‘O tei hau i taua toru nei, o te aroha ïa’
‘E teie nei, te vai nei te faaroo, e te tiaturiraa, e te aroha, e toru ra; o tei hau râ i taua toru nei, o te aroha ïa.’ — KORINETIA 1, 13:13.
1. Eaha ta te hoê taata e tuatapapa ra i te huru o te taata i parau no nia i te aroha?
UA PARAU te hoê taata tuiroo i roto i te ao atoa nei, o te haapii ra no nia i te huru o te taata, e: “No te taime matamua i roto i te aamu o to tatou huru, te taa maitai ra matou e, i roto i te mau hinaaro matamua i te pae o te feruriraa o te taata, te hinaaro rahi roa ˈˈe, o te aroha ïa. Tei ropu te aroha i te mau hinaaro atoa o te taata, mai te mahana e vai ra i ropu i te tereraa o te mau palaneta. (...) Mea taa ê roa te hoê tamarii o tei ore i horoahia i te here, i te pae o te huru, o te tino e o te feruriraa, i te hoê tamarii o tei herehia. Mea taa ê atoa to ˈna huru tupuraa. Ua ite matou i teie nei e ua fanauhia te taata no te hoê oraraa i reira te mau parau ra ora e aroha e tuea ˈi. Oia mau, e ere roa ˈtu te reira i te mea apî. O te haapapuraa noa teie o te Aˈoraa i nia i te mouˈa.”
2. a) Mea na roto i teihea parau to te aposetolo Paulo faaiteraa i te faufaaraa o te aroha? b) Eaha te mau uiraa o tei tia e ia tuatapapahia i teie nei?
2 Oia mau, mai ta taua taata aravihi ra i faˈi, e ere roa ˈtu taua parau mau ra no nia i te faufaaraa o te aroha no te oaoaraa o te mau taata, i te mea apî. A tahi râ paha te feia aivanaa i ite ai i te reira, ua faahitihia râ te reira i roto i te Parau a te Atua hau atu i te 19 senekele i teie nei. No reira te aposetolo Paulo i nehenehe ai e papai e: ‘E teie nei, te vai nei te faaroo, e te tiaturiraa, e te aroha, e toru ra; o tei hau râ i taua toru nei, o te aroha ïa.’ (Korinetia 1, 13:13). Ua ite anei outou e i roto i teihea tuhaa te aroha i rahi aˈe ai i te faaroo e i te tiaturiraa? No te aha e nehenehe ai e parau e o te aroha te rahi roa ˈˈe o te mau ateributi o te Atua e o te mau hotu o to ˈna varua?
E maha huru aroha
3. Eaha te mau hiˈoraa no te here i rotopu i te hoê tane e te hoê vahine e itehia ra i roto i te Bibilia?
3 Ua riro te neheneheraa e aroha, teie huru i horoahia i te mau taata, ei faaiteraa o te paari o te Atua e o te anaanatae î i te aroha ta ˈna e horoa nei na ratou. E maha huru parau a te mau Heleni no te Tau tahito no te faataa i te parau ra “aroha”. O érôs, te hoê o ratou, oia hoi te auraa, te here i rotopu i te hoê tane e te hoê vahine, tei faatuatihia i te taatiraa i te pae tino. Aita te feia i papai i te mau Papai heleni kerisetiano i faaohipa i te reira, noa ˈtu e te faaohipa nei te Septante i te tahi mau parau hoê â auraa i roto i te Maseli 7:18 e 30:16, e te matara maira te mau manaˈo no te here i rotopu i te hoê tane e te hoê vahine i roto i te tahi mau irava o te mau Papai hebera. Ei hiˈoraa, te taio nei tatou e ua ‘hinaaro roa’ o Isaaka ia Rebeka (Genese 24:67). Te ite-maitai-hia ra te hoê hiˈoraa faahiahia mau no taua huru here ra i roto i te aamu o Iakoba, e mai te huru ra e ua faahinaaro roa o ˈna i te potii nehenehe ra o Rahela i to ˈna iteraa ˈtu ia ˈna. No reira, “ua tavini atura Iakoba e a hitu atura matahiti, no Rahela, e no to ˈna hinaaro ia ˈna, riro atura taua mau matahiti ra, mai na mahana rii aita rea nei te huru ia ˈna”. (Genese 29:9-11, 17, 20.) Te faataa atoa ra te Sire a Solomona i te here i rotopu i te hoê tiai mamoe e te hoê potii apî. Eita râ e navai i te faahiti-noa-raa i te parau e e tia ia faaitehia taua huru here ra, o te nehenehe e horoa mai e rave rahi oaoa, ia au noa i te mau faaueraa tumu tia a te Atua. Ia au i te Bibilia, mea na roto noa i te here i ta ˈna iho vahine te hoê taata e nehenehe ai e ‘mauruuru i te mau taime atoa’. — Maseli 5:15-20.
