Génesis

44 Ta patil, te José jich la yalbey ta mantal te winik te wentainbil yuʼun te snae: «Nojesbeya ta bayal weʼelil te scostal te winiketik, jaʼ chikan te jayeb ya xjuʼ ya yichʼik baele sok otsesa te stakʼinik ta scostalik ta jujuntul. 2 Pero, ta stiʼ scostal te xutil kereme otsesa te stojol te sit awal tsʼunubil yuʼun sok otsesa te jcopa; te copa te pasbil ta plata». Te winik jich la spas te bitʼil albot ta mantal yuʼun te José.

3 Ta sakubel kʼinal, te winiketik bajtik sok te sburroik. 4 Kʼalal mato kʼax namajemik* bael te banti ay te mukʼul lum, te José jich la yalbey te winik te wentainbil yuʼun te snae: «¡Animajan! ¡Baan nutstiklana! Te kʼalal ya atatiklane, jichme xa awal: ‹¿Bin yuʼun chopol* te bin la apasbonkotik kʼalal lek te bin la jpastik ta atojolike? 5 ¿Mabal jaʼuk te copa ini te ya x-uchʼaj-a te kajwal sok te ya stuuntes ta snaʼel ta lek te bin ya xkʼot ta pasele? Kʼax ma lek te bin la apasike›».

6 Jaʼ jich la yaltiklanbey te kʼalal la statiklane. 7 Pero, jich la yalik: «¿Bin yuʼun te jich ya awal, kajwal? Te joʼotik maʼyuk bin-ora jich ya jpaskotik. 8 ¿Bin-utʼil kʼan kelkʼantik oro o plata ta sna te awajwale? ¡Melel kʼalalto ta skʼinal Canaán la kichʼtik sujtel tal te takʼin te la jtatik ta stiʼ jcostaltike! 9 Teme ya ata te bin yakat ta sleel, kajwal, akʼa lajuk te machʼa yichʼoje. Te yantike, akʼa yichʼik mosoinel awuʼun». 10 Jaʼ yuʼun, jich albotik yuʼun: «Jichme ya xkʼot ta pasel te bitʼil la awalike. Pero, jaʼnaxme ya jmosoin te machʼa yichʼoj te bin yakon ta sleele. Te yantike maʼyuk smul ya xjilik». 11 Ta oranax la skojtesik ta lum te scostalik sok ta jujuntul la sjambeyik te stiʼe. 12 Te winik xmelmon jajch sle ta jujun costal, jajch sle ta scostal te bankilal jaʼto ta scostal te xutil kereme. La sta te copa ta scostal te Benjamín.

13 Jich yuʼun la schʼiʼ* skʼuʼik. Tey-abi, ta jujuntul la schaʼmojtesbeyik yijkats te sburroik, jich sujtik bael ta mukʼul lum. 14 Kʼalal te Judá sok te sbankil yijtsʼinab kʼotik ta sna te José, teyto la staik-a. Jaʼ yuʼun la snijan sbaik kʼalalto ta lum ta stojol. 15 Jich albotik yuʼun te José: «¿Bin-a te la apasike? ¿Yuʼunbal ma anaʼojik-a te ya xjuʼ ya jnaʼ ta lek te bin ya xkʼot ta pasele?». 16 Jich la yal te Judá: «¿Bin ya kalkotik ta atojol, kajwal? ¿Bin-utʼil ya jcholtik awaʼiy te bin kʼot ta pasele? ¿Bin-utʼil ya kakʼtik ta ilel te maʼyuk jmultike? Te smelelil Dios la yakʼ ta naʼel te jmultike. ¡Ta ora ini, mosootik ya xkʼootik awuʼun, kajwal, jich bitʼil te machʼa la yichʼ tabeyel te copae!». 17 Pero, jich jamal la yal te José: «¡Maʼyuk bin-ora jich ya jpas-abi! Jaʼnax ya jmosoin jilel te machʼa la yichʼ tabeyel te copae. Te yantike jun yoʼtan ya xjuʼ ya xbajtik te banti ay te statike».

