Ua pahono ratou i te aroha o te Atua ma te ore e imi i to ratou iho maitai
“Ia haamaitai hoi ratou ia Iehova i to ˈna ra aroha, e te ohipa ravea taa ê na ˈna i te tamarii a te taata nei.” — SALAMO 107:8.
1. Nafea to te aposetolo Ioane haafaufaaraa i te aroha i roto i ta ˈna rata matamua?
‘E AROHA te Atua.’ Auê hoi auraa rahi to teie nei faahitiraa! Aita ïa tatou e maere ra e no te aha te aposetolo Ioane i faahiti ai i te reira e piti taime i roto i ta ˈna rata matamua (Ioane 1, 4:8, 16). E ere noa te Atua ra o Iehova i te aroha, o o ˈna atoa hoi te faahohoˈaraa o te aroha.
2. Mea nafea to te Atua faaiteraa i te aroha na roto i te poieteraa i te tane e te vahine, e na roto i te haamâharaa i to ratou mau hinaaro?
2 A feruri na i te aroha ta te Atua i faaite na roto i ta ˈna huru poieteraa ia tatou. Ua faaite o Davida, papai salamo i faauruahia e te Atua, i to ˈna mauruuru na roto i teie mau parau tano maitai e: “E haamaitai au ia oe, ua taa ê hoi to ˈu hamaniraahia.” (Salamo 139:14). Ia nehenehe tatou e ora ma te oraora maitai e ma te oaoa, ua horoa mai te Atua na tatou e pae tumu ite (te neheneheraa e ite, e faaroo, e tamata, e hauˈa e e tapea) o te faatia nei ia tatou ia tamata e rave rahi mau mea au maitai. Auê hoi mau ohipa nehenehe mau ta tatou e ite ra i roto i te poieteraa e haaati ra ia tatou! Auê hoi mau ohipa faahiahia huru rau i roto i te mau huru oraraa o te mau raau tupu e o te mau animala! Eaha ˈtu ïa no te haviti e te mau ravea faahiahia o te tino taata! Ua vaiiho atoa mai te Atua na tatou e rave rahi huru maa hotu, mau pota e te tahi atu mau maa au maitai te tahi e te tahi (Salamo 104:13-16). Mea tano maitai iho â ïa i to te aposetolo Paulo faataaraa i te feia e ora ra i Lusetera tahito e ‘ua hamani maitai mai [te Atua], ma te horoa mai i te ûa no nia i te raˈi ra, e te anotau auhune, e ma te faaî mai i to tatou aau i te maa e te oaoa.’ — Ohipa 14:17.
3. Eaha te mau huru faahiahia ta te Atua i horoa mai no tatou?
3 A feruri atoa na i te mau haamaitairaa atoa ta te hoê utuafare fetii oaoa e horoa mai. Hau atu, a feruri na i te mau oaoaraa atoa ta tatou e nehenehe e ite maoti ta tatou mau ravea i te pae feruriraa e i te pae o te mau manaˈo hohonu: ta tatou e feruri ra, to tatou maramarama, to tatou haamanaˈoraa, to tatou haava manaˈo e to tatou iho â râ neheneheraa e haamori, mau mea atoa te reira o te rave e mea teitei aˈe tatou i te mau animala. Eita atoa e ore e nehenehe e faahiti i te oaoaraa ta te upaupa e nehenehe e horoa mai no tatou. E mau faaiteraa anaˈe taua mau ǒ, e te vai atura, no te aroha ta te Atua e faaite ra ia tatou.
4. Eaha te mau tapao aroha ta te Atua i horoa i te mau taata mai te taime a hara ˈi to tatou mau metua matamua?
4 Mea papu maitai e ua tamata o Adamu raua o Eva e rave rahi mau oaoaraa a vai taata tia noa ˈi raua i roto i te ô i Edene (Genese 2:7-9, 22, 23). Teie nei râ, a faaea ˈi raua i te pahono i te mau tapao aroha a te Atua ma te ore e imi i to raua iho maitai, ua faarue anei oia i te nunaa taata? Aita roa ˈtu! Taa ê atu i te reira, ua rave oioi atura oia i te mau faanahoraa no te faatitiaifaro i te mau hape atoa i tupu mai na roto i te hara a to tatou mau metua matamua (Genese 3:15). Ua faaite atoa o Iehova i to ˈna iho aroha ma te faaoromai-maite-raa i te huaai tia ore a Adamu (Roma 5:12). Ua na reira oia fatata e 6 000 matahiti i teie nei. Ua faaite taa ê te Atua i to ˈna aroha na roto i ta ˈna huru raveraa i nia i ta ˈna mau tavini. E parau mau roa teie: “O Iehova, o Iehova, e Atua aroha noa, e te hamani maitai rahi, e te faaoromai rahi, e te maitai rahi, e te parau mau; e te vaiiho maite i te aroha e tausani noa ˈtu te ui; e te faaore i te parau-tia ore, e te hara, e te ino.” — Exodo 34:6, 7.
