‘Mea na reira te Atua i te hereraa mai ia tatou’
“I na reira te Atua i te [hereraa] mai ia tatou nei, ia [here] atoa tatou ia tatou iho e tia ˈi.”—IOANE 1, 4:11.
1. I te 23 no Mati i muri aˈe i te toparaa mahana, no te aha te mau mirioni taata e putuputu ai i roto i te mau Piha no te Basileia e vetahi atu mau vahi rururaa na te ao nei?
I TE Sabati 23 no Mati 1997, i muri aˈe i te toparaa mahana, eita e ore e, e hau atu i te 13 000 000 taata na te ao nei, o te putuputu atu i roto i te mau Piha no te Basileia e te tahi atu mau vahi rururaa e faaohipahia ˈtu e te mau Ite no Iehova. No te aha? No te mea ua putapû to ratou mafatu i te tapao rahi roa ˈˈe o te here o te Atua i te huitaata nei. Ua huti o Iesu Mesia i te ara-maite-raa i nia i taua tapao faahiahia mau ra o te here o te Atua, ia ˈna i parau e: “I [here] mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.”—Ioane 3:16.
2. Eaha te mau uiraa e tano ia tatou pauroa ia aniani no nia i to tatou huru fariiraa i te here o te Atua?
2 A tuatapapa ˈi tatou i te here o ta te Atua i faaite mai, e tano ia aniani tatou ia tatou iho e, ‘Te mauruuru mau ra anei au i te mea o ta te Atua i rave? Te faaite ra anei ta ˈu huru faaohiparaa i to ˈu oraraa i to ˈu mauruuru?’
‘E here te Atua’
3. (a) No te aha e ere i te mea maere ia faaite te Atua i te here? (b) Nafea te puai e te paari e itehia ˈi i roto i te mau mea o ta ˈna i poiete?
3 E ere i te mea maere ia faaite te Atua i te here, no te mea “e [here] hoi te Atua.” (Ioane 1, 4:8) O te here to ˈna huru matamua roa. I to ˈna faaineineraa i te fenua ei nohoraa no te taata, to ˈna haamaraaraa mai i te mau mouˈa e to ˈna haaputuputuraa i te pape i roto i te mau roto e te mau moana, e mau faaiteraa faahiahia anaˈe ïa te reira no to ˈna puai. (Genese 1:9, 10) I to te Atua faanahoraa i te tereraa o te pape e te tereraa o te mataˈi ora, i to ˈna faaohiparaa i te rahiraa o te mau mea ora huˈa roa e te mau raau huru rau atoa, no te faataui i te mau mea rii tumu o te fenua nei ei maa na te taata ia nehenehe ratou e ora, i to ˈna faatanoraa i te mau uati natura e vai nei i roto i to tatou tino, ia au i te roaraa o te mau mahana e te mau avaˈe i nia i te palaneta ra Fenua, ua faaite ïa teie mau mea atoa i to ˈna paari rahi. (Salamo 104:24; Ieremia 10:12) Te mea hau atu râ i te faahiahia i roto i te poieteraa materia, o te tapao ïa no te here o te Atua.
4. I roto i te poieteraa materia, eaha te tapao no te here o te Atua o ta tatou paatoa e ite nei e e oaoa nei?
4 Na roto i to tatou vaha, e taa ia tatou te here o te Atua, ia amu anaˈe tatou i te hoê maa hotu monamona tei para maitai, aita noa hoi te reira i hamanihia ei maa na tatou, ei faaoaoaraa atoa râ ia tatou. Te ite nei to tatou mau mata ma te feaa ore i te tapao no to ˈna here, ia mataitai tatou i te mau toparaa mahana nehenehe mau, te raˈi tei î i te fetia i te po, te mau tiare ua rau te huru to ratou hohoˈa e to ratou peni unauna, te hautiraa a te mau animala iti, e te mata ataata o to tatou mau hoa. Na roto i to tatou ihu, e papu ia tatou i teie here, ia hâuˈa tatou i te noanoa o te mau tiare. Na roto atoa i to tatou tariˈa, ia faaroo anaˈe tatou i te ahehe o te hoê toparaa pape, te taˈi o te manu, e te reo o te feia i herehia e tatou. E papu atoa ia tatou te reira, ia tauahi anaˈe mai te hoê taata herehia ia tatou. E nehenehe ta vetahi mau animala e ite, e faaroo, aore ra e hâuˈa i te tahi mau mea ta te taata e ore e nehenehe. Tera râ, e nehenehe ta te taata, tei hamanihia hoi ia au i te hohoˈa o te Atua, e ite i te here o te Atua, na roto i te hoê ravea o te ore e naeahia e te animala.—Genese 1:27.