4. Eaha te mau hiˈoraa o te aroha i roto i te utuafare ta te mau Papai e horoa nei?
4 Te vai atoa ra te aroha puai mau i rotopu i te mau fetii. Te faataa ra te mau Heleni i teie huru aroha tei niuhia i nia i te mau auraa o te toto, na roto i te parau ra storgê. O taua here ra te tumu o teie parau tuiroo e: “Te parau hua nei te reo o te toto hau atu i te tahi pae.” Te itehia ra te hoê hiˈoraa faahiahia mau i roto i te here ta Maria e ta Mareta i faaite no to raua taeae ra o Lazaro. Mea here roa na raua ia ˈna, no te mea ua oto rahi roa raua i to ˈna pohe-taue-raa. E auê hoi to raua oaoa rahi a faatia mai ai o Iesu ia ˈna (Ioane 11:1-44)! Ua riro atoa te here o te metua vahine no ta ˈna tamarii ei hiˈoraa o taua huru here ra (hiˈo Tesalonia 1, 2:7). No reira, no te haapapu i te hohonuraa o to ˈna here no Ziona, ua parau o Iehova e ua rahi aˈe te reira i to te hoê vahine no ta ˈna tamarii. — Isaia 49:15.
5. Mea nafea te ereraa i te aroha e ite-maitai-hia ra i to tatou nei tau?
5 Ua riro te “aroha” ore ei haapapuraa e te ora nei tatou i ‘te mau mahana hopea’, tei tapaohia e te mau ‘tau fifi mau’. (Timoteo 2, 3:1, 3.) No te mea e aita e aroha i roto i te utuafare, te faarue nei te tahi mau taurearea i to ratou fare, e aita te tahi mau taata paari e haapao faahou ra i to ratou metua ruhiruhia (Maseli 23:22). Te ite-atoa-hia ra te aroha ore na roto i te hoê numera o te haere noa ˈtura i nia o te mau tamarii i hamani-ino-hia — e no te mea e taparahi-ino-roa-hia vetahi mau tamarii e to ratou mau metua, e tia ˈtura ïa ia tapea ia ratou i te fare maˈi. Te ite-atoa-hia ra te aroha ore no te mea e aita e rave rahi metua e aˈo nei i ta ratou mau tamarii. Te vaiiho-noa-raa i te mau tamarii ia rave mai ta ratou e hinaaro ra, e ere ïa te reira i te hoê tapao aroha, o te peeraa ïa i te haerea haavî ore. Te metua tane e here mau ra i ta ˈna mau tamarii, e aˈo atu oia ia ratou ia titau-anaˈe-hia te reira. — Maseli 13:24; Hebera 12:5-11.
6. A horoa mai na i te tahi mau hiˈoraa bibilia i te pae o te aroha i rotopu i te mau hoa.
6 E hiˈopoa anaˈe na i teie nei i te parau heleni ra philia e faataa ra i te aroha (aita roa ˈtu e manaˈo taatiraa i te pae tino) i rotopu i te mau hoa, i rotopu e piti vahine aore ra e piti tane tei paari i te pae o te huru, ei hiˈoraa. Te vai ra te hoê hiˈoraa maitai o taua aroha ra i roto i te here i rotopu ia Davida e ia Ionatana. A pohe ai o Ionatana i te tamaˈi, ua oto aˈera o Davida na roto i teie mau parau e: “E ati to ˈu ia oe, e tau taeae, e Ionatana e! e here rahi to ˈu ia oe: e oto rahi to oe ia ˈu, e oto hau ïa i to te vahine.” (Samuela 2, 1:26). Te haapii atoa nei tatou e mea here mau na te Mesia i te aposetolo Ioane, o tei matauhia mai te pǐpǐ “herehia e Iesu ra”. — Ioane 20:2.
