Deuteronomio
33 Jaʼ ini jaʼ te bendición la yakʼ te Moisés, te winik yuʼun te smelelil Dios, te la yakʼbey te israeletik te kʼalal mato xlaj-ae. 2 Jich la yal:
«Jaʼto ta Sinaí tal te Jehová
sok jaʼto ta Seír xlemetnax ta stojolik.
Xlemetnax sok yutsilal jaʼto ta witstikil yuʼun Parán,
sok jokinbil yuʼun bayal ta mil chʼul-abatetik,
ta swaʼel ayik te machʼatik chapalik ta yakʼel guerra.
3 Kʼux la yaʼiy ta yoʼtan te lum yuʼun.
Spisil te chʼul lum yuʼun ay ta akʼab.
Tey nakalik ta yeʼtal awok.
Jajch yalik te bintik ya awale.
4 (Te Moisés la yakʼbotik mantaliletik, leyetik,
te jaʼ kʼot ta stojol te lum yuʼun te Jacob).
5 Jaʼ la yichʼ yaʼtel ta ajwalil ta Jesurún,*
kʼalal te jwolwanejetik yuʼun te lum la stsob sbaik
sok spisil ta chajp stsʼumbal te lum yuʼun Israel.
6 Jal akʼa kuxinuk te Rubén, mame xlaj,
sok mame jtebuknax te swiniktake».
7 Jich la yakʼbey bendición te Judá:
«Kajwal, Jehová, aʼiybeya skʼop te Judá
sok ikʼa tal sujtel ta lum yuʼun.
Skoltayoj te bintik yuʼun ta swenta skʼab,
koltaya yuʼun ya yakʼbey guerra te skontratak».
8 Jich la yal ta stojol te Leví:
«Te Tumim sok te Urim* awuʼun* jaʼ yuʼun ya xkʼot te winik te jun yoʼtan ta atojol,
jaʼ te machʼa la apas ta prueba ta Masá.
Jaʼat la atsak aba ta kʼop sok ta stsʼeel slokʼib jaʼ yuʼun Meribá,
9 jaʼ te winik te jich la yalbey te smeʼ state: ‹Maba la kichʼtiklan ta wenta›.
Ni jaʼuk la skʼan la snaʼbey sba te yermanotak
sok maba la yichʼ ta wenta te yal snichʼnab.
Melel la schʼuunik spasel te bin la awale
sok la skʼotesik ta pasel te chapbilkʼop awuʼune.
10 Akʼa snojptesik te Jacob ta swenta te bintik achapoj
sok akʼa snojptesik te Israel ta swenta te Ley awuʼune.
Akʼa yakʼik pom te kʼax sumetnax yikʼ* ta atojol
sok akʼa yakʼik tsʼakal amajtan ta kajtajib awuʼun.
11 Kajwal, Jehová, akʼbeya bendición te yip,
sok lekuk ya awil te yaʼtel skʼabik.
Wakʼbeya* yaʼik te machʼatik ya xkontrainot yuʼun,
yuʼun jich maba ya xjajchikxan ta stojol te machʼatik ya x-ilayot yuʼun».
12 Jich la yal ta stojol te Benjamín:
«Te machʼa kʼux aʼiybil yuʼun te Jehová junuk yoʼtan ya xnain ta stojol;
te bitʼil ya skanantay ta sjunal kʼajkʼal,
junme yoʼtan ya xnain ta snejkʼel».
13 Jich la yal ta stojol te José:
«Te Jehová akʼa yakʼbey bendición te skʼinal
ta swenta te bintik lek ta chʼulchan
sok te tsʼujul soknix te slokʼib jaʼetik te ayik ta yeʼtal lum,
14 sok te bintik lek ya yakʼ xchʼi te kʼajkʼal
sok te lekil sit awal tsʼunubil te ya yakʼ ta jujun u,
15 sok te bintik lekikxan ay ta antiguo witstikil*
sok te bintik lek te ay ta chʼin witsetik te stalel ayike,
16 sok te bintik lek yuʼun te kʼinal sok te bintik ya snojes,
sok te lek ya yil te machʼa yak ta nainel ta jpejt* chʼix.
