Bayal ya yakʼ stseʼelil koʼtantik kʼalal bayalxan bin ya kakʼtik

1, 2. ¿Bin yuʼun jaʼ lek te bitʼil la spasotik te Jehová te jaʼ bayalxan ya yakʼ stseʼelil koʼtantik te kʼalal ay bin ya kakʼtike?

TE Jehová spasojotik yuʼun ya yakʼ stseʼelil koʼtantik kʼalal ay bin ya kakʼbeytik te yantike, ma jaʼuk te kʼalal ay bin ya kichʼtik akʼbeyele (Hech. 20:35). Melelnix-a te ya yakʼ stseʼelil koʼtantik kʼalal ay machʼa ya yakʼbotik majtanil, pero jaʼ ya yakʼxan stseʼelil koʼtantik te kʼalal ay bin ya kakʼbeytik te yantike. Te bitʼil jich spasojotik te Jehovae, ay bin lek ya jtatik-a. ¿Bin yuʼun te jich ya kaltike?

² Te bitʼil jich spasojotik te Jehovae yakʼoj ta jkʼabtik te bin-utʼil ya xjuʼ ya jtatikxan stseʼelil koʼtantik. Teme ya jletik te bin ya xjuʼ ya jpastik ta stojol te yantike, ya jtatikxan stseʼelil koʼtantik. ¿Melel te kʼax tʼujbil te jich pasbilotike? (Sal. 139:14).

3. ¿Bin yuʼun ya yal te Biblia te jaʼ Dios te tseʼel yoʼtan te Jehovae?

³ Te Biblia ya yal te jaʼ tseʼel yoʼtanik te machʼatik ay bin ya yakʼ, jaʼ yuʼun ma yanuk ya kaʼiytik-a te Jehová jaʼ te «Dios te tseʼel yoʼtane» (1 Tim. 1:11). Jaʼ te Machʼa ay bin nail la yakʼ sok maʼyuk machʼa yan jich la spas. Te jpuk-kʼop Pablo, jich la yal: «Melel jaʼ ta swenta te kuxulotik, ya xbeenotik sok te ayotik ta kʼinale» (Hech. 17:28). Jaʼnix jich, «spisil te bintik lek akʼbilotik sok te lekil majtaniletik» talem ta stojol te Jehová (Sant. 1:17).

4. ¿Bin ya skoltayotik yuʼun ya jtatikxan stseʼelil koʼtantik?

⁴ ¿Bin ya xjuʼ ya jpastik teme ya jkʼan ya jtatikxan stseʼelil koʼtantik kʼalal ay bin ya kakʼbeytik te yantik? Ta artículo ini ya xbajt kiltik bin-utʼil ya xjuʼ ya jkʼayinbeytik te yutsil yoʼtan te Jehová (Efes. 5:1). Jaʼnix jich ya kiltik bin ya skʼan ya jpastik teme jich ya kaʼiytik te maʼyuk skʼoplal ta yoʼtan te yantik te bin ya jpastik ta stojolik. Spisil ini ya skoltayotik yuʼun maba ya xchʼay te stseʼelil koʼtantik kʼalal ay bin ya kakʼbeytik te yantike.

JKʼAYINBEYTIK TE YUTSIL YOʼTAN TE JEHOVÁ

5. ¿Bintik yakʼojbotik te Jehová?

⁵ Kiltik bin-utʼil yakʼoj ta ilel te ay yutsil yoʼtan te Jehová, ya kilbeytik skʼoplal chaʼoxchajp. Jich bitʼil te ya yakʼbotik te bintik ya xtuun kuʼuntik maniwan spisiluk-ora ay bayal jtakʼintik, pero te Jehová ya yakʼbotik spisil te bintik ya xtuun kuʼuntik, jich bitʼil te jweʼeltik, jkʼuʼ jpakʼtik sok te banti ya xkuxinotik (Sal. 4:8; Mat. 6:​31-33; 1 Tim. 6:​6-8). Maba jichuk ya spas yuʼun sujbil ya yaʼiy sba. Pero, ¿bin yuʼun-nix-a te jich ya spase?

6. ¿Bin ya yakʼ jnoptik te Mateo 6:​25, 26?