18 Tey-abi, te Judá noptsaj* ta stojol te José sok jich la yalbey: «Awokoluk, kajwal, ya jkʼan wokol te yakuk xjuʼ ya xkʼopojon ta atojol sok te manchuk ya x-ilinat, melel jich kʼoemat te bin-utʼil faraón. 19 Kajwal, te jaʼate jich la ajojkʼoybotik: ‹¿Kuxultobal te atatike? ¿Aytobal yan awijtsʼinik?›. 20 Te joʼotike jich la kalkotik, kajwal: ‹Kuxul, kuxul te jtatike, pero mamalix. Jaʼnix jich ay yan kijtsʼintik, jaʼ te xutil kereme. Ayin* kʼalal mamalix-a te jtatkotike, laj te sbankil te jun snan* soke, jaʼxanix jilem stukel. Kʼax kʼux ta oʼtanil yuʼun te state›. 21 Ta patil, jich la awalbotik: ‹Ikʼbonik tal yuʼun ya kilbey sit yelaw›. 22 Te joʼotike jich la kalbatkotik, kajwal: ‹Te kerem ma xjuʼ ya xpitot ta stojol te state. Te jichuk ya xkʼot ta pasele, yananix xlaj-a te state›. 23 Pero, te jaʼate jich la awalbotik: ‹Mame xtalex ta jtojol teme maba awikʼojbonik tal te awijtsʼinike›.

24 »Kʼalal kʼoonkotik ta stojol te jtatik, te j-abat awuʼune, la jcholbeytik yaʼiy te bin la awalbotik, kajwal. 25 Te kʼalal kʼax te tiempoe, jich la yalbotik te jtatkotik: ‹Sujtanik bael yuʼun ya amanikxan tal jtebuk weʼelil›. 26 Pero, jich la kalbeytik: ‹Ma xjuʼ ya xboonkotik ta stojol te winik-abi jaʼto teme ya kikʼtik bael te xutil kerem kuʼuntike. Jaʼnax ya xkootik bael teme ya sjokinotik te kijtsʼintike›. 27 Jaʼ yuʼun, jich la yalbotik te jtatkotik, te j-abat awuʼun: ‹Te jaʼexe, anaʼojik ta lek te chaʼtulnax jnichʼnab la yakʼbon te kiname. 28 Te jtule lokʼ bael ta jtojol sok jich la kal: «¡La yichʼ tiʼel yuʼun jkojt jtiʼawal chambalam!» Jaʼtonix-abi, maʼyuk kilojbeyix sit yelaw. 29 Teme ya awikʼbonik bael te jnichʼan sok teme ay la sta swokol ta be soknix teme laje, jaʼ ta awentaik te ya xkoon bael sok sakal stsotsel jol sok mel-oʼtan ta Mukenal›.*

30 »Te jtate kʼax kʼux ta yoʼtan te skereme, jichnix te bitʼil kʼux ya yaʼiy sbae. Teme ya sujton bael ta stojol te jtat, te j-abat awuʼun, pero teme maba ya sjokinotik bael te kereme, 31 yame xlaj te jtatkotik teme maba ya yil te snichʼane. Jaʼ ta jwentatik te ya xko bael sok sakal stsotsel sjol sok mel-oʼtan ta Mukenal.* 32 Te joʼone jamal la kalbey te jtat te ya jwentain te kereme. Jich la kalbey: ‹Teme maba ya kikʼbat sujtel tal, jaʼme jmul ya xkʼot ta sbajtelkʼinal, mame jaʼukat›. 33 Jich yuʼun, kajwal, awokoluk, joʼukonme ya xjilon ta moso awuʼun ma jaʼuk te kereme, yuʼun jich ya xjuʼ ya sujt bael sok te sbankiltake. 34 ¿Bin-utʼil kʼan sujtukon bael ta stojol te jtat teme maba ya sjokinon bael te kereme? ¡Ma stsʼijk kuʼun te ya kil te ya xkʼax swokol te jtat ta swenta-abi!».