E tia mau anei ia outou ia tatarahapa?

‘EITA roa ˈtu vau e tatarahapa,’ o ta George Bernard Shaw ïa i papai. ‘O tei ravehia, ua ravehia ïa,’ o ta vetahi paha e parau.

Peneiaˈe, te faataupupu nei tatou iho i te farii i te hoê hape no te mǎtaˈu i te erehia i te faaturaraa ia ˈna iho. Peneiaˈe te imi nei tatou i te otoheraa e na te tahi ê te hape. Aore ra e hinaaro paha tatou e tatarahapa, te faataupupu noa nei râ tatou e tae noa ˈtu i te taime e manaˈo ai tatou e ua haamoehia te hape.

E mea faufaa anei râ te tatarahapa? E faatupu mau anei te reira i te tahi mea?

Te faahepo nei te here ia tatarahapa tatou

Te here autaeae, o te tapao ïa e faataa ra e tera te mau pǐpǐ mau a Iesu Mesia. Teie ta ˈna i parau: “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” (Ioane 13:35) Te faaue nei te mau Papai i te mau Kerisetiano ia “aroha uˈana maite outou ia outou iho ma te aau porao ore.” (Petero 1, 1:22) Te faahepo nei te here uˈana ia tatarahapa tatou. No te aha? No te mea e haamauiui iho â tatou no te huru tia ore o te taata o te tapoˈi ra i te here mai te peu e eita te mauiui e faaorahia.

Ei hiˈoraa, eita paha tatou e hinaaro e paraparau i te tahi taata i roto i te amuiraa kerisetiano, no te mea mea ê roa to ˈna huru. Mai te peu e ua faahapa tatou, nafea te hoê taairaa here e faaafarohia ˈi? I roto i te rahiraa o te mau tupuraa, na roto i te tatarahaparaa e te raveraa i te tutavaraa no te paraparau ia ˈna ma te mahanahana. Ua euhe tatou e e here tatou i to tatou mau hoa faaroo, e ia parau atu tatou e te tatarahapa mau ra tatou no ta tatou hapa, te faatura ra tatou i te tahi o taua faaheporaa ra.—Roma 13:8.

Ei faahohoˈaraa: Mari Carmen e o Paqui, e vahine kerisetiano e e hoa rahi raua. No te mea hoi e ua tiaturi o Mari Carmen i te tahi mau parau faaino, ua faaatea mai o ˈna ia Paqui. Ma te ore e faataa, ua faarue roa o ˈna ia Paqui. Fatata hoê matahiti i muri iho, faaroo atura Mari Carmen e mea haavare te mau parau faaino. Eaha to ˈna huru? Ua turai te here ia ˈna ia haere e farerei ia Paqui e ia faaite atu ia ˈna ma te haehaa i to ˈna tatarahapa hohonu i to ˈna haerea ino roa. Ua taˈi ihora raua toopiti, e ua riro raua ei hoa rahi mai reira mai.

Noa ˈtu e aita tatou e manaˈo ra e ua rave tatou i te tahi ohipa hape, e faatitiaifaro râ te tatarahaparaa i te taa-ore-raa i te mau mea. Te haamanaˈo ra o Manuel e: “E rave rahi matahiti i teie nei, ua faaea mâua ta ˈu vahine i te fare o te hoê o to mâua mau tuahine pae varua a tapeahia ˈi oia i te fare maˈi. Ua rave mâua i tei maraa ia mâua no te tauturu ia ˈna e ta ˈna mau tamarii a maˈihia ˈi oia. I muri aˈe râ i to ˈna hoˈiraa mai i te fare, ua parau atu oia i te hoê hoa e aita i tano to mâua aufauraa i te mau haamâuˈaraa a te utuafare.

“Ua haere mâua e farerei ia ˈna e ua faataa e peneiaˈe no to mâua apî e te aravihi ore, aita mâua i haapao i te mau mea mai ta ˈna e rave. Ua pahono oioi mai nei oia e e tarahu ta ˈna ia mâua e ua oaoa mau â oia no te mau mea o ta mâua i rave no ˈna. Ua afaro te fifi. Ua haapii mai te ohipa i tupu ia ˈu i te faufaaraa ia tatarahapa ma te haehaa ia tupu te tahi taa-ore-raa i te mau mea.”

