Raˈi

Auraa: Vahi faaearaa o te Atua ra o Iehova e te mau varua haapao maitai; vahi itea-ore-hia e te taata. I roto i te Bibilia, e rave rahi auraa to te parau “raˈi.” Ei hiˈoraa, e nehenehe e faataa i te Atua iho; ta ˈna faanahonahoraa o te mau melahi haapao maitai; te hoê tiaraa maitai i pihai iho i te Atua; te ao nui materia i nia ˈˈe i te fenua; te reva e haaati ra i te palaneta Fenua; te mau faatereraa taata i raro aˈe i te mana o Satani; te faatereraa parau-tia apî o te raˈi e o Iesu Mesia e ta ˈna feia aiˈa haamanahia e Iehova no te faatere.

Ua ora anei tatou i roto i te ao varua hou a riro mai ai ei taata?

Ioa. 8:23: “Ua parau atura [Iesu Mesia] . . . , No raro nei outou, no nia vau: no teie nei ao outou, e ere au i to teie nei ao.” (No te ao varua o Iesu. Mai ta Iesu râ i parau, e ere mai te reira no te mau taata.)

Roma 9:10-12: “A hapu atoa ˈi hoi Rebeka i te [“mau maehaa,” MN] [e] . . . ait[â] hoi te tamarii i fanau, aore hoi i rave i te maitai e te ino, ia tupu tei haapaohia e te Atua i te maitiraa ra, (eiaha ia riro no te ohipa, no ˈna râ no tei parau [maira), i] parauhia ˈtu ai oia e, E riro te matahiapo ei tavini no tei muri aˈe.” (Papu maitai e ahiri e ua ora o Iakoba e o Esau, te mau maehaa, i roto i te ao varua hou a fanauhia ˈi i nia i te fenua, e roo ïa to raua niuhia i nia i to raua haerea i roto i te ao varua. Aita i noaa ia raua teie roo e tae noa ˈtu i muri aˈe i to raua fanauraahia ei taata.)

E haere anei te feia maitatai atoa i nia i te raˈi?

Ohi. 2:34: “Aita hoi Davida [ta te Bibilia e faataa ra mai te hoê ‘taata ia au i te mafatu o Iehova’] i tae i nia i te raˈi.”

Mat. 11:11: “E parau mau ta ˈu e parau atu ia outou nei, i ta te vahine i fanau nei aita ˈtu ïa peropheta rahi i itea ia Ioane Bapetizo nei, o tei iti roa râ i te basileia o te ao ra, e rahi ïa ia ˈna.” (I to ˈna poheraa, aita ïa o Ioane i haere i nia i te raˈi.)

Sal. 37:9, 11, 29: “E riro hoi te feia hamani ino ra i te tâpû-ê-hia, o te feia râ i tiaturi ia Iehova ra, no ratou ïa te fenua. . . . Te feia mǎrû ra, e parahi ïa i te fenua, e oaoa ratou i te rahi o te hau ra. E parahi te feia parau-tia i nia i te fenua, e parahi tamau â ratou i reira.”

Ahiri e aita o Adamu i hara, e haere anei o ˈna i nia i te raˈi?

Gen. 1:26: “Ua parau ihora te Atua, E hamani tatou i te taata ma to tatou iho huru, ia au i to tatou iho hohoˈa; e ei nia iho ratou i te mau iˈa o te tai, e i nia iho i te mau manu o te reva, e i nia iho i te mau puaa, e i nia iho i te fenua atoa, e i nia iho hoi i te mau mea e nee haere i te fenua nei ra.” (Ua opua te Atua ia haapao o Adamu i te fenua e te oraraa o te mau animala. Aita hoê aˈe mea e haapapu ra e e haere oia i nia i te raˈi.)

Gen. 2:16, 17: “Ua parau maira te Atua ra o Iehova i te taata, na ô maira, E amu noa oe i to te mau raau atoa o te ô nei; area i to te raau e ite ai i te maitai e te ino, eiaha oe e amu i te reira; ei te mahana e amu ai oe i te reira, e pohe ïa oe.” (E ere te opuaraa matamua a te Atua e ia pohe te taata i te hoê mahana. Ua riro te faaueraa e itehia ra i ǒ nei ei faaararaa no nia i te hoê haerea e aratai i te pohe. No reira, e utua te pohe no te faaroo-ore-raa, e ere râ i te ravea no te fanaˈo i te hoê oraraa faahiahia aˈe i nia i te raˈi. E haamauruuruhia te taata no to ˈna auraroraa na roto i te ora aita e hopearaa aore ra ora mure ore i roto i te Paradaiso ta te Atua i faaineine no ˈna. Hiˈo atoa Isaia 45:18.)

