8: “O te faatiaia ˈtu ia outou ra, ua faatiaia ïa i [“to ˈu,” MN] orio mata nei.”a Te tapao ra te hoê taata tuatapapa parau no nia i teie nei irava e: “O te mata te vahi fifi roa ˈˈe e te paruparu roa ˈˈe o te tino taata nei; e te orio mata ra—te opani na reira te maramarama e ô mai ai ia ite tatou—o te vahi fafa ohie roa ˈˈe ïa e te vahi faufaa roa ˈˈe o te mata. Aita ˈtu parau o te nehenehe e faahohoˈa maitai aˈe i te aupuru rahi o Iehova i te feia i herehia e ana.”

6. Mea nafea to Iesu Mesia faaiteraa i to ˈna aroha ia vetahi ê?

⁶ Ua aroha noa atoa o Iesu ia vetahi ê. Ua pinepine oia i te putapû i te “aroha” i mua i te ati o te mau taata i roohia i te maˈi aore ra i hepohepo roa. (Mareko 1:41; 6:34) Ua faaite oia e ia ore noa ˈtu te tahi e hamani maitai i ta ˈna mau pǐpǐ faatavaihia, mai te mea ra ïa e o ˈna iho te hamani-ino-hia ra. (Mataio 25:41-46) E i teie nei mahana, ei “tahuˈa rahi” no tatou i nia i te raˈi, e nehenehe mau â ta ˈna e “aroha mai ia tatou i to tatou mau paruparu nei.”—Hebera 4:15.

7. Nafea te aroharaa ia vetahi ê ia tauturu ia tatou ia riri anaˈe tatou i te hoê taeae aore ra i te hoê tuahine?

⁷ ‘E aroha mai i to tatou mau paruparu nei’—aita anei teie manaˈo e tamahanahana ra ia tatou? Oia mau, te hinaaro nei tatou e na reira atoa i nia i te tahi e te tahi. Parau mau, e mea ohie aˈe ia hiˈo i te mau paruparu o vetahi ê. (Mataio 7:3-5) Tera râ, ia riri faahou anaˈe outou i te hoê taeae aore ra i te hoê tuahine, a tamata na i teie ravea. A feruri na e o outou aˈe taua taata ra e to ˈna atoa ra huru oraraa, huru taata, e ta ˈna mau hapa atoa te tia ia faaruruhia. Ua papu anei ia outou e eita atoa outou e rave i te hoê â hape—peneiaˈe i te hape ino roa ˈtu â? Maoti i te titau rahi roa ia vetahi ê, e tia ia tatou ia aroha ˈtu ia ratou, e tauturu hoi te reira ia tatou ia vai aifaito noa mai ia Iehova, ‘ua ite hoi oia e e repo tatou nei.’ (Salamo 103:14; Iakobo 3:17) Ua ite oia i to tatou mau otia. Eita roa ˈtu oia e titau mai hau atu i tei maraa ia tatou. (A faaau e Te mau arii 1, 19:5-7.) Ia faaite ïa tatou paatoa e tia ˈi, i teie huru aroha i nia ia vetahi ê.

8. Nafea tatou ia faaruru anaˈe te hoê taeae aore ra te hoê tuahine i te ati?

⁸ Ua papai o Paulo e e au te amuiraa i te hoê tino e to ˈna mau melo taa ê te tia hoi ia rave amui i te ohipa ma te tahoê. Ua parau â oia e: “Ia mauiui te hoê melo ra, e mauiui atoa te mau melo atoa ra.” (Korinetia 1, 12:12-26) E tia ia tatou ia mauiui atoa e te feia e faaruru ra i te ati, oia hoi ia taa i to ratou huru. Na te mau matahiapo e rave nei i te upoo i roto i teie nei tuhaa. Ua papai atoa o Paulo e: “O vai tei paruparu e aore au i paruparu? o vai tei turori e aore au i amâ?” (Korinetia 2, 11:29) Te pee nei te mau matahiapo e te mau tiaau ratere i te hiˈoraa o Paulo i roto i teie nei tuhaa. I roto i ta ratou mau oreroraa parau, i roto i ta ratou ohipa tiai mamoe, e tae noa ˈtu ia faatitiaifaro anaˈe ratou i te mau ohipa haavaraa, te tutava nei ratou i te aroha ˈtu ia vetahi ê. Ua faaue o Paulo e: “E oto atoa hoi i te feia e oto ra.” (Roma 12:15) Ia ite anaˈe te mau mamoe e te aroha mau ra te mau tiai mamoe ia ratou, te papu ra ia ratou i to ratou mau otia, e te putapû atoa ra ratou i mua i te mau haafifiraa o ta ratou e faaruru ra, e farii ohie aˈe ïa ratou i te mau aˈoraa, te aratairaa, e i te faatitiaifaroraa. E haere mai ratou i te mau putuputuraa ma te aau tae, no te mea ua papu ia ratou e e fanaˈo ratou i reira i te ‘tamǎrûraa no to ratou mau nephe.’—Mataio 11:29, MN.

