¿Yabal anaʼ yilel te bin smelelil?

1. ¿Bin yilel ya awil te smelelil kʼope?

TE J-ABATOTIK yuʼun te Dios kʼux ta koʼtantik te smelelil kʼope, tey yichʼoj yip-a te schʼuunel koʼtantike (Rom. 10:17). Schʼuunoj koʼtantik te Jehová, jaʼ la yakʼ te congregación yuʼun «jaʼ yoyal sok te ya skoltaybey skʼoplal te smelelil kʼope» (1 Tim. 3:15). Sok stseʼelil koʼtantik ya jchʼuunbeytik skʼop te machʼatik ya swentainotik, melel ya yalbotik te bin ya skʼan ya yal te Biblia sok ya skoltayotik yuʼun ya jpasbeytik te skʼanojel yoʼtan te Dios (Heb. 13:17).

2. Jich bitʼil ya yal Santiago 5:​19, ¿bin yuʼun ya skʼan ya jtsajtay jbatik te j-abatotik yuʼun te Diose?

² Manchukme jchʼuunojtikix te smelelil kʼop sok te ya jpastik te bin ya yal te organización yuʼun te Diose, yato xjuʼ te ya kichʼtik namajtesel ta stojol te smelelil kʼope (kʼopona Santiago 5:19). Te Satanás ya skʼan te yakuk kijkitaytik ta yakʼel ta ilel smukʼul koʼtantik ta swenta te bin ya yal te Biblia, sok te manchuk ya jchʼuuntikix te bin ya yal te organización yuʼun te Diose (Efes. 4:14).

3. ¿Bin yuʼun ma skʼan ya kijkitaytik te smelelil kʼope? (Efesios 6:​13, 14).

³ (Kʼopona Efesios 6:​13, 14). Te Pukuj nopolix ya xbajt yal lotiletik yuʼun jich spisil te nacionetik ya skontrainik te Jehová (Apoc. 16:​13, 14). Jaʼnix jich, jnaʼojtik te Satanás ya spas tulan yuʼun ya sloʼlayxan te j-abatetik yuʼun te Diose (Apoc. 12:9). Jaʼ yuʼun, kʼax mukʼ skʼoplal te yakuk jnaʼtik stsajtayel bintik-a te smelelil sok bin-a te lotile, sok te yakuk jchʼuuntik te bin smelelile (Rom. 6:17; 1 Ped. 1:22). Jaʼ te bin ya skʼan ya jpastik yuʼun jich ya xkolotik jilel-a ta slajibal kʼajkʼal.

4. ¿Bin ya xbajt kilbeytik skʼoplal ta artículo ini?

⁴ Ta artículo ini ya kalbeytik skʼoplal cheb taleliletik te ya xtuun kuʼuntik yuʼun ya jnaʼtik yilel bin-a te smelelil te lokʼem tal ta Biblia sok te ya jpastik te bin ya yal te organización yuʼun te Diose. Jaʼnix jich ya xbajt kiltik oxchajp skʼoplal te bin ya skʼan ya jpastik yuʼun ma xkijkitaytik te smelelil kʼope.

TALELILETIK TE YA SKOLTAYOTIK TA YILEL TE BIN SMELELIL

5. ¿Bin-utʼil snitojbey sba skʼoplal te xiʼel te Jehová sok te snaʼel stsajtayel bin-a te smelelile?

⁵ Te xiʼel te Jehová. Te xiʼel te Jehová ya skʼan ya yal te kʼux ta koʼtantik sok te maʼyuk bin-ora ya jpastik te bin ma smulane. Ya skʼan ya jnaʼtik stsajtayel te bin lek sok te bin ma lek, te bin smelelil sok te bin lotil, yuʼun jich lek ya yilotik-a te Jehová (Prov. 2:​3-6; Heb. 5:14). Ma skʼan ya jxiʼtik te ants winiketik jaʼ ya skʼan ya jxiʼtik te Jehová, melel te ants winiketik jaʼ ya spasik te bin ma smulan te Jehovae.

