A tiai ma te faaoromai

E ITE te tiai mamoe o te pii noa e “E luko!,” e aita hoi e luko, e aita ta ˈna pii tamau no te ani i te tauturu e tâuˈahia ra. I teie mahana atoa, aita e rave rahi e tâuˈa ra i te mahana o Iehova e piri maira, no te mea ua faaroo na ratou e rave rahi mau faaararaa o tei riro hoi ei mau faaararaa haavare. Te faaohipa nei te enemi rahi o te Atua, oia hoi o Satani, taua “melahi” haavare “no te maramarama” ra i te mea e e rave rahi roa o te ore e ite maite ra e teihea te faaararaa mau e o te tia ia haapaohia.—Korinetia 2, 11:14.

E mea atâta atoa te hoê huru feruriraa e mauruuru ia ˈna iho, no te feia e tavini ra ia Iehova e tau taime te maoro. No te aha? A hiˈo na i te faaararaa a te aposetolo Petero i te senekele matamua.

A feruri maitai

Te piti o te rata faauruahia a Petero, e faahaamanaˈoraa ïa no te mau Kerisetiano matamua, e no tatou atoa. Ua papai oia e: “E au mau here e, te papai atu nei au i te piti o te episetole ia outou i teie nei; ei faaararaa ˈtu i to outou [“aravihi ia feruri maitai na roto i te hoê faahaamanaˈoraa,” MN].” (Petero 2, 3:1) No te aha hoi o Petero i tapitapi ai? Te haamatara ra o Petero i te vairaa mai o te feia tâhitohito, e te haafifi nei ta ratou tâhitohitoraa i te manaˈo faufaa e e tau ru teie e orahia ra e te mau tavini a te Atua. Teie te taime no te vai ara i te haavarehia e te feia faaooo. No reira o Petero i faaitoito ai i te feia e taio i ta ˈna rata ia ‘[“haamanaˈo,” MN] i te parau i parauhia mai e te mau peropheta moˈa i mutaa ihora.’ (Petero 2, 3:2; Ohipa 3:22, 23) Eaha hoi ta te mau peropheta i parau na?

E rave rahi taime to te mau tavini haapao maitai a te Atua faaiteraa e mea nafea te mau haavaraa a te Atua ia faaore i te ino. Ua faahaamanaˈo o Petero i te feia e taio i ta ˈna rata e ua faaohipa te Atua i te Diluvi i te tau o Noa, ei ravea no te ohipa mai i te îraa te fenua i te ino. Oia mau, ua haamou taua Diluvi rahi ra i te ao o taua tau ra. Tera râ, ua faaora mai te Atua ia Noa e to ˈna utuafare i roto i te hoê araka, e te mau mea ora “e rave rahi te huru ra.” Te haapapu ra te mau aai na te ao nei i te tia-mau-raa o teie aamu a te Bibilia.a—Genese 6:19; Petero 2, 3:5, 6.

Te pii ra o Petero i taua ohiparaa mai a te Atua ra te hoê mea e ‘haamoehia’ e te tahi mau taata. I muri iho, ua vare vetahi ê i te mauruururaa ia ˈna iho a te feia tâhitohito o taua tau ra. Eiaha roa ˈtu râ tatou ia haamoe i ta Iehova i rave aˈena. Te na ô maira o Petero ia tatou e: “Area te raˈi e te fenua e vai nei, te tapeahia nei ïa e taua parau ra no te auahi ia tae i te mahana haavaraa, i te poheraa o te feia paieti ore ra.” (Petero 2, 3:7) Oia mau, e tia i te Atua ia ohipa faahou mai.

E ere te Atua i te mea taere

Ua mairi aˈena e mau tausani tau. No te aha te Atua i tiai maoro roa ˈi no te faatitiaifaro i te mau fifi o te huitaata nei? Te faaite faahou maira o Petero i te tahi atu mea. Te na ô ra oia e: “Eiaha na ia moe ia outou teie nei parau iti, e au mau here e, hoê â hete [“ia Iehova,” MN] te mahana hoê e te matahiti hoê tausani ra; e te matahiti hoê tausani ra, hoê â hete e te mahana hoê.” (Petero 2, 3:8) Mea taa ê to Iehova manaˈo no nia i te tau i to tatou nei. I to te Atua mure ore hiˈoraa, te tau mai te poieteraa o Adamu e tae mai i teie nei, aita ïa i naeahia hoê hebedoma. Tera râ, noa ˈtu eaha to tatou manaˈo no nia i te tau, a mairi noa ˈi te tausani matahiti e te mahana tataitahi, te piri noa ˈtura tatou i te tupuraa o te opuaraa a Iehova.

