Ua tiahihia Adamu raua Eva i rapae i te ô i Edene. I muri aˈe, e rave rahi tamarii ta raua. O Kaina te iˈoa o ta raua tamaiti matamua. Ua riro oia ei taata faaapu. Te piti o ta raua tamaiti, o Abela ïa. Ua riro oia ei tiai mamoe.

I te hoê mahana, ua pûpû Kaina raua Abela i te mau tusia na Iehova. Ua ite anei oe eaha te hoê tusia? O te hoê ô taa ê roa. Ua oaoa Iehova i te tusia ta Abela i pûpû na ˈna, area râ to Kaina, aita Iehova i oaoa. Ua riri roa ïa Kaina. Ua faaara Iehova ia Kaina e e nehenehe to ˈna riri e turai ia ˈna ia rave i te tahi ohipa ino. Aita râ Kaina i faaroo.

Ua parau Kaina ia Abela: ‘E haere anaˈe i roto i te faaapu.’ A vai ai raua anaˈe i roto i te faaapu, ua taparahi haapohe Kaina i to ˈna taeae. Eaha ta Iehova i rave? Ua faautua Iehova ia Kaina ma te faaatea ê ia ˈna i to ˈna mau fetii. Aita roa ˈtu Kaina i nehenehe e hoˈi faahou mai.

Eaha ïa te haapiiraa no tatou? E haamata paha tatou i te riri eita anaˈe te mau mea e tupu mai ta tatou e hinaaro ra. Ia rahi mai te riri i roto i to tatou aau e ia faaara mai vetahi ê e ua ite ratou i to tatou riri, e mea tia ia faatano oioi i te reira ia ore taua mau huru aau e faatere ia tatou.

No te mea ua here rahi Abela ia Iehova e ua rave oia i te ohipa maitai, e haamanaˈo noa Iehova ia ˈna. E faatia faahou mai te Atua ia Abela i te mahana e faariro ai oia i te fenua ei paradaiso.

A mairi ai te tau, ua rahi atu â te taata i nia i te fenua. Mea ino râ te rahiraa. Ua riro atoa te tahi mau melahi i nia i te raˈi ei melahi ino. Ua faarue ratou i to ratou nohoraa i te raˈi no te haere mai i nia i te fenua. Ua ite anei oe no te aha ratou i na reira ˈi? No te mea ua hinaaro ratou e rave i te tino taata e e faaipoipo i te mau vahine.

Ua tamariihia teie mau melahi e ta ratou mau vahine. Ua paari mai ta ratou mau tamarii e ua riro ratou ei taata puai roa o tei hamani ino ia vetahi ê. Aita Iehova i nehenehe e vaiiho ia tupu te reira. Ua faaoti oia i te haapohe i te feia ino ma te faatupu i te hoê diluvi.

Te vai ra râ te tahi taata mea taa ê oia. Ua here mau oia ia Iehova. O Noa to ˈna iˈoa. E vahine ta ˈna e e toru tamaiti: o Sema, Hama e Iapheta. Ua faaipoipo pauroa ta Noa mau tamaiti. Ua faaue Iehova ia Noa ia patu i te hoê araka rahi, mai te hoê afata rarahi ïa, o te ore e tomo. Ia tupu mai te diluvi, e faaorahia Noa e to ˈna utuafare maoti teie araka. Ua faaue atoa Iehova ia Noa ia aratai i te mau animara e rave rahi i roto i te araka ia nehenehe atoa ratou e ora.

Ua haamata oioi Noa i te patu i te araka. Ua na reira oia e to ˈna utuafare fatata e 50 matahiti i te maoro. Ua patu ratou i te araka mai ta Iehova iho â i faaue atu. I taua taime ra, ua faaara atoa Noa i te mau taata e e tupu te diluvi. Aita râ hoê aˈe tei faaroo ia ˈna.

Ua tae mai te taime no te haere i roto i te araka. A hiˈo na eaha tei tupu i muri iho.