Jun-nax aʼtejukotik sok te Jesucristo, te jwolwanej kuʼuntike

1. ¿Bin-a te skʼanojel yoʼtan te Dios ta ora ini?

TE BIN ya skʼan yoʼtan te Dios ta ora ini, jaʼ te ya yichʼ cholel te lek yachʼil kʼop yuʼun te Wentainel ta swolol Balumilal (Mar. 13:10; 1 Tim. 2:3, 4). Te aʼtelil ini jaʼ yuʼun te Jehová sok kʼax mukʼ skʼoplal ya yil, jaʼ yuʼun la stsa te sNichʼan te kʼax kʼux ta yoʼtan yuʼun ya swentain. Kʼax lek te machʼa yak ta swentainel te scholel skʼop Dios, jaʼ yuʼun te kʼalal ya xtal te slajibal kʼajkʼal ya jnaʼtik te kʼax tseʼel yoʼtan te Jehová ta swenta te bin la yichʼ pasel (Mat. 24:14).

2. ¿Bin ya kilbeytik skʼoplal ta artículo ini?

² Ta artículo ini ya kiltik te jaʼ ya stuuntes Jesús te «aʼbat te jun yoʼtan soc pʼij», yuʼun ya yakʼbotik te bin ya xtuun kuʼuntik ta swenta schʼuunel koʼtantik sok jaʼ swentainoj te scholel skʼop Dios, melel maʼyuk bin-ora jich yichʼojxan pasel (Mat. 24:45). Jaʼnix jich ya kiltik te bintik ya xjuʼ ya jpastik yuʼun jun-nax ya x-aʼtejotik sok te Jesús jaʼnix jich sok te j-abat te jun yoʼtan sok pʼij.

JAʼ YA SWENTAIN SCHOLEL SKʼOP DIOS TE JESÚS

3. ¿Bin aʼtelil akʼbil ta swenta te Jesuse?

³ Te Jesús jaʼ yak ta swentainel te scholel skʼop Dios. ¿Bin-utʼil ya jnaʼtik? Te kʼalal nopol ya xbajtix ta chʼulchan-a, la stsob te jnopojeletik ta wits yuʼun Galilea sok jich la yaltiklanbey: «Aʼbotonix quichʼ tulan caʼtel ta chʼulchan soc ta bahlumilal». Kiltik te bin la yalxan: «Ha yuʼun bahanic, otsesahic ta jnopojel spisil te nacionetic» (Mat. 28:18, 19). Chikan ta ilel te jaʼ akʼbil yaʼtel te Jesús yuʼun ya swentain te scholel skʼop Dios.

4. ¿Bin yuʼun ya jnaʼtik te yakto ta swentainel te Jesús te scholel skʼop Dios?

⁴ Te Jesús la yal te ya yichʼ cholel skʼop Dios sok ya yichʼ otsesel jnopojeletik ta «spisil te nacionetic» sok ya sjokin te jnopojeletik «ta jujun kʼajkʼal jaʼto ta slajibal kʼajkʼal» (Mat. 28:20, TNM). Chikan ta ilel te jaʼ yak ta swentainel te scholel skʼop Dios te Jesús jaʼto tal ta ora ini.

5. ¿Bin-utʼil ya jkʼotestik ta pasel te bin ya yal te Salmo 110:3?

⁵ Te Jesús snaʼoj te ya x-ayin bayal machʼatik ya scholik skʼop Dios ta slajibal kʼajkʼal. Sok snaʼoj te ya xkʼot ta pasel te albilkʼopetik ini: «Te pueblo awuʼun jun yoʼtan ya yacʼ sba ta acuenta te bin cʼahcʼalil yac awaʼiy cuentahinwanej» (Sal. 110:3). Jaʼ yuʼun teme yakat ta scholel te lek yachʼil kʼop, jun yakat ta aʼtel sok te Jesús sok te j-abat te jun yoʼtan sok pʼij, soknix yakat ta skʼotesel ta pasel te albilkʼop-abi. Manchukme ay wokoliletik ya yichʼ sitintayel, yak ta cholel te skʼop Diose.

6. ¿Bin wokolil yakotik ta sitintayel?