“Eita roa ˈtu te hoê pani hiˈopoahia e pihaa,” e parau teie o te faaite ra e ia tiai-noa-anaˈe-hia te hoê mea, e au ra e eita oia e tae oioi mai. Teie râ, te titau nei o Petero ia ‘tiai e [ia tapea noa i roto i te feruriraa] ia tae mai taua mahana o [Iehova] ra.’ (Petero 2, 3:12; MN) Nafea tatou e nehenehe ai e faatupu i teie huru feruriraa o te faaara noa maira ia tatou e e fatata te Atua i te ohipa mai?

Mea puai aˈe te ohipa i te parau noa

Te huti ra o Petero i te ara-maite-raa i nia i te mau ohipa. Te faahiti ra oia no nia i “[“te haerea e te mau ohipa moˈa,” MN] e te paieti.” (Petero 2, 3:11) Eaha ïa te auraa?

E rave te tavini mau a te Atua i te hoê ohipa o te auhia mai e Ana. E itehia te faaroo o teie huru taata haamori mau i roto i to ˈna haerea. Na te reira e faataa ê ia ˈna i te feia e parau noa ra e te tiaturi ra ratou i te Atua e i ta ˈna mau parau tǎpǔ. Ua ite paha outou e te faataa ê nei te taviniraa a te mau Ite no Iehova i mua i te taata, ia ratou. Te haere nei ratou i to outou fare no te faaite ia outou i te mau parau tǎpǔ a te Atua i roto i te Bibilia. Te faaite atoa nei râ ratou i to ratou mau tiaturiraa e ta ratou mau haapiiraa i te mau vahi atoa e farerei ai ratou i te taata.

Te Ite o te rohi nei i te faaite i to ˈna faaroo ia vetahi ê, e puai ïa e e paari atu â ta ˈna mau tiaturiraa. E faahohonu te parau i te manaˈo putapû e e faatupu atoa i te oaoa e te mauruuru i roto i te taata. Ia faaite anaˈe tatou i te parau apî maitai o te Basileia o te Atua, te faaoaoa atoa ra ïa tatou ia Iehova. Ua ite tatou e ‘e ere oia i te Atua parau-tia ore, a haamoe ai oia i ta tatou ohipa i rave, e to tatou [“here no,” MN] to ˈna ra iˈoa,’ mai ta Paulo, te hoa o te aposetolo Petero, e parau ra.—Hebera 6:10; Roma 10:9, 10.

Eaha te faahopearaa o teie tapitapiraa no te haaparare i te parau apî maitai o te Basileia i te anotau hopea o teie faanahoraa ino? Tau hanere tausani taata aau haavare ore o te haapii nei i te faatupu i te hoê taairaa piri e o Iehova, no te fanaˈo i to ˈna hamani maitai faito ore e no te ite i te oaoa mau i roto i te tiaturiraa o te ora mure ore i nia i te hoê fenua paradaiso.

Ua ite aˈena

Noa ˈtu e ua ite tatou i roto i te Bibilia e e ohipa mai te Atua ra o Iehova i te taime faataahia e ana, e tia ia tatou ia faaroo i te tahi atu faaararaa ta Petero i horoa. “Ua ite [“aˈena,” MN] na outou i teie nei mau mea, e ara ia outou, ia ore outou ia riro i te haavare a te taata iino ra, e hiˈa ihora outou i to outou itoitoraa na.”—Petero 2, 3:17.

Ua ite papu aˈena o Iehova e e nehenehe vetahi o tei erehia i te faaroo puai, e haaparuparuhia i te mea e au ra e mea taere te Atua i te ohipa mai. Ua ite atoa oia e e nehenehe te mana o te feia paieti ore e faaino i ta ˈna mau tavini mau, aore ra e faaino i ta ratou tiaturiraa e te fatata maira te faaraaraa o te iˈoa o te Atua. Auê ïa te fifi e ia hiˈa i te itoitoraa i teie anotau hopea!