5. Mea nafea to Iehova faaiteraa i te here rahi i nia ia Adamu raua o Eva?
5 I to te Atua ra o Iehova poieteraa i na taata matamua, o Adamu raua o Eva, ua haaati oia ia raua i te mau tapao no to ˈna here. Ua tanu hoi oia i te hoê ô, te hoê paradaiso, e ua tuu oia i roto, i te mau huru tumu raau atoa. Ua horoa maira oia i te tahora pape ia pîpîhia teie ô e ua faaî oia i teie vahi i te mau manu e te mau animala haviti mau. E ua pûpû oia i teie mau mea atoa na Adamu raua o Eva ei nohoraa no raua. (Genese 2:8-10, 19) Ua faariro o Iehova ia raua ei tamarii na ˈna, ei mau melo no to ˈna utuafare fetii na te ao atoa nei. (Luka 3:38) Ma te horoa mai i te ô i Edene ra ei hiˈoraa, ua faanaho te Metua i te raˈi ra o te tane e te vahine matamua, i te hoê hopoia anaanatae mau na raua, oia hoi te haaparareraa i te Paradaiso e ati aˈe te palaneta. E î hoi te fenua taatoa i ta raua huaai.—Genese 1:28.
6. (a) Eaha to outou manaˈo no nia i te haerea faaroo ore o Adamu raua o Eva? (b) Na te aha e faaite e ua huti mai tatou i te haapiiraa na roto i te ohipa i tupu i Edene ra, e ua faufaahia tatou i taua ite ra?
6 Aita râ i maoro i muri iho, ua tamatahia te auraro, te taiva ore o Adamu raua o Eva. Aita o Eva na mua, e i muri iho, o Adamu, i faaite i to raua mauruuru no te here o tei niniihia mai i nia ia raua. E ohipa hairiiri mau ta raua i rave. Aita e parau no te faatia i to raua haerea! Ua erehia ˈtura raua i to raua mau taairaa e te Atua, ua tiavaruhia raua i rapae i to ˈna utuafare fetii, e ua tiahihia ˈtura raua i rapae i te ô i Edene. E te ite noa nei â tatou i teie mahana i te mau faahopearaa o ta raua hara. (Genese 2:16, 17; 3:1-6, 16-19, 24; Roma 5:12) Ua huti mai râ anei tatou i te haapiiraa na roto i te ohipa i tupu? Eaha to tatou iho huru i mua i te here o te Atua? Te faaite ra anei te mau faaotiraa o ta tatou e rave nei i te mau mahana atoa, e te mauruuru nei tatou i to ˈna here?—Ioane 1, 5:3.
7. Noa ˈtu te ohipa o ta Adamu raua o Eva i rave, nafea to Iehova faaiteraa i to ˈna here i nia i ta raua huaai?
7 Noa ˈtu te mauruuru ore rahi ta to tatou na metua matamua i faaite, no te mau mea atoa ta te Atua i rave no raua, aita te Atua i haapae i to ˈna iho here. No to ˈna aroha i te mau taata o tei ore i fanauhia ˈtura—o tatou atoa hoi e ora nei i teie mahana—ua faatia te Atua e ia fanau o Adamu raua o Eva i te tamarii hou raua a pohe ai. (Genese 5:1-5; Mataio 5:44, 45) Ahiri aita, eita ïa hoê aˈe o tatou nei e fanauhia mai. Na roto i te faaite-mǎrû-noa-raa mai i to ˈna hinaaro, ua horoa atoa mai o Iehova i te hoê niu, ia noaa te tiaturiraa no te mau tamarii atoa a Adamu o te faatupu i te faaroo. (Genese 3:15; 22:18; Isaia 9:6, 7) Ua rave atoa oia i te faanahoraa ia nehenehe te mau taata no te mau nunaa atoa, e fanaˈo faahou i te mea i erehia e Adamu, oia hoi, te oraraa tia roa ei mau melo fariihia o te utuafare fetii a te Atua na te ao atoa nei. Ua na reira oia na roto i te pûpûraa mai i te hoê hoo.