A faaite i te mauruuru ia vetahi ê

9. Nafea o Iehova ia faaite e te mauruuru nei oia i te maitai i roto ia tatou?

⁹ Te piti o te ravea ia ama noa te here taeae, o te mauruuru ïa. Ia mauruuru tatou ia vetahi ê, e tia ia tatou ia hiˈo e ia haafaufaa i to ratou mau huru maitatai e ta ratou mau tutavaraa. Ia na reira tatou, te pee ra ïa tatou ia Iehova iho. (Ephesia 5:1) I te mau mahana atoa, te faaore nei oia i ta tatou mau hara iti e rave rahi. Te faaore atoa nei oia i te mau hara iino mai te peu e e tatarahapa mau te taata. E ia faaore anaˈe oia i ta tatou mau hara, eita oia e hoˈi faahou mai i nia iho. (Ezekiela 33:14-16) Ua ani te papai salamo e: “Ahiri oe, e Iehova, e tapao na i te mau hara nei, o vai, e Iehova, te taata e mau?” (Salamo 130:3) Ta Iehova e hiˈo ra, o te mau mea maitatai ïa o ta tatou e rave nei i roto i ta ˈna taviniraa.—Hebera 6:10.

10. (a) No te aha e mea atâta roa ia erehia te mau hoa faaipoipo i te mauruuru i te tahi e te tahi? (b) Mai te peu e te iti ra to outou mauruuru no to outou hoa, eaha ïa ta outou e rave?

¹⁰ E mea faufaa iho â râ e ia pee tatou i teie hiˈoraa i roto i te utuafare fetii. Ia faaite anaˈe te mau metua e te mauruuru ra raua i te tahi e te tahi, e horoa raua i te hiˈoraa no te utuafare. I teie nei tau te faataa oioi nei hoi te feia faaipoipo, e mea ohie roa ia ore e tâuˈa rahi i to ˈna hoa faaipoipo, ia faarahi i ta ˈna mau hape e ia faaiti i to ˈna mau huru maitatai. E faaino teie huru feruriraa tano ore i te faaipoiporaa, a riro atu ai mai te hoê hopoia teimaha oaoa ore. Mai te peu e te iti ra to outou mauruuru no to outou hoa, a ani ia outou iho, ‘Aita roa anei to to ˈu hoa te tahi mau huru maitatai?’ A haamanaˈo na i te mau tumu no reira outou i here ai e i faaipoipo ai ia ˈna. Ua moe pauroa anei te mau tumu atoa i here ai outou i taua taata otahi roa ra? Aita paha; no reira, a rohi ia mauruuru outou i te maitai o to outou hoa, e a parau roa ˈtu i to outou mauruuru ia ˈna.—Maseli 31:28.

11. Ia here na hoa faaipoipo i te tahi e te tahi ma te haavare ore, eaha ïa te mau peu e tia ia haapae?

¹¹ E tauturu atoa te mauruuru i na hoa faaipoipo ia here i te tahi e te tahi ma te haavare ore. (A faaau e te Korinetia 2, 6:6; Petero 1, 1:22.) Eita teie here, faaitoitohia e te mauruuru hohonu, e faatia i te mau peu aroha ore i te taime o raua anaˈe, i te mau parau o te haamauiui e o te faahaehaa, i te tâuˈa-ore-raa i to ˈna hoa inaha, e mairi noa te mau mahana e aita hoê aˈe parau maitai aore ra mǎrû e faahitihia, e eita atoa e faatia i te hamani-ino-raa i te pae tino. (Ephesia 5:28, 29) Te tane e te vahine o te mauruuru mau i te tahi e te tahi, e faahanahana ïa raua i te tahi e te tahi. Eita noa raua e na reira i mua i te taata, i te taime atoa râ o raua anaˈe i mua ia Iehova—oia hoi, i te mau taime atoa.—Maseli 5:21.