⁶ Jun wokolil te ya jsitintaytik jaʼ te kontrainel. Te apostataetik, te politicoetik sok te jwolwanejetik yuʼun religión ya yalik lotiletik ta swenta te aʼtelil ya jpastike. Teme ya schʼuun te jfamiliatik, te machʼatik ya snaʼbotik jbatik sok te joʼtaktik ta aʼtel, yaniwan spasik tulan yuʼun ya kijkitaytik te Jehová sok te scholel skʼop Dios. Pero ay nacionetik te ya yalbotik te ya smilotik te jkontrataktik, te ya skontrainotik, te ya stsakotik sok ya yotsesotik ta cárcel. Pero ma yan-nax ya kaʼiytik-a, melel te Jesús jich la yal: «Yac awichʼic ihlayel [...] ta scaj te jbihile» (Mat. 24:9). Te bitʼil ya kichʼtik ilayele ya yakʼ ta ilel te yakotik ta stʼunel te ejemplo yuʼun te Jesús sok te lek ya yilotik te Jehová (Mat. 5:11, 12). Te Diablo jaʼ ya swentain te kontrainel-abi, pero jaʼ bayalxan yuʼel te Jesús. Ta swenta te ya skoltayotik te Jesús, te skʼop Dios yak ta kʼoel ta stojol te ants winiketik ta spisil nacionetik.

7. ¿Bin-utʼil ya anaʼ te yak ta kʼoel ta pasel te bin ya yal Apocalipsis 14:6, 7?

⁷ Yan wokolil te ya jsitintaytik jaʼ te ay bayal ta chajp kʼopiletik. Ta najalsitil te la yakʼ ta ilel te Jesús ta stojol te jpuk-kʼop Juan, la yakʼ ta naʼel te maʼyuk bin ya smak yuʼun ya yichʼ alel te lek yachʼil kʼope (kʼopona Apocalipsis 14:6, 7). ¿Bin-utʼil juʼem kuʼuntik sitintayel te wokolil-abi? Jaʼ te ay ta jw.org publicacionetik te lokʼem ta Biblia kʼaxem ta jmil ta chajp kʼopiletik. Jaʼnix jich, te Cuerpo Gobernante yaloj te ya xjuʼ yichʼ kʼasesel kʼaxem ta 700 ta chajp kʼopiletik te libro Mulana, te jaʼ ya jtuuntestik ta yakʼel nojptesel ta Biblia. Jaʼnix jich yichʼoj pasel videoetik ta stojol te machʼatik ma xyaʼiyik kʼinal sok publicacionetik ta braille ta stojol te machʼatik ma xyilik kʼinal. Ta swenta-abi, bayalxan ants winiketik yakik ta yaʼiyel te lek yachʼil kʼop. Te albilkʼopetik te ay ta Biblia chikan ta ilel te yak ta kʼoel ta pasel: te ants winiketik te «bayel ta chahp scʼopic» yakik ta snopel yan kʼopil kʼoem, jaʼ te smelelil kʼop te ay Biblia (Zac. 8:23; Sof. 3:9). Spisil-abi yak ta kʼoel ta pasel, melel jaʼ yak ta swentainel te Jesucristo.

8. ¿Bin lek lokʼem-a te yak ta cholel te skʼop Dios ta ora ini?

⁸ Ta ora ini, ta 240 ta chajp nacionetik sok lumetik kʼaxem ta 8 millón ta tul ants winiketik ochemik ta organización yuʼun Jehová. ¡Soknix ta jujun jaʼbil ya yichʼik jaʼ bayal ta mil ta tul! Pero ma jaʼuk mukʼ skʼoplal te jaytule, te bin mukʼ skʼoplale jaʼ te bin ya yal te Biblia ta swenta te yachʼil talelil te jaʼ ya yakʼik ta ilel te yachʼil jnopojeletik (Col. 3:8-10). Bayal machʼatik yijkitayojik te mulwej, te majaw, te pʼajaw soknix te jaʼ mukʼxan skʼoplal ya yilik te snacionik. Yak ta kʼoel ta pasel te albilkʼop ay ta Isaías 2:4: «Ma ba ya schahpanix sbahic ta yaqʼuel guerra». Ta swenta te ya jpastik tulan te spisil-ora jlapojtik te yachʼil talelil, te ants winiketik ya yilik sok ya skʼan ya x-ochik tal ta organización yuʼun Jehová sok jaʼ ya kakʼtik ta ilel te jaʼ ya jtʼuntik te Jesucristo, te jwolwanej kuʼuntike (Juan 13:35; 1 Ped. 2:12). ¿Bin yuʼun te juʼem kuʼuntik spasele? Melel jaʼ yak ta skoltaybelotik te Jesús.

TE JESÚS YA STSA JTUL J-ABAT

9. Jich bitʼil ya yal Mateo 24:45-47, ¿bin la yal te Jesús te ya xkʼot ta pasel ta slajibal kʼajkʼal?

⁹ (Kʼopona Mateo 24:45-47). Te Jesús la yal te machʼa ya stojobtesotik ta swenta skʼop Dios ta slajibal kʼajkʼal bael jaʼ «te aʼbat te jun yoʼtan soc pʼij». Jaʼ yuʼun te j-abat-abi snujpʼ te tulan ya x-aʼtej ta ora ini, sok jich yak ta spasel. Te Jesús ya stuuntes chaʼoxtul j-abatetik te ya xbajtik ta chʼulchan swenta ya yaʼiy «macʼlinwanej ta yorahil» ta stojol te j-abatetik yuʼun Dios sok te ants winiketik te ya smulanik snopel te Biblia. Te winiketik-abi ma jaʼuk ya swentainbotik te schʼuunel koʼtantik (2 Cor. 1:24). Melel ya snaʼik te jaʼ «jtsobaw soc jpʼijubteswanej» te Jesucristo ta lum yuʼun Jehová (Is. 55:4).

