Eaha ta te Bibilia e parau ra no te Atua e no Iesu?

MAI TE peu e e taio noa ˈtu te hoê taata i te Bibilia ma te ite ore i te haapiiraa o te Toru Tahi, e noaa anei ia ˈna te hoê noa ˈˈe manaˈo iti roa no nia i te reira? E mea papu e, e eita roa.

Oia mau, eaha te manaˈo e ô mai i roto i te feruriraa o te taata taio noa, oia hoi o te Atua anaˈe te Poiete Puai Mana Hope tei taa ê roa ia vetahi ê; e mea taa ê atoa o Iesu, e te reira hou oia i riro mai ai ei taata, e e poieteraa o ˈna i raro aˈe i te Atua.

Hoê hoi te Atua, eiaha râ e toru

E PIIHIA te haapiiraa bibilia e faˈi ra e hoê anaˈe Atua te haamoriraa i te Atua hoê roa. Ua parau o Levi Paine, orometua haapii i te aamu o te mau ekalesiatiko e, e eita roa te “haamoriraa i te Atua hoê roa” i roto i to ˈna huru mau, e nehenehe e faaauhia i te haapiiraa o te Toru Tahi: “E itehia te haamoriraa etaeta mau i te Atua hoê roa i roto i te Faufaa Tahito. Mea taa ê te Atua e mea otahi. Aita roa e niu (...) to te manaˈo ra no nia i te Toru Tahi.”

Ua faaore anei to Iesu haereraa mai i nia i te fenua nei i te haamoriraa i te Atua hoê roa? Te pahono ra o Levi Paine e: “No te reira, aita roa ïa e taa-ê-raa i rotopu i te Faufaa Tahito e te Faufaa Apî. E riro te haamoriraa i te Atua hoê i te vai tamau noa. E ati Iuda hoi o Iesu, ua haapiihia oia e na metua ati iuda ia au i te mau aˈoraa tumu a te Faufaa Tahito. E niu ati iuda papu mau to ta ˈna haapiiraa; oia mau e Evanelia apî eiaha râ i te ite apî no nia i te Atua. (...) Hau atu â, ua faariro oia no ˈna iho te tuhaa rahi o te papai ati iuda no te haamoriraa i te Atua hoê roa: ‘E faaroo mai, e Iseraela e: O te Fatu to tatou Atua, hoê hoi Atua.’”

E itehia taua mau parau ra i roto i te Deuteronomi 6:4. Mai teie te huru ia faahitihia i roto i te Bibilia no Ierusalema: “A faaroo e Iseraela e: O Yahvé to tatou Atua, hoê anaˈe Yahvé.”a Ia au i te tarame, aita te parau ra “hoê roa” i apeehia i te hoê parau tauiraa otini e faataa ra e te vai ra hau atu i te hoê taata.

Aita atoa te aposetolo Paulo i faaite i te hoê noa ˈˈe tauiraa i roto i te huru o te Atua, e te reira, i muri atoa i to Iesu haereraa mai i nia i te fenua nei. Ua papai oia e: “Hoê râ te Atua.” — Galatia 3:20; hiˈo Korinetia 1, 8:4-6.

Tau tausani taime, te faahiti ra te Bibilia i te Atua mai te hoê anaˈe taata. Ia paraparau anaˈe te Atua, e aparau oia mai te Atua otahi e o te ore e nehenehe e tatuhaahia. E mea maramarama mau te Bibilia i nia i te reira tuhaa. Te na ô ra te Atua e: “O vau o Iehova, o to ˈu ïa iˈoa, e ore au e horoa i to ˈu ra hanahana no vetahi ê.” (Isaia 42:8). “O vau o Yahvé to Atua (...) Eiaha roa ˈtu to oe ei Atua ê ia ˈu nei.” (Na matou e haapapu ra). — Exodo 20:2, 3, Je.