E tia anei ia haere i nia i te raˈi no te ite i te oaoa mau?

Sal. 37:11: “Te feia mǎrû ra, e parahi ïa i te fenua, e oaoa ratou i te rahi o te hau ra.”

Apo. 21:1-4: “E ite atura vau i te raˈi apî e te fenua apî . . . Ua faaroo atura vau i te hoê reo rahi no te raˈi maira, i te na ôraa mai e, Inaha tei ǒ te taata ra te sekene o te Atua, e e parahi oia i roto ia ratou ra, e ei taata ratou no ˈna, e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”

Mika 4:3, 4: “E ore te hoê fenua e aa mai i te tahi fenua i te ˈoˈe, e ore hoi ratou e haapii faahou i te tamaˈi. E parahi râ ratou o te taata atoa i raro aˈe i ta ˈna iho vine, e i raro aˈe i ta ˈna iho suke, e aore roa e taata e haamǎtaˈu mai ia ratou: o te vaha hoi o Iehova sabaota ra, tei parau mai.”

Ua haamatara anei o Iesu i te eˈa o te raˈi no te feia atoa i pohe hou oia a pohe ai?

Eaha te auraa o te Petero 1, 3:19, 20? “O ta ˈna [Iesu ei varua, i muri aˈe i to ˈna tia-faahou-raa] ïa i aˈo atu i te mau varua e vai i roto i te tapearaa i teie nei; o tei ore i faaroo i mutaa ihora, i te faaoromairaa roa o te Atua a tiai ai i te anotau ia Noa ra, i te tarairaa i te pahi ra, i ora ˈi e toofanu pue taata i te moana, oia hoi na taata [“mau nephe,” KJ, Dy; “mau taata,” Jé, Os, AC, Ce, Da, VB] toovau ra.” (Teie “mau varua e vai i roto i te tapearaa,” e mau nephe anei o te mau taata i patoi i te pororaa a Noa hou te Diluvi, e e nehenehe anei ratou e haere i nia i te raˈi? Te faaite ra te hoê faaauraa i te Petero 2, 2:4, te Iuda 6 e te Genese 6:2-4 e o te mau melahi a te Atua teie mau varua tei rave i te tino taata no te faaipoipo, i te anotau o Noa. I roto i te Petero 1, 3:19, 20, o pneuʹma·sin te taˈo Heleni iritihia na roto i “te mau varua,” area te taˈo hurihia na roto i te parau ra “mau nephe” o psy·khaiʹ ïa. E ere teie “mau varua” i te mau nephe faataa-ê-hia i te tino, e mau melahi faaroo ore râ; teie nei râ, te “mau nephe” e faahitihia ra i ǒ nei e mau taata ora ratou, te mau taata, oia hoi o Noa e to ˈna utuafare. No reira, ua riro te poroi i porohia na i “te mau varua e vai i roto i te tapearaa” ei poroi haavaraa.)

Eaha te auraa o te Petero 1, 4:6? “I parau-atoa-hia ˈtu ai hoi te evanelia i te feia i pohe ra, i faahapahia ˈtu ai ratou e te taata i te tino ra, te ora ra râ ratou i te Atua i te varua ra.” (O te taatoaraa anei o “te feia i pohe” hou te poheraa o Iesu teie e parauhia ra? Mai tei ite-aˈena-hia, e ere teie feia pohe i “te mau varua e vai i roto i te tapearaa.” E mau melahi faaroo ore teie mau varua. Eita te pororaa e nehenehe e afai mai i te tahi haamaitairaa i te feia pohe i te pae tino, no te mea, mai ta te Koheleta 9:5 e faaite ra, ‘aita a te feia i pohe ra e parau itea’ e, ia au i te Salamo 146:4, ‘ua mou ta ˈna i opua i taua mahana ra.’ I roto râ i te Ephesia 2:1-7, 17, te faahitihia ra no te tahi mau taata, tei pohe i te pae varua e ua ora faahou mai i to ratou fariiraa i te parau apî maitai.)

Te faahiti ra anei te “Faufaa Apî” i te ora i nia i te raˈi mai te tiaturiraa o te mau Kerisetiano atoa?