⁶ Te Jehová ya yakʼbotik te bintik ya xtuun kuʼuntik, melel kʼuxotik ta yoʼtan. Kilbeytik skʼoplal te bin la yal te Jesús ta Mateo 6:​25, 26 (kʼopona). Ta versiculoetik ini te Jesús la yakʼ ta ejemplo te jaʼmal mutetik, jich la yal: «Maba ya stsʼunbajik, maba ya yaʼiyik kʼajoj sok maba ya stsobik ta yawil te yawal stsʼunubike». Jich la yalxan: «Ya xmakʼlinotik yuʼun te aTatik te ay ta chʼulchane». Jaʼ yuʼun, jich la sjojkʼoy: «¿Mabal jaʼuk bayalxan akʼoplalik-a te bin-utʼil te jaʼmal mutetike?». Te bin la skʼan la yakʼ ta nopele, jaʼ te Jehová jaʼ mukʼxan skʼoplal ya yil te j-abatetik yuʼun te bitʼil te chambalametike. Teme ya skanantay te chambalametik te Jehovae, seguro ayotik te jaʼnix jich ya skanantayotik-euk. Te bitʼil jaʼ jTatik te Jehová sok te kʼuxotik ta yoʼtane ya yakʼbotik te bintik ya xtuun kuʼuntike (Sal. 145:16; Mat. 6:32).

7. ¿Bin-utʼil ya xjuʼ ya jkʼayinbeytik yutsil yoʼtan te Jehová? (Jaʼnix jich ilawil te fotoetik).

⁷ Jich bitʼil te kʼuxotik ta yoʼtan te Jehová, jaʼnix jich kʼux ta koʼtantik te ants winiketik sok ya kakʼbeytik te bintik ya xtuun yuʼunik. ¿Yabal anaʼbey sba jtul hermano o hermana te maʼyuk sweʼel sok skʼuʼ spakʼ? Te Jehová ya xjuʼ ya stuuntesat yuʼun ya yakʼbey te bin ya xtuun yuʼune. Te J-abatotik yuʼun te Jehová naʼbil jbatik te ya kakʼtik ta ilel yutsil koʼtantik kʼalal ya xkʼax wokolil. Jnop kaʼiytik te kʼalal kʼax te chamel COVID-19, bayal hermanoetik la yakʼik weʼelil, kʼuʼul pakʼal sok yantikxan te bintik ya stuuntes te hermanoetik, jaʼnix jich la yakʼik ta ilel yutsil yoʼtanik kʼalal la yakʼik majtan takʼin ta obra mundial yuʼun ya xjuʼ ya yichʼik koltayel te hermanoetik ta swolol Balumilal te yakik ta kʼaxel ta wokol. Spisil te hermanoetik ini la skʼotesik ta pasel te bin ya yal te Hebreos 13:16: «Mame xchʼay ta awoʼtanik spasel te bin leke sok ta yakʼbeyel yantik te bintik ay awuʼunike, melel jich kʼoem te bin-utʼil milbil majtaniletik te kʼax lek ya yil te Diose».

8. ¿Bin ya xjuʼ kuʼuntik spasel te bitʼil ya yakʼbotik yip koʼtantik te Jehová? (Filipenses 2:13).

⁸ Te Jehová ya yakʼ yip koʼtantik. Ma pʼisbiluknax te yuʼele sok ya smulan skoltayel te j-abatetik yuʼune (kʼopona Filipenses 2:13). ¿Aybal akʼanojbey koltayel te Jehová yuʼun ya xkujch awuʼun te tsajel, te tulan pruebaetik o yuʼun ya apas te aʼteliletik ta jujun kʼajkʼal? Kʼalal te Jehová la yakʼbat yip awoʼtan, jichniwan la awaʼiy aba bitʼil te jpuk-kʼop Pablo, te jich la yal: «Spisil ya xjuʼ kuʼun spasel ta swenta te machʼa ya yakʼbon yip koʼtane» (Filip. 4:13).

9. ¿Bin-utʼil ya xjuʼ ya jkʼayinbeytik yutsil yoʼtan te Jehová? (Jaʼnix jich ilawil te fotoetik).

⁹ Te Jehová ay yuʼel yuʼun ya skoltay te yantike pero te joʼotike maʼyuk kuʼeltik, manchukme jich-abi ya xjuʼ ya jkʼayinbeytik te yutsil yoʼtan kʼalal ya jkoltaytik te yantik. Jich bitʼil teme ay jtul hermano te ayix yaʼbilal o ay ta chamel, ya xjuʼ ya jkoltaytik ta smanel te sbiluk o ya jkoltaytik ta aʼtel ta sna. Ya xjuʼ ya jap jbatik ta koltaywanej ta skusel sok ta slekubtesel te sNail Tsoblej, teme jich ya jpastike bayal ya xjuʼ ya jkoltaytik te kermanotaktik.