12. No te aha e tia ˈi i te mau metua ia faaite i te mauruuru no te maitai i roto i ta ratou mau tamarii?

¹² E tia atoa i te mau tamarii ia ite e te mauruuru ra to ratou mau metua ia ratou. Eiaha ïa te mau metua ia faahiti rahi roa i te mau parau haapopou haavarevare, tera râ, e tia ia haapopou i te mau huru maitatai o ta ratou mau tamarii e te ohipa maitai mau o ta ratou e rave ra. A haamanaˈo i te hiˈoraa o Iehova i to ˈna faaiteraa i to ˈna mauruuru ia Iesu. (Mareko 1:11) A haamanaˈo atoa i te hiˈoraa o Iesu ei “fatu” i roto i te hoê parabole. Ua haapopou oia e piti “tavini maitai e te haavare ore” ma te aifaito, noa ˈtu e e ere hoê â mea tei horoahia na raua tataitahi, e e ere atoa hoê â faito ta raua tataitahi i faahotu mai. (Mataio 25:20-23; a faaau e te Mataio 13:23.) E imi atoa te mau metua paari i te tahi mau ravea no te faaite i to raua mauruuru no te mau huru maitatai taa ê o te tamarii tataitahi, to ˈna mau aravihi, e ta ˈna mau ohipa e rave. I te hoê â taime, e tamata raua eiaha e haafaufaa rahi roa i te mau manuïaraa e manaˈo atu ai ta raua mau tamarii e e tia ia ratou ia tutava noa i te hemo atu ia vetahi ê. Eita hoi raua e hinaaro e ia riri ta raua mau tamarii aore ra ia taiâ ratou ia paari mai ratou.—Ephesia 6:4; Kolosa 3:21.

13. Na vai e rave nei i te upoo i te faaiteraa i te mauruuru i te melo tataitahi o te amuiraa?

¹³ I roto i te amuiraa kerisetiano, te rave nei te mau matahiapo e te mau tiaau ratere i te upoo i te pae no te faaiteraa i te mauruuru i te melo tataitahi o te nǎnǎ a te Atua. E tiaraa fifi mau to ratou, no te mea te amo atoa nei ratou i te hopoia teimaha e aˈo ma te parau-tia, e faatitiaifaro ma te mǎrû i te feia rave hapa, e e horoa i te aˈoraa etaeta ia titau-anaˈe-hia. Nafea ratou ia faaaifaito i teie mau hopoia taa ê atoa?—Galatia 6:1; Timoteo 2, 3:16.

14, 15. (a) Nafea to Paulo faaiteraa i te aifaito i te pae no te horoaraa i te aˈoraa etaeta? (b) Nafea te mau tiaau kerisetiano ia faaaifaito i te titauraa ia faatitiaifaro i te mau hapa, e te titauraa ia horoa i te haapopouraa? A horoa na i te tahi hiˈoraa.

¹⁴ E tauturu rahi te hiˈoraa o Paulo ia ratou. Ua riro oia ei orometua haapii, ei matahiapo, e ei tiai mamoe aravihi rahi. Ua tia ia ˈna ia tauturu i te mau amuiraa e fifi rahi to ratou, e aita oia i haamarirau ma te mǎtaˈu, i te horoa i te aˈoraa etaeta i te taime e titauhia ˈi. (Korinetia 2, 7:8-11) Ia tuatapapahia te taviniraa a Paulo, te itehia ra e ua faaohipa varavara oia i te aˈo—i te taime noa e titauhia ˈi aore ra e tano ai. I te na reiraraa, ua faaite oia i te paari a te Atua.

¹⁵ Mai te peu e e faaauhia te taviniraa a te hoê matahiapo i roto i te amuiraa i te tahi upaupa, e riro ïa te aˈo e te faaiteraa hapa mai te hoê noa nota i roto i te himene taatoa. E tano teie nota i te vahi i faataahia no ˈna. (Luka 17:3; Timoteo 2, 4:2) A feruri na râ i te hoê himene tera anaˈe te nota, e na nia-iho-noa-hia. Eita e maoro, e taahoa roa to outou tariˈa. Hoê â huru, te tamata nei te mau matahiapo kerisetiano i te faatanotano i ta ratou haapiiraa e i te haamaitai ma te tauiui rii. Eita noa ratou e haapii no te faaafaro i te mau fifi. Area ra, te opua nei ratou e faaitoito. Mai ia Iesu Mesia, e imi na mua te mau matahiapo aroha i te tahi ohipa maitai ta ratou e nehenehe e haapopou, eiaha râ te tahi hape o ta ratou e faahapa. Te mauruuru nei ratou no te ohipa itoito ta to ratou mau hoa kerisetiano e rave ra. Te tiaturi nei ratou e, i roto i te taatoaraa, te tutava nei te taata tataitahi i te tavini ia Iehova. E e oioi noa te mau matahiapo i te faaite roa ˈtu i teie manaˈo to ratou.—A faaau e te Tesalonia 2, 3:4.