5. Mea nafea to Iehova faaiteraa i te aroha e te faaoromai na roto i ta ˈna mau taairaa e te nunaa o Iseraela?
5 Oia mau, ua rahi hoi te faaoromai ta te Atua i faaite i roto i ta ˈna mau taairaa e te mau ati Iseraela, mai te taime ratou i riro mai ai ei nunaa no ˈna, i raro mai i te mouˈa o Sinai, e tae roa ˈtu i te taime a aratai ai to ratou haerea patoi ia ˈna ia faarue roa ia ratou. Teie ta tatou e taio no nia i taua tumu parau ra i roto i te Paraleipomeno 2, 36:15, 16: “Ua tono maira te Atua o to ratou mau metua o Iehova i te vea, aita i tuutuu; no te mea te aroha ra oia i to ˈna mau taata, e to ˈna ihora parahiraa. Ua tâhito ra ratou i te mau vea a te Atua, e ua vahavaha i ta ˈna parau, e ua hamani ino i te mau peropheta na ˈna, e tupu roa aˈera te riri o Iehova i to ˈna taata, e aita roa aˈera e haapuraa.” Teie râ, te vai ra te tahi pae o tei pahono i te aroha o te Atua ra o Iehova ma te ore e imi i to ratou iho maitai. E hiˈo ïa tatou e mea nafea râ ma te tuatapapa i te oraraa o vetahi i rotopu ia ratou. E e faaoti ai tatou e mea nafea, na roto i te faaohiparaa, e nehenehe ai tatou e pahono atoa i te aroha o Iehova.
Mea nafea to Mose pahonoraa ma te ore e imi i to ˈna iho maitai
6. Ua riro te hiˈoraa o Mose ei hiˈoraa faahiahia roa i roto i teihea tuhaa, e mea na roto i to ˈna faaîraa i teihea mau hopoia to ˈna iteraa i te aroha o te Atua?
6 Ua pahono aˈera o Mose i te aroha o te Atua na roto i te hoê huru faahiahia mau. Auê ïa mau mahana faahiahia no a muri aˈe teie e matara mai i mua ia ˈna, te tamaiti faaamu a te tamahine a Pharao! Teie nei râ, ua maiti oia e “rave atoa i te pohe i te amuiraa i te taata no te Atua ra; ia rave i te navenave poto noa o te parau ino ra. E taoˈa rahi hoi ia ˈna te mau faainoraa, i te Mesia nei, i te mau taoˈa atoa o Aiphiti ra”. (Hebera 11:25, 26.) I te hoê taime, ua hinaaro o Mose e faaora i to ˈna mau taeae, te mau ati Iseraela, mai te faatîtîraa a to Aiphiti. Aita râ ratou i au i ta ˈna mau tutavaraa, e, inaha, aitâ te taime i faataahia e te Atua no te faaora ia ratou i tae mai atura (Ohipa 7:23-29). Teie nei râ, tau ahuru matahiti i muri iho, no te faaroo o Mose e no to ˈna hinaaro hohonu e tauturu i to ˈna mau taeae, ua horoa aˈera o Iehova no ˈna, i te mana no te faatupu e rave rahi mau semeio, e i roto i te roaraa e 40 matahiti, ua faaohipa aˈera oia ia ˈna mai te hoê peropheta, te hoê haava, te hoê iriti ture e te hoê arai i pihai iho i te mau ati Iseraela. Na roto i te amoraa i taua mau hopoia ra, ua ite aˈera o Mose, i roto e rave rahi mau huru tupuraa, i te aroha ta te Atua e faaite ra ia ˈna e i to ˈna mau taeae ati iseraela.
