Na tapao rahi roa ˈˈe no te aroha tei ore i iteahia aˈenei
“I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, (...) te faaroo ia ˈna ra, ia roaa râ te ora mure ore.” — IOANE 3:16.
1. Eaha ta Ioane e hinaaro ra e parau na roto i teie nei mau parau: “E aroha te Atua”?
“E aroha hoi te Atua.” Ta te aposetolo Ioane ïa i parau e piti taime (Ioane 1, 4:8, 16). Oia mau, e taa ê te aroha o Iehova i to ˈna paari, ta ˈna parau-tia e to ˈna puai; no te mea E aroha oia. Inaha, o te huru mau hoi oia no te aroha. E riro paha outou i te aniani e: ‘Ua ite anei au e no te aha e aroha o te Atua? E nehenehe anei ta ˈu e faataa maramarama ˈtu i te reira i te hoê taata ma te horoa ˈtu i te tahi mau tapao, te tahi mau hiˈoraa? Eaha ta te reira e faatupu i nia i to ˈu oraraa e i nia i ta ˈu mau ohipa?’
2. Eaha ïa te mau tapao iteahia ta te Atua i horoa mai ei faaiteraa i to ˈna aroha?
2 Ua faaite te Atua ra o Iehova i to ˈna aroha rahi i nia i te mau taata ta ˈna i poiete. A feruri na te nehenehe o to tatou mata e te ohipa ta raua e rave, i to tatou mau ivi paari maitai, i te puai o to tatou mau iˈo amui, i te mau ravea e nehenehe ai tatou e tapea. Mea tano mau â ia rave tatou i teie mau parau a te papai salamo, no tatou iho: “E haamaitai au ia oe, ua taa ê hoi to ˈu hamaniraahia.” A hiˈo atoa na i te mau mouˈa nehenehe mau, te mau taheraa pape mǎrû e na reira mai hoi te pape mâ maitai i te tahe mai, te mau aua tei î i te tiare, te mau toparaa mahana nehenehe mau. “Eita te huru rau o ta oe ra ohipa, e Iehova! E mau ravea paari anaˈe â ta oe! Ua î te fenua nei i ta oe ra taoˈa.” — Salamo 139:14; 104:24.
3, 4. Eaha te mau tapao o te aroha o te Atua ta te mau Papai hebera e horoa maira?
3 Aita te Atua i faaea i te faaite i to ˈna aroha noa ˈtu e ua fariu ê na taata matamua ia ˈna. Ei hiˈoraa, ua vaiiho oia ia raua ia fanau mai i te hoê huaai o te nehenehe hoi e fanaˈo i te mau faanahoraa ta ˈna e rave na roto i te arai o ta ˈna “huaai” i tapuhia maira. Tera mau te hoê tapao no te aroha (Genese 3:15). I muri aˈe, ua rave aˈera oia e ia faaineine o Noa i te hoê araka ia ora mai te huitaata, e tae noa ˈtu te tahi atu mau mea ora atoa ta ˈna i poiete (Genese 6:13-21). E i muri iho, ua faaite oia i to ˈna aroha rahi i nia ia Aberahama, o tei parau-atoa-hia te taua o Iehova (Genese 18:19; Isaia 41:8). Ua faaite faahou te Atua i to ˈna aroha na roto i te faaoraraa i te mau huaai a Aberahama mai roto mai i to ratou vai-tîtî-raa i Aiphiti. Teie ta tatou e taio i roto i te Deuteronomi 7:8: “No te mea râ, hinaaro [aroha] aˈera Iehova ia outou (...) i aratai mai ai Iehova ia outou ma te rima puai.”