10. ¿Bin-utʼil ya xjuʼ ya x-akʼbot yip yoʼtan te yantik ta swenta te bin ya kaltike?

¹⁰ Mame xchʼay ta koʼtantik te bayal ya xkoltaywan te bin ya kaltik sok ya xjuʼ ya yakʼbey yip yoʼtan te yantike. ¿Aybal machʼa ya anaʼbey sba te ya skʼan smukʼul kʼinal yaʼiy? Teme aye, ¿yabal xjuʼ te ya awakʼbey koltayele? Ya xjuʼ ya awulaʼtay ta sna, ya akʼopon ta teléfono sok te ya atikunbey jun tarjeta o jun mensaje. Ma puersauk te bayal te bin ya awale, te bin mukʼ skʼoplale jaʼ te lokʼemuk tal ta awoʼtan te bin ya awale. Te lekil kʼopetik sok te lokʼem ta oʼtanil te bin ya yichʼ alele, ya xjuʼ ya xkoltayot te ants winik yuʼun jun yoʼtan ya yakʼ sba ta jujun kʼajkʼal sok te ya sta smukʼul kʼinal yaʼiy (Prov. 12:25; Efes. 4:29).

11. ¿Bin ya spas te Jehová sok te spʼijile?

¹¹ Te Jehová ya yakʼ spʼijil koʼtantik. Te jnopojel Santiago, jich la stsʼibay: «Teme ay jtul ta awolilik te maʼyuk spʼijil yoʼtan, akʼa skʼanbey Dios ta spisil-ora», sok jich la yalxan: «Melel ma pʼisbiluknax ya yakʼ stukel sok maba ya stabotik ta alel» (Sant. 1:5). Jich bitʼil ya yal te versículo ini, te Jehová ma stukeluknax ya stuuntes te spʼijile, melel ya yakʼbotik jpʼijiltik-euk. Ya skʼan ya yal-abi te «maba ya stabotik ta alel» te kʼalal ya jkʼanbeytik koltayele, te bin ya spase jaʼ te ya stij koʼtantik ta skʼanel koltayel (Prov. 2:​1-6).

12. ¿Bin-utʼil ya xjuʼ ya kakʼbeytik snop yantik te bin jnopojtike?

¹² Jaxan te joʼotike, ¿yabal xjuʼ ya jkʼayinbeytik stalel te Jehová sok te ya jpʼijubtestik te yantike? (Sal. 32:8). ¡Yak, ya xjuʼ! Bayal bintik-utʼil ya xjuʼ ya jpastik. Jich bitʼil te ya jnojptestik te yachʼil publicadoretik ta scholel skʼop Dios, jaʼnix jich te ancianoetik ya skoltayik te siervo ministerialetik sok te yantik hermanoetik te yichʼojikix jaʼ yuʼun ya spasik ta lek te yaʼtelik ta congregación. Bayal hermanoetik sok hermanaetik te pʼijubenikix ta lek ta aʼtel ta construcción sok ta mantenimiento ya spʼijubtesik te yantik yuʼun ya spasik aʼteliletik ta sNail Tsoblej sok ta yantikxan.

13. ¿Bin-utʼil ya xjuʼ ya jkʼayinbeytik stalel te Jehová kʼalal ya jpʼijubtestik te yantik?

¹³ Kʼalal ya jpʼijubtestik te yantik ya skʼan ya jkʼayinbeytik stalel te Jehová. Jich bitʼil la kiltikix sok yutsil yoʼtan ya yakʼ jpʼijiltik, jaʼnix jich te joʼotik ya kakʼbeytik snop te yantik te bin jnaʼojtikix. Maba jtukeltikuk ya jtuuntestik te bin jnopojtik ta skajnax te ya jxiʼtik te ya spojbotik kaʼteltik te machʼa yakotik ta snojptesele o te jich ya jnoptik: «Maʼyuk machʼa la snojpteson, akʼa snop ta stukel». Ta lum yuʼun te Jehová, ma lek te jich ya jnoptike. Ma jaʼuknax sok yutsil koʼtantik ya jnojptestik te yantik, jaʼnix jich ya jpastik tulan yuʼun ya snopik ta lek (1 Tes. 2:8). Teme jich ya jpastike seguro ayotik te «jichme pʼijubenik ta lek ta snojptesel-a te yantik» (2 Tim. 2:​1, 2). Teme jpisiltik ya jpʼijubtestik te yantik ya jtatikxan jpʼijiltik sok stseʼelil koʼtantik.