Ua haamaitai Iehova i teie nau hoa faaipoipo no te faaiteraa i te here e te ‘titauraa i te parau hau.’ (Roma 14:19) Te titau atoa ra te here ia haapao i te mau manaˈo hohonu o vetahi ê. Te aˈo maira Petero ia faaite tatou i te “manaˈo aroha.” (Petero 1, 3:8, MN) Mai te peu e e manaˈo aroha to tatou, e ite ïa tatou i te mauiui ta tatou i faatupu na roto i te hoê parau aore ra te hoê ohipa feruri-ore-hia e e turaihia tatou ia tatarahapa.

“Ia faaahuhia outou i te haehaa”

E nehenehe atoa te mau matahiapo kerisetiano haapao maitai e tatamaˈi i te tahi mau taime. (A faaau e te Ohipa 15:37-39.) Teie te tahi mau taime e mea faufaa roa ia tatarahapa. Na te aha râ e tauturu i te hoê matahiapo aore ra te tahi atu Kerisetiano e mea fifi no ˈna ia tatarahapa?

Te taviri, o te haehaa ïa. Ua aˈo te aposetolo Petero e: “Ia faaahuhia outou i te haehaa.” (Petero 1, 5:5) Noa ˈtu e e mea mau e i roto i te rahiraa tatamaˈiraa, ua hape na pae e piti, te haapao ra te Kerisetiano haehaa i to ˈna iho mau hape e te farii nei oia i te reira.—Maseli 6:1-5.

E tia i te taata e tatarahapahia ˈtura ia farii i te reira ma te haehaa. Na roto i te hoê faahohoˈaraa, e feruri na tatou e te tia ra e piti taata e hinaaro ra e paraparau i nia e piti tupuai mouˈa taa ê. Eita e afaro te paraparauraa na roto i te area e faataa ê ra ia raua. Ia pou mai râ te hoê o raua i raro i te peho e ia pee atoa te tahi i to ˈna hiˈoraa, e nehenehe ïa ta raua e paraparau ohie noa. Oia atoa, mai te peu e e hinaaro e piti Kerisetiano e faaafaro i te fifi i rotopu ia raua, ia haere ïa te hoê i raro i te peho no te farerei i te tahi, i roto i te hoê auraa parau, ia tatarahapa ma te tano.—Petero 1, 5:6.

Faufaaraa rahi o te tatarahaparaa i roto i te faaipoiporaa

Te vai ra iho â te mau ravea no te tatarahaparaa i roto i te faaipoiporaa o na taata tia ore e piti. E mai te peu e e manaˈo aroha to te tane e te vahine faaipoipo, e turaihia ïa raua ia tatarahapa ia paraparau aore ra ia rave noa ˈtu raua i te tahi mea tano ore. Te na ô ra te Maseli 12:18 e: “Te taata vavi noa ra, e au ïa i te ˈoˈe patiatia ra; o te arero râ o te taata paari ra, mai te raau rapaau maˈi ra ïa.” Eita te ‘patiatia vavi’ e nehenehe e iriti-ê-hia, e nehenehe râ e faaorahia na roto i te hoê tatarahaparaa rotahi. Parau mau, te titau ra te reira i te taa-maitai-raa e te tutavaraa tamau.

Te na ô ra o Susana no nia i to ˈna faaipoiporaa e: “E 24 matahiti te maoro to mâua Jack* faaipoiporaa, te haapii noa nei râ mâua i te mau mea apî no nia ia mâua. Tera noa râ, tau taime i mairi aˈenei, ua faataa ê mâua e ua ora tataitahi i to ˈna pae no te tahi hebedoma te maoro. Ua faaroo râ mâua i te mau aˈoraa a te mau Papai ta te mau matahiapo i horoa mai e ua hoˈi faahou mâua. Te taa ra ia mâua i teie nei e i te mea hoi e mea taa ê roa to mâua huru, e tupu iho â te aimârôraa. Ia tupu anaˈe te reira, e tatarahapa oioi mâua e e tutava mau mâua i te taa i te manaˈo o te tahi. Te oaoa nei au i te parau e ua maitai rahi mai to mâua faaipoiporaa.” Te na ô faahou ra Jack e: “Ua haapii atoa mâua i te ite i te mau taime e e haamata mâua i te tatamaˈi. I taua taime ra, e tâuˈa rahi mâua i te tahi e te tahi.”—Maseli 16:23.

