¿Bin majtʼanil ya xjuʼ ya kakʼbeytik te Jehová?

TE JESÚS jich la yal ta jun buelta: «Ha bayel xan yutsil te machʼa ay bin ya yacʼ te bin utʼil ay bin ya yichʼ» (Hech. 20:35). Te bin la yal te Jesús jichnanix ya xkʼot ta pasel ta swenta te bitʼil kamigoinej jbatik sok te Jehovae. ¿Bin yuʼun te jich ya kaltike? Melel bayal bintik yakʼojbotik te ya yakʼ stseʼelil koʼtantike, pero yame jtatikxan bayal stseʼelil koʼtantik teme joʼotik ya kakʼbeytik jun majtʼanile. ¿Bin majtʼanil ya xjuʼ ya kakʼbeytik? Te Proverbios 3:9 ya yal: «Ichʼa ta mucʼ Jehová soc te bintic ay awuʼun». Te bintik ay kuʼuntike tey ochem skʼoplal-a te jtiempotik, te bintik ya jnaʼtik spasel, te kiptik sok te jtakʼintike. Kʼalal ya jtuuntestik te bintik ay kuʼuntik ta skoltayel te smelelil yichʼel ta mukʼ te Diose, yakotikme ta yakʼbeyel jun majtʼanil te Jehová, jaʼ-abi ya yakʼbotik bayal stseʼelil koʼtantik.

¿Bin ya skoltayotik swenta ma xchʼay ta koʼtantik yakʼbeyel Jehová te jtakʼintike? Te jpuk-kʼop Pablo la yalbey te corintoetik te yakuk skʼejik jtebuk te stakʼinik yuʼun ya yakʼik ta majtʼanil (1 Cor. 16:2). Teme ya akʼan ya anaʼbeyxan skʼoplal te bintik-utʼil ta akʼel te majtʼan takʼin ta alumale, ilawil te rekuadro ay ta alane.

Ay nasionetik te banti ma xjuʼ ta akʼel majtʼan takʼin ta Internet. Pero te pajina donate.jw.org ya yalbey skʼoplal chaʼoxchajp bintik-utʼil yan ya xjuʼ ta akʼele. Ay chaʼoxpam nasionetik te banti ta pajina-abi ay sjunal yuʼunik te ya yakʼbey sujtib jojkʼoyeletik te ya yichʼ pasel ta swenta te yakʼel majtʼan takʼine.