7. Mea nafea to Mose pahonoraa i te mau tapao aroha o te Atua?
7 Mea nafea to Mose pahonoraa i te here e i te aroha mau o te Atua? ‘Ua faarii faufaa ore anei oia i te aroha mau o te Atua?’ (Korinetia 2, 6:1). Aita roa ˈtu! Ua pahono aˈera o Mose i te mau tapao aroha a Iehova ma te ore e imi i to ˈna iho maitai, ma te huri i te mau taime atoa i nia ia ˈna, to ˈna Poiete, e ma te atuatu i te mau taairaa piri roa e o ˈna. Ua faaite te Atua e mea faufaa roa o Mose no ˈna a aˈo ai oia ia Aarona, to ˈna taeae, e ia Miriama, to ˈna tuahine, no te mea e ua faaino raua ia ˈna. Ua “parau vaha” aˈera oia ia Mose e ua faaite aˈera ia ˈna i “to Iehova huru”. (Numera 12:6-8.) Noa ˈtu te mau haamaitairaa e rave rahi tei noaa ia ˈna, ua vai noa o Mose ei taata haehaa roa ˈˈe i rotopu i te mau taata atoa e ua rave oia i te mau mea atoa ta Iehova i faaue atu ia ˈna. “O ta ˈna ïa i rave.” — Exodo 40:16; Numera 12:3.
8. Mea nafea to Mose faaiteraa e ua huri tia ˈtu oia i nia i te Atua?
8 Ua huri tia atoa ˈtu o Mose i nia ia Iehova ma te ore e imi i to ˈna iho maitai, ma te tapitapi no To ˈna iˈoa, no To ˈna roo e no Ta ˈna haamoriraa viivii ore. No reira, ua pure aˈera oia ia Iehova e piti taime ia faaore i te hara a Iseraela no To ˈna iˈoa, e ua faaroohia oia (Exodo 32:11-14; Numera 14:13-19). A faaohipa ˈi te mau ati Iseraela i te haamoriraa idolo o te kafa, ua faaite aˈera o Mose i to ˈna itoito no te haamoriraa viivii ore ma te tuô e: “O vai to Iehova ra? o te horo mai ïa ia ˈu nei.” I muri aˈe i te reira, o ˈna e te feia i turu mai ia ˈna, ua haapohe aˈera ratou e 3 000 o te feia haamori idolo. I muri iho, i roto i te roaraa e 40 matahiti, ua faaoromai aˈera oia i te hoê nunaa mauruuru ore e te patoi. Ma te feaa ore, ua pahono aˈera o Mose i te mau tapao aroha a te Atua ma te ore e haapao ia ˈna iho, ma te vaiiho mai i te hoê hiˈoraa maitai no tatou. — Exodo 32:26-28; Deuteronomi 34:7, 10-12.
Te hiˈoraa faahiahia o Davida
9. a) Mea nafea to Davida pahonoraa i te aroha o te Atua? b) Mai ia Davida, nafea tatou e nehenehe ai e faahanahana ia Iehova e ta tatou mau taoˈa faufaa?
9 Te tahi atu taata no te Bibilia o tei horoa i te hoê hiˈoraa faahiahia mau no te pahono i te aroha o te Atua ma te ore e imi i to ˈna iho maitai, o Davida ïa, te piti o te arii no Iseraela. Ua turai to ˈna itoito no te iˈoa o Iehova ia ˈna ia aro atu ia Golia, te aito philiseti, o tei aa ia Iseraela, e ua horoa aˈera te Atua i te upootiaraa na ˈna (Samuela 1, 17:45-51). Na taua iho itoito ra i turai ia Davida ia afai i te afata o te faufaa i Ierusalema (Samuela 2, 6:12-19). E oia atoa, aita anei to ˈna hinaaro no te patu i te hoê hiero no Iehova i riro atoa ei faaiteraa no to ˈna itoito e to ˈna mauruuru no te aroha e no te maitai o te Atua? Oia mau. Noa ˈtu e aita i horoahia ia ˈna ra taua haamaitairaa ra, ua tamau noa oia i te faaineine i te paturaa e ua faahanahana oia ia Iehova ma te horoa ˈtu i te auro, te ario, e te mau ofai maitatai moni rahi (Samuela 2, 7:1-13; Paraleipomeno 1, 29:2-5). Mai ia ˈna atoa, e tia ia tatou ia pahono i te aroha o te Atua ma te ore e imi i to tatou iho maitai, ma te ‘faatura ia ˈna i ta tatou ra mau taoˈa faufaa’, ma te faaohipa i ta tatou mau taoˈa materia no te faahaere i te mau maitai o te Basileia i mua. — Maseli 3:9, 10; Mataio 6:33.