No te aha te hoê hoo?
8. No te aha eita ta te Atua e nehenehe noa e faaoti e, noa ˈtu e e tia ia Adamu raua o Eva ia pohe, eita roa hoê o ta raua mau tamarii auraro e pohe?
8 Ua titau-mau-hia anei ia aufauhia te hoê hoo, oia hoi te ora o te hoê taata? Eita anei ta te Atua e nehenehe noa e faaoti, noa ˈtu e e tia ia Adamu raua o Eva ia pohe no to raua faaroo ore, ia nehenehe râ ta raua mau tamarii atoa, o te auraro i te Atua, e ora e a muri noa ˈtu? Ia au i te hoê hiˈoraa taata taotiahia, peneiaˈe e mea tano te reira. Teie râ, “te here nei [Iehova] i te titiaifaro e te parau-tia.” (Salamo 33:5, MN) I muri aˈe i to Adamu raua Eva hararaa, to raua fanauraa mai i te tamarii; no reira, aita hoê aˈe o ta raua mau tamarii i fanauhia mai, e taata tia. (Salamo 51:5) Ua roo-paatoa-hia ratou i te hara, e te utua o te hara ra, o te pohe ïa. Ahiri e aita o Iehova i tâuˈa i te reira, eaha ïa huru hiˈoraa o ta ˈna e horoa ra i mua i te mau melo o to ˈna utuafare fetii na te ao atoa nei? Aita oia i nehenehe e ofati i ta ˈna iho mau faatureraa tia. Ua faatura oia i te mau titauraa no te parau-tia. Aita hoê aˈe taata e nehenehe e faahapa noa ˈtu i te huru raveraa a te Atua no te faatitiaifaro i teie mau ohipa.—Roma 3:21-23.
9. Ia au i te ture a te Atua no nia i te parau-tia, eaha te huru hoo i titauhia?
9 Nafea ïa e noaa mai ai te hoê niu tano maitai, no te faaoraraa i te mau tamarii a Adamu e faaite i to ratou auraro î i te here ia Iehova? Mai te peu e e pohe te hoê taata tia ei tusia, i reira ïa te parau-tia e faatia ˈi, ia tapoˈi te faufaa o taua ora tia ra i te mau hara a te feia e farii i te hoo ma te faaroo. I te mea e, no te hara a te hoê taata, o Adamu, oia te tumu i hara ˈi te fetii taata taatoa, na te toto e haamaniihia o te tahi atu taata tia, tei tuea te faufaa, e faafaito faahou i te parau-tia. (Timoteo 1, 2:5, 6) Ihea râ e itehia mai ai teie taata?
Eaha te rahi o te haapaeraa?
10. No te aha aita te huaai a Adamu i nehenehe e horoa mai i te hoo i hinaarohia?
10 I rotopu i te mau tamarii a te taata hara ra o Adamu, aita hoê aˈe e nehenehe e horoa i tei titauhia no te hoo faahou mai i te oraraa no a muri aˈe i erehia e Adamu. “E ore roa e tia i te taata ia faaora i tana taeae, e aita a ˈna hoo ia hopoi i te Atua e noaa mai ai oia ra: (i te rahi hoi o te hoo ia ˈna e ora ˈi, e ore roa ˈtu ïa e taea:) ia ora noa mai â oia e a muri noa ˈtu, e eiaha roa ia tae i te tahuti.” (Salamo 49:7-9) Taa ê atu i te vaiiho noa i te huitaata e aita e tiaturiraa, ma te hamani maitai, ua horoa mai o Iehova iho i te ravea.
