2 Reyes

17 Te Hosea snichʼan Elá och ta ajwalil ta Israel ta Samaria te kʼalal ayix 12 jaʼbil ta ajwalil-a te Acaz ta Judá sok wentainwan baluneb jaʼbil. 2 Jaʼ la spas te bintik ma lek ya yil te Jehová, jaʼnax te ma jichuk kʼaxto la spas te bitʼil te ajwaliletik ta Israel te nailajem yuʼune. 3 Te Salmanasar te ajwalil yuʼun Asiria mo ta yakʼbeyel guerra, jich te Hosea jajch ta abatinel ta stojol te ajwalil sok la stojbey spatan. 4 Pero, te ajwalil yuʼun Asiria la snaʼ stojol te ay bin muken yak ta schapel te Hosea yuʼun ya xkontrainot yuʼun, melel la stikun winiketik ta stojol te So te ajwalil yuʼun Egipto sok te maba la stojix spatan jich te bitʼil la spas tal ta jujun jaʼbile. Jaʼ yuʼun, te ajwalil yuʼun Asiria la yakʼ ta chukojibal sok tey la schuk jilel-a te Hosea.

5 Jich te ajwalil yuʼun Asiria la yochintaybey spisil te skʼinale. Kʼot ta Samaria sok la sjoytay oxeb jaʼbil. 6 Te kʼalal ayix baluneb jaʼbil ta ajwalil-a te Hosea, te ajwalil yuʼun Asiria la yuʼunin te Samaria. Tey-abi la schuktiklan bael ta Asiria te israeletik, la yakʼ nainukik ta Halá sok ta Habor te ay ta stsʼeel te mukʼul jaʼ Gozán soknix ta mukʼul lumetik yuʼun te medoetik.

7 Jich kʼot ta pasel ini, melel la sta smulik ta stojol te Jehová te Dios yuʼunik, jaʼ te machʼa lokʼesotik tal yuʼun ta skʼinal Egipto te mosoinbilik yuʼun-a te faraón te ajwalil yuʼun Egipto. La yichʼik ta mukʼ yantik diosetik 8 sok la spasik te bintik kʼayemik ta spasel te nacionetik te la stentiklan lokʼel te Jehová ta stojol te israeletik soknix te costumbreetik te jajch spasik te ajwaliletik yuʼun Israel.

9 Te israeletik jaʼ la spasik te bintik ma lek ya yil te Jehová te Dios yuʼunike. La spasik toyol awilaletik ta spisil te mukʼul lumetik yuʼunik, jich bitʼil ta toyol tsʼajkʼetik yuʼun yilojibal kʼinal sok ta mukʼul lumetik te joytaybilik ta tsʼajkʼetik te yichʼoj lek yip.* 10 Jaʼnix jich la spasik balal tonetik te ya yichʼik ta mukʼ sok chʼul teʼetik yuʼun Aserá ta spisil toyol witsetik soknix ta spisil yeʼtal teʼetik te bayal yabinal; 11 ta spisil te toyol awilaletik ya yakʼik te xtomet schʼailel te chikʼbil majtanil yuʼunik, jich bitʼil ya spasik te nacionetik te la stentiklan lokʼel te Jehová ta stojolike. Jaʼ la spasik te bintik ma lek yuʼun la sjachbeyik yilinba te Jehová.

12 La yichʼik ta mukʼ lokʼombaetik te ilobtik* sba, manchukme jich la yichʼik albeyel yuʼun te Jehová: «¡Mame jichuk xa apasik!». 13 Te Jehová la skom te lum Israel sok te Judá ta swenta te j-alwanejetik yuʼun sok ta swenta te winiketik te ya yilik najalsitil.* Jich la yaltiklanbey: «¡Ijkitayaik te chopol* beetik awuʼunik sok sujtanik tal! Chʼuunaik spasel te mantaliletik kuʼun sok te bintik kaloje, spisil te bintik tsʼibaybil ta ley te la kakʼbey te antiguo ameʼ atatik jaʼ te la jtikunbeyex ta swenta te j-alwanejetik te jaʼik j-abatetik kuʼune». 14 Pero maba la yichʼik ta wenta. Kʼax tulan la yakʼ te yoʼtanik jich te bitʼil la spasik te antiguo smeʼ statik te ma la yakʼik ta ilel schʼuunel yoʼtanik ta stojol te Jehová te Dios yuʼunike. 15 La spʼajik te mantaliletik yuʼun, te chapbilkʼop la spas sok te antiguo smeʼ statik soknix la spʼajik te jultesel oʼtanil te la yichʼik akʼbeyele. Maba la skom sbaik ta yichʼel ta mukʼ lokʼombaetik te ma xtuunik, jaʼnix jich ma xtuun kʼotik-euk. Jaʼ la stʼunik te bin la spasik te yantik lumetik te joytaybilik yuʼune, manchukme albotik yuʼun te Jehová te manchuk jich ya spasike.