10. Mea tano mau e ia pee tatou i te haerea o Davida i roto i teihea tuhaa?
10 Parau mau, ua rave o Davida i te tahi mau hapa rahi, teie nei râ, i roto i te roaraa o to ˈna oraraa, ua faaite oia ia ˈna mai ‘te hoê taata e au i te mafatu o Iehova’. (Samuela 1, 13:14; Ohipa 13:22.) Ua î roa ta ˈna mau salamo i te mau parau haamauruururaa no te aroha o te Atua. No nia i teie parau, ua faataa te hoê buka parau paari bibilia (The International Standard Bible Encyclopædia) e “ua faahiti [o Davida] i te mau parau haamauruururaa hau atu i ta te tahi atu mau taata i faahitihia i roto i te Papai moˈa.” Ua parau te taata papai salamo ra o Asapha e ua “hinaaro aˈera (...) [te Atua] i tana tavini ia Davida, ta ˈna i rave mai mai te aua mamoe ra; ua aratai mai oia ia ˈna (...) ia faaamu oia i to ˈna taata, i te mau huaai o Iakoba, e te mau tamarii a Iseraela ta ˈna ra tufaa. Ua faaamu oia ia ratou ma te aau haavare ore”. (Salamo 78:70-72.) E au mau e ia pee tatou i te haerea o Davida.
Iesu Mesia, to tatou Hiˈoraa tia roa
11, 12. Mea nafea to Iesu faaiteraa e ua huri tia ˈtu oia i nia i te Atua?
11 Oia mau, ua riro o Iesu Mesia ei hiˈoraa bibilia nehenehe roa ˈˈe o te hoê taata o tei pahono i te aroha o te Atua ma te ore e imi i to ˈna iho maitai. Eaha ta te reira i turai ia ˈna ia rave? Na mua roa ˈˈe, ua turaihia oia ia taai ia Iehova anaˈe iho. Aita e feaaraa e ua huri noâ o Iesu i nia i te Atua i te mau taime atoa. Ua turai to ˈna mauruuru no te aroha e no te maitai o to ˈna Metua i te raˈi ra ia ˈna ia riro ei taata paari mau i te pae varua. Ua atuatu oia i te mau taairaa piri e te hohonu e te Atua. Mea au roa na Iesu i te pure; mea au roa na ˈna e paraparau i to ˈna Metua i te raˈi ra. Te taio nei tatou e e rave rahi taime to te Mesia pureraa. E nehenehe atoa oia e pure i te hoê rui taatoa (Luka 3:21, 22; 6:12; 11:1; Ioane 17:1-26). No te haamauruuru i te aroha o te Atua, ua ora o Iesu ia au maite i te parau mau oia hoi “e ore te taata e ora i te maa anaˈe ra, i te mau mea atoa râ i haapaohia e te Atua”. I te parau mau, ua riro te raveraa i te hinaaro o to ˈna Metua ei maa na ˈna (Mataio 4:4; Ioane 4:34). E ore anei e tia e ia pahono atoa tatou i te aroha o te Atua ma te taai atu ia ˈna anaˈe iho?
12 Ma te pahono i te aroha o te Atua ma te ore e imi i to ˈna iho maitai, ua aratai o Iesu Mesia i te mau taime atoa, i te ara-maite-raa i nia i to ˈna Atua e to ˈna Metua. A pii ai te hoê taata ia ˈna “Orometua maitai”, ua faaite aˈera oia i to ˈna au ore ma te parau e: “O te Atua anaˈe ra te maitai.” (Luka 18:18, 19). Ua parau o Iesu e rave rahi taime e aita oia i nehenehe e rave i te hoê noa ˈˈe ohipa ia au to ˈna iho manaˈo. Aita roa ˈtu oia i vaiiho i te hoê noa taime ma te ore e faahanahana i te iˈoa o to ˈna Metua, e ma te tano maitai, ua haamata aˈera oia i te pure ta ˈna i horoa ei hiˈoraa na roto i teie aniraa e: “Ia raa to oe iˈoa.” Ua ani atoa aˈera oia e: “E tau Metua, e haamaitai i to iˈoa.” E na mua rii noa ˈˈe i to ˈna poheraa, ua parau aˈera te Mesia i to ˈna Metua e: “Ua haamaitai au ia oe i te ao nei; ua oti ia ˈu te ohipa ta oe i ho mai na ˈu e rave ra.” (Mataio 6:9; Ioane 12:28; 17:4). Ma te papu, no te pahono i te aroha o te Atua ra o Iehova, e tia ia tatou ia imi i te faahanahana ia ˈna e ia pure no te faaraaraa i to ˈna iˈoa moˈa.