11. Mea na roto i teihea ravea to Iehova horoaraa mai i te ora taata tia i hinaarohia ei hoo tano maitai?
11 Aita o Iehova i tono mai i te hoê melahi i nia i te fenua nei, o te faahua pohe na roto i te faatusiaraa i to ˈna tino materia a ora noa ˈi oia ei varua. Area ra, na roto i te hoê semeio o ta te Atua anaˈe, te Poiete, i nehenehe e opua, ua rave mai oia i te puai ora e te ihotaata o te hoê tamaiti i nia i te raˈi, e ua tuu atu i roto i te opu o te hoê vahine, o Maria te tamahine a Heli, no roto i te opu fetii o Iuda. Na te puai ohipa o te Atua, to ˈna varua moˈa, i paruru i te tupuraa o te aiû iti i roto i te opu o to ˈna mama, e ua fanauhia mai oia ei taata tia. (Luka 1:35; Petero 1, 2:22) Tei teie taata ˈtura ïa te faufaa e hinaarohia ra ei hoo, o te tuea maitai i te mau titauraa no te parau-tia a te Atua.—Hebera 10:5.
12. (a) I roto i teihea auraa o Iesu e parauhia ˈi te “Tamaiti fanau tahi” a te Atua? (b) Mea nafea te tonoraa te Atua i teie Tamaiti no te pûpû i te hoo, i te haapapuraa i To ˈna here no tatou?
12 O vai i rotopu i ta ˈna mau muriadi tamaiti i nia i te raˈi, ta Iehova i maiti no teie hopoia? O tei parauhia ra ïa i roto i te mau Papai, “ta ˈna Tamaiti fanau tahi.” (Ioane 1, 4:9) E tano ia faaohipahia teie pereota no te faataa, eiaha i to ˈna tiaraa i to ˈna fanauraahia mai ei taata, i to ˈna râ tiaraa na mua ˈtu, a vai ai oia i nia i te mau raˈi. O ˈna anaˈe ta Iehova iho i poiete ma te ore i apitihia mai e vetahi ê. Oia te Matahiapo o te poieteraa atoa. O ˈna ta te Atua i faaohipa no te hamani i te taatoaraa o te mau poieteraa ê atu. E mau tamaiti te mau melahi na te Atua, mai ia Adamu atoa i riro ei tamaiti na te Atua. Tera râ, te parauhia ra e “te hanahana [o Iesu,] e au [ïa] i te Tamaiti fanau tahi a te Metua ra.” E te na ôhia ra e, tei nia oia “i te ouma o te Metua.” (Ioane 1:14, 18) To ˈna taairaa e te Metua, e taairaa piri roa ïa, te omoe, e te aroha. Hoê â to ˈna here i te huitaata nei e to to ˈna Metua. Te faaite ra te Maseli 8:30, 31 (MN) i te huru o te Metua i nia i ta ˈna Tamaiti, e te huru o te Tamaiti i nia i te huitaata nei: “O vau atura ta ˈna [Iehova] i poihere taa ê i tera mahana e tera mahana, ua oaoa noa hoi au i mua ia ˈna i te mau taime atoa, . . . e te mau mea o ta ˈu [o Iesu, te Rave ohipa Matamua a Iehova, te faataiperaa o te paari] i poihere ra, tei te mau tamaiti a te taata nei ïa.” O teie Tamaiti here-roa-hia, ta te Atua i tono mai i nia i te fenua nei no te pûpû i te hoo. E mau parau faufaa rahi ïa teie ta Iesu i faahiti: “I [here] mai te Atua i to te ao, e ua tae roa i te horoa mai i ta ˈna Tamaiti fanau tahi”!—Ioane 3:16.
13, 14. E tauturu te aamu Bibilia no nia i to Aberahama tamataraa i te pûpû ia Isaaka, ia tatou ia papu i te aha, no nia i te ohipa i ravehia e Iehova? (Ioane 1, 4:10)
13 No te tauturu ia tatou ia papu rii i te auraa o taua ohipa ra, i mutaa ihora, hou o Iesu i haere mai ai i nia i te fenua nei, ua faaue te Atua ia Aberahama, tau 3 890 matahiti i teie nei, e: “A rave i to tamaiti i tena na, i to tamaiti hoê ra ia Isaaka, ta oe e here na, a haere ai i te fenua ra o Moria, pûpû mai ai ia ˈna i reira ei tusia taauahi i nia i te hoê mouˈa na ˈu e faaite atu ia oe.” (Genese 22:1, 2) Ua auraro o Aberahama ma te faaroo. A feruri na e o outou aˈe o Aberahama. O ta outou ïa tamaiti, te tamaiti otahi o ta outou i poihere rahi. Eaha to outou manaˈo, a tâpû ai outou i te vahie no te tusia taauahi, a ratere ai outou e rave rahi mahana te maoro i te fenua ra o Moria, e a faatarava ˈi outou i ta outou tamaiti i nia i te fata?