Ioa. 14:2, 3: “E rave rahi te parahiraa mau i te fare o tau Metua ra; ahiri aita ra, ua parau atu ïa vau ia outou. Te haere nei au e haamaitai i te hoê vahi no outou. E ua oti anaˈe i te faaauhia e au te hoê vahi no outou ra, e hoˈi mai au e aratai ia outou i o ˈu ra; ei reira atoa outou i te vahi e parahihia e au ra.” (Te faaite ra Iesu i ǒ nei e e parahi ta ˈna mau aposetolo haapao maitai, ta ˈna e paraparau atura, i te taime au, i roto i te “fare” o to ˈna Metua i nia i te raˈi, e o Iesu atoa. Tera râ, aita o ˈna e faataa ra ehia mau pǐpǐ ê atu o te haere atoa i nia i te raˈi.)

Ioa. 1:12, 13: “Te feia atoa râ i ite atu ia ˈna [Iesu] i te faarooraa i to ˈna ra iˈoa, homai ra oia i te mana ra ia ratou ei tamarii na te Atua. Te feia e ere i to te toto i fanau ai ra, e ere hoi i to te hinaaro o te tino, e ere hoi i to te hinaaro o te taata, no te Atua râ.” (A tapao na e i roto i te mau irava na mua ˈtu, i te irava 11, te faahitihia ra to Iesu “ihora taata,” te mau ati Iuda. Ua riro te feia atoa i farii ia Iesu i to ˈna haereraa mai ia ratou ra i te senekele matamua ei tamarii na te Atua e e ora ratou i nia i te raˈi. No te mau ihoparau, mai te huru e ua mairi, e ere ïa teie papai no te feia atoa tei riro ei Kerisetiano mai reira mai.)

Roma 8:14, 16, 17: “O te feia atoa hoi i arataihia e te varua o te Atua ra, e tamarii anaˈe ïa ratou na te Atua. O te varua iho hoi, e to tatou atoa nei varua, o tei faaite ïa e, e tamarii tatou na te Atua. E tamarii ra, e feia tufaa ïa; e feia tufaa i te Atua ra, e feia tufaa tatou e te Mesia; te pohe apipiti nei hoi tatou e oia atoa, ia haamaitai-apipiti-hia tatou e oia atoa hoi.” (Parau mau, i te tau a papaihia ˈi teie mau parau, ua riro te feia atoa i arataihia e te varua o te Atua ei mau tamaiti na te Atua e ua tiaturi ratou e e faahanahanahia ratou e te Mesia. Aita râ i tupu noa mai te reira. Ei hiˈoraa, te faahiti ra te Luka 1:15 e ua î o Ioane Bapetizo i te varua moˈa, te haapapu maitai nei râ te Mataio 11:11 e eita o ˈna e faahanahanahia i roto i te Basileia o te raˈi. No reira, i muri aˈe i te haaputuputuraahia te feia aiˈa o te Basileia o te raˈi, e itehia mai vetahi atu feia e tavini ra i te Atua ei pǐpǐ a ta ˈna Tamaiti e eita hoi ratou e apiti atu i te hanahana o te raˈi.)

Eaha te mau irava o te “Faufaa Apî” e faaite ra e e haamaitaihia te tahi mau Kerisetiano i te ora mure ore i nia i te fenua?

Mat. 5:5: “E ao to tei mǎrû; e riro hoi ia ratou te fenua.”

Mat. 6:9, 10: “E to matou Metua i te ao ra, ia raa to oe iˈoa. Ia tae to oe ra hau. Ia haapaohia to oe hinaaro i te fenua nei, mai tei te ao atoa na.” (Eaha te hinaaro o te Atua no te fenua nei? Eaha ta te Genese 1:28 e Isaia 45:18 e faataa maira no nia i te reira?)

Mat. 25:31-33, 40, 46: “Ia tae maira te Tamaiti a te taata ma ta ˈna hanahana, e te mau melahi moˈa atoa ra, ei reira oia e parahi ai i nia iho i to ˈna terono hanahana; e e haaputuhia to te mau fenua atoa i mua i to ˈna aro: e na ˈna e faataa ia ratou mai te tiai mamoe e faataa i te mamoe i te puaaniho ra: e e tuu oia i te mamoe i tana rima atau, e te puaaniho i te rima aui. E na ô aˈe te arii i te parau ia ratou [te mau mamoe], na ô aˈera, Oia mau ta ˈu e parau atu ia outou nei, O outou i na reira i te hoê taeae iti haihai roa i roto i tau mau taeae nei, ua na reira mai ïa outou ia ˈu. O te haere ê ïa [te mau puaaniho] e rave i te pohe mure ore, area te feia parau-tia ra [te mau mamoe], o te rave ïa i te ora mure ore.” (A tapao na e mea taa ê teie mau “mamoe” i te mau taeae o te Arii, ‘tei noaa te parauraa no te raˈi.’ [Heb. 2:10–3:1] E ora teie mau taata e au i te mau mamoe i te taime e parahi ai o Iesu i nia i to ˈna terono e i reira e roo-faahou-hia ˈi te tahi o to ˈna “mau taeae” i te mau tamataraa i te fenua nei.)

