HAAPIIRAA 20
Mea nafea te amuiraa i te faanahoraahia?
E Atua naho o Iehova. (Korinetia 1, 14:33) Te tiai nei ïa tatou ia naho maitai to ˈna nunaa. E nafea te mau amuiraa e faanahohia ˈi? E e nafea tatou e turu ai ia manuïa te reira?
1. O vai te upoo o te amuiraa?
O te Mesia “te upoo . . . o te amuiraa.” (Ephesia 5:23) Mai te raˈi mai, na ˈna e aratai ra i te mau ohipa a to Iehova nunaa na te ao nei. Ua faatoroa Iesu i “te tavini haapao maitai e te paari,” te hoê pǔpǔ taata feruriraa paari to ratou matauhia ei Tino aratai. (A taio i te Mataio 24:45-47.) Mai te mau aposetolo e te mau matahiapo o Ierusalema o te senekele matamua, te horoa ra te Tino aratai i te aratairaa i te mau amuiraa na te ao nei. (Ohipa 15:2) E ere râ teie pǔpǔ taata i te mau aratai o ta matou faanahonahoraa. E ani râ ratou i ta Iehova e i ta te Bibilia aratairaa e e auraro ratou i ta Iesu aratairaa.
2. O vai te mau matahiapo e eaha ta ratou e rave?
Te mau matahiapo, o te mau Kerisetiano ïa tei vai taiva ore e rave rahi matahiti. Te haapii ra ratou i te nunaa o Iehova ma te faaohipa i te Bibilia ma te tauturu e ma te faaitoito ia ratou. Aita ratou e aufauhia no ta ratou ohipa. E tavini ratou “ma te aau tae . . . i mua i te Atua, eiaha no te nounou taoˈa, ma te hinaaro mau râ.” (Petero 1, 5:1, 2) Te mau tavini tauturu, o te mau tane ïa o te amuiraa o te tauturu i te mau matahiapo a faaî atu ai ratou i muri iho i te mau titauraa no te riro mai ei matahiapo.
E faatoroa te Tino aratai i te tahi mau matahiapo ei tiaau haaati. E haere ratou e farerei i te mau amuiraa, no te horoa i te aratairaa e no te faaitoito i te mau taeae e tuahine. E faatoroa atoa ratou i te mau matahiapo e te mau tavini tauturu o te faaî ra i te mau titauraa e itehia ra i roto i te Bibilia.—Timoteo 1, 3:1-10, 12; Tito 1:5-9.
3. Eaha te hopoia ta te Ite no Iehova tataitahi e rave?
I roto i te mau amuiraa atoa, e “arue ratou i te iˈoa o Iehova” ma te horoa i te mau pahonoraa, ma te rave i te mau tumu parau, ma te himene i te mau putuputuraa e ma te apiti atoa i roto i te pororaa ia au i to ratou tupuraa.—A taio i te Salamo 148:12, 13.
A FAAHOHONU ATU Â
A haapii i to Iesu huru ei aratai, e nafea te mau matahiapo e nehenehe ai e pee i to Iesu hiˈoraa e e nafea tatou e nehenehe ai e auraro ia Iesu e e ohipa e te mau matahiapo.
4. E aratai maitai o Iesu
Te horoa mai ra Iesu i te hoê titauraa mahanahana mau. A taio i te Mataio 11:28-30, e a aparau i teie uiraa:
Eaha ta Iesu e hinaaro ia manaˈo tatou no nia i ta ˈna huru aratairaa?
Nafea te mau matahiapo e pee ai i to Iesu hiˈoraa? A pata i te VIDEO.
Te haapii maitai ra te Bibilia e nafea te mau matahiapo e rave ai i ta ratou ohipa.
A taio i te Isaia 32:2 e te Petero 1, 5:1-3, e a aparau i teie mau uiraa:
Eaha to oe huru ia ite oe, mai ia Iesu, e te tutava ra te mau matahiapo i te faaite i te maitai ia vetahi ê?
Eaha te tahi atu mau tuhaa e pee ai te mau matahiapo i to Iesu hiˈoraa?
5. E haapii te mau matahiapo ma te horoa i te hiˈoraa
Eaha ta Iesu e hinaaro ra ia manaˈo te mau matahiapo no nia i ta ratou hopoia? A pata i te VIDEO.
Ua haamau Iesu i te mau ture aveia no te feia e aratai ra i roto i te mau amuiraa. A taio i te Mataio 23:8-12, e a aparau i teie uiraa:
Eaha ta oe i ite no nia i te taa-ê-raa i roto i te mau ture aveia Bibilia no te mau matahiapo, e ta oe i ite i rotopu i te mau aratai haapaoraa?
E haapao te mau matahiapo ia puai to ratou auhoaraa e o Iehova e e tauturu ratou i to ratou utuafare ia na reira atoa
E aupuru te mau matahiapo i te taatoaraa o te amuiraa
E poro tamau te mau matahiapo
E taata haapii te mau matahiapo. E tauturu atoa ratou no te tamâraa e no te tahi atu mau ohipa
6. E nehenehe tatou e turu i te mau matahiapo
Te horoa mai ra te Bibilia i te hoê tumu faufaa no te turu i te mau matahiapo. A taio i te Hebera 13:17, e a aparau i teie mau uiraa:
No te aha te Bibilia e parau ai ia auraro tatou i tei aratai ia tatou? No te aha oia, aore ra no te aha aita?
A taio i te Luka 16:10, e a aparau i teie uiraa:
No te aha mea faufaa ia ohipa tatou e te mau matahiapo oia atoa i roto i te mau mea iti?
TE MANAˈO O VETAHI: “Aita e faufaa ia riro ei mero o te hoê haapaoraa faanahohia.”
No te aha oe e manaˈo ai e mea maitai ia haamori te hoê taata i te Atua ei mero o te hoê amuiraa?
HAAPOTORAA
O Iesu te upoo o te amuiraa. E oaoa tatou i te turu i te mau matahiapo o te tavini ra i raro aˈe i ta ˈna aratairaa no te maitai ta ratou e faaite ra e no te hiˈoraa ta ratou e horoa ra.
Haamanaˈoraa
O vai te upoo o te amuiraa?
E nafea te mau matahiapo e tauturu ai i te mau amuiraa?
Eaha te hopoia a te Ite no Iehova tataitahi?
HIˈOPOA
A hiˈo i te haapapuraa o te haapeapearaa rahi ta te Tino aratai e ta te tahi mau matahiapo no te mau Kerisetiano i teie mahana.
A haapii no nia i te ohipa ta te mau tiaau haaati e rave ra.
A taio no nia i te tuhaa a te vahine i roto i te amuiraa.
A hiˈo mea nafea te mau matahiapo e haa rahi ai no te faaitoito i to ratou mau taeae e tuahine.
“Matahiapo Kerisetiano, hoa ohipa no to tatou oaoa” (Te Pare Tiairaa 15 no Tenuare 2013)