14 No te aha te hoê metua aroha e putapû ai mai teie te huru? Te na ô ra te Genese 1:27 e ua poiete te Atua i te taata ma To ˈna iho hohoˈa. Te faahohoˈa ra ïa to tatou here e to tatou aroha i roto i te tahi faito, i to Iehova iho here e to ˈna iho aroha. No Aberahama, ua tapea te Atua ia ˈna, ia ore o Isaaka ia faatusiahia. (Genese 22:12, 13; Hebera 11:17-19) Area no ˈna ra, aita o Iehova i faaore i te pûpûraa i te hoo, noa ˈtu e ua riro te reira ei haapaeraa rahi no ˈna iho e no ta ˈna Tamaiti. Teie ohipa i ravehia, e ere ïa no te mea e hopoia faahepohia te reira i te Atua, e tapao râ no to ˈna hamani maitai faito ore. Te mauruuru mau ra anei tatou i te reira?—Hebera 2:9.
Eaha ta te hoo e faatupu
15. Mea nafea te hoo i te ohiparaa i nia i te oraraa o vetahi pae, i roto atoa i teie faanahoraa o te mau mea?
15 E ohipa teie ravea î i te here ta te Atua i pûpû, ma te hohonu i nia i te oraraa o te feia o te farii i te reira ma te faaroo. Ua atea ê ratou i te Atua i mutaa ihora, no to ratou tiaraa hara. Ua riro hoi ratou, mai ta ta ˈna Parau e faahiti ra, ‘ei enemi i to ratou aau i te mau ohipa iino ra.’ (Kolosa 1:21-23) Ua ‘faafaitehia râ ratou i te Atua i te pohe o ta ˈna Tamaiti.’ (Roma 5:8-10) I te mea e ua taui ratou i to ratou huru oraraa e ua farii ratou i te faaoreraa hapa ta te Atua i haafanaˈo i te feia e faatupu i te faaroo i roto i te tusia o te Mesia, ua noaa ia ratou te hoê haava manaˈo mâ.—Hebera 9:14; Petero 1, 3:21.
16. Eaha te mau haamaitairaa i fanaˈohia e te nǎnǎ iti, no to ratou faaroo i roto i te hoo?
16 Ua faatae Iehova na te hoê numera taotiahia o teie mau taata, oia hoi te hoê nǎnǎ iti, i te maitai faito ore ia tahoê atu e ta ˈna Tamaiti i roto i te Basileia i nia i te raˈi, ma te tapao ra e faatupu i te opuaraa matamua a te Atua no te fenua nei. (Luka 12:32) No roto mai ratou ‘i te mau opu, e te mau reo, e te mau nunaa, e te mau fenua atoa, . . . e e riro ratou ei hui arii, e ei tahuˈa na to tatou Atua, e e riro ia ratou te hau i teie nei ao.’ (Apokalupo 5:9, 10) Ua papai atu te aposetolo Paulo i teie feia e: “O te [v]arua faatamarii râ tei noaa ia outou, i parau ai hoi tatou, E Aba, e tau Metua. O te [v]arua iho hoi, e to tatou atoa nei varua, o tei faaite ïa e, e tamarii tatou na te Atua. E tamarii ra, e feia tufaa ïa; e feia tufaa i te Atua ra, e feia tufaa tatou e te Mesia.” (Roma 8:15-17) Ia faatavaihia ratou e te Atua ei mau tamarii na ˈna, e fanaˈo ratou i te mau taairaa here i erehia e Adamu; e fanaˈo atu â râ teie mau tamaiti i te mau hopoia ê atu o te taviniraa i nia i te raˈi—aita ïa te reira i noaa ia Adamu. Eita ïa e maerehia ia parau te aposetolo Ioane e: “A hiˈo na i te huru o to te Metua [here] ia tatou nei, o tatou i mairihia mai e, e tamarii na te Atua”! (Ioane 1, 3:1) Te faaite nei te Atua i nia i teie feia, eiaha noa te here ia au i te mau faaueraa tumu (a·gaʹpe), te aroha hohonu (phi·liʹa) atoa râ, e huru auraa taa ê e vai ra i rotopu i te mau hoa mau.—Ioane 16:27.