6. ¿Bin la spasik te lajuntul jtsajtaywanejetike?

⁶ Teme jaʼ ya kakʼtik te jaʼ ya jxiʼtik te ants winiketik te bitʼil te Jehovae, ya xjuʼ te jaʼ ya xjajch jchʼuuntik te bin ma lek ta stojol te Jehová. Jnop kaʼiytik ta swenta te 12 ta tul jtsajtaywanejetik te bajt yilik te kʼinal te albotik yuʼun Jehová te ya yichʼik te israeletike. Te lajuntul jtsajtaywanejetike, jaʼ bayalxan la xiʼik te cananeoetik te bitʼil te Jehovae. Jaʼ yuʼun, jich la yalik: «Ma xhuʼ cuʼuntic yaʼbeyel guerra te winiquetique, yuʼun cʼax hich yipic a te bin utʼil te hoʼotique» (Núm. 13:​27-31). Melelnix-a te jaʼ kʼax bayal yip te cananeoetik te bitʼil te israeletik. Pero, te kʼalal la yalik te ma xjuʼ yuʼunik stsalel te skontratakike, jaʼ yak ta chʼayel ta yoʼtanik te Jehová. Jaʼ la skʼan te jaʼ bajtuk ta yoʼtanik te bin la skʼan te Jehová te yakuk spas te israeletik, sok te la skʼan te juluk ta yoʼtanik te bin spasoj te Jehová ta stojolik. Te jichuk la spasike jichniwan la staik ta ilel te cananeoetik te ma xjuʼ yuʼunik stsalel te Machʼa spisil ya xjuʼ yuʼune. Pero, te Josué sok te Caleb ma jichuk la spas stukelik, melel ay schʼuunel yoʼtanik sok jaʼ ya skʼanik te lek ya x-ilotik yuʼun te Diose. Jaʼ yuʼun, jich la yalbeyik te lume: «Teme lec yoʼtan cuʼuntic te Jehová, ya me yicʼotic ochel soc ya yaʼbotic jqʼuinalintic te qʼuinale» (Núm. 14:​6-9).

7. ¿Bin ya xjuʼ ya skoltayotik yuʼun jaʼ ya jxiʼtik te Jehová? (Jaʼnix jich ilawil te foto).

⁷ Te bin ya xjuʼ ya skoltayotik yuʼun ya jxiʼtik te Jehová, jaʼ te manchuk ya xchʼay ta koʼtantik te bin ya smulan kʼalal ay bin ya jtatik ta nopel spasel (Sal. 16:8). Kʼalal ya akʼopon jun relato ta Biblia, jojkʼoybey aba: «Te teyuk ayon-ae, ¿binwan la jpas te jichuke?». Jich bitʼil, nopa awaʼiy te yakat ta yaʼiyel te bin la yalik te lajuntul jtsajtaywanejetik. ¿Yabal achʼuun te bin ya yalike o yabal stsalat te xiwele? O ¿jaʼbal ya axiʼxan te Jehová sok ya apas te bin ya smulane? Te israeletik ma la snaʼik yilel te jaʼ yakik ta yalel te bin smelelil te Josué sok te Caleb. ¿Bin kʼot ta stojolik? Jaʼ te ma juʼ ochik ta Kʼinal te albil skʼoplal ya yichʼike (Núm. 14:​10, 22, 23).

8. ¿Bin talelil ya skʼan te ayuk kuʼuntik sok bin yuʼun?

⁸ Te pekʼel oʼtanil. Te Jehová ya yakʼbey snaʼ te bin smelelil te machʼatik pekʼel yoʼtanik (Mat. 11:25). Kʼalal la jnoptik te smelelil kʼope, la kakʼtik ta ilel spekʼelil koʼtantik sok la jkʼantik koltayel (Hech. 8:​30, 31). Manchukme jich-abi, ya skʼan ya jtsajtay jbatik yuʼun manchuk ya xjajch jtoy jbatik. Te toybaile ya xjuʼ ya yakʼ jnoptik te mukʼ skʼoplal-euk te bin ya jtatik ta nopel spasel jich bitʼil te bin ya yal te Biblia soknix te bin ya yal te organización yuʼun te Diose.