13. Ua turai te aroha o te Atua ia Iesu ia rave i te aha?
13 E hiˈopoa anaˈe na i teie nei e nafea, na roto i te pitiraa o te huru, to Iesu pahonoraa i te aroha o te Atua ma te ore e imi i to ˈna iho maitai: mea au roa na ˈna i te parau-tia e ua riri o ˈna i te ino, ia au i te parau tohu i papaihia i roto i te Salamo 45:7 (Hebera 1:9). Ua faaite oia i te huru “maitai roa (...), e te rave ore i te ino, e te viivii ore, e te taa ê hoi i te feia rave hara ra”. (Hebera 7:26.) Ua ani o Iesu i te feia e patoi maira ia ˈna ma te uˈana mau, ia haapapu mai e ua hara o ˈna, aita râ ratou i manuïa (Ioane 8:46). E piti taime, ua aratai aˈera to ˈna faufau i te ino ia tamâ i te hiero ma te tiahi i te feia paieti ore nounou moni i rapae au (Mataio 21:12, 13; Ioane 2:13-17). E auê ïa mau parau uˈana ta Iesu i faahiti no te faaite e o vai mau na te mau faatere haapaoraa haavare, ma te parau roa ˈtu e no ǒ mai ratou i te Diabolo ra! — Mataio 6:2, 5, 16; 15:7-9; 23:13-32; Ioane 8:44.
14. Ei pahonoraa i te aroha o te Atua, mea nafea to Iesu ohiparaa i nia i ta ˈna mau pǐpǐ?
14 Ua ohipa atoa te aroha o Iehova i nia i te mau huru raveraa a Iesu i nia i ta ˈna mau aposetolo e i nia i te tahi atu o ta ˈna mau pǐpǐ. Ua faaite o Iesu i te hoê aroha rahi, te tiai-maite-raa e te faaoromai i nia ia ratou. Ua faaoromai mau â o Iesu i ta ratou mârôraa; te po a hoohia ˈi oia, te tataˈu noa ra ratou no te ite e o vai râ tei rahi aˈe i rotopu ia ratou (Luka 22:24-27). Noa ˈtu â râ, ua faaite noa o Iesu i te mǎrû e te haehaa o te mafatu (Mataio 11:28-30). Parau mau, ua hoo o Iuda ia ˈna, ua faarue o Petero ia ˈna e toru taime e ua horo ê te tahi atu mau aposetolo a haere mai ai te hoê nahoa taata e tapea ia ˈna. Teie nei râ, aita roa ˈtu oia i iria noa ˈˈe aore ra i riri noa ˈˈe. Nafea tatou e ite ai i te reira? I te taime o ˈna i ite faahou ai i te mau aposetolo i muri aˈe i to ˈna faatia-faahou-raa, aita o Iesu i faahaamanaˈo ia ratou ma te iria i to ratou mǎtaˈuraa. Aita, ua tamǎrû râ oia ia ratou e ua faaitoito aˈera ia ratou ia tavini faahou ratou i te Basileia. — Ioane 20:19-23.
15. Mea nafea to Iesu haamâharaa i te mau hinaaro i te pae tino o te mau taata, ma te ore e imi i to ˈna iho maitai?
15 Ua pahono aˈera o Iesu Mesia i te aroha o te Atua ma te ore e imi i to ˈna iho maitai, na roto i te tahi atu â huru: ma te faatusia ia ˈna no vetahi ê, tae roa i te pohe haama e te mauiui mau i nia i te hoê pou haamauiuiraa (Philipi 2:5-8). Ua haamâha atoa o Iesu i te mau hinaaro i te pae tino o te mau taata ma te faaamu-semeio-raa i te rahiraa taata e ma te faatupu e rave rahi mau faaoraraa (Mataio 14:14-22; 15:32-39). I te mau taime atoa, ua tuu oia i te mau maitai o vetahi ê na mua ˈˈe i to ˈna iho. No reira oia i nehenehe ai e parau e: “E ana to te alope, e tauraa to te manu o te reva, area te Tamaiti a te taata nei aita o ˈna tuaroi.” (Mataio 8:20). Ua ite o Iesu i te ohiparaa o te varua moˈa ia matara anaˈe te reira mai roto mai ia ˈna e ia faatupu anaˈe oia i te mau faaoraraa semeio. Aita roa ˈtu oia i tamata i te huti i te hoê maitai i te pae materia na roto i te mau mana tei hau ê i to te taata nei, ei hiˈoraa a faatiaia ˈi te hoê vahine o tei roohia i te hoê tapahi a 12 matahiti te maoro, ma te faaroo, i to ˈna ahu e ua ora aˈera oia (Mareko 5:25-34). Hau atu, aita roa ˈtu o Iesu i faaohipa i to ˈna mau mana tei hau ê i to te taata nei no te huti i te maitai no ˈna iho. — Mataio 4:2-4.