10. ¿Bin libroil te ya xchiknaj ta dibujoetik la skoltayat yuʼun ya x-ochat ta j-abat yuʼun Dios?

¹⁰ Jaʼto tal ta 1919, te j-abat te jun yoʼtan schajpanoj bayal publicacionetik swenta ya yakʼbey snaʼ te ants winiketik te bintik smelelil ya yal te Bibliae. Ta 1921, te j-abat te jun yoʼtan sok pʼij la slokʼes ta inglés te libro El Arpa de Dios yuʼun ya yakʼ ta nopel te bin smelelil ay ta Biblia. Te kʼalal kʼax bael te tiempoe, jaʼnix jich la yichʼtiklan pasel yantik libroetik. ¿Bin libroil la skoltayotik ta snaʼbeyel sba te jTatik te ay ta chʼulchan sok te kʼuxuk ta koʼtantike? Jaʼikniwan ini: «Sea Dios veraz», La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Bin ya yakʼ ta nopel ta smelelil te Bibliae? O ¿Bin ya yakʼ jnoptik te Bibliae? O jaʼniwan yakat ta stuuntesel te yachʼil libro Mulana. Te libroetik-abi la yichʼtiklan pasel swenta ya skoltayotik ta yotsesel jnopojeletik, sok kʼax bayal skoltayojotik ta yorail.

11. ¿Bin yuʼun kʼax mukʼ skʼoplal te ya jnoptikxan ta swenta te Jehová sok te Biblia?

¹¹ Ma jaʼuknax te estudianteetik ya skʼan ya snopikxan ta swenta Jehová sok te bintik kʼubul ay ta Biblia, jaʼnix jich te joʼotike. Te jpuk-kʼop Pablo jich la yal: «Te machʼatic muqʼuiquix ha ya xtuhun yuʼunic te tulan weʼelil». Jaʼnix jich la yal teme ya jpas ta jkuxlejaltik te bin ya jnoptike, ya skoltayotik ta snaʼel «te bintic lec soc te bintic ma lecuque» (Heb. 5:14). Ta ora ini wokolniwan ya kaʼiytik schʼuunel spasel te mantaliletik yuʼun Jehová, melel kʼax ma lekix stalel te ants winiketik. Pero te Jesús yakʼbeyojotik te bintik ya xtuun kuʼuntik swenta tulan te schʼuunel koʼtantik, te bin-utʼil ya spase jaʼ ta swenta te Biblia. Te Jesús stuuntesoj te j-abat te jun yoʼtan swenta ya yakʼbotik te bintik ya xtuun kuʼuntike.

12. ¿Bin jpasojtik swenta ya kichʼtik ta mukʼ sbiil te Dios jich te bin-utʼil la spas te Jesús?

¹² Jich te bitʼil la spas te Jesús, te joʼotike ya kichʼtik ta mukʼ te sbiil te Dios jich te bin-utʼil ya skʼan pasele (Juan 17:6, 26). Jich bitʼil ta 1931 la kichʼtik biiltesel testigo yuʼun Jehová. Jich la kakʼtik ta ilel te ya jkʼantik te ya jtuuntesbeytik te sbiil te jTatik ay ta chʼulchan, melel kʼax mukʼ skʼoplal kuʼuntik (Is. 43:10-12). Sok ta octubre ta jaʼbilnix-abi, te sbiil te Dios jajch yichʼ akʼel ta yelaw te revista ini ta inglés. Jaʼnix jich ta Traducción del Nuevo Mundo la yichʼ akʼel te bantinix ya skʼan otsesel-ae. Jkʼaxel ma pajaluk sok te bin ya spasik te yantik religionetike, te ya slokʼesbeyik te sbiil te Dios ta sBibliaik.

TE JESÚS YA SWENTAIN TE JNOPOJELETIK YUʼUN

13. ¿Bin ya yakʼbat schʼuun awoʼtan te jaʼ yak ta stuuntesel Jesús te «aʼbat te jun yoʼtan soc pʼij»? (Juan 6:68).