No te aha ïa te taatoaraa o te feia i papai i te Bibilia, o tei faauruahia e te Atua, i faahiti ai ia ˈna mai te hoê anaˈe iho, ahiri, i te papuraa mau, e toru taata i roto ia ˈna? Eaha ïa te faahopearaa e imihia ra, maoti te haavare i te taata? Ahiri e toru taata i roto i te Atua e mea papu iho â ïa e, e farii oia e ia haapapu te feia papai i te reira i roto i ta ˈna Parau, ia ore hoi te manaˈo ia feaa. Area râ, e nehenehe atoa e farii e, e na reira paha ïa te feia papai i te mau Papai kerisetiano heleni tei ora i pihai iho i te Tamaiti a te Atua; aita roa ˈtu râ.

Teie râ, te mea ta te feia papai Bibilia i haapapu, oia ïa hoê roa te Atua, e e Atua Otahi, e e ore e nehenehe e tatuhaahia e aita to ˈna e aifaito: “O vau o Iehova, e aitâ ˈtu; aitâ ˈtu Atua maori râ o vau.” (Isaia 45:5). “O Iehova to oe iˈoa, e o oe anaˈe tei Teitei i te fenua atoa nei.” — Salamo 83:18.

E ere e rave rahi atua i roto i te hoê Atua

UA PII Iesu i te Atua “te Atua mau hoê roa”. (Ioane 17:3.) Aita oia i faaau Ia ˈna mai te hoê atua e rave rahi taata i roto ia ˈna. Te tumu ïa i roto i te Bibilia aita ˈtu e taata i piihia te Mana Hope, maoti râ o Iehova anaˈe. Mai te peu e mea taa ê atu, aita ïa to te parau ra “mana hope” e auraa. Aita taua tiaraa ra i faaotihia i nia ia Iesu aore ra i nia i te varua moˈa, no te mea o Iehova anaˈe te teitei roa ˈˈe. I roto i te Genese 17:1, te faˈi ra oia e: “O vau te Atua mana hope ra.” I roto i te Exodo 18:11 te taiohia ra e: “E rahi Iehova i te mau atua atoa ra.”

I roto i te mau Papai hebera, e piti otiniraa to te parau ra ’èlôah (atua): ʼèlohim (mau atua) e ʼelohé (mau atua no). I te rahiraa o te taime, te faataa ra taua mau huru otiniraa ra ia Iehova, e i reira ïa e tatarahia na roto i te hoê parau otahi: “Atua.” Te haapapu ra anei taua mau huru ra i te hoê Toru Tahi? Aita. Te parau nei ra o William Smith i roto i Te hoê Titionare a te Bibilia (beretane) e: “Te manaˈo maere mau e faataa ra ia [ʼelo·himʹ] mai te huru ra e te vai ra e toru taata i roto i te Atua, aita e rave rahi taata i rotopu i te feia aravihi e farii ra i te reira i teie nei mahana. Aore ra te tuea ra taua faaohiparaa parau i ta te feia e tuatapapa ra i te tarame e pii ra te huru otiniraa no te faahanahana, aore ra te faaite ra i te taatoaraa o te puai no ǒ mai i te Atua ra, te amuiraa o te puai ta te Atua e faaohipa ra.”

Te parau ra Te Vea marite no te mau papai e no te mau reo ati sema no nia i te parau ra ʼèlohim: “E pinepine oia i te faaohipahia e te tahi ateributi iho parau haa huru otahi, e e rave oia i te huru o te hoê parau ateributi huru otahi.” E tauturu te aamu o te poieteraa no te faahiˈoraa i taua huru faaohiparaa ra: e 35 taime te raveraahia te tiaraa ra ʼèlohim, e i roto i te mau tupuraa atoa, te iho parau haa e faataa ra eaha ta te Atua e parau ra e e rave ra, mea na roto ïa i te huru otahi (Genese 1:1 e tae atu i te 2:4). No reira, te faaoti nei taua vea ra i te na ôraa e: “E mea papu e te parau ra [ʼElohim] e otiniraa rahi, o tei faataa i te hanahana e te mana.”