4 Noa ˈtu â ïa e ua tamau noâ te mau ati Iseraela i roto i to ratou mauruuru ore e to ratou auraro ore, aita Iehova i faarue ia ratou i te reira iho taime. Ua aˈo aˈera râ oia ia ratou ma te parau atu i te mau parau tei î i te aroha: “E fariu mai outou i ta outou mau parau ino ra, eaha hoi outou i hinaaro ai i te pohe, e te utuafare o Iseraela e?” (Ezekiela 33:11). Teie râ, noa ˈtu e o Iehova te huru iho o te aroha, e Atua parau-tia atoa oia e te paari. I te hoê taime, ua taeahia i te nunaa auraro ore i te otia o to ˈna faaoromai. No te rahi te hape ta te mau Iseraela i rave ‘e aita roa ˈˈera e haapuraa’; no reira ua faatia aˈera oia e ia hopoi-tîtî-hia ratou i Babulonia (Paraleipomeno 2, 36:15, 16). I reira atoa, aita te aroha o te Atua i ore roa; ua haapao oia e ia hoˈi te hoê toea i te fenua tupuna e hitu ahuru matahiti i muri aˈe. Ia taio outou i te Salamo 126, e ite ïa outou eaha te mau manaˈo hohonu o te mau melo o taua toea ra.
Te faaineineraa Iehova ia ˈna no te horoa i te tapao rahi roa ˈˈe o te aroha
5. No te aha e nehenehe ai e parau e ua faaite mai te Atua i te tapao o to ˈna aroha i te tonoraa mai oia i ta ˈna Tamaiti i nia i te fenua nei?
5 I muri aˈe, i roto i te Tuatapaparaa, ua tae aˈera i te taime e horoa ˈi Iehova i te tapao rahi roa ˈˈe o to ˈna aroha, te hoê aroha e haapapu-mau-hia e te manaˈo horoa noa. Ua faaineine aˈera te Atua i taua ohipa ra ma te rave e ia tuuhia mai nia mai i te raˈi te ora o ta ˈna Tamaiti fanau tahi i roto i te opu o te paretenia ati iuda ra o Maria (Mataio 1:20-23; Luka 1:26-35). A feruri na i te taairaa fatata roa e taati ra ia Iehova e ta ˈna Tamaiti e hia ˈtura maororaa. Teie te parauhia ra no nia i te oraraa o Iesu hou oia e riro mai ai ei taata, tei faataa-taipe-hia mai mai te huru iho o te paari: “Tei pihai iho hoi au ia ˈna [i te Atua] i reira mai te [hoê rave ohipa aravihi mau]; e te oaoa noa ra vau i te mau mahana atoa ra, i te oaoa tamau-maite-raa i mua i tana aro.” (Maseli 8:30, 31). No reira, i to outou manaˈoraa, i te mea hoi e e tia ia ˈna ia faataa ê ia ˈna i Ta ˈna Tamaiti fanau tahi, e ere anei ïa te reira i te hoê haapaeraa na Iehova?
6. Eaha te anaanatae, ta tatou e nehenehe e manaˈo e ua ite o Iehova, mai te itehia e te hoê metua tane here mau, no nia i te tuhaa matamua o te oraraa o Iesu?
6 Eita e ore e ua hiˈopoa Iehova ma te anaanatae mau i te tupuraa o ta ˈna Tamaiti mai to ˈna mai â haamataraa i roto i te tino taata. Ua paruru te varua moˈa o te Atua ia Maria ia ore te hoê noa ˈˈe mea ia haafifi mai i te tupuraa o te aiû. Ua haapao o Iehova e ia haere atu o Iosepha raua o Maria i Betelehema no te tapaopaoraa iˈoa, ia fanauhia Iesu i reira e ia faatupu oia te parau tohu a Mika 5:2. Na roto i te arai o te hoê melahi, ua faaara mai te Atua ia Iosepha no nia i te mau hinaaro ino mau o te arii ra o Heroda, oia hoi e haapohe i te aiû; ua horo ê atura Iosepha e to ˈna utuafare i Aiphiti e ua faaea noa ˈtura i reira e pohe atu ai o Heroda (Mataio 2:13-15). I muri iho, ua tamau â te Atua i te haapao mai i te mau ohipa atoa ta Iesu i rave. Auê ïa oaoa i itea e ana a taeahia ˈi o Iesu i te ahuru ma piti o to ˈna matahiti, e a haamaere oia i te mau orometua e te feia atoa i roto i te hiero ra i te mau uiraa e te mau pahonoraa ta ˈna e horoa ˈtu! — Luka 2:42-47.
