Éxodo

35 Ta patil, te Moisés la stsob spisil te israeletik sok jich la yalbey: «Jaʼ ini jaʼ te bin la yal ta mantal te Jehová te ya skʼan pasel: 2 ya xjuʼ ya x-aʼtejex wakeb kʼajkʼal, pero ta sjukebal kʼajkʼal chʼultesbilme ya xkʼot awuʼunik; jaʼ jun sábado yuʼun ya akux awoʼtanik ta swenta te Jehová. Teme ay machʼa ya x-aʼtej ta sábado, yame skʼan ya yichʼ milel. 3 Mame xa atsumik kʼajkʼ ta anaik ta sábado».

4 Ta patil, te Moisés jich la yalbey spisil te israeletik: «Jaʼ ini jaʼ te bin la yal ta mantal te Jehová: 5 ‹Tsobaik tal ta apisilik jun majtanil ta stojol te Jehová. Spisil te machʼa jich yoʼtan ya yakʼ jun majtanil ta stojol te Jehová, akʼa yichʼ tal: oro, plata, cobre, 6 hilo te azul sbonil, kuxul morado hilo te pasbil ta stsotsel tuminchij, tsajal hilo, lekil lino, stsotsel tentsun, 7 snujkulel tat tuminchij te bonbil ta tsaj, snujkulel foca, acacia-teʼ, 8 aceite ta swenta te yawil kʼajkʼetik, bálsamo te ya xtuun ta swenta te aceite te ay machʼa ya yichʼ malel ta sjol sok ta swenta te pom te sumetnax yikʼ,* 9 jaʼnix jich ónice-tonetik sok yantik tonetik yuʼun ya yichʼ akʼbeyel te efod sok te majkil tanil.*

10 »›Akʼa talukik spisil te machʼatik ya snaʼik ta lek aʼtel te ay ta awolilik sok akʼa spasik spisil te bin yaloj ta mantal te Jehová: 11 te nailpakʼ templo sok te spakʼul soknix te smujkil, te sganchoil sok te smarcoil, skʼatal teʼel, oyetik yuʼun sok te skajtajib;* 12 te skaxaul chapbilkʼop sok te steʼel soknix te smajkil, sok te cortina te ya xatawan; 13 te mesa, te steʼel, sok spisil te bintik ya xtuun yuʼun, te pan te ya yichʼ akʼel ta stojol te Dios; 14 te skajtajib kʼajkʼ, te bintik ya xtuun yuʼun, te yawil kʼajkʼetik sok te aceite te ya xtuun yuʼun ya yichʼ tsumel te kʼajkʼ; 15 te skajtajib schikʼojibal pom sok te steʼel; te aceite te ay machʼa ya yichʼ malel ta sjol sok te pom te sumetnax yikʼ;* te cortina yuʼun te yochibal te nailpakʼ templo; 16 te skajtajib chikʼbil majtanil, te schajchajtakʼinul te pasbil ta cobre, te steʼel sok spisil te bintik ya xtuun yuʼun; te yawil jaʼ sok te skajtajibe; 17 te scortinaul te amakʼ, te oyetik sok te skajtajibik; te cortina yuʼun te yochibal te amakʼe; 18 te estacaetik yuʼun te nailpakʼ templo, te estacaetik yuʼun te amakʼ sok te schʼajanul, 19 jaʼnix jich te kʼuʼuletik te leknax jalbilik te ya yichʼ lapel ta chʼul awilal, te chʼul kʼuʼuletik yuʼun te sacerdote Aarón sok te kʼuʼuletik yuʼun te snichʼnab swenta ya x-abatinik ta sacerdoteil›».