Ioa. 10:16: “E mamoe ê atu â ta ˈu, e ere i to teie nei aua, e aratai atoa mai au ia ratou e tia ˈi, e faaroo mai hoi ratou i to ˈu reo, ia hoê aˈe nǎnǎ, e hoê hoi tiai.” (O vai teie mau “mamoe ê atu”? O te mau pǐpǐ ïa a te Tiai mamoe maitai roa, o Iesu Mesia, e ere no te aua o te “faufaa apî” e aita ratou e tiaturi ra e ora i nia i te raˈi. Noa ˈtu râ, e faatupu ratou i te mau taairaa piri roa e te feia i roto i tera aua.)

Pet. 2, 3:13: “Te tatari nei râ tatou i te raˈi apî e te fenua apî ta ˈna i parau maira, i te vai-mau-raa o te parau-tia ra.” (Hiˈo atoa Apokalupo 21:1-4.)

Apo. 7:9, 10: “E i muri aˈe i te reira [no faaroo noa ˈtura te aposetolo Ioane i te numera o te feia o tei “tapaohia” e “i tauihia no roto i teie nei ao” no te parahi i pihai iho i te Mesia, i nia i te mouˈa Siona i nia i te raˈi; hiˈo Apokalupo 7:3, 4; 14:1-3], hiˈo atura vau, e inaha e feia rahi roa, e ore roa e pau ia taio, no te mau fenua atoa, e te mau opu atoa, e te mau nunaa atoa, e te mau reo atoa, i te tia-noa-raa i mua i te terono, e i mua i te Arenio, ma te ahu teatea i te ahuraa e ma te amaa tamara i to ratou rima; e ma te pii hua hoi to ratou reo, i te na ôraa e, Tei to tatou Atua te ora, tei parahi i nia iho i te terono ra, e tei te Arenio.”

Ia au i te Bibilia, ehia rahiraa taata o te fanaˈo i te ora i nia i te raˈi?

Luka 12:32: “Eiaha e mǎtaˈu, e tau nǎnǎ iti e; e mea hinaaro na to outou Metua i te horoa mai i te basileia no outou.”

Apo. 14:1-3: “Hiˈo atura vau, e inaha, te tia noa ra te Arenio [Iesu Mesia] i nia iho i te mouˈa ra o Siona [i nia i te raˈi; hiˈo Hebera 12:22-24], ma te taata atoa hoi i pihai iho ia ˈna, hoê hanere e maha ahuru ma maha i te tausani, ma te iˈoa o to ˈna Metua i te papairaahia i nia iho i to ratou mau rae. . . . Ua himene ihora ratou, mai te himene apî ra te huru . . . e aore roa e taata e ite ai i taua himene ra ia haapii, maori râ e, o taua hoê hanere, e maha ahuru, e maha tiahapa i te tausani ra, i tauihia no roto i teie nei ao.”

E mau ati Iuda i te pae tino noa anei te mau 144 000?

Apo. 7:4-8: “Ua faaroo atura vau i te rahiraa o te feia i tapaohia ra: hoê hanere e maha ahuru ma maha i te tausani i tapaohia, no te mau opu atoa o te mau tamarii a Iseraela ra: . . . Iuda . . . Reubena . . . Gada . . . Asera . . . Naphatali . . . Manase . . . Simeona . . . Levi . . . Isahara . . . Zebulona . . . Iosepha . . . Beniamina.” (E ere i te mau opu o Iseraela i te pae tino no te mea: aita roa ta Iosepha e opu; aita te mau opu a Epheraima e a Dana e faahitihia ra i roto i teie tabula; i te pae hopea, ua faataa-ê-hia te mau ati Levi no te taviniraa i roto i te hiero, aita râ ratou i faarirohia mai te hoê o na 12 opu. Hiˈo Numera 1:4-16.)