9. ¿Bin ya xbajt skoltayotik yuʼun ma xchʼay kuʼuntik te spekʼelil koʼtantik?

⁹ ¿Bin ya xbajt skoltayotik yuʼun ma xchʼay kuʼuntik te spekʼelil koʼtantik? Ma skʼan ya xchʼay ta koʼtantik te jaʼ mukʼxan skʼoplal te Jehová te bitʼil te joʼotike (Sal. 8:​3, 4). Jaʼnix jich ya xjuʼ ya jkʼopontik Dios yuʼun manchuk ya xchʼay kuʼuntik te spekʼelil koʼtantik sok te yakuk kakʼ jbatik ta nojptesel. Te Jehová ya skoltayotik yuʼun jaʼ nail ya kakʼtik te snopojibal yuʼune, te ya snojptesotik ta swenta te sKʼop sok te organización yuʼune. Kʼalal ya jkʼopontik te Biblia, jletik pruebaetik te ya yakʼ ta ilel te jaʼ ya smulan te Jehová te pekʼel oʼtanil sok te ya yilay te toybail soknix te machʼa mukʼ skʼoplal ya yaʼiy sba. Jaʼ yuʼun, teme ya awichʼ akʼbeyel jun aʼtelil te mukʼ skʼoplale, tsajtayame aba yuʼun manchuk ya xchʼay te spekʼelil awoʼtane.

¿BIN YA SKʼAN YA JPASTIK YUʼUN MA XKIJKITAYTIK TE BIN SMELELIL?

10. ¿Machʼatik ya stuuntes te Jehová yuʼun ya skoltay te j-abatetik yuʼune?

¹⁰ Akʼa smukʼulin awoʼtan te organización yuʼun te Diose. Ta antiguo Israel, te Jehová jaʼ la stuuntes te Moisés, ta patil te Josué yuʼun ya yakʼbey tojobtesel te lum yuʼune (Jos. 1:​16, 17). Leknax ya xkʼot te skuxlejalik te israeletik kʼalal jich ya yilik te jaʼ akʼbil yaʼtelik yuʼun te Jehová te winiketik-abi. Ta patil, kʼalal jajch te congregacione, jaʼ koltaywanik te 12 ta tul jpuk-kʼopetik (Hech. 8:​14, 15). Ta patil la yichʼ akʼbeyel yaʼtel te ancianoetik ta Jerusalén. Te bitʼil te hermanoetik la schʼuunik te mantaliletik te la yakʼik te winiketik ini, «la stsakxan yip te schʼuunel yoʼtanik te congregacionetike sok mo yajtalul ta jujun kʼajkʼal» (Hech. 16:​4, 5). Ta jkʼajkʼaleltik, te Jehová jaʼnix jich ya yakʼbotik bendición teme ya jchʼuuntik te bin ya yalbotik te organización yuʼune. Jaʼ yuʼun, ¿binwan yaʼiyel ya yaʼiy sba teme ma jchʼuunbeytik skʼop te machʼatik tsabil yuʼune? Yuʼun ya jnaʼtik stojol-a ya kiltik te bin kʼot ta pasel ta stojol te israeletik kʼalal yakik ta bael-a ta Kʼinal te albil skʼoplal ya yichʼik.

11. ¿Bin kʼot ta stojolik te machʼatik la stoy sbaik ta stojol te machʼa tsabil yuʼun Jehová? (Jaʼnix jich ilawil te dibujo).