Akʼa taluk spisil ini ta sjol te José,
ta sba sjol te machʼa la yichʼ tsael ta yolil te sbankil yijtsʼinabe.
17 Te yutsilal jaʼ jich te bin-utʼil sba snichʼan toro,
te xulub yuʼun jaʼ pajal sok xulub te jkojt jaʼmal toro.
Sok-abi, ya sluch bael te lumetike,
ta jtsojbnax ya yichʼik luchel bael jaʼto kʼalal ta stiʼil balumilal.
Jaʼik te 10 mil ta tul yuʼun Efraín,
sok jaʼik te bayal ta mil yuʼun Manasés».
18 Jich la yal ta stojol te Zabulón:
«Tseʼelukme awoʼtan Zabulón, te kʼalal ya xlokʼat baele,
jaʼnix jichat Isacar, tseʼelukme awoʼtan ta nailpakʼetik awuʼun.
19 Yame yikʼik tal te lumetik ta wits.
Teyme ya yakʼik milbil majtaniletik ta swenta te bin stojil.
Melel ya slokʼesik te kʼulejaliletik te ya yakʼ te maretik
sok te kʼulejaliletik te nakʼalik yuʼun te jiʼileltik».
20 Jich la yal ta stojol te Gad:
«Akʼame yichʼ bendición te machʼa ya sjambeyxan bael stiʼil te skʼinal Gad.
Ya spajkan sba tey-a jich te bin-utʼil jkojt león-choj,
chapal yuʼun ya stsʼok lokʼel kʼabal, jich, sok jolal.
21 Jaʼ ya stsa ta stojol te bin sbabial ya xlokʼ ta kʼinal,
melel tey makbil-a te sparte jtul jpasley.
Ya stsob sbaik te jolaletik yuʼun te lume.
Ya skʼotes ta pasel te bin stojil ya yil te Jehová
sok te bintik schapoj ta stojol te lum Israel».
22 Jich la yal ta stojol te Dan:
«Jaʼ alal choj te Dan.
Ya xwil tal jaʼto tal ta Basán».
23 Jich la yal ta stojol te Neftalí:
«Te Neftalí jun yoʼtan te bitʼil lek ilbil yuʼun te Jehová
sok nojel ta bendicionetik yuʼun.
Ya yochintay te banti ya xmal te kʼajkʼal sok te sur».
24 Jich la yal ta stojol te Aser:
«Te bendición te la sta te Aser jaʼ te yal snichʼnab.
Lekuk ya x-ilot yuʼun te yermanotak
sok akʼa yajtsʼes ta aceite te yoke.
25 Pasbil ta hierro sok ta cobre te smajkil te puertaetik awuʼun,
te jayeb kʼajkʼal kuxulate junme awoʼtan ya x-ayinat.
26 Maʼyuk machʼa yan jich te bin-utʼil te smelelil Dios yuʼun Jesurún,
te ya xbeen ta chʼulchan yuʼun ya xtal skoltayat
sok yutsilal ya snajkan sba ta sba tokaletik.
27 Jaʼ anibal te Dios jaʼto tal ta namey kʼinal;
ay ta aweʼtal te skʼab te sbajtelkʼinal ay.
Jaʼ ya stentiklan lokʼel ta atojol te akontratak,
jich ya xbajt yal: ‹¡Lajinlana!›.
28 Te Israel jun yoʼtan ya xnain,
sok te stsʼumbal Jacob parte ya xnain
ta jpam kʼinal te banti ay sit awal tsʼunubiletik sok yachʼil vino
sok te banti ya xko tal tsʼujul ta chʼulchan.
29 ¡Ay stseʼelil awoʼtan Israel!
¿Machʼa ya spajat
lum te koltaybilat yuʼun te Jehová
te jaʼ majkilal awuʼun te ya skanantayat
sok te jaʼ espada awuʼun te ay yutsilal?