7. Eaha te huru here ta te parau ra agapê e faataa ra, e mea nafea e faaitehia ˈi taua aroha ra?
7 Eaha te parau heleni ta Paulo i faaohipa i roto i te Korinetia 1, 13:13, i reira to ˈna faahitiraa i te faaroo, te tiaturiraa e te aroha, e i muri iho ua parau oia e “o tei hau râ i taua toru nei, o te aroha ïa”? O agapê te parau i faaohipahia i ǒ nei, e o te reira ta te aposetolo Ioane i faaohipa a parau ai oia e: “E aroha hoi te Atua.” (Ioane 1, 4: 8, 16). O te hoê here ïa tei arataihia aore ra tei faaterehia e te mau faaueraa tumu. E nehenehe te reira e apitihia, aore ra eita, e te manaˈo aroha i te hoê taata e te auraa ˈtu ia ˈna, e tuea râ i te hoê huru hohonu e faaitehia ma te ore e titau i te hoê faahoˈiraa, o te turai ia rave i te ohipa maitai no te tahi pae, noa ˈtu eaha to ratou maitai aore ra te faufaa ta tatou e nehenehe e huti mai. Na taua here ra i turai i te Atua ia horoa i te taata here-roa ˈˈe-hia e ana, ta ˈna Tamaiti otahi roa, o Iesu Mesia, “ia ore ia pohe te faaroo ia ˈna ra, ia roaa râ te ora mure ore”. (Ioane 3:16.) Mai ta Paulo e faahaamanaˈo maitai maira ia tatou, “e ore hoi te hoê e haapohe no te tahi taata parau-tia, e faaoromai râ paha te hoê taata ˈtu i te pohe no te taata maitai. Ua faarahi râ te Atua i to ˈna aroha ia tatou nei, i te mea te vai taata hara noa nei â tatou, i pohe ai te Mesia no tatou nei”. (Roma 5:7, 8.) Oia mau, e turai te here agapê i te taata e faaite ra i te reira ia haamaitai i te tahi pae, noa ˈtu eaha to ratou tiaraa i te pae totiale e noa ˈtu e eaha ta te reira e titau ia ˈna.
Rahi aˈe i te faaroo e i te tiaturiraa — No te aha?
8. No te aha ua rahi aˈe te here agapê i te faaroo?
8 No te aha râ o Paulo i parau ai e ua rahi aˈe taua here hohonu ra (agapê) i te faaroo? Ua papaihia i roto i te Korinetia 1, 13:2 e: “Tei ia ˈu noâ iho te tohu, e te ite i te mau parau moe atoa ra, e te mau ite atoa, e tei ia ˈu te mau faaroo tapao atoa e tia ˈi ia hopoi ê atu i te mouˈa, e aore o ˈu aroha, aita roa a ˈu e faufaa.” (Hiˈo Mataio 17:20). No reira, mai te peu e na te hoê hinaaro miimii e turai i ta tatou mau tutavaraa ia roaa mai te ite e no te haere i mua i roto i te faaroo, eita roa ˈtu ïa tatou e haamaitaihia e te Atua. I roto i te hoê â huru manaˈo, ua faaite o Iesu e e ‘tohu vetahi ma to ˈna iˈoa, e tatai ratou i te mau demoni i to ˈna iˈoa, e e rave ratou i te semeio e rave rahi i to ˈna iˈoa’, eita râ oia e farii atu ia ratou. — Mataio 7:22, 23.
9. No te aha te aroha i rahi aˈe ai i te tiaturiraa?
9 No te aha te here agapê i rahi aˈe ai i te tiaturiraa? No te mea e e nehenehe te tiaturiraa e turai i te hoê taata ia feruri noa ia ˈna iho, tei atuatuhia e te hoê taata o te hepohepo noa no to ˈna iho maitai, eita râ te aroha “e imi i te maitai no ˈna iho”. (Korinetia 1, 13:4, 5.) Hau atu, e hope te tiaturiraa — mai te oraraa ˈtu i te “ati rahi” e te ôraa ˈtu i roto i te ao apî — ia tupu anaˈe te reira (Mataio 24:21). O ta Paulo ïa e faataa maira na roto i teie mau parau e: “E ora hoi tatou i te [tiaturiraa], o te [tiaturiraa] hiˈohia ra, e ere ïa i te [tiaturiraa]; o ta te taata hoi i ite ra, eaha oia e tia ˈi ia [tiaturi] atu i te reira? I [tiaturi] râ tatou i tei ore i itea e tatou, te [tiai] nei hoi tatou i te reira ma te fatimauu ore.” (Roma 8:24, 25). Area te aroha râ, e faaoromai ïa i te mau mea atoa, e e ore roa e mou (Korinetia 1, 13:7, 8). Ua rahi aˈe ïa te here o te ore e imi i to ˈna iho maitai (agapê), i te faaroo aore ra i te tiaturiraa.