Te auraa o ʼElohim e ere ïa “mau taata”, e “mau atua” râ. No reira ˈtura, te mau taata e faahua parau ra e te horoa ra te parau ’èlohim i te manaˈo no te Toru Tahi, te faariro nei ïa ia ratou ei feia haamori e rave rahi atua. No te aha râ? No te mea i roto i to ratou feruriraa, ua faaoti ratou e e toru atua i roto i te Toru Tahi. Area râ, fatata te taatoaraa o te feia e turu ra i te Toru Tahi, e patoi ra i te manaˈo e e toru atua taa ê e vai ra i roto i te Toru Tahi.

Te faaohipa atoa ra te Bibilia te mau parau ra ʼèlohim e ʼèlohé no te faataa te mau atua hape aore ra te mau idolo e rave rahi (Exodo 12:12; 20:23). Tera râ, i te tahi atu taime, e ravehia taua nau parau ra i nia anaˈe i te hoê atua hape mai te atua o te mau Philiseti tei piihia “Dagona to ratou atua [ʼèlohé]”. (Te mau Tavana 16:23, 24.) Te pii-atoa-hia o Baala e “e atua [ʼèlohim]”. (Te mau Arii 1, 18:27.) Hau atu â, ua faaohipa-atoa-hia taua parau ra no nia i te mau taata (Salamo 82:1, 6). Ua parau o Iehova ia Mose e e riro oia ei “Atua” [ʼèlohim] no Aarona e no Pharao. — Exodo 4:16; 7:1.

E mea papu e, te faaohiparaa i te tiaraa ʼèlohim e ʼèlohé no te mau atua hape e no te mau taata atoa, e ere ïa te auraa e e mau atua e rave rahi teie mau atua e mau taata tataitahi atoa. No reira atoa, mai te peu e, te faaohipahia ra nau parau ra ʼèlohim e ʼèlohé i nia ia Iehova, eita oia e nehenehe e faaoti e ua hau atu i te hoê taata teie e itehia ra i roto i te Atua, mai te peu e e hiˈopoahia te toea o te Bibilia no nia i te reira tumu parau.

Iesu, te hoê taata poietehia ê atu

I NIA i te fenua, ua riro o Iesu ei taata — noa ˈtu e e taata tia roa, no te mea ua hopoi Iehova i te puai ora o ta ˈna Tamaiti i roto i te vairaa tamarii o Maria (Mataio 1:18-25). Tera râ, ua ora aˈena o Iesu na mua ˈˈe taua tau ra. Ua parau o ˈna iho e “ua haere mai i raro mai nia mai i te raˈi ra”. (Ioane 3:13.) Ua tano atura ïa e ia parau oia i muri iho i ta ˈna mau pǐpǐ e: “E nafea outou, ia ite outou i te Tamaiti a te taata [Iesu] i te hoiraa i nia, i te vahi tana i parahi i mutaa iho ra?” — Ioane 6:62, V.C.J.S.

No reira, hou oia a haere mai ai i nia i te fenua nei, ua ora o Iesu i nia i te raˈi. Tera râ, ua riro anei oia mai te hoê o na atua o te Toru tahi, puai mana hope e te mure ore? Aita, no te mea ua faataa papu maitai mai te Bibilia e hou oia i riro mai ai ei taata, mai te mau melahi ra to ˈna huru, e varua poietehia Iesu e te Atua. Aita to te mau melahi e to Iesu e ora hou ratou i poietehia ˈi.

Hou to ˈna oraraa i nia i te fenua nei, o Iesu “tei fanau hia na mua roa i te mau meaˈtoa i poiete hia ra” (Kolosa 1:15, V.C.J.S.), oia “te haamataraa o te poieteraa a te Atua”. (Apokalupo 3:14, Fillion, tatararaa katolika). Eita e nehenehe e tatara, ma te tia, te parau ra “te haamataraa” [ar·kheʹ na roto i te reo heleni] no te faaite e na Iesu i ‘haamata’ i te poieteraa a te Atua. I roto i ta ˈna mau papai bibilia, ua hau atu te 20raa o te taime to Ioane faaohiparaa i te parau heleni ra ar·kheʹ, e, i te taatoaraa, e ravehia te auraa matarohia “haamataraa”. Oia nei, ua poietehia Iesu e te Atua: o o ˈna te haamataraa o ta ˈna poieteraa itea-ore-hia e te mata taata nei.