¹¹ Kʼalal te israeletik ayik ta bael ta Kʼinal te albil skʼoplal te ya yichʼik akʼbeyele, ay chaʼoxtul winiketik te mukʼ yaʼtelik jajchik ta kʼop ta stojol te Moisés sok jajchik ta kʼop ta swenta te aʼtelil akʼbil yuʼun te Jehová. Jich la yalik: «Chʼuhltesbilic spisil te pueblo, [ma jaʼuknax te Moisés] spisilic chʼuhltesbilic, soc ay ta yohlilic te Jehová» (Núm. 16:​1-3). Melelnix-a te Jehová chʼultesbil ya yil «spisil te pueblo», pero jaʼ tsaot te Moisés yuʼun ya skanantay te lum yuʼune (Núm. 16:28). Kʼalal ma lek jajchik ta kʼop ta stojol te Moisés, jaʼ ma lek jajchik ta kʼop ta stojol te Jehová. Ma jaʼuk bajt ta yoʼtanik te bin ya skʼan te Dios, jaʼ bajt ta yoʼtanik te bin ya skʼan stukelike, te mukʼuk yaʼtelik sok te mukʼuk skʼoplal ya yichʼik ilele. Te Jehová la slajin spisil te machʼatik mukʼ yaʼtelik sok bayal ta tul israeletik te jaʼnix jich la spasike (Núm. 16:​30-35, 41, 49). Schʼuunoj koʼtantik te Jehová jaʼnix jich ya spas ta ora ini, ma lek ya yil te machʼatik ma schʼuunik te bin ya yal te organización yuʼune.

12. ¿Bin yuʼun ya smukʼulin koʼtantik te organización yuʼun te Diose?

¹² Bayal bin yuʼun te ya kakʼ smukʼul koʼtantik ta spisil-ora ta swenta te organización yuʼun te Diose. Te machʼatik ya swentainik te organización, ya spasik ta ora te kʼalal ay bin ya yichʼ jelontesel ta swenta te bin-utʼil ya xkʼot ta koʼtantik te bin ya yal te Biblia o teme ay bin ya yichʼ chajpanel ta swenta te kaʼteltike (Prov. 4:18). Jich ya spasik yuʼun ya skʼan te lek ya x-ilotik yuʼun te Jehovae. Jaʼnix jich, ya spasik tulan te ban kʼalal ya xjuʼ yuʼunik, yuʼun lokʼemuk ta sKʼop Dios te bin ya staik ta nopel spasele. Jaʼ te bin ya skʼan ya jpastik ta jpisiltik.

13. ¿ Bin-a te «lekil kʼopetik» sok bin ya skʼan ya jpastik?

¹³ «Mame xa awijkitay te lekil kʼopetik» (2 Tim. 1:13). ¿Bin-a te «lekil kʼopetik»? Jaʼ te nojpteseletik te ay ta Biblia (Juan 17:17). Te nojpteseletik ini, jaʼme tey yichʼoj yip-a te bin jchʼuunojtike. Te organización yuʼun te Jehová snojptesejotik te jich ya skʼan ya jpastike, melel teme jich ya jpastik lek ya xkʼootik ta lokʼel.

14. ¿Bin-utʼil la yijkitayik te «lekil kʼopetik» chaʼoxtul jchʼuunjeletik?

¹⁴ ¿Binwan ya xkʼot ta pasel teme ya kijkitaytik te «lekil kʼopetik»? Kiltik te bin kʼot ta pasel ta sbabial siglo. Ay chaʼoxtul jchʼuunjeletik la spukik ta alel te kʼotix yorail te skʼajkʼalel te Jehová. Ayniwan jun carta te jich ya yal te la skuyik te jaʼ la stsʼibay te jpuk-kʼop Pablo. Pero te jchʼuunjeletik ta Tesalónica maba la yilik teme yuʼun-nix melel-ae, jaʼ yuʼun la schʼuunik te bin la yichʼ alel sok la spukikxan ta alel. Maba la yakʼ sbaik ta loʼlayel te juluk ta yoʼtanik te bin akʼbot snopik yuʼun te jpuk-kʼop Pablo te kʼalal sjokinojikto-ae (2 Tes. 2:​1-5). Albotik yuʼun te jpuk-kʼop Pablo te manchuk ya schʼuunik spisil te bin ya yaʼiyike. Yuʼun ma jichukxan ya xkʼot ta pasel ta stojolik, te Pablo la stsʼibay te schebal carta te jich ya yal: «Joʼon Pabloon, te la jtsʼibaybeyex ta jkʼab te spatjibal oʼtanil ini, te jaʼ señail spisil te cartaetik kuʼune. Jaʼ jich te bin-utʼil ya stsʼibajone» (2 Tes. 3:17).