16 La yijkitayik schʼuunel spisil te mantaliletik yuʼun te Jehová te Dios yuʼunike. La spasbeyik slokʼombail chaʼkojt jkolel* toroetik ta ultesbil takʼin sok la spasik jun chʼul teʼ yuʼun Aserá. La snijan sbaik ta stojol spisil te bintik ay ta chʼulchan sok la yichʼik ta mukʼ te Baal. 17 Jaʼnix jich la schʼojik ochel ta kʼajkʼ te skerem nichʼnabik sok te yantsil nichʼnabik, la yakʼ sbaik ta jnaʼojel sok la slebeyik swentail te bintik ya xkʼot ta pasele. Jaʼ bajt ta yoʼtanik spasel te bintik ma lek ya yil te Jehová yuʼun ya sjachbeyik yilinba.

18 Jich yuʼun, te Jehová kʼax bayal ilin ta stojol te Israel, kʼaxto bayal ilin te jich la slokʼes bael ta stojole. Ma la yakʼ te ya xkol jilel ni jtuluk, jaʼxanix la yijkitay te stsʼumbal Judá.

19 Jaʼnix jich, te stsʼumbal Judá maba la schʼuun te mantaliletik yuʼun te Jehová te Dios yuʼune. Jaʼ la spasik-euk te bin kʼayemik ta spasel-a te Israele. 20 Te Jehová la spʼaj spisil te stsʼumbal Israel, la spejkʼanbey skʼoplal sok la yakʼ ta skʼab te jpojbiluketik jaʼto te kʼalal la slokʼeslan bael ta stojole. 21 La slokʼes bael te Israel ta stsʼumbal David, jich te Israel jaʼ la yotsesik ta ajwalil te Jeroboán snichʼan Nebat. Pero, te Jeroboán la yakʼ namajuk* ta stojol Jehová te Israel te jich la yakʼ sta tulan smulik. 22 Te lum Israel maba la yijkitay spasel te muliletik la spas te Jeroboán. Maba la yijkitayik spasel te muliletik-abi 23 jaʼto te kʼalal te Jehová la slokʼeslan bael ta stojole, jich te bitʼil la yal ta stojol spisil te j-alwanejetik te jaʼik te j-abatetik yuʼune. Jich yuʼun, te israeletik la yichʼik lokʼesel bael ta skʼinalik, la yichʼik ikʼel bael ta Asiria, jaʼ te banti ayik jaʼto ta ora ini.

24 Jich yuʼun, te ajwalil yuʼun Asiria la yikʼ tal ants winiketik ta Babilonia, Cutá, Avá, Hamat sok ta Sefarvaim, la yakʼ nainukik tey ta mukʼul lumetik yuʼun Samaria te banti nainik te israeletike. La yuʼuninik te Samaria, jich nainik ta mukʼul lumetik yuʼun. 25 Te kʼalal kʼotik ta nainel tey-a, maba yichʼojik ta mukʼ-a te Jehová. Jich yuʼun, te Jehová la stikun león-chojetik te ay chaʼoxtul milotik yuʼune. 26 Jaʼ yuʼun, jich la stikunbeyik ta albeyel te ajwalil yuʼun Asiria: «Te ants winiketik te la awikʼtiklan bael sok te la awakʼ nainukik ta mukʼul lumetik yuʼun Samaria, maba ya snaʼbeyik sba te religión yuʼun te Dios yuʼun te kʼinal-abi. Ta skaj te maba ya snaʼbeyik sba te religión yuʼun te Dios yuʼun te kʼinale, yak ta stikunel león-chojetik te yakik ta milel yuʼune».