7. A faaite mai na na faahitiraa e toru e haapapu mai e mai te aha te faufaaraa te taviniraa a Iesu i mua i te aro o te Atua.
7 Ahuru ma vau matahiti i muri iho, ia haere atu Iesu ia Ioane ra no te bapetizo ia ˈna, te hiˈo noa maira Iehova i te reira. I reira, ma te oaoa, to ˈna niniiraa mai i to ˈna varua moˈa i nia ia Iesu, e ua na ô maira e: “Tau Tamaiti aroha teie, ua mauruuru roa vau ia ˈna.” (Mataio 3:17). E nehenehe te taatoaraa o te mau metua tane kerisetiano e taa i te oaoa i itea e te Atua ia ˈna i hiˈopoa maite i te taviniraa a Iesu e ia ˈna i ite mea nafea to ˈna faahoˈi-noa-raa mai i te mau haamaitairaa o ta ˈna mau ohipa i nia i to ˈna Metua i te raˈi ra. I te hoê mahana, ua aratai aˈera Iesu vetahi o ta ˈna mau pǐpǐ i nia i te hoê mouˈa teitei. I reira, ua faahanahana aˈera Iehova i te Mesia i te hoê hanahana tei hau ê i te natura taata nei. Teie ta te Metua e parau ra: “O tau Tamaiti here teie, ua mauruuru roa vau ia ˈna; a faaroo ia ˈna.” (Mataio 17:5). Ua faaroo-faahou-hia ˈˈera te reo o Iehova, te toruraa ïa o te taime, a pure ai Iesu ia ˈna ia faahanahana oia i To ˈna iˈoa. Ua pahono maira Iehova e: “Ua haamaitai au, e e haamaitai faahou atu â vau.” Mai te mea ra ïa e teie mau parau, te parauhia ˈtura ïa ia Iesu, no te mea ua manaˈo te tahi pae o ratou e ua paraparau mai te melahi ia ˈna, e te tahi pae ra ua haruru te patiri. — Ioane 12:28, 29.
8. Eaha te manaˈo hohonu ta te aroha o te Atua e faatupu mai i roto ia outou?
8 Eaha te manaˈo hopea ta outou i huti mai i taua hiˈopoaraa poto ra no nia i te huru o te Atua i nia i ta ˈna Tamaiti, e to ˈna anaanatae ia ˈna? E tia ia tatou ia taa maitai e mea here mau na Iehova i ta ˈna Tamaiti fanau tahi. Ma te haamanaˈo i te reira e i te mau manaˈo hohonu o fatata, te taatoaraa o te mau metua o te fenua nei, i te hoê tamaiti fanau tahi, a tuatapapa na eaha te ohipa i tupu i muri iho, oia hoi: te pohe tusia o Iesu.
Te tapao rahi roa ˈˈe no te aroha
9, 10. Eaha ïa te tapao rahi roa ˈˈe no te aroha ta te Atua i horoa mai na te huitaata nei, e te faahaamanaˈo maira te reira ia tatou i tei hea mau irava o te mau Papai?