15. ¿Bin-utʼil ya skʼan ya jkanantay jbatik ta swenta te lotiletike? Ala jun ejemplo. (Jaʼnix jich ilawil te fotoetike).

¹⁵ ¿Bin ya yakʼ jnoptik te carta te la stsʼibay te jpuk-kʼop Pablo ta stojol te tesalonicenseetik? Teme ay bin ya kaʼiytik te ma pajaluk sok te bin-utʼil jnopojtik ta Biblia ya skʼan ya stsajtay jbatik. Ta antigua Unión Soviética, te jkontrataktik la spukik jun carta —te la yalik te talemlaj ta stojol te Betel— te banti la yal te akʼa stukeltay sbaik te hermanoetik ta stojol te organización. Manchukme melel yilel te bin ya yal te cartae, te hermanoetik te jun yoʼtan yakʼoj sbaik ta stojol te Jehová maba la schʼuunik. Melel la staik ta ilel te bin ya yal te carta maba pajaluk sok te bintik jnopojtike. Ta jkʼajkʼaleltik, te jkontrataktik jaʼnix jich ay ya stuuntesik te tecnología yuʼun ya schʼaytesbotik koʼtantik sok yuʼun ya skʼan ya xatotik. Ya skʼan ya jkanantay jbatik yuʼun «manchuk orauknax ya xjelon te lek snopojibal» kuʼuntik, jaʼ yuʼun ya skʼan ya kiltik ta lek te bin ya kaʼiytik sok te bin ya jkʼopontik te jaʼuk pajal sok te bin ya yal te organizacione (2 Tes. 2:2; 1 Juan 4:1).

16. Jich bitʼil ya yal Romanos 16:​17, 18, ¿bin ya skʼan ya jpastik yuʼun maba ya kijkitaytik te smelelil kʼope?

¹⁶ Jaʼme xa ajokin te machʼatik jun yoʼtanik ta stojol te Jehová. Te Jehová ya skʼan te pajaluknax ya kichʼtik ta mukʼ sok te kermanotaktike, pero jaʼnax jich ya xjuʼ ya jpastik teme ma xkijkitaytik te smelelil kʼope. Te machʼatik ya yijkitayik te smelelil kʼop ya xatik te congregación. Jaʼ yuʼun, te Dios ya yalbotik te manchuk ya jokintik yuʼun jich ma xkijkitaytik-euk-a te smelelil kʼope (kʼopona Romanos 16:​17, 18).

17. ¿Bin ya xkʼot ta pasel teme ya anaʼ bin-a te smelelil sok te maba ya awijkitaye?

¹⁷ Teme ya jnaʼtik yilel bin-a te smelelil kʼop sok teme maba ya kijkitaytik, jun koʼtantik ta swenta te schʼuunel koʼtantik (Efes. 4:​15, 16). Maba ya kakʼ jbatik ta loʼlayel ta swenta te lotiletik sok te lotil nojptesel ya yakʼ te Satanás sok jaʼ ya skoltayotik te Jehová ta yorail te tulan wokolil. Pasa tulan yuʼun maba ya awijkitay te smelelil kʼop, jich «te Dios te ya yakʼ lamalkʼinal» maba ya yijkitayat (Filip. 4:​8, 9).