E ere teie te taime no te feaa aore ra no te feaapiti i nia i te mea o ta Iehova e rave. (Hebera 12:1) Teie râ te taime no te mauruuru i ta te faaoromai o Iehova i faatupu—te tiaturiraa e e ora te mau mirioni taata, o te apiti i roto i te feia rahi roa na te mau nunaa atoa, e o te tiai nei i te ora mai i te ati rahi i mua nei. (Apokalupo 7:9, 14) Te aˈo nei o Petero e: “Ia tupu râ to outou i te maitai, e te ite i to tatou Fatu ra i te Ora ia Iesu Mesia. Ei ia ˈna te haamaitai i teie nei, e a muri noa ˈtu.”—Petero 2, 3:18.

“Tamau maite outou i to outou iho here i te Atua”

Ua riro te rohiraa i roto i te pororaa i te Basileia e te haere-tamau-raa i te mau putuputuraa kerisetiano no te haamoriraa e no te haapiiraa i te Parau a te Atua, ei parururaa no tatou. No reira, aita to tatou taime no te tapitapi rahi roa no te mau huru tupuraa ino i roto i teie faanahoraa ino. Eiaha te mǎtaˈu e te haapeapearaa ia tupu rahi mai i roto i te oraraa o te mau Kerisetiano mau. (Korinetia 1, 15:58) Rahi noa ˈtu â tatou i te tavini ia Iehova, oioi noa ˈtu â te taime i te mairi.

Teie te aˈoraa ta Iuda, hoê â to raua Petero tau e e taeae atoa hoi no Iesu, e horoa maira na tatou: “[O] outou, e au mau here e, i te [paturaa] ia outou iho [i nia] i to outou faaroo moˈa rahi ra, e te pureraa ma te [varua moˈa], tamau maite outou i to outou iho [here] i te Atua, i te tiairaa i te aroha o to tatou Fatu ra o Iesu Mesia, e tae noa ˈtu i te ora mure ore ra.” (Iuda 20, 21; MN) A tapao na i te faufaaraa o te hoê haerea maitai e faatupuhia e te pure tuutuu ore. (Tesalonia 1, 5:17) Te na ô faahou ra o Iuda e: “E aroha ˈtu i te tahi pae, ei haapaoraa ê ïa; e e faaora ˈtu hoi i te tahi pae ma te mǎtaˈu, i te haruraa ia ratou no roto i te auahi; i te atâtaraa ˈtu i te ahu i poraorao i te iino ra.” (Iuda 22, 23) Auê te faufaa rahi ia haapaari te tahi i te tahi i teie anotau fifi! E auê te faufaa atoa ia ore ia topa i roto i te marei, ma te faariro i teie “mahana faaoraraa” maoro ei otoheraa no te “taiataraa,” o te tupu rahi nei hoi i teie nei i roto i teie ao ino i te pae morare.—Iuda 4; Korinetia 2, 6:1, 2.

Na roto i te peeraa i te aˈoraa î i te here a Petero, a Paulo, e a Iuda e na roto i te rohiraa ma te itoito i roto i te taviniraa a te Atua, e nehenehe outou e tiai ma te faaoromai ia ohipa mai o Iehova. E na reira anei râ outou?

Eiaha e haamarirau i te ani atu i te mau Ite o to outou vahi, i te tauturu no te haapaari i to outou faaroo i roto i te parau tǎpǔ o te ora mure ore a te Atua. A haapii e eaha te titauhia no te apiti i roto i teie ohipa faaiteraa rahi o te ore e tapiti-faahou-hia, o te hope ia tupu te ati rahi e piri maira. (Mareko 13:10) E noaa ïa ia outou te tiaturiraa e ora i roto i te ao apî o te parau-tia ta Iehova i tǎpǔ mai. (Petero 2, 3:13) A haapao i ta ˈna mau faahaamanaˈoraa! A tiai ma te faaoromai! A rohi!

[Nota i raro i te api]

[Hohoˈa i te api 7]

A haapii i teie nei i te parau tǎpǔ o te Paradaiso a te Atua

[Faaiteraa i te fatu o te hohoˈa i te api 5]

Luko: Animals/Jim Harter/Dover Publications, Inc.; tiai mamoe apî: Children: A Pictorial Archive from Nineteenth-Century Sources/Grafton/Dover Publications, Inc.