Te itehia ra hoê auraa piri roa i roto i te mau parau e faataa ra te poieteraa o Iesu e te mau parau e faaohipahia ra e te “Paari” taipe i roto i te buka Maseli: “Te i te Fatu [Yahvé] ra vau, mai te haamataraa mai o tona ra mau haerea, hou oia i poiete ai i te hoe mea, i te matamua ra. Aita i tatumu hia te pueraa teiaha o te mau moua, aita hoi te mau aivi i faafanau hia ˈi au, aita oia i hamani i te fenua e te mau anavai, e te mau poro o te fenua ˈtoa nei”. (Maseli 8:12, 22, 25, 26, V.C.J.S.). Noa ˈtu â ïa e ua ravehia te parau ra “Paari” no te faaau i te hoê mea ora i poietehia e te Atua, te farii ra e rave rahi mau taata tuatapapa Bibilia e, e huru faataaraa parau noa te reira no te faahohoˈa ia Iesu, i te mea e hou oia a haere mai ai i nia i te fenua nei, e poieteraa varua oia.

Ua tamau noa o Iesu, na nia i to ˈna tiaraa “Paari” (hou oia i ora mai ei taata) i te parau e e ua riro oia i “pihai iho ia ˈna [i te Atua] mai te fatu ohipa ra”. (Maseli 8:30, V.C.J.S.) Ia au i te ohipa i ravehia e taua fatu ohipa ra, te faahiti ra o Kolosa 1:16 no nia ia Iesu e “mea na roto ia ˈna to te Atua poieteraa i te mau mea atoa nei, i nia i te raˈi e i nia i te fenua nei”. — Reo Farani no to tatou nei tau.

Mea na roto atura ïa i te arai o taua fatu ohipa ra — taua tauturu i raro aˈe ia ˈna ra — to te Atua Mana Hope poieteraa i te taatoaraa o te tahi atu mau mea. Teie te huru hiˈoraa ta te Bibilia e faataa ra no nia i te tiaraa tataitahi o taua nau taata ra: “Area ia tatou nei, hoê anaˈe iho Atua, te Metua, no reira mai te mau mea atoa nei (...) e hoê anaˈe iho Fatu, o Iesu Mesia, mea na roto mai ia ˈna te mau mea atoa nei”. (Na matou e haapapu ra) — Korinetia 1, 8:6, Osty, iritiraa katolika.

Mea papu mau e e tei taua fatu ohipa ra to te Atua parauraa e: “E hamani tatou i te taata ma to tatou iho huru.” (Genese 1:26). Te parau nei taua taata rii ra e ua ravehia te mau parau ra “hamani tatou” e “to tatou iho” no te haapapu i te Toru Tahi. Tera râ, mai te peu e e parau oe e: ‘E hamani tatou i te tahi mea’, eita ia e faaotihia e e rave rahi taata i roto ia oe. O ta oe râ e hinaaro ra e parau e, e rave ïa e piti aore ra e rave rahi atu taata i te ohipa. Oia atoa nei, i to te Atua faaohiparaa i te mau parau ra “hamani tatou” e “to tatou iho”, ua parau tia ˈtu oia i te tahi taata, ta ˈna poieteraa varua matamua, te fatu ohipa oia o Iesu na mua ˈˈe to ˈna oraraa ei taata i nia i te fenua nei.

E nehenehe anei e faahema i te Atua?

TE PARAU ra o Mataio 4:1 no nia ia Iesu e ua “faahemahia oia e te diabolo ra”. I muri aˈe i to ˈna faaiteraa ia ˈna “i te mau basileia atoa i te ao nei e to ratou hinuhinu”, ua parau maira o Satani ia Iesu e: “E horoa ˈtu vau i teie nei mau mea atoa ia oe na ia tipapa mai oe i raro e haamori mai ia ˈu.” (Mataio 4:8, 9). Te hinaaro o Satani oia hoi ia taiva Iesu i te Atua.