¹³ Te Jesús stuuntesoj te «aʼbat te jun yoʼtan soc pʼij», swenta ya yakʼ jun organización liʼ ta Balumilal te banti ya xjuʼ ya yichʼik ta mukʼ ta smelelil te Diose. ¿Bin ya anop ta swenta te organización-abi? Jichniwan ya awaʼiy aba te bin-utʼil la yaʼiy sba te Pedro, te jich la yalbey te Jesús: «¿Machʼa yan ya jtʼuncotic? Haʼat awichʼoj te cʼop scuenta cuxlejal sbahtel qʼuinal» (Juan 6:68). ¿Binwan kileltik te manchuk la jnaʼbeytik sba te organización yuʼun Jehová? Te Cristo jaʼ ya stuuntes-abi yuʼun ya yakʼbotik te bintik ya xtuun kuʼuntik ta swenta schʼuunel koʼtantik. Soknix ya spʼijubtesotik yuʼun ya jpastik ta lek te kaʼteltik ta stojol Dios. Jaʼnix jich ya skoltayotik yuʼun ya jlaptik te yachʼil talelil swenta ya kakʼbeytik stseʼelil yoʼtan te Jehová (Efes. 4:24).

14. ¿Bin-utʼil skoltayojat te ayat ta organización yuʼun Jehová ta yorail te tulan chamel COVID-19?

¹⁴ Te kʼalal ya jsitintaytik wokoliletik, te Jesús ya stojobtesotik sok spʼijil yoʼtan. Jaʼ jich chikan ta ilel te kʼalal jajch te tulan chamel COVID-19. Bayal ants winiketik ta swolol Balumilal ma snaʼikix te bin ya spasike, pero te Jesús la sle bin-utʼil ya stojobtesotik swenta ya kichʼtik kanantayel. La kichʼtik albeyel te ya jtuuntestik cubreboca te banti ay bayal ants winiketik soknix te ma jlakʼ jbatike. Te ancianoetik la yichʼik jultesbeyel ta yoʼtanik te spisil-ora ya skʼoponik te publicadoretik soknix ya yilik teme ay bin ya xtuun yuʼunik soknix ta swenta schʼuunel yoʼtanik (Is. 32:1, 2). Jaʼnix jich te informe yuʼun te Cuerpo Gobernante yakʼbeyojotik bayal tojobteseletik sok smukʼul koʼtantik.

15. ¿Bintik kichʼojtik albeyel ta yorail te tulan chamel, sok bintik lekilal jtaojtik yuʼun?

¹⁵ Ta yorail te tulan chamel, jaʼnix jich la kichʼtik albeyel te bin ya xjuʼ ya jpastik ta swenta te tsoblejetik sok te scholel skʼop Dios. Ta oranax jajch jpastik te tsoblejetik sok te mukʼul tsoblejetik ta videoconferencia, sok yakotik ta scholel te skʼop Dios ta carta sok ta teléfono. Yakʼojbotik bayal bendición te Jehová te bitʼil jpasojtik tulane. Bayal beteletik yalojik te toyem yajtalul te machʼa ochik ta publicador. Jaʼnix jich ta jkʼajkʼaleltik bayal hermanoetik ay bintik lek lokʼem yuʼunik te ya yakʼ yip koʼtantik (ilawil te recuadro «Te Jehová ya yakʼbey bendición te scholel skʼop Dios»).

16. ¿Bin-a te schʼuunoj koʼtantike?

¹⁶ Ayniwan chaʼoxtul hermanoetik la yalik te jelaw te organización te kʼalal la yalbotik te bin-utʼil ya jkanantay jbatik ta swenta te tulan chamel. Pero chikan ta ilel te jaʼ kʼax lek te tojobtesel la kichʼtike (Mat. 11:19). Teme ya jnopilan ta koʼtantik ta swenta te bin-utʼil ya skanantayotik sok skʼuxul yoʼtan te Jesús, schʼuunoj koʼtantik te chikan bin ya xtal ta pajel chaʼbej, te Jehová sok te sNichʼan spisil-ora ya sjokinotik (kʼopona Hebreos 13:5, 6).

17. ¿Bin yaʼiyel ya awaʼiy aba te bitʼil jaʼ ya swentainat ta aʼtel te Jesús?

¹⁷ ¡Kʼax tseʼel koʼtantik te jaʼ ya swentainotik ta aʼtel te Jesús! Ochemotik ta jun organización te ma yakʼoj te jaʼ ya xatotik te jnaciontik, te jtsʼumbaltik o te jkʼoptik. Kichʼojtik akʼbeyel spisil te bin ya xtuun kuʼuntik ta swenta te schʼuunel koʼtantik sok chapalotik yuʼun ya jcholtik skʼop Dios. Ta jujuntul te joʼotik jnopojtik bin-utʼil ya jlaptik te yachʼil talelil sok te kʼuxuk ta koʼtantik te yantik. ¡Kʼax lek ya kaʼiy jbatik te bitʼil jaʼ jwolwanej kuʼuntik te Jesús!