16. Eaha te faahopearaa o te haerea mauruuru e te aroha o Paulo, i nia i to ˈna mau hoa kerisetiano?

¹⁶ Ma te papu maitai, ua taa i te rahiraa o te mau Kerisetiano ta Paulo i tavini na e ua mauruuru oia ia ratou e ua aroha atoa ia ratou. Nafea tatou e ite ai? A hiˈo na e eaha to ratou manaˈo no nia ia Paulo. Aita ratou i mǎtaˈu ia ˈna, noa ˈtu e e mana rahi to ˈna. Aita, ua here râ ratou ia ˈna e ua haafatata ˈtu ia ˈna. No reira, i to ˈna faarueraa i te hoê vahi, “tauahi maira [te mau matahiapo] i nia i te aˈî o Paulo ua hôˈi maira ia ˈna”! (Ohipa 20:17, 37) Auê te mau matahiapo—e o tatou atoa nei—i te mauruuru e, i te mea e te vai nei teie hiˈoraa to Paulo o ta tatou e nehenehe e pee! Oia mau, e faaite anaˈe i to tatou mauruuru i te tahi e te tahi.

Te mau ohipa hamani maitai

17. Eaha vetahi mau faahopearaa maitatai e faatupuhia e te mau ohipa hamani maitai i roto i te amuiraa?

¹⁷ Hoê o te mau faaitoitoraa puai roa ˈˈe no te here taeae, o te ohipa hamani maitai ïa. Mai ta Iesu i parau, “e mea maitai i te horoa ˈtu i te rave mai.” (Ohipa 20:35) Noa ˈtu e e horoa tatou i te pae varua, i te pae materia, aore ra i to tatou taime e to tatou puai, eita noa tatou e faaoaoa ia vetahi ê, e oaoa atoa râ tatou iho. I roto i te amuiraa, e parare oioi te hamani maitai. Inaha, ia haamata-anaˈe-hia i te rave i te hoê ohipa hamani maitai, e rave rahi atu â te faahoˈihia mai. E eita e maoro, e uˈana roa te aroha taeae!—Luka 6:38.

18. Eaha te auraa o te “maitai” e faahitihia ra i roto i te Mika 6:8 (MN)?

¹⁸ Ua faaue o Iehova i to ˈna nunaa ra o Iseraela ia faaite i te hamani maitai. I roto i te Mika 6:8, te na ôhia ra: “Ua faaite mai oia ia oe, e te taata na, i te mea maitai; e eaha ta Iehova hinaaro ia oe ra maori râ o te rave i te parau-tia, e ia hinaaro hoi i te aroha [“maitai,” MN], e te haere ma te haehaa i te aro o to Atua?” Eaha te auraa ‘ia hinaaro i te maitai’? Te taˈo Hebera i faaohipahia i ǒ nei no “maitai” (cheʹsedh), ua huri-atoa-hia ïa e “aroha.” Ia au i te hoê buka (The Soncino Books of the Bible), “te faataa ra [teie taˈo] i te tahi mea itoito aˈe i te taˈo ra aroha. To ˈna auraa ra, e ‘aroha [ïa] o te ohipa,’ te raveraa i te tahi mau ohipa hamani maitai, eiaha noa i nia i te feia i roto i te veve e te fifi, i nia râ i to ˈna taata-tupu atoa.” Te na ô ra te tahi atu aivanaa e, te auraa o te taˈo ra cheʹsedh, oia ïa “here e faatupu i te ohipa.”

19. (a) Eaha te mau ravea ta tatou e imi no te hamani maitai ia vetahi ê i roto i te amuiraa? (b) A horoa i te hoê hiˈoraa i to outou iho fanaˈoraa i te here taeae.