Mea nafea ïa te haapao maitai o Iesu i te tamataraahia mai te peu o te Atua iho o ˈna? E nehenehe anei te Atua e orure hau ia ˈna iho? Eita, noa ˈtu â ïa te orure hau ra te mau melahi e te mau taata i te Atua, ua na reira hoi vetahi. E auraa hoi to te faahemaraahia o Iesu mai te peu e, e ere oia i te Atua, e taata taa ê râ o ˈna tei nehenehe e maiti no ˈna iho i te mea maitai e te mea ino, mai te hoê melahi aore ra te hoê taata o tei nehenehe e taiva mai te peu e hinaaro oia.

I te tahi aˈe pae, eita e nehenehe e feruri e e hara te Atua aore râ e haapao ore oia ia ˈna iho. “O tei tia roa ta ˈna ohipa ra (...). E Atua parau mau, (...) e parau tia ta ˈna e te titiaifaro.” (Deuteronomi 32:4). No reira, mai te peu o Iesu te Atua, eita oia e nehenehe e faahemahia. — Iakobo 1:13.

No te mea e ere oia o te Atua, ua nehenehe o Iesu e taiva; aita râ, ua mau papu râ oia, ma te parau atu e: “E haere ê atu oe, e Satani; ua oti hoi i te papaihia, O to Atua o Iehova ta oe e haamori, e oia anaˈe ra ta oe e faaroo.” — Mataio 4:10.

Eaha hoi te faufaa o te hoo?

E TUATIRAA papu to te hoê o te mau tumu matamua o Iesu i haere mai ai i nia i te fenua nei, e te Toru Tahi. Te taiohia ra i roto i te Bibilia e: “Hoê hoi Atua, e hoê hoi arai i ropu i te Atua e te taata, o te taata ra o Iesu Mesia; o tei horoa ia ˈna iho ei hoo i te taata atoa”. — Timoteo 1, 2:5, 6.

Ua riro hoi o Iesu, taata tia roa, ei hoo o te faahoˈi ma te tano maitai i te mea i erehia e Adamu: te tiaraa no te hoê oraraa taata tia roa i nia i te fenua. E mea tano maitai ïa to Paulo parauraa no ˈna ra e “te Adamu hopea”; ua parau atoa te aposetolo no taua tumu parau ra e: “Mai te taata i hope i te pohe ia Adamu, e hope atoa i te faaorahia i te Mesia”. (Korinetia 1, 15:22, 45). Ua riro mau atura te ora taata tia roa o Iesu ei “hoo [tuea maitai]” tei titauhia e te parau-tia a te Atua. Oia atoa no te parau-tia a te taata, te vai ra te hoê parau mana oia hoi e ia faatueahia te tino moni hoo i te hara i ravehia.

Mai te peu e i te tahi aˈe pae, e melo o Iesu no te hoê huru Atua, e mea papu ïa e e hau rahi atu te hoo i tei titauhia e te ture a te Atua (Exodo 21:23-25; Levitiko 24:19-21). E taata tia roa hoi o Adamu tei hara i Edene ra, e ere râ i te Atua. No reira, e tia mau ïa ia tano maitai te hoo i te parau-tia a te Atua ra; oia hoi te hoê ora taata parau-tia, oia te “Adamu hopea”. I to te Atua tonoraa mai ia Iesu ei hoo i nia i te fenua nei, ua rave oia e ia tuea maitai i te parau-tia; e ere roa ïa o Iesu i te hoê atua tei faariro ia ˈna iho ei taata, e ere atoa ïa e taata atua, e taata tia roa râ, “i raro iti aˈe oia i te mau melahi”. (Hebera 2:9; hiˈo Salamo 8:5, 6.) Eaha ïa te melo o te hoê Atua mana hope — Metua, Tamaiti aore ra Varua Moˈa — o tei raro iti aˈe i te mau melahi?