9 Te faaite maira te Bibilia e ua ite to tatou Metua i te raˈi ra eaha mau na te hinaaro o vetahi ê. I roto i te Isaia 63:9, teie ta tatou e taio no nia ia Iehova e te mau ati Iseraela: “To ratou atoa ra mau ati aore oia i mârô atu ia ratou; na te melahi ra no mua i tana aro ratou i faaora; no to ˈna aroha e to ˈna hamani maitai i faaora ˈi oia ia ratou; e na ˈna ratou i mau, e na ˈna ratou i hopoi i te mau mahana atoa mai tahito maira.” Eita e ore e mea peapea roa ˈtu â na Iehova i te faarooraa oia i te mau “oto rahi” e te iteraa oia i te mau “roimata” o Iesu (Hebera 5:7)! I te aua ra hoi o Getesemane to Iesu na reiraraa i te pure. I muri aˈe, ua haruhia ˈˈera oia e ua faahua-haava-hia, ua taparahihia e ua taumihia ˈˈera i nia i to ˈna upoo te hoê hei raau taratara. Ia haamanaˈo na outou e te hiˈo noa maira to ˈna Metua, ma to ˈna here rahi ia ˈna, i te mau mea atoa e tupu ra. Ua ite atoa maira oia ia Iesu i te pereteteraa no te teiaha hoi o te pou haamauiuiraa ta ˈna e amo ra, e i muri aˈe ua patitihia ˈˈera hoi i nia iho. Eiaha ia moehia ia tatou e e nehenehe te Atua e rave e ia ore ta ˈna Tamaiti here mau ra ia roohia i taua mau haamauiuiraa riaria mau ra; aita râ oia i na reira, ua faatia aˈera hoi e ia ite Iesu i te reira. I te mea hoi e ite atoa te Atua i te mau manaˈo hohonu, eita e ore taua mau ohipa i tupu i te riro ei haamauiuiraa rahi roa ˈˈe tei ore i iteahia aˈenei e ana aore ra o te ore roa ˈtu e ite-faahou-hia.
10 E tauturu te tuatapaparaa ta tatou i rave iho nei ia farii taatoa tatou i te mau parau ta Iesu i parau atu ia Nikodemo, i te na ôraa ˈtu oia e: “I aroha mai te Atua i to te ao, e ua tae roa i te horoa mai i ta ˈna Tamaiti Fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioane 3:16). E ite â tatou i taua manaˈo nei i roto i teie faahitiraa a Ioane, te hoê aposetolo here-rahi-hia e Iesu, o te parau ra e: “Ua itea to te Atua aroha ia tatou nei, o te Atua i tono mai i ta ˈna Tamaiti fanau tahi i te ao nei (...) ei taraehara i ta tatou nei hara.” — Ioane 1, 4:9, 10.
11. Mea nafea to Paulo faataaraa mai i te tapao rahi roa ˈˈe o te aroha ta te Atua i horoa mai?
11 Inaha, e tauturu taua mau mea atoa nei ia taa papu tatou i te mau parau a te aposetolo Paulo, tei arue i te aroha rahi faahiahia mau o te Atua ra o Iehova, o te na ô ra i roto i te Roma 5:6-8: “I to tatou vai-paruparu-raa hoi i pohe ai te Mesia i te tau mau ra, no te feia paieti ore ra. E ore hoi te hoê e haapohe no te tahi taata parau-tia, e faaoromai râ paha te hoê taata ˈtu i te pohe no te taata maitai. Ua faarahi â te Atua i to ˈna aroha ia tatou nei, i te mea te vai taata hara noa nei â tatou, i pohe ai te Mesia no tatou nei.” I te tonoraa mai oia i ta ˈna Tamaiti fanau tahi i te fenua nei, ia mauiui oia e ia ite atoa hoi i te pohe riaria roa ˈˈe, eita e ore e o te haapapuraa rahi roa ˈˈe teie no te aroha o Iehova.
Te piti o te tapao rahi roa ˈˈe no te aroha
12, 13. a) Mai te aha ïa te huru te taa-ê-raa te tapao no te aroha ta Iesu i horoa mai? b) E mea nafea to Paulo faataaraa mai i te here rahi o Iesu?