E tia anei ia outou ia tatarahapa mai te peu e te manaˈo ra outou e e ere na outou te hape? Ia puta anaˈe te mau manaˈo hohonu, e mea fifi ia pari e na vai te hape. Te mea faufaa râ i roto i te faaipoiporaa, o te hau ïa. A rave na i te hiˈoraa o Abigaila, te hoê vahine ati Iseraela, ua faaino ta ˈna tane ia Davida. Noa ˈtu e eita oia e faahapahia no te ohipa maamaa a ta ˈna tane, ua tatarahapa oia. Ua taparu oia e: “E faaore mai oe i te hara a to tavini vahine nei.” Ua pahono Davida ma te faatura ia ˈna, e ua farii oia ma te haehaa e ahiri aita oia, e haamanii oia i te toto hara ore.—Samuela 1, 25:24-28, 32-35.

Oia atoa, te manaˈo nei te hoê vahine kerisetiano o June te iˈoa, e 45 matahiti te maoro to ˈna faaipoiporaahia, e te titau ra te hoê faaipoiporaa e manuïa i te ineineraa e tatarahapa na mua. Te na ô ra oia e: “Te parau nei au ia ˈu iho e mea faufaa aˈe to mâua faaipoiporaa i to ˈu mau manaˈo hohonu ei taata. Ia tatarahapa anaˈe au, te manaˈo nei au e te turu nei au i te manuïaraa o to ˈu faaipoiporaa.” Te na ô nei te hoê tane ruhiruhia ra o Jim te iˈoa e: “Te tatarahapa nei au i ta ˈu vahine no te mau mea haihai atoa. Mai to ˈna tâpûraahia, e hepohepo oioi noa oia. E tauahi noa vau ia ˈna e e na ô vau e, ‘E ta ˈu here iti, eiaha e inoino mai. Aita vau i hinaaro e haamauiui ia oe.’ Mai te hoê raau tupu ia pîpîhia i te pape, e oraora oioi noa mai oia.”

Mai te peu e ua haamauiui tatou i te taata here-roa ˈˈe-hia e tatou, e tano maitai te tatarahapa-oioi-raa. Te farii nei o Milagros ma te aau rotahi, i to ˈna na ôraa e: “Ua faaruru vau i te ereraa i te tiaturi, e e mauiui au ia parau mai ta ˈu tane i te mau parau iria. Ia tatarahapa râ oia, e maitai oioi au i muri iho.” Te na ô maira te mau Papai ma te tano maitai e: “E au te parau maitai i te topata rii meli ra; e momona i te taata nei, e ora hoi to te ivi.”—Maseli 16:24.

A faatupu i te huru aravihi e tatarahapa

Mai te peu e te faatupu ra tatou i te tatarahapa ia titauhia, e ite paha tatou e e farii maitai mai te taata. E peneiaˈe e tatarahapa atoa ratou. Ia manaˈo anaˈe tatou e ua haamauiui tatou i te hoê taata, no te aha e ore ai e faariro ei peu e tatarahapa maoti i te ape roa i te farii i te hape? Te manaˈo nei te ao nei e e tapao paruparu te tatarahaparaa, te haapapu mau râ te reira e e taata paari te Kerisetiano. Parau mau, eita tatou e hinaaro e riro mai te feia e farii ra i te tahi mau hape, e faaiti nei râ i ta ratou hopoia. Ei hiˈoraa, ua parau aˈena anei outou e eiaha e inoino mai ma te aau rotahi ore? Ia tae mai tatou na muri aˈe i te hora e ia tatarahapa tatou, te hinaaro mau ra anei tatou e haamaitai ia tae mai tatou i te hora?

No reira, e tia mau anei ia tatou ia tatarahapa? E. Na tatou tera hopoia e na vetahi ê. E nehenehe te tatarahaparaa e haamama i te mauiui i faatupuhia no te huru tia ore, e e nehenehe ta te reira e faaora i te mau taairaa e fatata ra i te amahamaha. Te tatarahaparaa tatou, e haapiiraa ïa no te haehaa e te faaineine ra te reira ia tatou ia haapao atu â i te mau manaˈo hohonu o vetahi ê. Ei faahopearaa, e riro tatou i mua i te mau hoa faaroo, te mau hoa faaipoipo, e vetahi ê ei feia te tia ia herehia e ta ratou e nehenehe e tiaturi. E fanaˈo tatou i te hau o te feruriraa, e na te Atua ra o Iehova e haamaitai mai ia tatou.

[Nota i raro i te api]

[Hohoˈa i te api 23]

Te faatupu ra te tatarahaparaa rotahi i te here kerisetiano