27 Te kʼalal jich la yaʼiy stojol te ajwalil yuʼun Asiria, jich la yal ta mantal: «Ikʼaik sujtel jtuluk te sacerdoteetik te la achukik tale yuʼun ya xchaʼbajt ta nainel tey-a sok te ya snojptes te ants winiketik ta swenta te religión yuʼun te Dios yuʼun te kʼinal-abi». 28 Jich yuʼun, jtul sacerdote te la yichʼ tal chukel lokʼel ta Samaria sujt ta nainel ta Betel sok jajch snojpteslan te bitʼil ta ichʼel ta mukʼ te Jehová.

29 Pero, ta jujunchajp te lumetik te kʼotik ta nainel tey-ae la spas sdiosik sok la yakʼik ta temploetik te ayik ta toyol awilaletik te spasojik-a te samaritanoetike. Jich la spasik te jujunchajp lumetik jaʼ chikan te banti ayik ta nainel ta mukʼul lumetik. 30 Te winiketik yuʼun Babilonia la spasbeyik slokʼombail te Sucot-Benot, te machʼatik talemik ta Cut la spasbeyik slokʼombail te Nergal, te machʼatik talemik ta Hamat la spasbeyik slokʼombail te Asimá 31 sok te machʼatik talemik ta Avá la spasbeyik slokʼombail te Nibhaz sok te Tartac. Te machʼatik talemik ta Sefarvaim la yakʼik ta chikʼbil majtanil te snichʼnabik ta stojol te Adramélec sok te Anamélec te diosetik yuʼun te Sefarvaim. 32 Manchukme yichʼojik ta mukʼ-a te Jehová, la sleik winiketik yuʼun te lum swenta ya yotsesik ta sacerdoteetik ta toyol awilaletik. Jaʼ ya x-aʼtejik ta temploetik te ayik ta toyol awilaletik. 33 Ya yichʼik ta mukʼ te Jehová, pero jaʼnix jich ya yichʼik ta mukʼ te diosetik yuʼunike jaʼ chikan te bin sreligionik te jujunchajp lumetik te banti la yichʼik ikʼel tale.

34 Jaʼto ta ora ini maba yijkitayojik spasel te bin kʼayemik ta spasel ta sreligionik-ae. Maʼyuk ni jtuluk te ya yichʼ ta mukʼ te Jehová, maʼyuk ni jtuluk te ya schʼuun te bintik yaloj, te ya yichʼ ta mukʼ te bintik schapoj, te Ley yuʼun sok te mantaliletik te la yakʼ te Jehová ta stojol te snichʼnab te Jacob, jaʼ te machʼa la sjeltaybey te sbiil, te la yakʼbey sbiilin Israel. 35 Te kʼalal la schap skʼop te Jehová sok te israeletik, jich la yaltiklanbey ta mantal: «Mame xa awichʼik ta mukʼ yantik diosetik, mame xa akejan abaik ta stojolik, mame xa awakʼ abaik ta abatinel ta stojolik sok mame xa awakʼbeyik milbil majtaniletik. 36 Jaʼ ya skʼan ya awichʼik ta mukʼ te Jehová —jaʼ te machʼa la slokʼesex tal ta skʼinal Egipto ta swenta smukʼul yuʼel sok yip skʼab—, jaʼ ya skʼan ya akejan abaik ta stojol sok jaʼ ya skʼan ya awakʼbeyik milbil majtaniletik. 37 Yame skʼan ya achʼuunik spisil-ora te leyetik yuʼun, te bintik schapoj, te Ley yuʼun sok te mantaliletik te jaʼnix la stsʼibay ta atojolik soknix mame xa awichʼik ta mukʼ yantik diosetik. 38 Mame xchʼay ta awoʼtanik te chapbilkʼop la jpastik soknix mame xa awichʼik ta mukʼ yantik diosetik. 39 Jaʼme ya skʼan ya awichʼik ta mukʼ te Jehová te Dios awuʼunike, melel jaʼme te machʼa ya skoltayex lokʼel ta skʼab spisil te akontratakike».

40 Pero, ta jujunchajp te lumetik ini maba la schʼuunik, maba la yijkitayik spasel te bin kʼayemik ta spasel ta sreligionik-ae. 41 Manchukme yichʼojik ta mukʼ-a te Jehová, jaʼnix jich la yichʼik ta mukʼ te lokʼombaetik te spasojike. Jaʼto ta ora ini, jich yakik ta spasel te snichʼnabik sok te smamatakik* jich bitʼil la spasik te antiguo smeʼ statik.