20 Jich spisil te israeletik lokʼik bael ta stojol te Moisés. 21 Spisil te machʼatik tijbot yoʼtanik sok spisil te machʼatik la skʼan yoʼtanik yakʼel la yichʼbeyik bael smajtan te Jehová. Jaʼ ya yichʼ tuuntesel yuʼun ya yichʼ pasel te nailpakʼ ta swenta tsoblej yuʼun ya yichʼ chajpanel spisil te bintik ya yichʼ tuuntesel ta abatinel tey-a sok yuʼun ya yichʼ pasel te chʼul kʼuʼuletik. 22 Maba komik ta bael winiketik sok antsetik te sok spisil yoʼtanik yichʼojik bael slutʼojibal skʼuʼik, stakʼin schikinik, schʼokowik sok yantik te ya stuuntesik ta schʼalilik. Jaʼnix jich yantik biluketik te pasbilik ta oro. Ta spisilik la yichʼik bael ta stojol te Jehová te smajtanik te pasbilik ta oro. 23 Jaʼnix jich la yichʼik bael spisil te machʼatik ay yuʼunik hilo te azul sbonil, kuxul morado hilo te pasbil ta stsotsel tuminchij, tsajal hilo, lekil lino, stsotsel tentsun, snujkulel tat tuminchij te bonbil ta tsaj sok snujkulel foca. 24 Spisil te machʼatik la skʼan yakʼik ta majtanil plata sok cobre la yichʼik bael ta stojol te Jehová, sok spisil te machʼatik ay yuʼunik acacia-teʼ la yichʼik bael swenta ya xtuun yuʼunik ta spasel te aʼtelile.

25 Spisil te antsetik te ya snaʼik ta lek aʼtel la spasik hilo sok la yichʼik bael te bin la spasike: hilo te azul sbonil, kuxul morado hilo te pasbil ta stsotsel tuminchij, tsajal hilo sok lekil lino. 26 Sok spisil te antsetik te ya snaʼik ta lek aʼtel te tijbot yoʼtanik la spasik hilo sok te stsotsel tentsun.

27 Jaʼnix jich, te jolaletik yuʼun te lum la yichʼik bael ónice-tonetik sok yantik tonetik yuʼun ya yichʼ akʼbeyel te efod sok te majkil tanil.* 28 Jaʼnix jich la yichʼik bael bálsamo, aceite te ya xtuun yuʼun ya yichʼ tsumel kʼajkʼ, aceite te ay machʼa ya yichʼ malel ta sjol sok aceite ta swenta te pom te sumetnax yikʼ.* 29 Spisil te winiketik sok te antsetik te tijbot yoʼtanik ay bin la yichʼik bael ta swenta te aʼtel te ya skʼan ya yichʼ pasel te la yal ta mantal te Jehová ta swenta te Moisés. Te israeletik spasemal yoʼtanik la yakʼbeyik smajtan te Jehová.

30 Te Moisés jich la yalbey te israeletik: «Ilawilik, te Jehová la stsa te Bezalel, snichʼan Urí, snichʼan Hur, te talem ta stsʼumbal Judá. 31 La snojesbey ta yoʼtan te chʼul espíritu* yuʼun Dios swenta ay spʼijil yoʼtan, te ya yichʼbey swentail sok te yakuk snaʼ ta lek spasel spisil ta chajp aʼtelil 32 yuʼun jich ya xjuʼ ya spas te bintik tʼujbilik ta ilel, te ya x-aʼtej sok oro, plata sok cobre, 33 te ya sboj sok ya yakʼ ta yawil te tonetik soknix yuʼun ya spas spisil ta chajp biluketik ta teʼ. 34 Sok la yakʼbey ta yoʼtan te Bezalel sok te Oholiab te snichʼan Ahisamac, te talem ta stsʼumbal Dan, te ya spʼijubtesik te yantike. 35 Jaʼnix jich la yakʼbey ta yoʼtanik yuʼun ya snaʼik spasel tʼujbil aʼteliletik sok te ya snaʼik tsʼisomajel ta hilo te azul sbonil, kuxul morado hilo te pasbil ta stsotsel tuminchij, tsajal hilo sok lekil lino soknix te ya snaʼik jalab. Te winiketik-abi ya spasik biluk ta chajp aʼteliletik sok ya schajpanik biluk ta chajp aʼteliletik te tʼujbilik ta ilel.