12 E riro paha outou i te aniani e eaha te piti o te tapao rahi roa ˈˈe no te aroha. Teie ta Iesu Mesia i parau: “Ia horoa te taata i to ˈna iho ora no to ˈna ra mau taua, aita roa e taata aroha ê atu i tei reira.” (Ioane 15:13). Parau mau, i roto i te roaraa o te Tuatapaparaa, ua horoa vetahi pae i to ratou ora no te tahi atu mau taata; e ora taotia-noa-hia râ hoi; no te mea ia tae i te hoê taime e pohe iho â ratou. Area o Iesu Mesia ra, e taata tia hoi oia, inaha, e tiaraa to ˈna no te ora. Eita oia e roohia i te pohe tupuna, mai tei itehia — e te ite-noa-hia nei â — e te toea o te huitaata nei. Eita atoa te hoê noa ˈˈe taata e nehenehe e haru i te ora o Iesu (Ioane 10:18; Hebera 7:26). Ia haamanaˈo na outou i teie mau parau ta ˈna: “Aita oe i manaˈo e, e tia noa ia ˈu ia tau i tau Metua i teie nei, e na ˈna e horoa mai i te melahi e ia ahuru noa ˈtu te legeona ia piti tiahapa e ia rahi atu â?” — Mataio 26:53; Ioane 10:17, 18.
13 E papu rahi atu â tatou i te here i faaitehia e Iesu ia tuatapapa tatou i te reira ia au i te tahi atu â huru hiˈoraa. Ua faarue oia i to ˈna oraraa varua faahiahia roa i nia i te raˈi, ei hoa fatata roa e ei tauturu atoa hoi no tei Teitei roa ˈˈe o te ao nei, te Arii mure ore ra. No to ˈna râ here rahi i faaite ai oia i te huru ta Paulo e faataa ra, oia hoi: “O te huru ïa oia no te Atua, e aore oia i parau e haru toroa ia faito atoa oia i te Atua, haapae atura râ i to ˈna iho, rave atura i to te tavini ra huru, i te fanauraa mai ma te huru o te taata nei. E no te mea oia i itea mai te taata nei i te huru, ua faahaehaa oia ia ˈna iho, i te haapao-maite-raa e tae noa ˈtura i te pohe i te pohe satauro ra.” — Philipi 2:6-8.
14. Mea nafea to te peropheta ra o Isaia i te faaiteraa mai i te tapao rahi roa ˈˈe no te aroha i horoahia mai e Iesu?
14 E ere anei teie te hoê tapao no te aroha? Eita ïa e ore e, e te piti hoi teie no te tapao rahi roa ˈˈe no te aroha, i muri noa ˈˈe i to te Atua ra o Iehova, to ˈna Metua i te raˈi ra. Te faaite maira te mau parau tohu e vai ra i roto i te buka a Isaia pene 53, i te mau mea atoa i faaruruhia e Iesu, i te na ôraa mai e: “I vahavahahia oia, e aore i haapaohia e te taata; e taata mataro i te oto, e ua ite hoi i te mihi (...). Ua rave mau râ oia i to tatou paruparu, e ua hopoi ê oia i to tatou oto; ua parau râ tatou ia ˈna e, tairi utua to ˈna; mai te taata tairihia e te Atua, i pohe ai ra. I paruparu râ oia i ta tatou nei hara, i tairihia oia i to tatou nei ino (...). No to ˈna paruparu e ora ˈi tatou (...). No te mea ua manii ia ˈna to ˈna varua [nephe] e tae noa ˈtura i te pohe.” — Isaia 53:3-5, 12.
15, 16. Eaha te mau parau a Iesu e faaite maira i te auraa o te tusia ta ˈna e horoa?