TEME YA JKUYTIK TE MAʼYUK SKʼOPLAL YA YILIK TE BIN YA JPASTIKE

14. ¿Bin ya spas te machʼatik ay bin ya jpastik ta stojole?

¹⁴ Bayal buelta kʼalal ay bin ya jpastik ta stojol te yantike, kʼaxtoxan-a teme jaʼ te hermanoetik, ya yakʼ kiltik te mukʼ skʼoplal ya yilik kʼalal ya yalik wokol. Te kʼalal ya yalik wokol yaniwan stsʼibayik jun tarjeta o chikan te bin-utʼil ya yakʼik ta ilel te ya yalik wokole (Col. 3:15). Te kʼalal jich ya spasike ya yakʼbotik bayal stseʼelil koʼtantik.

15. ¿Bin ya skʼan ya xjul ta koʼtantik kʼalal ma xkichʼtik albeyel wokol?

¹⁵ Jaʼnix jich ayuk ta koʼtantik te ma spisiluk ya yalik wokol te machʼatik ay bin ya jpastik ta stojol. Yaniwan kakʼ jtiempotik, kiptik sok jtakʼintik yuʼun ay machʼa ya jkoltaytik, pero ta patil ma xyakʼ ta ilel te ay skʼoplal ta yoʼtan te bin la jpastike, teme jiche ¿bin ya skoltayotik yuʼun ma xchʼay te stseʼelil koʼtantik sok yuʼun ma x-ilinotik? Juluk ta koʼtantik te bin ya yal te Hechos 20:35. Te tseʼel oʼtanil ya kaʼiytike ma jaʼuk ta swenta te bin yaʼiyel ya yaʼiy sba te yantike. Ay ta jwentatik skoltayel te yantik sok stseʼelil koʼtantik manchukme maʼyuk skʼoplal ya yilik te bin ya jpastike. Kiltik chaʼoxchajp te bin ya xjuʼ ya skoltayotik.

16. ¿Bin ya skʼan ayuk ta koʼtantik?

¹⁶ Te kʼalal ay bin ya awakʼbey te yantik jaʼ ya akʼayinbey stalel te Jehová. Te Jehová ya yakʼbey te bintik lek te ants winiketik chikan teme ay skʼoplal ya yilik o maʼuk (Mat. 5:​43-48). Te Jehová jich ya yalbey te j-abatetik yuʼun: «Mame xa amaliyik te ya sutbeyex te bin ya awakʼik ta majanele. Teme jich ya apasike, mukʼme te amajtan ya ataike» (Luc. 6:35). Jaʼ yuʼun, mame xa amel awoʼtan teme maba ya yalik wokol ta swenta te bin ya apase. Mame xchʼay ta awoʼtan te ya smajtantesat te Jehová ta swenta te bin lek ya apas ta stojol te yantik, melel ya yakʼ «sok stseʼelil yoʼtan» (2 Cor. 9:7; Prov. 19:17).

17. ¿Bin ya xjuʼ ya skoltayotik ta skʼayinbeyel stalel te Jehová? (Lucas 14:​12-14).

¹⁷ Yanxan te bin ya skoltayat yuʼun ya akʼayinbey stalel te Jehová, jaʼ te ya apas ta akuxlejal te bin ya yal te Lucas 14:​12-14 (kʼopona). Melelnix-a te maba chopol te ya x-otseswanotik ta jnaʼtik sok te ya kakʼbeytik yil yutsil koʼtantik te machʼatik jich ya spas ta jtojoltik-euke. Pero, ¿teme ya jtatik ta ilel te jich ya jpastik ta skajnax te ya jmaliytik te ay bin ya kichʼtik akʼbeyele-euke? Teme jiche, akʼa jpastik tulan ta spasel te bin la yal te Jesús: Akʼa kakʼbeytik yil yutsil koʼtantik te machʼa ma xjuʼ te jich ya spas ta jtojoltike. Teme jich ya jpastike ya yakʼ stseʼelil koʼtantik, melel yakotik ta skʼayinbeyel stalel te Jehová. Jaʼnix jich, teme maba ya jmaliytik yuʼun ay bin ya xlokʼ kuʼuntik-a te kʼalal ay bin ya kakʼtik, spisil-ora ay bin ya kakʼtik sok stseʼelil koʼtantik manchukme ma xkichʼtik albeyel wokol.

18. ¿Bin ya skoltayotik yuʼun maʼyuk bin chopol ya jnoptik ta stojol te yantike?