17. (a) Eaha te ravea e vai ra i mua i te feia atoa e faatupu i te faaroo i roto i te hoo? (b) Eaha te auraa o “te tiamâ maitai o te tamarii a te Atua ra” no ratou?
17 Te tuu atoa nei Iehova i mua i vetahi atu feia—ratou atoa e faatupu i te faaroo i roto i te faanahoraa hamani maitai a te Atua no te ora na roto ia Iesu Mesia—i te ravea e fanaˈo ai i te mau taairaa faufaa roa i erehia e Adamu. Ua faataa te aposetolo Paulo e: “Te hinaaro rahi o te mau mea hamanihia nei [te poieteraa taata no roto mai ia Adamu ra] ma te faaoao, te tiai nei ïa i te faaiteraahia mai o te tamarii a te Atua [oia hoi, te tiai nei ratou i te taime i reira e ite-papu-hia ˈi e, te rave ra te mau tamaiti a te Atua tei riro ei feia tufaa e te Mesia i roto i te Basileia o te raˈi, i te ohipa no te haamaitai i te huitaata nei]. Ua faarirohia hoi te mau mea hamanihia nei ei mea faufaa ore noa [ua fanauhia hoi ratou i roto i te hara ma te pohe i mua ia ratou, e aita e ravea ia nehenehe ratou e faatiamâ ia ratou iho], e ere ra i te mea hinaaro, na ˈna râ na tei faariro ei mea faufaa ore noa ma te tiai [i horoahia mai e te Atua], e faaorahia hoi te mau mea hamanihia nei i te tapea ra o te pohe, ia noaa te tiamâ maitai o te tamarii a te Atua ra.” (Roma 8:19-21) Eaha te auraa o teie tiamâraa? Ua faatiamâhia ïa ratou i te faatîtîraa a te hara e te pohe. E noaa ia ratou te huru taata tia i te pae feruriraa e i te pae tino, te Paradaiso ei vahi faaearaa no ratou, e te ora mure ore no te fanaˈo i to ratou huru taata tia e e faaite i to ratou mauruuru ia Iehova, te Atua mau hoê ra. E nafea teie mau mea atoa e tupu ai? Na roto ïa i te tusia o te hoo a te Tamaiti fanau tahi a te Atua.
18. Eaha ta tatou e rave i te 23 no Mati i muri aˈe i te toparaa mahana, e no te aha?
18 I te 14 no Nisana 33 o to tatou tau, i roto i te hoê piha teitei i Ierusalema, ua haamau o Iesu i te oroa Haamanaˈoraa o to ˈna pohe. Ua riro te haamanaˈoraa i to ˈna pohe i te mau matahiti atoa, ei oroa faufaa roa i roto i te oraraa o te mau Kerisetiano mau atoa. Na Iesu iho i horoa i teie faaueraa: “E na reira outou ei manaˈoraa ia ˈu.” (Luka 22:19) I te matahiti 1997, e faatupuhia te oroa Haamanaˈoraa i muri aˈe i te toparaa mahana i te 23 no Mati (te haamataraa ïa o te 14 no Nisana). I taua mahana ra, aita ˈtu ohipa faufaa aˈe maoti râ te taeraa mai ïa i teie oroa Haamanaˈoraa.
Nafea outou ia pahono mai?
◻ Na roto i teihea mau ravea to te Atua faaiteraa i to ˈna here rahi i te huitaata nei?
◻ No te aha te hoê ora taata tia i hinaarohia ˈi no te hoo mai i te huaai a Adamu?
◻ Eaha te haapaeraa rahi ta Iehova i rave no te horoa mai i te hoo?
◻ Eaha ta te hoo e faatupu?
[Hohoˈa i te api 10]
Ua horoa mai te Atua i ta ˈna Tamaiti fanau tahi