15 No te mau faahopearaa atoa e itea i te pohe e farereihia e ana, ua pure aˈera Iesu i roto i te aua i Getesemane ra e: “Haere atura oia i mua iti atu, tipapa ihora i raro ma te pure, na o atura, E tau Metua e, ia tia ra, e hopoi ê atu i teie nei auˈa, ia tupu râ to oe hinaaro, eiaha to ˈu.” (Mataio 26:39). Eaha ïa ta Iesu e ani ra na roto i teie nei mau parau? Te patoi ra anei oia i to ˈna tiaraa “Arenio a te Atua, o tei hopoi ê atu i te hara o te ao”? (Ioane 1:29.) Aita roa ˈtu, no te mea i roto i te roaraa o ta ˈna taviniraa, ua parau atu oia i ta ˈna mau pǐpǐ e e ite oia i te mauiui e e pohe atu hoi oia; ua faaite atoa mai oia ia ratou eaha te huru pohe ta ˈna e farerei atu (Mataio 16:21; Ioane 3:14). No reira, eita e ore o Iesu i te manaˈo i te tahi atu mea ia ˈna i faahiti i taua pure nei.
16 Eita e ore e te mea e haapeapea ra ia Iesu o te pariraa ïa e parihia mai ia ˈna oia hoi te faaino i te Atua. O te ohipa riaria roa ˈˈe hoi te nehenehe e parihia i te hoê ati Iuda. Teie râ, no te aha ïa e haapeapea ˈi no te hoê pariraa hape? No te mea, i roto i taua huru tupuraa nei, e nehenehe to ˈna pohe e faahaama i to ˈna Metua i te raˈi ra. Oia mau, te haapohehia ra te Tamaiti a te Atua, aita hoi ta ˈna e hara, e mea here atoa hoi na ˈna i te parau-tia, e mea riri na ˈna ia ore te ture ia aurarohia, e tei haere mai i te fenua nei no te faahanahana i te iˈoa o to ˈna Metua, e teie nei o te haapohehia ra na te nunaa o te Atua e te tumu no te faainoraa ïa i te Atua ra o Iehova. — Hebera 1:9; Ioane 17:4.
17. No te aha te pohe ta Iesu farerei e riro no ˈna ei tamataraa fifi mau?
17 I roto i ta ˈna taviniraa, teie ta Iesu i parau: “E bapetizoraa râ to ˈu e vai nei e aita to ˈu mauiui ia oti.” (Luka 12:50). Ua tae oia i teie nei i te taime faufaa roa ˈˈe no taua bapetizoraa ra. Eita e ore e o te tumu ïa to ˈna hou i riro mai ai ei topata toto, i te taime oia e pure ai (Luka 22:44). Taa ê atu i te reira, e hopoia teimaha to nia i to ˈna tapono i taua rui ra, hopoia ta tatou e ere roa ˈtu e nehenehe e faito te teiaharaa. Ua ite oia e e tia ia ˈna ia tapea i to ˈna haapao maitai, mai te peu e eita oia e na reira ra, e riro ïa te reira i te faahaama ia Iehova! E nehenehe hoi Satani e parau e ua tano mau oia e ua hape te Atua ra o Iehova. Auê râ ïa fifi no te Diabolo ra o Satani e, inaha, ua tapea Iesu i to ˈna haapao maitai e tae noa ˈtu i te hopea! Ua haapapu aˈera hoi oia e e haavare hairiiri mau e te faufau atoa hoi o Satani. — Maseli 27:11.
18. Eaha ïa tapitapiraa ta Iesu i ite i te rui oia e tapeahia ˈi?
18 No te tiaturi rahi te Atua ra o Iehova i te haapao maitai o ta ˈna Tamaiti i tohu ai oia e e tapea mau â Iesu i to ˈna haapao maitai e tae noa ˈtu i te hopea (Isaia 53:9-12). Teie râ, ua ite atoa Iesu e, no te mea e tia ia ˈna ia tapea i to ˈna haapao maitai, e hopoia teimaha atura ïa to nia ia ˈna. E nehenehe hoi oia e topa i roto i te hara (Luka 12:50). I taua rui ra, tei roto to ˈna ora mure ore e to te huitaata atoa nei, i to ˈna rima. Auê ïa tapitapiraa i itea e Iesu e! Ahiri oia i haaparuparu e i hara, eita ïa ta ˈna e nehenehe e taparu atu i te aroha o Iehova aore ra e taparu atu ia faaore mai Iehova i ta ˈna hara maoti te tusia o te tahi atu taata, mai ta te mau taata hara tia ore mai ia tatou nei e na reira ra.