Rahi aˈe i te paari, i te parau-tia e i te puai?
10. No te aha e nehenehe ai e parau e ua rahi aˈe te aroha i na ateributi matamua e maha a te Atua?
10 E hiˈopoa anaˈe na i teie nei i na ateributi matamua e maha o te Atua ra o Iehova: te paari, te parau-tia, te puai e te aroha. E nehenehe atoa anei e parau e ua rahi aˈe te here i rotopu ia ratou paatoa? E, ma te feaa ore. No te aha? No te mea o te aroha te tumu o te mau ohipa a te Atua. No reira te aposetolo Ioane i papai e: “E aroha hoi te Atua.” Oia mau, e faahohoˈa ra te aroha i te Atua (Ioane 1, 4:8, 16). Aita hoê aˈe vahi i roto i te mau Papai i reira tatou e taio ai e e paari te Atua, e parau-tia oia aore ra e puai oia. Teie râ, te parauhia ra e te vai ra ia Iehova ra teie mau huru maitai (Ioba 12:13; Salamo 147:5; Daniela 4:37). Ua aifaito maitai taua na ateributi e maha ra i roto ia ˈna. Ma te aroha, te faatupu ra o Iehova i ta ˈna mau opuaraa ma te faaohipa, aore ra ma te haapao, i ta ˈna e toru ateributi ê atu.
11. Na te aha i turai ia Iehova ia poiete i te ao nei, te mau poieteraa i te pae varua e te mau taata?
11 Na te aha i turai ia Iehova ia poiete i te ao atoa nei, te mau varua e te mau taata maramarama? To ˈna paari? To ˈna puai? Eita, no te mea ua faaohipa te Atua i taua ateributi e piti ra no te poiete noa. Ei hiˈoraa, te taio nei tatou e: “Ua haamau Iehova i te tumu o te fenua i to ˈna ra paari.” (Maseli 3:19). Hau atu, aita roa ˈtu to ˈna ateributi ra, oia hoi te parau-tia, i turai ia ˈna ia poiete i te mau taata e tapea ra i te hoê feruriraa i te pae morare e te maitiraa mai ta ratou e hinaaro. Na to ˈna aroha i turai ia ˈna ia apiti i roto i te mau oaoaraa o te oraraa maramarama. Mea na roto atoa i te aroha to ˈna iteraa i te hoê ravea no te tatara i te faautuaraa ta te parau-tia i faatopa i nia i te mau taata no te hara a Adamu (Ioane 3:16). Na te aroha noâ i turai ia Iehova ia hinaaro e ia ora te mau taata faaroo i roto i te Paradaiso i nia i te fenua nei no a muri aˈe. — Luka 23:43.
12. Eaha to tatou huru i mua i te puai, te parau-tia e te aroha o te Atua?
12 I te mea e e Atua mana hope oia, eita roa ˈtu ïa tatou e hinaaro e haapohehae ia ˈna. Te ani nei o Paulo e: “Te faaooo nei tatou i te Fatu ia riri? e puai rahi anei to tatou i to ˈna?” (Korinetia 1, 10:22). Oia mau, e ‘Atua pohehae’ o Iehova, eiaha râ na roto i te hoê auraa tia ore, ‘te ani nei râ oia e ia taai maite atu tatou ia ˈna anaˈe ra’. (Exodo 20:5; Traduction Œcuménique de la Bible.) O tatou te mau kerisetiano, eita anei tatou e putapû no te mau faaiteraa e rave rahi o te paari itea-ore-hia a te Atua (Roma 11:33-35). E tia i to tatou faatura hohonu no ta ˈna parau-tia ia faaatea ê ia tatou i te hara i opuahia (Hebera 10:26-31). Ma te feaa ore, o te aroha te ateributi rahi roa ˈˈe o te mau ateributi matamua e maha o te Atua. E na teie aroha a Iehova, aroha o te ore e imi i to ˈna iho maitai, e aratai ra ia tatou ia ˈna ra e e horoa mai i te hinaaro e ia au mai oia ia tatou, e i te hinaaro e haamori ia ˈna e e apiti atu i te ohipa no te faaraaraa i to ˈna iˈoa moˈa. — Maseli 27:11.
