Kʼalal ya jkoltaybeytik skʼoplal te tojobtesel yuʼun Jehova, ya kakʼtik ta ilel kʼuxul-oʼtanil

Kʼalal ay machʼa ya yichʼ lokʼesel, jich ya yichʼ kanantayel-a te kongregasion soknix jich ya yichʼ tojobtesel te machʼa ma sujtes yoʼtan ta swenta te smule (1Co 5:6, 11). Teme ya jchʼuuntik te tojobteseletik yuʼun Jehová, ya kakʼtik ta ilel kʼuxul oʼtanil. Te kʼalal ay machʼa ya yichʼ lokʼesel ta kongregasion ya yakʼ bayal mel-oʼtan, kʼaxtoxan ya smel yoʼtan-a te sfamilia sok te ermanoetik yuʼun te komite judisial.

Te kʼalal jich ya jpastike, ya kakʼtik ta ilel skʼuxul koʼtantik sok te ya kichʼtik ta mukʼ te sbiil te Jehová soknix te mantaliletik yuʼune (1Pe 1:14-16). Jaʼnix jich ya kakʼbeytik yil skʼuxul koʼtantik te machʼa la yichʼ lokʼesele. Manchukme kʼux ta aʼiyel te tojobtesele, ya xjuʼ ya yakʼ «lamal-oʼtanil» (Heb 12:5, 6, 11). Teme yato jkʼopontik te machʼa yichʼojix lokʼesel ta kongregasion, maba yakotik ta yakʼel te ya stojobtes te Jehová. Juluk ta koʼtantik te Jehová ya xtojobteswan jich te bin-utʼil lek ya yil stukel (Jer 30:11). Jkoltaytik te Jehová sok akʼa jpasbeytik te skʼanojel yoʼtan kʼalal ya jmaliytik te ya sujt tal ta stojol Jehová te machʼa lokʼem kuʼuntike (Isa 1:16-18; 55:7).

KʼALAL LA AWILIX-A TE BIDEO JUNUK KOʼTANTIK TA STOJOL TE JEHOVÁ, AKʼBEYA SUJTIB TE JOJKʼOYELETIKE:

• 

  ¿Bin-utʼil ya yaʼiy sba te meʼil tatiletik kʼalal jtul yal snichʼnab ya yijkitay te Jehová?

• 

  ¿Bin-utʼil te kongregasion ya xjuʼ ya skoltaybey te sfamilia te machʼa la yichʼ lokʼesele?

• 

  ¿Bin relatoil te ay ta Biblia ya yakʼ ta ilel te jaʼ kʼax mukʼ skʼoplal te junuk koʼtantik ta stojol te Jehová ma jaʼuk ta stojol te jfamiliatike?

• 

  ¿Bin-utʼil ya kakʼtik ta ilel te jaʼ jun koʼtantik ta stojol te Jehová ma jaʼuk ta stojol te jfamiliatike?