19. Eaha ta Iesu ohipa i rave na roto i to ˈna haerea haapae ia ˈna iho?
19 Ma te feaa ore, te faaoromai i faaitehia e Iesu i taua mahana ra i te 14 no Nisana o te matahiti 33, o te tapao rahi roa ˈˈe ïa no te aroha tei ore aˈenei i faaitehia e te hoê taata: o te Atua o Iehova anaˈe ra tei na reira. E auê ïa mau ohipa faahiahia mau i ravehia e Iesu no tatou maoti to ˈna pohe! Inaha, i to ˈna poheraa, ua riro maira oia ei “Arenio a te Atua o tei hopoi ê atu i te hara o te ao”. (Ioane 1:29.) Ua faatia oia i na 144 000 pǐpǐ ia riro mai ratou ei arii e ei tahuˈa ia faatere atu ratou i pihai iho ia ˈna hoê tausani matahiti te maororaa (Apokalupo 20:4, 6). Taa ê atu, te fanaˈo nei “te feia rahi roa” o te mau “mamoe ê atu” i teie nei mahana, i te tusia o te Mesia e e nehenehe ratou e tiaturi e ora ˈtu i te hopearaa o te amuiraa o te mau mea nei. O ratou te mau taata matamua te fanaˈo atu i te mau haamaitairaa ta te Paradaiso i nia i te fenua nei e faatupu mai. E e riro atoa e rave rahi miria taata te faatiahia mai mai te pohe maira maoti te tusia o Iesu. Inaha, e nehenehe atoa hoi ratou e ora ˈtu e a muri noa ˈtu i roto i te Paradaiso i nia i te fenua nei (Apokalupo 7:9-14; Ioane 10:16; 5:28, 29). I te mea mau, “te mea atoa a te Atua i parau mai, e [Oia] anaˈe ïa i roto ia ˈna”, oia hoi i roto ia Iesu Mesia. — Korinetia 2, 1:20.
20. Eaha ïa to tatou huru i mua i na tapao rahi roa ˈˈe no te aroha i faaitehia mai e te Atua ra o Iehova e o Iesu Mesia?
20 Mea tano mau â ia faaite tatou i to tatou mauruuru i te Atua ra o Iehova e ia Iesu Mesia no te mau mea atoa ta raua i rave no tatou nei i te horoaraa mai na tapao rahi roa ˈˈe no te aroha. E tia mau â ia tatou ia faaite i taua mauruuru ra, e e fanaˈo taatoa tatou i ta raua mau haamaitairaa ia haapapu atu tatou ia raua i te reira. E tuatapapa te tumu parau i mua nei vetahi o te mau ravea faahiahia roa ˈˈe e nehenehe ai tatou e na reira.
Te haamanaˈo ra anei outou?
◻ Eaha te mau tapao no te aroha o te Atua ta te mau taata atoa e nehenehe e ite?
◻ Nafea tatou e nehenehe ai e ite e ua mauiui Iehova i to ˈna iteraa ˈtu i te mau mauiui i farereihia e ta ˈna Tamaiti?
◻ E taa ê te pohe o Iesu no te huitaata nei i to te tahi atu mau taata tei nehenehe e horoa i to ratou ora, i roto i tei hea tuhaa?
◻ Eaha ta te aroha o Iehova e o Iesu e tia ia faatupu i nia ia tatou nei?