Te hotu rahi roa ˈˈe o te mau hotu o te varua
13. Eaha te parahiraa to te aroha i rotopu i te mau hotu o te varua a te Atua?
13 Eaha te parahiraa o te aroha i rotopu i na hotu e iva o te varua o te Atua i faahitihia i roto i te Galatia 5:22, 23? Oia hoi, ta Paulo e parau ra, o ‘te aroha ïa, te oaoa, te hau, te faaoromai, te mǎrû, te maitai, te faaroo, te mamahu, te hitahita ore’. Ma te tano mau, ua tuu oia i te aroha i te parahiraa matamua. E auraa anei e ua rahi aˈe te aroha i te oaoa, te huru maitai ta ˈna i faahiti i muri noa iho? Oia mau, no te mea e eita tatou e nehenehe e ite i te hoê oaoa o te vai noa mai, aita anaˈe e aroha. I te tupuraa mau, aita te ao nei e ite ra i te oaoa no te manaˈo miimii, te ereraa i te aroha. Area, te mau Ite no Iehova, te vai ra te aroha i rotopu ia ratou, e te here nei ratou i to ratou Metua i te raˈi ra. Eita roa ˈtu ïa e maerehia e ia vai oaoa noa ratou. Ua tohuhia hoi e ‘e himene hua ratou ma te oaoa no te maitai o to ratou mafatu ra’. — Isaia 65:14.
14. No te aha tatou e nehenehe ai e parau e ua rahi aˈe te aroha i te hau?
14 Ua rahi aˈe atoa te aroha i te hau, te tahi atu hotu o te varua. No te ereraa i te aroha, te itehia ra i roto i te ao nei te mau au-ore-raa e te mau tatamaˈiraa e rave rahi. Teie nei râ, te vai ra te hau i rotopu i te mau tavini a Iehova i nia i te fenua atoa nei. Na ratou e haapapu nei i taua mau parau ra a te papai salamo e: “E haamaitai mai Iehova i to ˈna taata i te tuuraa mai i te hau ra.” (Salamo 29:11). Mai te peu e tei ia ratou ra taua hau ra, no te mea ïa tei ia ratou ra te tapao faaite e o ratou te mau kerisetiano mau, oia hoi te aroha (Ioane 13:35). O te aroha anaˈe o te nehenehe e na nia ˈtu i te mau tumu no te amahamaharaa, i te pae o te iri, o te nunaa aore ra o te ihotumu. Ua riro te aroha ei “tatua nehenehe roa”. — Kolosa 3:14.
15. Nafea e ite-maitai-hia ˈi te tiaraa aita e faaauraa o te aroha, ia faaau-anaˈe-hia taua huru maitai ra i te faaoromai?
15 Te ite-atoa-hia ra te tiaraa aita e faaauraa o te aroha, ia faaau-anaˈe-hia i te faaoromai, te faaruru-maite-raa i te ino aore ra i te faainoraa. Te faaoromai, o te tiai-maite-raa ïa e te ore e riri vave. Na te aha e rave e ia ore te mau taata e faaoromai e ia riri vave noa ratou? E ere anei na te ereraa i te aroha? I te taa-ê-raa, te faaoromai nei to tatou Metua i te raˈi ra e ‘eita oia e riri vave’. (Exodo 34:6; Luka 18:7.) No te aha? No te mea e te aroha nei oia ia tatou e “aita roa i hinaaro e ia pohe atu te hoê”. — Petero 2, 3:9.
16. Eaha te parahiraa o te aroha ia faaauhia i te mǎrû, te maitai, te mamahu e te hitahita ore?
16 Ua ite aˈena tatou e no te aha te aroha i rahi aˈe i te faaroo, e, no taua mau tumu ra, tei rahi aˈe ïa i te mau hotu hopea o te varua, oia hoi te mǎrû, te maitai, te mamahu e te hitahita ore. Mea faufaa mau taua mau huru maitai atoa ra, eita râ tatou e huti i te tahi aˈe maitai mai te peu e aita e aroha. O ta Paulo ïa e haapapu ra i roto i te Korinetia 1, 13:3, i reira oia e papai e: “Ia horoa noâ vau i ta ˈu mau taoˈa atoa ei faaamu i te taata rii, e ia tuu noa ˈtu vau i tau tino ia tahuhia i te auahi, e aita o ˈu aroha, aita roa a ˈu e faufaa i reira.” Inaha hoi, na te aroha e faahotu i te mau huru mai te mǎrû, te maitai, te faaroo, te mamahu e te hitahita ore. No reira o Paulo i parau faahou ai e e maitai te aroha e “e tapoˈi i te mau mea atoa ra, e faaroo i te mau mea atoa ra, e tiai i te mau mea atoa ra, e haamahu i te mau mea atoa ra”. I te tahi aˈe pae, “e ore roa te aroha e mou”. (Korinetia 1, 13:4, 7, 8.) Ma te feaa ore, ua riro te tahi atu mau hotu o te varua ei mau faaiteraa, aore ra mau tuhaa o te aroha, o tei faahitihia i te omuaraa. Oia mau, i roto i na hotu o te varua e iva, o te aroha mau ïa tei rahi aˈe.