No te aha i parauhia ˈi “Tamaiti fanau tahi”?

TE PARAU ra te Bibilia no Iesu te “Tamaiti fanau tahi [i te auraa mau otahi-fanauhia]” a te Atua. (Ioane 1:14; 3:16, 18; Ioane 1, 4:9). Ia au i te feia e turu ra i te haapiiraa Toru Tahi, no te mea e mure ore te Atua, e mure ore atoa ïa te Tamaiti a te Atua. Teie râ, nafea ïa e tuea ai te matahiti o te tamaiti e o to ˈna metua tane?

Te parau ra te feia e turu ra i te Toru Tahi no Iesu e, eita e nehenehe e faatupu i te hoê taairaa i rotopu i te faataara iˈoa ra “fanau tahi [i te auraa mau otahi-fanauhia]” e te auraa ta te mau titionare e horoa ra no te parau “fanauraa”: oia hoi “te horoaraa i te ora”; “te neheneheraa e horoa, e faatupu i te ora”. Ia au noâ i te manaˈo o te feia e turu ra i te Toru Tahi, ia faaohipahia taua parau ra no Iesu, teie atura to ˈna auraa “te hoê huru taatiraa aita e haamataraa”, te hoê huru taairaa tamaiti fanau tahi aita i fanauhia. (Titionare faataaraa i te mau parau no te Faufaa Tahito e te Faufaa Apî, beretane, a Vine). E manaˈo tano anei te reira no outou? E riro anei te taata ei metua tane ma te ore e horoa i te ora?

I te tahi pae, mai ta Vine e faˈi ra, ma te ore e faataa i te reira, no te aha te Bibilia e faaohipa ai hoê â parau heleni “fanau tahi” no te faataa i te taairaa e vai i rotopu ia Isaaka e o Aberahama? I roto i te Hebera 11:17, ua parauhia o Isaaka te “tamaiti fanau tahi” a Aberahama. No Isaaka, eita iho â te manaˈo e feaa i te mea e e tamaiti fanau tahi oia, ia au i te auraa mau o te parau, aita oia i aifaito i to ˈna metua tane na nia i te tau aore ra te tiaraa.

Te parau heleni (hurihia na roto i te parau “fanau tahi”) i faaohipahia i nia ia Iesu e ia Isaaka oia ïa o monogénês, no roto mai ia monos, “tahi” e ia ginomai, ia tatarahia oia ïa “fanau”, “riro mai (haere mai i te ao)”. Teie atura te auraa o monogénês: “Fanauhia o ˈna anaˈe, oia hoi tamaiti otahi”. — Titionare haapotohia heleni-beretane o te Faufaa Apî (beretane), a E. Robinson.

Te faahiti ra te Titionare tuatapapa i te parau faaroo o te Faufaa Apî (beretane), neneihia e Gerhard Kittel, no taua parau ra e: “Te auraa o [Monogènês] oia ïa ‘hoê anaˈe ui’ aita e tuane e aita atoa e tuahine”. Te faataa atoa ra taua buka ra e, i roto i te Ioane 1:18; 3:16, 18; e i roto i te Ioane 1, 4:9, “aita i faaau-noa-hia te taairaa o Iesu i te hoê tamaiti otahi e to ˈna metua tane; te vai mau ra taua taairaa ra i rotopu i te [Tamaiti] fanau tahi e te Metua”.

No reira ˈtura, e haamataraa to Iesu, te Tamaiti fanau tahi. E tia mau iho â ia faaauhia te Atua Mana Hope, to ˈna Metua, Oia i horoa i te ora no ˈna, mai te hoê metua tane no te fenua nei, mai ia Aberahama, e horoa i te ora no ta ˈna tamaiti. (Hebera 11:17). Oia nei, ia faahiti anaˈe te Bibilia e, o te Atua te “Metua” o Iesu, te haapapu ra ïa oia e, e piti hoi taata taa ê maitai raua. O te Atua tei nia aˈe, o Iesu to raro aˈe Ia ˈna, e te reira, na nia ïa i te tau, te tiaraa, te puai aore ra i te ite.