¹⁹ E ere to tatou here taeae i te mea paraparau noa, aore ra i te tahi noa manaˈo. E ohipa mau râ. No reira, a imi i te tahi mau ravea e nehenehe ai outou e hamani maitai i to outou mau taeae e mau tuahine. A riro mai ia Iesu, o tei ore i tiai noa e ia haere mai te taata ia ˈna ra no te ani i te tauturu, e pinepine râ, na ˈna iho i haere atu ia ratou ra. (Luka 7:12-16) A feruri iho â râ i te feia e fifihia ra. Te hinaaro ra anei te hoê ruhiruhia aore ra te hoê taata huma i te tahi farereiraa aore ra te tauturu no te haere i te tahi vahi? Te hinaaro ra anei te hoê tamarii “otare” e ia horoa ˈtu tatou i te tahi taime e ia haapao rii tatou ia ˈna? Te hinaaro ra anei te hoê taata e taiâ ra i te hoê tariˈa faaroo aore ra te tahi parau tamahanahanaraa? Mai te peu e e nehenehe ta tatou, e rave anaˈe ïa i te taime no te rave i teie mau ohipa hamani maitai. (Ioba 29:12; Tesalonia 1, 5:14; Iakobo 1:27) Eiaha ia moehia e, i roto i te hoê amuiraa tei î i te mau taata tia ore, hoê o te mau ohipa hamani maitai faufaa roa ˈˈe, o te faaoreraa ïa i te hapa—te faaore-roa-raa i te inoino, noa ˈtu e e tumu ta tatou no te amuamu. (Kolosa 3:13) Ia ineine anaˈe tatou i te faaore i te hapa a vetahi ê, eita ïa e tupu i roto i te amuiraa, te mau amahamaharaa, te mau feiiraa, e te mau peapea, e au hoi i te mau tapoˈi rarirari o te tupohe i te auahi o te here taeae.

20. Nafea tatou paatoa ia hiˈopoa noa ia tatou iho?

²⁰ Ia hinaaro mau â tatou e tia ˈi, e ia ama noa teie auahi faufaa roa o te here i roto i to tatou mafatu. Eiaha e faaea i te hiˈopoa noa ia tatou iho. Te aroha ra anei tatou ia vetahi ê? Te faaite ra anei tatou i to tatou mauruuru ia vetahi ê? Te rave ra anei tatou i te mau ohipa hamani maitai i nia ia vetahi ê? Mai te peu e e na reira noa tatou, e haamahanahana noa te auahi o te here i to tatou fetii taeae, noa ˈtu te toetoe rahi e te aroha ore o teie nei ao. No reira ˈtura, “ia vai maite mai â te aroha taeae”—i teie nei e a muri noa ˈtu!—Hebera 13:1.

[Nota i raro i te api]

Eaha to outou manaˈo?

◻ Eaha mau na te here taeae, e no te aha e tia ˈi ia vai maite â?

◻ Nafea te aroharaa ˈtu ia vetahi ê ia tauturu ia tatou ia tapea noa i to tatou here taeae?

◻ Eaha te tuhaa a te mauruuru i roto i te here taeae?

◻ Nafea te mau ohipa hamani maitai ia faauˈana i te here taeae i roto i te amuiraa kerisetiano?

[Tumu parau tarenihia i te api 16

E here o te ohipa

Tau matahiti i teie nei, ua feaa rii te hoê taata o tei haapii na tau taime i te Bibilia e te mau Ite no Iehova, no nia i te parau no te here taeae. Ua ite oia e ua parau o Iesu e: “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” (Ioane 13:35) Mea fifi râ no ˈna ia tiaturi. I te hoê mahana, ua ite mata roa ˈtu oia i te here kerisetiano i te ohiparaa.

Noa ˈtu e tei nia oia i te parahiraa turairai, ua ratere teie nei taata i te atea ê i to ˈna fare. I Betelehema, i te fenua Iseraela, ua haere atura oia i te hoê putuputuraa a te amuiraa. I reira, ua ani onoono maira te hoê Ite Arabia e ia faaea te tahi atu Ite ratere e teie taata haapii Bibilia, i ǒ to ˈna utuafare i taua po ra. Hou e haere ai e taoto, ua ani aˈera te taata haapii i te parau faatia i te fatu fare ia haere i nia i te taupee i te poipoi aˈe no te mataitai i te hitiraa o te mahana. Ua faaara ˈtu râ te fatu fare e eiaha roa ˈtu. I te poipoi aˈe, ua faataa maira te taeae Arabia e eaha te tumu. Na roto i te hoê auvaha, ua parau maira oia e mai te peu e e ite to ˈna feia tapiri e e mau manihini ati Iuda ta ˈna—e e ati Iuda hoi te taata haapii Bibilia—e tutui ratou i to ˈna fare i te auahi e o ˈna atoa e to ˈna utuafare i roto. No to ˈna hitimahuta, ua ani atura te taata haapii Bibilia e, “No te aha ïa oe i rave ai i teie ohipa atâta?” Ma te ore e ani i te tauturu a te auvaha, ua hiˈo maira te taeae Arabia ia ˈna e ua na ô noa ˈtura, “Ioane 13:35.”

Ua putapû roa te taata haapii Bibilia i te vai-mau-raa o te here taeae. Ua bapetizohia ˈtura oia tau taime i muri iho.

[Hohoˈa i te api 18]

No to ˈna huru auhoa e te mauruuru, e mea ohie roa ia haafatata ˈtu i te aposetolo Paulo