Roma 2:28, 29: “O te ati Iuda rapae au ra, e ere ïa oia i te ati Iuda; e te peritome rapae au i te tino ra, e ere ïa i te peritome: o te ati Iuda roto ra, te ati Iuda; e te peritome aau ra, te peritome; eiaha to rapae au, o to te varua râ.”

Gal. 3:26-29: “E tamarii anaˈe hoi outou na te Atua i te faaroo ia Iesu Mesia ra. . . . Aita e ati Iuda, aita e Heleni, aita e tavini, aita e tiamâ, aita e tane, aita e vahine: hoê â hoi outou i roto i te Mesia ra ia Iesu. E no te Mesia outou na, e huaai ïa outou no Aberahama, e e feia aiˈa ïa i tei parauhia maira.”

E numera taipe noa anei te numera 144 000?

E itehia te pahonoraa i te mea ra e te faahitiraahia te numera taotiahia oia hoi 144 000, te parauhia ra i roto i te Apokalupo 7:9 no nia i te “feia rahi roa, e ore roa e pau ia taio.” Ahiri e eita e ravehia te numera 144 000 i to ˈna auraa mau, aita roa ˈtu ïa e auraa to ˈna faaauraa e te “feia rahi roa.” Te faariroraa ei numera mau e au ïa i ta Iesu i faahiti i roto i te Mataio 22:14, no nia i te Basileia o te mau raˈi: “E rave rahi hoi tei parauhia, e iti râ tei maitihia.”

E haere atoa anei te “feia rahi roa” faahitihia i roto i te Apokalupo 7:9, 10 i nia i te raˈi?

Aita te Apokalupo e faahiti ra i te hoê â parau no te mau melo o te feia rahi roa e no te mau 144 000, o tei “tauihia no roto i teie nei ao” no te apiti atu e te Mesia i nia i te mouˈa Siona o te raˈi.—Apo. 14:1-3.

I te mea e ‘te tia nei ratou i mua i te terono e i mua i te Arenio’ e ere ïa te auraa e tei te hoê vahi papu ratou, tei roto râ ratou i te hoê huru fariihia. (Hiˈo Apokalupo 6:17; Luka 21:36.) Te parau “i mua i te terono” (Heleni, e·noʹpi·on tou throʹnou; oia hoi “i raro aˈe i te mata o te terono”) aita ïa e titauhia ra e tei nia ratou i te raˈi. Tei “raro aˈe” noa ratou “i te mata” o te Atua, o te faaite maira ia tatou e mai te raˈi mai te hiˈopoa nei o ˈna i te mau taata.—Sal. 11:4; hiˈo Mataio 25:31-33; Luka 1:74, 75; Ohipa 10:33.

Aita roa ˈtu to te “feia rahi i nia i te raˈi” faahitihia i roto i te Apokalupo 19:1, 6 e taairaa e te “feia rahi roa” a te Apokalupo 7:9. E ere te feia rahi i nia i te raˈi ‘no ǒ mai i te mau nunaa atoa’ e aita atoa ratou e faatae nei i to ratou faaoraraa i te Arenio ra; e mau melahi ratou. Te vai ra i roto i te Bibilia te parau “feia rahi” i roto e rave rahi tuhaa parau.—Mar. 5:24; 6:34; 12:37.

Eaha te tiaraa o te feia e haere i nia i te raˈi?

Apo. 20:6: “E riro râ ratou ei tahuˈa na te Atua e na te Mesia, e e hau to ratou ia ˈna ra e ia hoê tausani i te matahiti.” (Hiˈo atoa Daniela 7:27.)

Kor. 1, 6:2: “Aita outou i ite e, na te feia moˈa e haava i to teie nei ao?”

Apo. 5:10: “Ua faariro oe ia matou ei hui arii, e ei tahuˈa na to matou Atua, e e riro ia matou te hau i teie nei ao.”

Na vai e maiti i te feia e haere i nia i te raˈi?

Tes. 2, 2:13, 14: “Ia haamaitai ra matou i te Atua ia outou eiaha ia faaea e tia ˈi, e te mau taeae herehia e te Fatu ra, no te mea ua maitihia outou e te Atua mai te matamua mai â ia ora i te haamaitai a te [v]arua e te faaroo i te parau mau: i parauhia ˈi outou e ana i ta matou nei evanelia, ia roaa te ao o to tatou Fatu ra o Iesu Mesia.”

Roma 9:6, 16: “E ere to Iseraela ˈtoa i te Iseraela mau. . . . E ere i to te hinaaro, e ere hoi i to te horo, no te Atua râ i aroha maira.”