Mai te peu te papu ra e, e ere o Iesu anaˈe te tamaiti a te Atua, tei poiete-varua-hia i nia i te raˈi, te taahia ra e, no te aha te tiaraa ‘Tamaiti otahi[-tei fanauhia]’ i horoahia ai no ˈna. Ua pii-atoa-hia e rave rahi mau melahi, vetahi mau varua poietehia — mai ia Adamu atoa — mau “tamarii (...) a te Atua”, no te mea no ǒ mai to ratou puai ora i te Atua ra o Iehova, te Tumu o te ora. (Ioba 38:7; Salamo 36:9; Luka 3:38). Teie râ, ua poietehia ratou paatoa na roto i te arai o te “Tamaiti fanau tahi”, o ˈna anaˈe tei poietehia e te Atua iho. — Kolosa 1:15-17.

Ua manaˈohia anei e o Iesu te Atua?

NOA ˈTU â ïa e, i roto i te Bibilia, ua pii-pinepine-hia Iesu, te Tamaiti a te Atua, aita hoi hoê noa ˈˈe taata, i te senekele matamua, i manaˈo noa ˈˈe e Atua Tamaiti oia. Ua ite atoa te mau demoni o tei “faaroo e e hoê roa Atua”, na roto i to ratou iteraa i te ao varua e, e ere o Iesu i te Atua. No reira ˈtura, e mea tano maitai ratou i te aparauraa ˈtu ia ˈna mai i te hoê taata taa ê, te “Tamaiti a te Atua”. (Mataio 8:29; Iakobo 2:19). Hau atu, i to Iesu poheraa, ua navai te ite o te mau faehau no Roma, e mau etene hoi ratou, no te parau e e parau mau te mau mea ta ratou i faaroo no roto mai i te vaha o ta ˈna mau pǐpǐ: e ere o Iesu te Atua, oia râ “te Tamaiti mau â teie na te Atua”. — Mataio 27:54.

No reira, te haapapu nei te faataaraa parau “Tamaiti a te Atua” e e poieteraa taa ê o Iesu, e e ere râ i te hoê tuhaa o te Toru Tahi. No te mea e Tamaiti oia a te Atua, e ere ïa o te Atua iho, te faahiti ra hoi o Ioane 1:18 e: “Aore â e taata i ite i te Atua”. — Osty.

Ua faariro te mau pǐpǐ ia Iesu ei “arai i ropu i te Atua e te taata”, eiaha râ mai te Atua iho. (Timoteo 1, 2:5) Ia tatara-anaˈe-hia te parau ra arai, e mea taa ê iho â ïa i te mau melo e hinaaro ra i ta ˈna arai, e mea tano ore ïa ia riro Iesu ei hoê o te mau tuhaa o ta ˈna e tamata ra i te faafaite. Ahiri Iesu i parau i te reira, e rave ïa oia i te hoê tiaraa e ere hoi no ˈna.

I roto i te taatoaraa o te Bibilia, te itehia ra te hoê haapapuraa maramarama mau o te mau taairaa e vai ra i rotopu i te Atua e o Iesu. O Iehova anaˈe te Atua Puai Mana Hope. Na ˈna iho i poiete ia Iesu, hou oia i tono ai ia ˈna i nia i te fenua nei. E haamataraa ïa to Iesu e, eita e tia ia ˈna ia aifaito i te Atua na nia i te puai e te vai-noa-raa e a muri noa ˈtu.

[Nota i raro i te api]

[Parau iti faaôhia i te api 14]

No te mea e ua poietehia oia e te Atua, ua vai noa Iesu i nia i te piti o te tiaraa no nia i te tau, te puai, e te ite.

[Hohoˈa i te api 15]

Ua parau o Iesu e ua ora aˈena oia hou oia i haere mai ai i nia i te fenua nei, no te mea ua poietehia oia e te Atua, ua riro oia ei haamataraa no ta ˈna poiete itea-ore-hia e te mata taata.