¹⁸ Mame xa anop te bin ma lek ta stojol te yantik (1 Cor. 13:7). Teme ay bin lek ya jpastik ta stojol te yane sok maba ya yal wokol, yaniwan jojkʼoybey jbatik: «¿Yuʼunbal maba mukʼuk skʼoplal la yil te bin la jpase o yuʼun chʼay ta yoʼtan yalbelon wokol?». O ayniwan yan bin yuʼun te maba la yal wokole. Ayniwan machʼa snopoj te ya yal wokol, pero wokol ya yaʼiy yalel. Soknix ayniwan machʼa ya xkʼexaw te kʼalal ya yichʼik koltayele, kʼaxtoxan-a te ay bin ya xjuʼ ya spas ta stojol-a te yantik ta namey, pero te ma xjuʼix yuʼun spasel ta ora ini. Jaʼ chikan te bin ya xkʼot ta pasele, te skʼuxul koʼtantik ya skoltayotik yuʼun maʼyuk bin chopol ya jnoptik ta stojol te kermanotaktik sok te ayuk bin ya kakʼtikxan sok stseʼelil koʼtantik (Efes. 4:2).

19, 20. ¿Bin yuʼun lek te yakuk jnatik smaliyel? (Jaʼnix jich ilawil te fotoetik).

¹⁹ Ayuk slamalil awoʼtan. Te ajwalil Salomón jich la yal ta swenta te utsil-oʼtanil: «Acʼa bahel ta haʼ te pan awuʼun, bayel cʼahcʼal ta patil ya me ata yan buelta» (Ecl. 11:1). Te versículo ini ya yakʼ jnoptik te ayniwan machʼatik ya yalbotik wokol «bayel cʼahcʼal ta patil». Ya kiltik jun ejemplo.

²⁰ Bayalix tal jaʼbil, te yinam jtul superintendente yuʼun circuito la stsʼibaybey jun carta jtul hermana te mato jaluk yichʼoj jaʼ, te banti la yalbey te junuk yoʼtan akʼa yakʼ sba. Waxakeb jaʼbil ta patil te hermana la yakʼbey sujtib te carta, te jich ya yal: «Ya kalbat te bayalix tal jaʼbil akoltayojon, manchukme maba anaʼoj». Jich ya yalxan: «Kʼax tʼujbilnax te bin la atsʼibaybone, pero te bin la stijbonxan koʼtane jaʼ te texto yuʼun te Biblia, sok maba ya xchʼay ta koʼtan».a Te kʼalal la yal te bintik wokoliletik kʼaxem ta skuxlejal, jich la yalxan: «Ay baeltik te jich la kaʼiy jba te maʼyuk bin ya jkʼanixe, te smelelil kʼop sok te bintik ay ta jwenta spasele. Pero te texto te la atsʼibaybone la yakʼon ta pensar sok la skoltayon yuʼun maba ya xchebaj koʼtan. Jaʼ te bin bayal la skoltayon te kʼaxix tal waxakeb jaʼbile». ¡Akʼbot bayal stseʼelil yoʼtan te yinam te superintendente yuʼun circuito te kʼalal la skʼopon te cartae! Teme ay bin lek jpasojtik ta stojol te yantik, yaniwan kichʼtik albeyel wokol-euk «bayel cʼahcʼal ta patil».

21. ¿Bin yuʼun mukʼ skʼoplal te yakuk jkʼayinbeytik te yutsil yoʼtan te Jehová?

²¹ Jich bitʼil la jnoptikix, kʼax leknax te bitʼil spasojotik te Jehovae, melel jaʼ ya yakʼxan bayal stseʼelil koʼtantik kʼalal ay bin ya kakʼtik, ma jaʼuk te kʼalal ay bin ya kichʼtik akʼbeyele. Leknax ya kaʼiy jbatik te kʼalal ya jkoltaytik te kermanotaktik sok te kʼalal ya kichʼtik albeyel wokol. Pero, chikan teme ya yalik wokol o maʼuk ya xjuʼ te tseʼel koʼtantik, melel lek te bin la jpastik ta stojolike. Jaʼ chikan te bin ya kakʼtike, ayuk ta koʼtantik te bin ya yal te 2 Crónicas 25:9: «Te Jehová cʼax to xan hich ya xhuʼ ya yaʼbat a». ¡Maʼyuk machʼa bayal bin ya xjuʼ ya yakʼ te bitʼil te Jehová! Jaʼ bayal ya yakʼxan stseʼelil koʼtantik te bitʼil ya smajtantesotik te Jehová. Jaʼ yuʼun, mukʼ skʼoplal te ya jpastik tulan ta skʼayinbeyel te yutsil yoʼtan te jTatik te ay ta chʼulchan.