16. Mea nafea to te Mesia haamâharaa i te mau hinaaro i te pae varua o vetahi ê?
16 Ua haamâha o Iesu ma te ore e imi i to ˈna iho maitai, i te mau hinaaro i te pae tino o te mau taata na roto i te faaoraraa i to ratou mau maˈi e ma te faatamaa-semeio-raa ia ratou; teie râ, te tumu matamua o ta ˈna taviniraa i nia i te fenua nei, o te pororaa ïa i te parau apî maitai o te Basileia o te Atua, te haapiiraa e te faariroraa i te mau taata ei pǐpǐ. Noa ˈtu te mau faaoraraa semeio faahiahia mau ta ˈna i faatupu, aita oia i matauhia mai te Taote rahi aore ra te Taata faatupu semeio, mai te Orometua maitai râ (Mataio 4:23, 24; Mareko 10:17). Ua faaite o Iesu ia ˈna mai te Orometua, e mea na reira to ta ˈna mau pǐpǐ matauraa ia ˈna e oia atoa to ˈna mau enemi (Mataio 22:16; 26:18; Mareko 9:38). E auê ïa mau parau mau hohonu ta ˈna i haapii, i roto i ta ˈna Aˈoraa i nia i te mouˈa ei hiˈoraa (Mataio 5:1 e tae atu i te 7:29)! Ua tano maitai ta ˈna mau faahohoˈaraa e ta ˈna mau parabole e tohu ra i te mau ohipa e tupu a muri aˈe, e oia atoa te tahi atu o ta ˈna mau parau tohu putapû mau. Eita ïa tatou e maere e, i te hoê taime, a tonohia ˈi te tahi mau faehau no te tapea ia ˈna, aita ratou i nehenehe e haru ia ˈna! — Ioane 7:45, 46.
17. a) Mea nafea to Iesu vaiihoraa mai i te hoê hiˈoraa tia mau no nia i te aroha? b) Eaha ta te tumu parau i mua nei e faaite mai?
17 Ma te feaa ore, ua faaite o Iesu Mesia ma te tia mau nafea ia pahono i te mau tapao aroha o te Atua ma te ore e imi i to ˈna iho maitai. Ua horoa oia na to ˈna Metua i te raˈi i te parahiraa matamua i roto i to ˈna oraraa e i roto i to ˈna mau manaˈo hohonu. Ua here oia ma te aau rotahi i te parau-tia, ua ohipa oia ma te aroha i nia i ta ˈna mau aposetolo e i nia i te tahi atu o ta ˈna mau pǐpǐ e ua pûpû oia i to ˈna ora no te haamâha i te mau hinaaro i te pae varua e i te pae materia o vetahi ê. I te pae hopea, ua faaoti oia i ta ˈna taviniraa ma te horoa i to ˈna ora ei hoo (Mataio 20:28). E o tatou? E parau mau, e feia hara tatou, mai ia Mose e ia Davida. E nehenehe râ ta tatou, na roto i te ohipa, e pee i to tatou Hiˈoraa ma te pahono i te mau tapao aroha o te Atua ma te ore e imi i to tatou iho maitai. O ta te tumu parau ïa i mua nei e faaite mai.
Eaha ta outou e pahono atu?
◻ No te aha e nehenehe ai e parau e ‘E aroha te Atua’?
◻ Mea nafea to Mose pahonoraa i te mau tapao aroha o te Atua?
◻ Mea nafea to Davida pahonoraa i te aroha o te Atua?
◻ Ua pahono o Iesu Mesia i te aroha o te Atua na roto i teihea huru tei tia ia peehia?
[Hohoˈa i te api 10]
Ua ite anei outou e mea nafea Mose i pahono ai i te here o te Atua?
[Hohoˈa i te api 12, 13]
Ua pahono o Iesu i te aroha o te Atua ma te tauturu ia vetahi ê i te pae varua e i te pae tino e ma te horoa i to ˈna ora ei hoo.