17. Eaha te mau faahitiraa bibilia e haapapu ra e o te aroha te hotu rahi roa ˈˈe o te mau hotu o te varua?
17 Te haapapu ra o Paulo e o te aroha te hotu rahi aˈe o te mau hotu o te varua a te Atua a parau ai oia e: “Eiaha outou e amutarahu na te taata atoa, area ia aroha ˈtu te tahi i te tahi: o tei aroha ˈtu hoi ia vetahi ê ra, ua haapao ïa i te ture. (...) ua hope atoa ïa [te ture i papaihia] i roto i teie nei parau e, E aroha ˈtu oe i to taata-tupu mai to aroha ia oe iho na. E ore roa te aroha e hamani ino i te taata-tupu: te au ra maori te aroha i te ture.” (Roma 13:8-10). Na roto i te tahi atu mau parau o tei tuea, ua pii te pǐpǐ ra o Iakobo i teie ture e faaue ra ia aroha i to ˈna taata-tupu mai ia ˈna iho, “te ture hau ê”. — Iakobo 2:8.
18. Eaha te tahi atu â mau faaiteraa e haapapu ra e o te aroha te huru maitai roa ˈˈe e vai nei?
18 Te vai ra anei â ia tatou nei te tahi mau faaiteraa e haapapu ra e o te aroha te huru maitai rahi roa ˈˈe? Oia mau. E tuatapapa anaˈe na i te ohipa i tupu a ani ai te hoê papai parau ia Iesu e: “Teihea na te parau rahi o te ture ra?” Ua manaˈo paha oia e e faahiti mai o Iesu i te hoê o te mau Ture Ahuru. Ua faahiti râ o Iesu i te Deuteronomi 6:4, 5, e ua pahono atura ia ˈna e: “Teie te parau rahi o te ture ra, E faaroo mai, e Iseraela e; O Iehova to tatou Atua, hoê hoi Iehova. E e hinaaro oe i to Atua ia Iehova ma to aau atoa, e ma to varua atoa, e ma to manaˈo atoa, e ma to puai atoa; o te parau teie i hau i mua.” E ua parau faahou atura o Iesu e: “E mai te reira atoa hoi te piti, E aroha ˈtu oe i to taata-tupu mai to aroha ia oe iho na. Aita ˈtu â parau e hau i te reira.” — Mareko 12:28-31.
19. Eaha vetahi mau hotu faahiahia mau o te here agapê?
19 Aita, aita o Paulo e faarahi ra i te parau a faahiti ai oia i muri iho i te faaroo, i te tiaturiraa e i te here, e: “O tei hau râ i taua toru nei, o te aroha ïa.” E turai te faaiteraa i te here ia tatou, ia atuatu i te mau auraa maitai e to tatou Metua i te raˈi ra e to tatou mau taata-tupu, e oia atoa e te mau melo o te amuiraa e o to tatou utuafare. Te tapao o te aroha, no te faaitoito ïa ia tatou. E e faaite mai te tumu parau i mua nei i te mau haamaitairaa e rave rahi ta te here mau e nehenehe e horoa mai.
Eaha ta outou e pahono atu?
◻ Ua rahi aˈe te aroha i te faaroo e i te tiaturiraa i roto i teihea auraa?
◻ Eaha te here agapê, e nafea te reira e itehia ˈi?
◻ No te aha o te aroha te ateributi rahi roa ˈˈe o na ateributi matamua e maha a te Atua?
◻ I roto i teihea auraa te aroha i rahi aˈe ai i te tahi atu mau hotu o te varua?
[Hohoˈa i te api 25]
Na te aroha i turai i te Atua ia poiete i te mau taata, ia ora ratou i roto i te hoê paradaiso i nia i te fenua nei. Te tiaturi ra anei outou e e ô atu outou i reira i te hoê mahana?